Mi Dangte Chunga Hmangaihna Lantîr Theih Dân

Mihring hmasa ber Adama thlahte kan nih angin, kan za hian chhûngkaw khat kan ni a. Chhûngkuate chu inhmangaih tawn tûr leh inzah tawn tûra beisei ni mah se, tûn laiah chutiang hmangaihna chu hmuh a harsa tawh hle. Chu chu min hmangaihtu kan Pathian duh dân a ni lo.

BIBLE-IN HMANGAIHNA CHUNGCHANG A SAWITE

“Nangmah i inhmangaih angin i ṭhenawm i hmangaih tûr a ni.”—LEVITICUS 19:18.

“In hmêlmate chu hmangaih ula.”—MATTHAIA 5:44.

ṬHENAWM HMANGAIH TIH AWMZIA

Pathianin 1 Korinth 13:4-7-naa hmangaihna awmzia a hrilhfiah dân hi chhinchhiah ang che.

“Hmangaihnain a dawhthei a, ngil a nei bawk ṭhîn.”

Ngaihtuah Tûr: Mi dangin i chungah dawhtheihna leh ngilneihna lantîr a, thil i tihsual hunah pawh thinrim taka an chhân lêt loh che hian engtin nge i awm?

“Hmangaihnain a îtsîk lo.”

Ngaihtuah Tûr: Mi dangin a lutuka ringhlel chein, an îtsîk che tih i hriat hian engtin nge i awm?

Hmangaihnain “mahni hma a sial lo.”

Ngaihtuah Tûr: Mi dangin an ngaih dân ringawt kalpui lo va, i ngaih dân an zahsak che hian engtin nge i awm?

Hmangaihnain “sual lamah a ngaihtuah lo.”

Ngaihtuah Tûr: Pathian chuan thil sual tia inlamlêtte chu ngaihdam a duh a. ‘Ani chuan a hau fo lo vang a; a thinur hek lo vang.’ (Sâm 103:9) Mi tuemaw kan tihlungnih loh va, min ngaihdam hian kan lâwm hle a. Chuvângin, miin min tihlungnih loh hunah pawh kan ngaidam ve tûr a ni.—Sâm 86:5.

Hmangaihnain “fel lohnaah a lâwm lo.”

Ngaihtuah Tûr: Kan chunga thil ṭha lote a thlen hian, kan hrehawm tawrhna avânga mite an lâwm chu kan duh lo va. Chuvângin, mite’n dik lo taka min cheibâwl a nih pawhin, hrehawm an tawrh hian kan lâwm lo.

Pathian malsâwmnate dawng tûr chuan, engtiang mi pawh ni se, an chungah hmangaihna kan lantîr tûr a ni a. Chutianga kan tih theih dân kawng ṭangkai tak pakhat chu ṭanpui ngaite ṭanpui hi a ni.