ZIR TUR THUZIAK 22
Kan Nun Kaihruaitu Finna
“LALPA chuan finna a pe ṭhîn.”—THUF. 2:6.
HLA 89 Ngaithlain A Thu Zâwm R’u
THLIR LAWKNAa
1. Engvângin nge kan za hian Pathian finna kan neih a ngaih? (Thufingte 4:7)
THU tlûkna pawimawh tak siam tûr i nei a nih chuan, chhan ṭha tak avângin finna dîlin i ṭawngṭai ngei ang. (Jak. 1:5) Lal Solomona chuan: “Finna hi thupui ber a ni,” tiin a ziak a. (Thufingte 4:7 chhiar rawh.) Mahse, eng ang finna pawh a sawina a ni lo. Pathian Jehova hnên aṭanga lo kal finna chungchâng a sawina zâwk a ni. (Thuf. 2:6) A nih leh, Pathian finna chuan tûn laia kan hmachhawn buainate chingfel tûrin min ṭanpui thei em? Min ṭanpui thei tih he thuziakah hian kan hmu ang.
2. Mi fing tak kan nih theih dân kawng khat chu eng nge ni?
2 Mi fing tak kan nih theih dân kawng khat chu an finna avânga zahkai tak mi pahnihte zirtîrna zir chian leh nunpui hi a ni. A hmasain, Solomona chungchâng kan ngaihtuah ang. Bible chuan, “Pathianin Solomona chu finna leh hriatna nasa tak . . . a pe a,” tiin a sawi. (1 Lal. 4:29) Pahnihnaah, tehkhin rual loh finna neitu Isua chungchâng kan ngaihtuah ang a. (Mt. 12:42) Isua chungchângah hetiang hian hrilh lâwk a ni: ‘LALPA thlarau—finna leh hriat theihna thlarau chu—a chungah a fu ang,’ tiin.—Is. 11:2.
3. He thuziakah hian eng nge kan sawiho vang?
3 Solomona leh Isua chuan Pathian pêk finna hmangin, kan tâna thil pawimawh takte chungchângah thurâwn ṭha tak tak min pe a. He thuziakah hian, chûng zînga pathum chu kan sawiho vang: Sum leh pai leh eizawnna hnaa thlîr dân inbûk tâwk neih a ngaihna, leh mahni ngei pawh thlîr dân inbûk tâwk neih a ngaihna chu.
INBUK TAWK TAKA SUM LEH PAI THLIR DAN
4. Engtin nge Solomona leh Isua chu hausakna lama an in an loh?
4 Solomona chu mi hausa tak a niin nuam takin a khawsa a. (1 Lal. 10:7, 14, 15) Kawng leh lamah, Isua chuan thil tlêm tê chauh a nei a, chênna tûr in pawh a nei lo. (Mt. 8:20) Mahse, an pahnihin finna Hnâr, Pathian Jehova hnên aṭanga lo kal finna an neih avângin, sum leh pai lamah thlîr dân inbûk tâwk an nei ve ve a ni.
5. Solomona’n sum leh pai chungchângah eng thlîr dân inbûk tâwk nge a neih?
5 Solomona chuan sum hi “himna” a ni tih a pawm a. (Thur. 7:12) Nuna kan mamawh zualpuite bâkah, kan neih duh thil ṭhenkhat chu sumin kan lei thei a ni. Mahse, mi hausa tak a nih angin, Solomona chuan sum aia pawimawh zâwk thilte pawh a awm tih a hria a. Entîr nân, ani chuan: “Sum tam tak aiin hmingṭhat hi thlan zâwk tûr a ni,” tiin a ziak a ni. (Thuf. 22:1) Sum ngainatute chuan an thil neihah lungawina an nei meuh lo tih a sawi bawk. (Thur. 5:10, 12) Kan sum leh paite chu a ral thuai theih avângin, chumia rinna nghat lo tûrin min vaukhân bawk a ni.—Thuf. 23:4, 5.
