Kan Zirtîrna Hmanraw Bâwm
1. Engtin nge Kristian chanchin ṭha hriltute chu mi themthiam ang an nih?
1 Mi themthiamte chuan hmanraw chi hrang hrang an hmang ṭhîn a. Hmanraw ṭhenkhat chu thil engemaw tân bîka hman a ṭûl châng a awm laiin, hmanraw pângngaite chu engtik lai pawha hman a ni fo ṭhîn. Mi themthiam takte chuan hêng hmanraw pângngaite hi a bâwmah an dah reng a, chûng chu an hmang thiam ber a ni. Bible chuan Kristian tinte chu rawngbâwlnaa inhmang tûr leh ‘hnathawktu zak lo’ ni tûrin a fuih a. (2 Tim. 2:15) Kan hmanraw bâwma hmanraw pawimawh ber chu eng nge ni? Chu chu Pathian Thu—‘zirtîr siam’ nâna kan hman ber chu a ni. (Mt. 28:19, 20) Chuvângin, ‘thutak thu fel taka’ hmang thiam nih kan tum tûr a ni a. Mahse, kan zirtîrna bâwmah hian mi dangte thutak zirtîr nâna Kristian zawng zawngte’n thiam taka hman dân kan zir tûr hmanraw dang kan hman fote pawh a awm a ni.—Thuf. 22:29.
2. Zirtîrna atâna kan hman ber hmanruate chu eng nge ni?
2 Zirtîrna Atâna Kan Hman Ber Hmanruate: Bible bâkah, eng hmanraw dangte nge kan hman ang? Bible thutak zirtîrna atâna kan hmanraw hman ber chu Bible Zirtîrna Dik Tak Chu Eng Nge Ni? tih lehkhabu a ni a. He lehkhabu kan zirpui zawhah chuan, “Keep Yourselves in God’s Love” tih bu chu a nî tin nuna Bible thu bulte nunpui tûra zirtîr nân kan hmang leh a ni. Chuvângin, hêng thu leh hla chhuah pahnihte hi kan hmang thiam hle tûr a ni. Brochure ṭhenkhat chu kan zirtîrna hmanraw bâwmah a tel tûr a ni bawk a. Pathian Min Pêk Chanchin Ṭha! chu Bible zirpui ṭan nâna kan hman berte zînga mi a ni. Kan biala mite chu lehkha chhiar thiam lutuk lote, a nih loh leh an ṭawnga thu leh hla chhuah kan neih vak lohte a nih chuan Pathian Thu Ngaithla Rawh tih leh Pathian Thu Ngaithlain Chatuanin Nung Rawh tih brochure-te chu kan hmang thei bawk. Bible zirpuite inawpna pâwl kawhhmuh nâna kan hman ber chu, Tute Nge Tûn Laia Jehova Duhzâwng Titute Chu? tih hi a ni a. Engvângin Nge Bible I Zir Ang?, Kingdom Hall-ah Eng Nge Thleng Ṭhîn?, tih leh Pathianin Hming A Nei Em?, tih video-te hi zirtîr siamnaah a ṭangkai a, hêng hi thiam taka hman dân kan zir tûr a ni.
3. Kan Lalram Rawngbâwlna lo chhuak leh tûrte chuan eng ti tûrin nge min ṭanpui ang?
3 Kan Lalram Rawngbâwlna lo chhuak leh tûrte chuan kan zirtîrna hmanraw bâwma thu leh hla chhuahte hmang thiam tûrin min ṭanpui ang a. Hêng hmanruate thiam taka hman kan tum chuan, Bible thâwk khum fuihna thu: “Nangmah leh i zirtîrnaah chuan fîmkhur la; chûng thil tiin awm reng rawh; chutiang tiin nangmah leh i thu ngaithlatute chu i chhandam dâwn zuk nia,” tih hi kan ngaihsak a lo ni ang.—1 Tim. 4:16.