Hmuh Theih Loh Pathian Miziate Chu I Hmu Em?

Pangpâr rawng mawi tak, arsi tam tak awmna vân, a nih loh leh lêngkîra tui khawhthla hum hum rîte i hriat hian, Siamtu chungchâng i ngaihtuah em? Kan chhehvêla awm thil siamte chuan hmuh theih loh Jehova miziate chu chiang takin a târ lang a. (Rom 1:20) Kan thil hmuhte chu châwl lawka ngun taka kan ngaihtuah hian, Pathian thiltihtheihna te, hmangaihna te, finna te, leh rorêl diknate mai bâkah, a thilphalnate chu kan hmu thei a ni.—Sâm 104:24.

Nî tina i hmuh ṭhin Jehova kut chhuak ṭhenkhat chu engte nge ni? Khawpuia awm i nih pawhin savate leh thingkûngte chu i hmu ṭhîn ngei ang a. Jehova thil siamte ngun taka thlîrna chuan kan lungkhamna tinêp tûr te, kan harsatna ngaihtuah buai lutuk lo tûr te, leh Jehova’n chatuanin min enkawl thei tih kan rinna tipung tûrtein min ṭanpui thei a ni. (Mt. 6:25-32) Fa i nei a nih chuan, anni chu tlukpui nei lo Jehova miziate hmu thiam tûrin ṭanpui ang che. Kan chhehvêla awm thil siamte kan ngaihhlutna a ṭhan chhoh zêl chuan, Siamtu kan hnaih lehzual sauh vang.—Sâm 8:3, 4.

THIL SIAM MAK TAKTE’N PATHIAN ROPUIZIA AN LANTIR—ENG LEH RAWNG TIH VIDEO CHU EN LA, TICHUAN A HNUAIA ZAWHNATE HI CHHANG ANG CHE:

• Engvângin nge rawng chi hrang hrang kan hmuh theih?

• Engvângin nge rawng ṭhenkhat chu kan en dân azira a inthlâk danglam?

• Engvângin nge vânah rawng chi hrang hrang kan hmuh?

• I chhehvêlah rawng dangdai tak nei eng thil siamte nge i hmuh?

• Engvângin nge thil siamte chu ngun taka kan en chian a ngaih?