Sum leh pai kan thlîr dânin kan nuna Lalram kan dah hmasakna chu a dâl em? (Paragraph 6-7-na en rawh)d
6. Isua’n sum leh pai chungchângah eng thlîr dân inbûk tâwk nge a neih? (Matthaia 6:31-33)
6 Isua’n sum leh pai chungchângah thlîr dân inbûk tâwk a nei a. Ani chu a eiin a in a. (Lk. 19:2, 6, 7) Ṭum khat chu, a thil mak tih hmasak berah, tui chu uain ṭha berah a chantîr a. (Joh. 2:10, 11) Chu bâkah, a thih nîah, silhfên man to tak a inbel a ni. (Joh. 19:23, 24) Mahse, Isua chuan sum leh pai chu a nunah a dah pawimawh ber lo. A hnungzuitute hnênah: “Tu man hotu pahnih rawng an bâwl kawp thei lo: . . . Pathian leh sum rawng in bâwl kawp thei lo ve,” tiin a hrilh a. (Mt. 6:24) Lalram kan zawng hmasa a nih chuan, Jehova’n kan mamawhte min pe ngei ngei ang tih min zirtîr a ni.—Matthaia 6:31-33 chhiar rawh.
7. Engtin nge unaupa pakhatin sum leh pai chungchânga thlîr dân inbûk tâwk neihna chu a hlâwkpui?
7 Kan unau tam takte chuan sum leh pai chungchânga Pathian finna nunpui chu an hlâwkpui a. Nupui la nei lo unau Daniel-a entawn tûr siam hi han ngaihtuah teh. Ani chuan: “Ka tleirâwl laiin, thlarau lam thilte chu ka nunah dah pawimawh ber ka tum tlat a ni,” tiin a sawi. A nun a tihsamkhai tlat avângin, a hun leh a thiamnate chu thlarau lam thiltihna hrang hrangah a hmang thei a. Ani chuan: “Ka nun kawng thlan avângin ka inchhîr ngai lo tih dik takin ka sawi thei. Ni e, ka nunah sum dah pawimawh ber duh ila chuan, sum tam tak ka thawk chhuak thei ngei mai. Mahse, engtin nge ka ṭhian ṭhate hi suma ka thleng phal tehlul ang? Engtin nge ka nunah Lalram ka dah hmasa tih inhriatna aṭanga ka neih lungawina chu thil danga ka thleng phal tehlul ang? Jehova chuan sum leh paiin min pêk theih hlimna aia nasa zâwk thil tam tak min pe a ni,” tiin a sawi. Ni e, sum leh pai ni lo va, thlarau lam thilte ngaihven tlatna chu kan hlâwkpui tak zet a ni.
INBUK TAWK TAKA EIZAWNNA HNA THLIR DAN
8. Engtin nge Solomona chuan hna chungchângah thlîr dân inbûk tâwk a nei tih kan hriat? (Thuhriltu 5:18, 19)
8 Solomona chuan kan thawhrimna aṭanga lo awm hlimna chu “Pathian thilpêk” a nih thu a sawi a. (Thuhriltu 5:18, 19 chhiar rawh.) Ani chuan: “Thawhrimna zawng zawngah hian hlâwkna a awm,” tiin a ziak bawk. (Thuf. 14:23) Solomona chuan a thusawite dikzia pawh a hria a ni. Ani chu mi taima tak a ni a. Inte a sa a, grep huante a siam a, huante leh dîlte a siam bâkah, khuate pawh a din bawk. (1 Lal. 9:19; Thur. 2:4-6) Chûng hna hautakte a thawhna aṭangin lungawina eng emaw chen a hmu ngei ang. Mahse, ani chuan hlimna nei tûrin chûng thiltihte chauh chu a rinchhan lo. Thlarau lam thiltihahte pawh a inhmang a ni. Entîr nân, kum sarih chhûng awh Jehova biakna hmun tûr biak in ropui tak sak hna chu a kaihruai a! (1 Lal. 6:38; 9:1) Eizawnna lam leh thlarau lam thiltihna kawng hrang hranga a inhman hnu chuan, thlarau lam thiltihte chu khawvêl lam thiltihte aia a pawimawh zâwkzia a hre ta a. Ani chuan: “Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh,” tiin a ziak a ni.—Thur. 12:13.
