I Nakin Hun Tûr Chu I Thlang Thei

Kum 3,500 vêl kal ta khân, Pathian Jehova chuan amah betute hnênah nakin hun muanawm tak an neih theih nâna an tih ngai chu hetiang hian a lo hrilh a ni: ‘In hmaah nunna leh thihna, malsâwmna leh ânchhia ka dah a ni; chutichuan, nunna chu thlang rawh u, in nun theih nân, nangni leh in thlahte nên,’ tiin.—Deuteronomy 30:19.

Chûng mite chuan nakin hun êng tak an neih theih nân, duh thlanna dik an siam a ngai a ni. Tûn laiah pawh, chutiang duh thlan theihna chu kan nei a. Bible chuan nakin hun muanawm tak thlan theih dân min hrilh a ni: ‘Lalpa in Pathian hmangaiha, a awkâ awihin,’ tiin.—Deuteronomy 30:20.

ENGTIN NGE JEHOVA HMANGAIHA A AWKA KAN NGAIHTHLAK THEIH?

BIBLE AṬANGIN INZIR RAWH: Jehova hmangaih tûr chuan, Bible aṭanga a chanchin i zir a ngai a. Chutianga i tih chuan, ani chu i tâna ṭha ber tûr duhsaktu hmangaihna nei tak Pathian a ni tih i hria ang. Ani chuan ‘a ngaihsak ṭhin che avângin,’ a hnêna ṭawngṭai tûrin a sâwm che a. (1 Petera 5:7) Bible chuan theih tâwp chhuaha amah hnaih i tum chuan, “anin a hnaih ang che,” tiin min tiam a ni.—Jakoba 4:8.

I THU ZIR CHU NUNPUI RAWH: Pathian awkâ ngaithla tih awmzia chu Bible-a kan hmuh a kaihhruaina fing takte zawm hi a ni. Chutianga i tih chuan, ‘i kawngte a lo tluang zêl ang a, i lo hmuingîl zêl ang.’—Josua 1:8.