Ṭawng Chi Hrang Hrang Hmanna Biala Thu Hril Tûra Thawhhona

Mite chuan an pianpui ṭawng ngeia Lalram thuchah an hriat hian an chhâng lêt ṭha zâwk ṭhîn a. Chu vâng a ni ngei ang, Jehova chuan C.E. 33 Pentikost ni khân “vân hnuaia hnam tin zîng ata Pathian ngaihsak Judate” chuan a hun laia ṭawng tuallêng Hebrai ṭawng emaw, Grik ṭawng emaw thiam mah se, an “ṭawng pianpui” ngeia chanchin ṭha an hriat theih nân ruahmanna a siamsak a ni. (Tirh. 2:5, 8) Tûn laia ṭawng chi hrang hrang hmanna biala awm ṭawng hman inang lo kohhrante chu thu hrilhna bial an inṭâwm mai thei a. Chûng kohhrana awm thuchhuahtute chuan in neitute tihlungnih lohna thlen thei ṭûl lo taka tlawh ngun lutukna pumpelh tûrin engtin nge an thawhho theih ang?

• 

  Inrâwnna (Thuf. 15:22): Service overseer-te chu chanchin ṭha theh darhna atâna pawm tlân theih tûr ruahmanna ngaihtuahin an inrâwn tûr a ni a. Rawngbâwlna bial nei tam lo ṭawng danga thu hrilhna nei kohhrante chuan an bial chhûnga awm an kohhran ṭawng hmangtute awmna in chu tlawh lo tûrin an duh mai thei che a. Mahse, an bial chu a zau êm avânga ṭha taka an fang chhuak kim ziah thei lo a nih chuan, chûng inte chu hmaih lo tûrin leh chu biala awm tuemawin tuina a lantîr chuan anmahni hriattîr tûrin an duh mai thei che. (od-E 93 ¶37) A nih loh leh, an kohhran ṭawng hman hmangtute zawng chhuak a, an biala ziak lût tûrin in kohhran ṭanpuina an dîl mai thei bawk. (km 7/12 5, bâwm) Kan hriat reng tûr chu, in pakhatah ṭawng pakhat aia tam hmang an awm mai thei tih hi a ni. Bial chhûng tlawh chhuak tûra ruahmanna siam engpawh chu mi mal chanchin vênhimna dân zamte nên a inkalh tûr a ni lo.

• 

  Thawhhona (Eph. 4:16): In service overseer hnên aṭanga in dawn kaihhruaina eng pawh chu zâwm tlat ang che. In kohhran ṭawng aia ṭawng dang hmang duh zâwk tuemaw chu Bible i zirpui em? A ṭawng duh zâwk hmang kohhran emaw, group emaw hnêna i pêk chuan hma a sâwn chak zâwk a rinawm a ni.

• 

  Inbuatsaihna (Thuf. 15:28; 16:1): In thu hrilhna biala in neitu pakhatin ṭawng dang a hman chuan, theih tâwp chhuahin chanchin ṭha hrilh tum rawh. Bial chhûnga i hmuh theih tûr ṭawng dang chu ngaihtuahin, an ṭawnga Bible leh video tihchhuahte chu i mobile leh tablet-ah i lo download-sa thei a. JW Language app hmangin, ṭawng ṭhenkhata chibai bûkna ṭawngkam tawi tê tê chu i inzir thei bawk a ni.