9. Engtin nge Isua’n eizawnna hna chu a nunah a dah pawimawh ber lo tih a lantîr?
9 Isua chu mi taima tak a ni a. Leia a nun ṭan tîr lamah khân, thingrem siamtu niin hna a thawk a. (Mk. 6:3) A nu leh pate chu theih tâwp chhuaha an chhûngkaw hung tak an enkawlna kawnga Isua ṭanpuina an dawn avângin an lâwm hle ngei ang. Isua chu ṭha famkim a nih avâng leh ṭha famkima hna a thawh theih avângin a thil siamte chu mite chuan an duh hle ngei ang! Ani chuan hnathawh chu nuam a ti hle niin a lang. Eizawnna hnaa a inhman lai pawhin, thlarau lam thiltihte atân hun a pe ṭhîn a ni. (Joh. 7:15) A hnuah, hunbi kima rawngbâwltu a nih angin a thu ngaithlatute chu: ‘Chaw dangral mai ûmin phe phe suh u, chatuana nun thlenga awm reng tûr chaw chu ûmin phe zâwk rawh u,’ tiin a fuih a. (Joh. 6:27) Tlâng Chunga a Thusawiah pawh: ‘Vânah in tân rote khâwl khâwm rawh u,’ tiin a sawi a ni.—Mt. 6:20.
Engtin nge eizawnna hna leh thlarau lam thiltihte chu inbûk tâwk taka kan thawh reng theih? (Paragraph 10-11-na en rawh)e
10. Unau ṭhenkhatin an eizawnna hnaah eng harsatna nge an hmachhawn mai theih?
10 Pathian finna chuan kan eizawnna hna chungchânga thlîr dân inbûk tâwk nei tûrin min ṭanpui a. Kristiante kan nih angin, ‘thil ṭha tia thawk rim’ tûra zirtîr kan ni. (Eph. 4:28) Hnathawhna pute chuan dik tak leh taima taka kan thiltihte chu an hmu fovin, kan hna thawh dân an ngaihhlutziate min hrilh pawh a ni thei. Jehova Thuhretute chunga thlîr dân dik an neih kan duh avângin dârkâr tam lehzual kan thawk ṭan pawh a ni thei bawk. Mahse, chutianga kan tih chuan, kan chhûngkaw tân leh Jehova tân hun tam tak kan pe thei lo vang. Thlîr dân inbûk tâwk nei tûr chuan, kan inthlâk danglam a ngai a ni.
11. Hnaa thlîr dân inbûk tâwk tak neih chungchânga unaupa thil zir pakhat chu eng nge ni?
11 Ṭhalai unaupa William-a chuan a nunah eizawnna hna dah pawimawh ber loh a ṭhatzia a thiltawn aṭangin a hria a. Tûn hmaa a hnathawhna pu, kohhran upa chungchângah, ani chuan: “[Chu unaupa] chu hnathawh chungchânga thlîr dân inbûk tâwk neihna kawnga entawn tûr ṭha tak a ni. Ani chu mi taima tak a nih bâkah, hna a thawh ṭhat ṭhin êm avângin amah dâwrtute nên pawh inlaichînna ṭha tak an nei a. Mahse, tlai lam hnathawh bân hun a lo thlen chuan, a hna chu dahin, a chhûngte tân leh Pathian biakna atân hun a pe ṭhîn a. Ani chu ka hriat tawhte zînga mi hlim thei ber pakhat a ni,” tiin a sawi.b
