Hmangaihnaa Khat Siamtu Chuan Min Ngaihsak

1. SIAMTU CHUAN NI A CHHUAHTIR

Ni êng awm lova leia nun awm dân tûr chu i mitthla thei em? Nî avângin thingkûng chuan a hnah te, a pâr te, a rah te, leh a chi te a chhuahtîr thei a. Chu bâkah, thingkûng chuan a zung aṭangin lei hnuaia tuite chu a hnah thlengin a hîp chho va, chûngte chu tuihuahte a chang leh ṭhîn a ni.

2. SIAMTU CHUAN RUAH A SURTIR

Ruah hi Pathian thilpêk hlu tak a ni a, ruah avângin leiin kan tân ei tûrte a tichhuak thei a. Pathian chuan vân ruahte leh kum ṭhat kumte, ei tûrte min pein, kan thinlung chu lâwmna leh lungawinain a tikhat a ni.

3. SIAMTU CHUAN EI TUR LEH SILH TURTE MIN PE

Chhûngkaw pa tam tak chuan an chhûngkaw tâna ei tûr leh silh tûr âwm tâwk neih chungchângah lungkhamna an nei a. Bible sawi hi lo chhinchhiah ang che: “Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela, in Pa vâna mi chuan a châwm si a. Nangni chu anni ai chuan nasa takin in hlu zâwk lo vem ni?” tih hi.—Matthaia 6:25, 26.

“Ram tûktinpâr ṭhanzia hi ṭha takin ngaihtuah rawh u . . . nimahsela, ka hrilh a che u, [Lal] Solomona meuh pawh a ropuina zawng zawnga a inthuam khân hêng tûktinpâr pakhat tluk pawh hian cheiin a awm lo. Chutichuan, ram hnim, vawiin anga nung, a tûka thuka tuah leh mai tûr mah Pathianin chuti kauva a chei chuan, . . . silhfên a pe zâwk êm êm dâwn lo che u em ni?”—Matthaia 6:28-30.

Pathianin ei tûr leh silh tûr min pe thei a nih chuan, nuna kan mamawh dangte nei tûrin min ṭanpui thei tih a chiang a. Pathian duh zâwng tih kan tum chuan, ei tûr kan neih theih nâna kan thawhrimna chu mal a sâwm theiin, kan mamawhte kan lei theih nâna hna hmu tûrin min ṭanpui thei a ni.—Matthaia 6:32, 33.

Nî te, ruah te, sava te, leh pangpârte chungchâng kan ngaihtuah hian Pathian hmangaihna tûr chhan ṭha tak kan nei tih a chiang hle. A dawta thuziakah chuan Siamtuin mihringte a biak pawh dân sawiho a ni ang.