‘Hêng Thu Hi In Thinlungah A Châm Reng Tûr A Ni’

Nu leh pate chu berâm vengtu ang an ni a. An fate chu ṭha takin an enkawl tûr a ni; awlsam taka kawng bovin, Setana beihna an tâwk thei reng si a. (Thuf. 27:23) Engtin nge nu leh pate chuan an fate chu an vênhim theih ang? An rilru leh thinlunga awmte hre tûrin nî tin inbiakpawhna neiin, an fate nên hun an hmang tlâng ṭhîn tûr a ni a. (Thuf. 20:5) Chu bâkah, nu leh pate chuan thil kâng thei lo hmangin an fate rinna chu an thuam nghehsak bawk tûr a ni. (1 Kor. 3:10-15) ‘Hêng thu Hi In Thinlungah A Châm Reng Tûr A Ni,’ tih video chuan chhûngkuaa Pathian biakna neih ziah a pawimawhzia a târ lang uar hle. He video hi chhûngkuaa in en hnuah, a hnuaia zawhnate hi sawiho ang che u.

(1) Engin nge Pu Romana te chhûngkua chu thlarau lam thil ngaihthahtîr? (2) Engvângin nge Unau Romana chuan chhûngkuaa Pathian biakna neih a tumna chu a hlawhchham? (3) Eng Bible chângin nge kan fate enkawlnaa hlawhtlin theih dân kawng ṭha ber min kawhhmuh? (Deut. 6:6, 7) (4) Chhûngkuaa inbiakpawhna ṭha zâwk nei tûrin eng nge kan tih theih? (5) Fate chuan nu leh pate lakah eng ang inpêkna nge an mamawh? (6) Barrow-te nupa chuan engtin nge Pu Romana te chhûngkua chungah a ṭha zâwnga nghawng an neih? (Thuf. 27:17) (7) Chhûngkuaa Pathian biakna hlawhtling nei tûrin chhûngkaw lû chuan eng nge a tih hmasak ngai? (8) Unau Romana chuan a chhûngkaw dinhmun a ṭhat zâwk theih nân eng nge a tih ṭan? (9) Engvângin nge chhûngkuaa Pathian biakna a hun taka neih ziah chu a pawimawh? (Eph. 6:4) (10) Chhûngkuaa Pathian biaknaa telh theih thil ṭhenkhat chu engte nge ni? (11) Engtin nge Unau Romana chuan Marcus-a chu zaidam tak, khauh tak sia thil dik tih a pawimawhzia hre thiam tûra a ṭanpui? (Jer. 17:9) (12) Engtin nge Romana te nupa chuan an fanu Rebecca-i chu Justin-a nêna an inlaichînna chungchânga thu tlûkna dik siam tûra an ṭanpui? (Mk. 12:30; 2 Tim. 2:22) (13) Engtin nge Unau Romana te nupa chuan an nuna insiamrem ngaite an insiamrem hunah rinna an neihzia an târ lan? (Mt. 6:33) (14) Engtin nge he video hian chhûngkaw lûte tân an chhûngkaw thlarau lam mamawh phuhhrûksak a pawimawhzia a sawi uar? (1 Tim. 5:8) (15) Chhûngkaw lû i nih angin eng nge tih i tum tlat?

CHHUNGKAW LUTE HNENA THU CHAH: He tûn lai lemchan hi kum 2011 regional inkhâwmpuia chan a ni a. Kha tih lai khân, chhûngkuaa Pathian biakna in neihah hmasâwn a ngai tih i hmu chhuak em? Tûnah eng nge i an? Insiamrem i la ngai a nih chuan, i chhûngkuain chatuana an hlâwkpui theih ṭawngṭaina nên inthlâkthlengna siam ang che.—Eph. 5:15-17.