INBUK TAWK TAKA MAHNI INTHLIR DAN
12. Engtin nge Solomona’n inbûk tâwk taka mahni inthlîrna a nei tih a târ lan a; mahse, engtin nge chu chu a hloh tâk?
12 Solomona chuan Jehova chibai bûktu rinawm a nih lai chuan, inbûk tâwk taka mahni inthlîrna a nei a. Ṭhalai mai a nih angin, tihtheih chin tâwk a nei tih a inhria a, Jehova kaihhruaina a dîl a ni. (1 Lal. 3:7-9) A lal ṭantirh lamah chuan, chapona hlauhawmzia pawh a hre bawk. Ani chuan: “Chapona chu boralna hmaah a kal a, rilru intivei chu tlûkna hmaah,” tiin a ziak a ni. (Thuf. 16:18) Lungchhiatthlâk takin, a hnuah Solomona chuan ama thurâwn pêk ngei chu a zâwm lo va. A lal aṭanga hun eng emaw chen a liam hnuah, Pathian thil phûtte chu chapo takin a ngainêp ṭan ta a ni. Entîr nân, Pathian dân pêk zînga pakhatin Hebrai lal chuan “a rilru a vah bo loh nân nupui pawh a ngah tûr a ni lo,” tih a târ lang a. (Deut. 17:17) Solomona chuan chu dân chu ngaihthahin, nupui 700 leh hmei 300 a nei a, chûng zînga a tam zâwk chu milem pathian betute an ni. (1 Lal. 11:1-3) Ani chuan thil engkim thunun thei niin a inngai pawh a ni thei. Eng pawh chu ni se, a tâwpah, Solomona chuan Jehova thu a awih loh avânga a sawhkhâwk ṭha lote chu a tuar ta a ni.—1 Lal. 11:9-13.
13. Isua inngaihtlâwmna rilru put hmang chhût ngunna aṭangin eng nge kan zir theih?
13 Isua chuan inbûk tâwk tak leh inngaitlâwm taka mahni inthlîrna a nei a. Mihring nia leia a lo kal hmain, Jehova rawngbâwlnaah hming ṭha tak a chher a ni. Isua avângin “engkim siam a ni a, vâna awmte, leia awmte nên.” (Kol. 1:16) Baptisma a chan lai khân, Isua chuan a Pa bula a awm laia a thil hlen chhuahte chu a hre chhuak ngei ang. (Mt. 3:16; Joh. 17:5) Mahse, chu chuan chapona a neihtîr lo. Chu mai bâkah, mi dangte aia ṭha zâwk angin a inlantîr ngai lo a ni. A zirtîrte hnênah he leia a lo kal chhan chu ‘rawngbâwlsaka awm tûr ni lovin, rawngbâwl tûr leh mi tam tak tlan nâna a nun pe tûr zâwka lo kal’ a nih thu a hrilh a. (Mt. 20:28) Mahni thua thil eng mah a tih theih loh thu pawh a sawi bawk. (Joh. 5:19) Inngaihtlâwmna a va lantîr chiang êm! Isua chuan kan tân entawn tûr ṭha tak a hnutchhiah a ni.
14. A âwm tâwka mahni inthlîrna neih chungchângah Isua hnên aṭangin eng nge kan zir theih?
14 Isua chuan a hnungzuitute chu a âwm tâwka mahni inthlîrna nei tûrin a zirtîr a. Ṭum khat chu an hnênah: “In samzaite lam pawh hi chhiar vek a ni asin,” tiin a hrilh a ni. (Mt. 10:30) Chu thu chuan a thim zâwnga mahni inthlîrna kan neih hunah min tichak lehzual a. Kan Pa vâna mi chuan min ngaihsak tak zetin, a mit hmuhah kan hlu tak zet a ni. Jehova chibai bûktute zînga tel tlâk lo leh khawvêl thara nung tlâk lova inngaiin, A rorêlna chungchânga rinhlelhna neih chu kan duh ngai lo vang.
Inbûk tâwk taka mahni inthlîrna kan neih loh chuan, eng hun remchângte leh malsâwmnate nge kan chân theih? (Paragraph 15-na en rawh)f
15. (a) Inbuk tâwk taka mahni inthlîrna neih chungchângah Vênnainsâng-in eng nge a sawi? (b) Phêk 24-naa milemin a târ lan angin, mahni kan inngaihven lutuk a nih chuan, eng malsâwmnate nge kan chân ang?
