Inbiak Dân Tûr Entîrnate Hman Dân

Kum 2018 January thla aṭang khân, inbiak dân tûr entîrnate chu Kan Kristian Nun leh Rawngbâwlna—Inzirna Lehkhabu phêk hmasa berah a chuang ṭan a. Chûngte chu eng anga hman tûr nge ni?

Zirlai Chanvo I Dawn Hunah: Inbiak dân tûr entîrnaa zawhna te, Bible châng te, leh thlun zawmna te chu i hmang tûr a ni a. Mahse, inbiak dân tûr entîrna video-a an ṭawngkam hman chiah chiah i hmang ve tûr tihna erawh a ni lo. A tih dân (setting) te, thuhmahruai te, chhûtpui dân te, leh thil dangahte chuan tih dân dang i hmang thei a. Kaihhruainaa târ lan a nih kher loh pawhin kan Zirtîrna Hmanraw Bâwma thu leh hla chhuah pakhat i pe chhuak thei bawk.

Rawngbâwla I Chhuah Hunah: Inbiak dân tûr entîrnate chu ṭanpuitu atâna siam a ni a. Miin a ngaihven a, hriat belh a duh chuan, inbiakna i chhun zawm thei a, tlawhkîr hun atâna inbiak dân tûr entîrnate chu i hmang zawm thei a ni. Inbiak dân tûr entîrna chu i siamrem thei ang a, a nih loh leh tih dân dang daih pawh i hmang thei bawk ang. In rawngbâwlna biala mite tân thla hmasaa thu emaw, Bible châng dang emaw chu a ngaihvenawm zâwk ang em? Tualchhûng mite chuan tûn lai thilthleng emaw, tualchhûng chanchin thar emaw chu an ngaihven zâwk ang em? Inbiak dân tûr entîrnate i hman dân chu eng pawh ni se, i thiltum ber chu ‘chan i neih ve theih nâna chanchin ṭha avânga engkim tih’ hi a ni tûr a ni.—1 Kor. 9:22, 23.