Engvângin Nge Pathianin Ṭawngṭaina Zawng Zawng Chu A Chhân Vek Loh?
Kan Pa vâna mi, Pathian Jehova chuan thinlung taka ṭawngṭainate chu ngaihthlâk nuam a ti a. Mahse, kan ṭawngṭainate chhân a nih loh chhan ṭhenkhat a awm a ni. Chûngte chu eng nge ni a, kan ṭawngṭai hunah eng nge kan hriat reng ang? Ṭawngṭaina chungchânga Bible kaihhruainate chu a hnuaiah târ lan a ni.
“In ṭawngṭaiin, Jentailte angin sawi nawn mai mai suh u.”—Matthaia 6:7.
Pathian Jehova chuan kan ṭawngṭai hian kan hriat sa chham nawn tûr leh ziah chhuah sa chhiar chhuak tûrin min duh lo. Chu aiin, thinlung aṭanga ṭawngṭai tûrin min duh a ni. I ṭhian hnên aṭanga nî tin thu ngai ringawt hriat a ninawm dân tûr chu han ngaithuah teh. Ṭhian ṭhate chu inhawng tak leh thinlung takin an inkâwm ṭhîn a. Chutiang bawkin, thinlung aṭanga kan ṭawngṭai hian kan Pa vâna mi chu ṭhian angin kan thlîr tihna a ni.
“In dîl a, in dîl dik loh avângin in hmu lo, in nawmsak nân hman in tum si a.”—Jakoba 4:3.
Pathianin ti lo tûr leh nei lo tûrin min duh tih kan hriat thilte chu a hnênah kan dîl a nih chuan, kan ṭawngṭainate chu a ngaithlâk kan beisei thei lo vang. Entîr nân, Jehova chuan awhna leh puithuna laka fihlîm tûra vaukhânna chiang tak min pêk laiin, pawisa khelh chîng mi chuan vânneihna a dawn theih nân dîl ta se, a chhâng ang em? (Isaia 65:11; Luka 12:15) Chutiang ṭawngṭainate chhâng tûra Jehova beisei chu a va inâwm lo tak êm! Pathianin kan ṭawngṭainate a chhân kan duh chuan kan dîlnate chu Bible thute nên a inmil tih kan chian tûr a ni.
“Dân ngaithla duh lova hnuchhawntu chu a ṭawngṭaina pawh tenawm a ni.”—Thufingte 28:9.
Bible hun laiin, Pathianin a dân fel hnâwltute ṭawngṭaina chu a chhâng lo va. (Isaia 1:15, 16) A rilru put hmang chu a la danglam lo. (Malakia 3:6) Pathianin kan ṭawngṭainate a chhân kan duh chuan, a dânte kan zawm a ngai a ni. A nih leh, tûn hmain thil sual lo ti ta i la, engtin nge ni ang? Chu chu Jehova’n kan ṭawngṭainate a ngaithla tawh ngai lo vang tihna a ni em? Ni lo ve! Pathian chuan inchhîrna kan lantîr a, amah tilâwm tûra theih tâwp kan chhuah phawt chuan, hmangaihna nei takin min ngaidam ang.—Tirhkohte 3:19.