15 Kum 15 vêl kal ta khân, Vênnainsâng chuan inbûk tâwk taka mahni inthlîrna kan neih a ngaih thu heti hian a sawi a ni: “Chapona nei khawpin kan indah sâng tûr a ni lo va; chutih rualin, kan indah hniam lutuk tûr pawh a ni hek lo. Chu aiin, ṭhatna laite leh ṭhat lohna laite kan nei tih hriain, a âwm tâwka mahni inthlîrna neih kan tum zâwk tûr a ni. Chumi chungchângah Kristian nu pakhat chuan: ‘Mi sual tak ka ni lo va, mi ṭha ber lah ka ni hek lo. Mi dangte ang bawkin ṭhatna laite leh ṭhat lohna laite ka nei a ni,’ tiin a sawi,” tiin.c Inbûk tâwk taka mahni inthlîrna neih kan hlâwkpui theih dân kha i lo hmu em?
16. Engvângin nge Jehova’n kaihhruaina fing tak min pêk?
16 Jehova chuan a Thu, Bible hmangin kaihhruaina fing tak min pe a. Ani chuan min hmangaihin, hlim tûrin min duh a ni. (Is. 48:17, 18) Hlimna dik tak min thlentu nung kawng fing tak chu kan nuna Jehova tilâwmtu thilte dah hmasak hi a ni. Chutianga kan tih chuan, sum leh pai te, eizawnna hna te, leh a lutuka mahni inngaihventute tawn ṭhin buaina tam tak chu kan pumpelh ang. Chuvângin, kan za hian fing taka awm leh Jehova thinlung tihlâwm chu i tum tlat ang u!—Thuf. 23:15.
HLA 94 Pathian Thu Avânga Lâwmna
a Solomona leh Isua chuan finna nasa tak an nei a. Chu an finna Hnâr chu Pathian Jehova a ni. He thuziakah hian sum leh pai leh eizawnna hnaa thlîr dân inbûk tâwk neih a ngaih bâkah, mahni ngei pawh thlîr dân inbûk tâwk neih a ngaih chhan chungchânga thlarauva thâwk khum Solomona leh Isua thurâwn pêk aṭanga kan zir theihte kan hmu ang a. Kan Kristian unau ṭhenkhatin chumi chungchânga Bible ṭanchhan thurâwn nunpuina an hlâwkpui dânte pawh kan hmu bawk ang.
b Vênnainsâng, February 1, 2015 chhuaka “Hlim Taka Thawhrim Theih Dân,” tih thuziak chu en rawh.
c Vênnainsâng (English), August 1, 2005 chhuaka “Bible-in Hlimna Hmu Tûrin A Ṭanpui Thei Che,” tih thuziak chu en rawh.
d MILEM HRILHFIAHNA: John-a leh Tom-a chu kohhran pakhata awm ṭhalai an ni a. John-a chuan a motor enkawl nân hun tam tak a hmang a. Tom-a erawh chuan a motor chu rawngbâwlnaah leh kohhran inkhâwmahte an tel theih nâna mi dangte ṭanpui nân a hmang a ni.
e MILEM HRILHFIAHNA: John-a chuan overtime a thawk a. A hnathawhna pu chu tihlungnih loh a duh lo. Chuvângin, a puin overtime thawk tûra a tih apiangin a remti a ni. Chumi tlai vêk chuan, kohhranho rawngbâwltu Tom-a chuan kohhran upa pakhat chu berâm tlawhnaah a zui a. A hmain, Tom-a chuan a hnathawhna pu hnênah chawlhkâr chhûnga zan ṭhenkhat chu Jehova biakna nêna inkûngkaih thiltihte atâna hman a duh thu a lo hrilh tawh a ni.
f MILEM HRILHFIAHNA: John-a chuan mahni chauh a inngaihtuah a. Mahni hamṭhatnate aia thlarau lam thilte dah pawimawh zâwktu Tom-a chuan Assembly Hall sak ṭhatnaah ṭanpuiin ṭhiante a siam belh a ni.