Nu leh Pate U—Jehova Hmangaih Tûrin In Fate Ṭanpui Rawh U

1-2. Kan dinhmunte a inthlâk danglam huna Bible thu bulte’n kan tâna awmzia a neih lehzual dân chu hrilhfiah rawh.

INNEIH nî chuan mopa leh monu hmêl ṭha takte chuan Bible ṭanchhan inneihna thusawi chu ngun takin an ngaithla a. Chu thusawia thu bulte chu an tân thu thar a ni hran lo. Mahse, chumi nî aṭangin chûng thute chuan an tân awmzia a nei lehzual tawh ang. Engvângin nge? Nupa anga an nunpui tawh dâwn vâng a ni.

² Kristian nupain fate an neih hian chutiang bawk chu a ni a. Kum tam tak chhûngin, fate enkawl seilen dân chungchânga thusawite chu an hre fo pawh a ni thei. Mahse, tûnah chuan chûng thu bulte chuan an tân awmzia a nei lehzual tawh dâwn a ni. Anmahni fa ngei an enkawl tawh dâwn si a. Mawhphurhna lian tak a va ni êm! Ni e, dinhmun tharte hian kan hriat ṭhan êm êm Bible thu bulte kan thlîr dân chu a tidanglam thei a. Chumi avâng tak chuan, Israel lalte chu an dam “chhûng zawng” Pathian Thu chhiar leh chhût ngun tûra tih an ni ang bawkin, Jehova chibai bûktute pawhin chutiang chuan an ti a ni.—Deut. 17:19.

3. He thuziakah hian eng nge kan sawiho vang?

³ Nu leh pate u, Kristianin a neih theih azawnga chanvo hlu ber in nei a ni, Jehova chanchin hre tûra in fate zirtîr chu. Mahse, Pathian chungchâng zirtîr mai aia tam tih in duh a. In fate chu Pathian hmangaihna thûk tak nei tûra ṭanpui in duh a ni. In fate thinlunga Jehova hmangaihna tuh tûrin eng nge in tih theih? He thuziakah hian, nu leh pa in nih anga nangmahni ṭanpui theitu Bible thu bul pali kan sawiho vang a. (2 Tim. 3:16) Kristian nu leh pa ṭhenkhatin Bible thurâwn nunpuina an hlâwkpui dânte pawh kan hmu bawk ang.

NU LEH PATE ṬANPUI THEITU THU BUL PALI

4. An fate thinlunga Jehova hmangahna tuh tûra nu leh pate ṭanpui theitu thu bul pakhat chu eng nge ni? (Jakoba 1:5)

⁴ Thu bul 1: Jehova kaihhruaina zawng rawh u. Jehova hmangaihna nei tûra in fate in ṭanpui theih nâna in mamawh finna pe tûr che uin Jehova hnênah dîl ang che u. (Jakoba 1:5 chhiar rawh.) Ani chu thurâwn pe tûra tling ber a ni. Chutiang a nih chhan tam tak a awm a. Chûng zînga pahnih chu lo ngaihtuah ta ila. Pakhatna, Jehova chu pa azawnga thiltawn ngah ber a ni a. (Sâm 36:9) Pahnihna, a thurâwn pêk fing takte chu englai pawhin a ṭangkai reng a ni.—Is. 48:17.

5. (a) Jehova inawpna pâwlin nu le pate ṭanpui nân eng nge a buatsaih? (b) Video-a târ lan angin, Unau Amorim-a te nupain an fate an enkawl seilen dân aṭangin eng nge i zir?

⁵ Jehova chuan A Thu, leh a inawpna pâwl hmangin amah hmangaih tûra in fate in enkawl seilennaa ṭanpui theitu che u Bible ṭanchhan thu leh hla chhuah tam tak min pe a. (Mt. 24:45) Entîr nân, kum eng emaw zât chhûng Sâpṭawnga tihchhuah Awake! magazine-a târ lan “Chhûngkaw Tâna Ṭanpuina,” tih thuziak inzawmahte chuan thurâwn ṭha tak takte in hmu thei a, chûng thuziakte chu tûnah chuan kan website-ah pawh hmuh theih a ni tawh. Kan website jw.org-a pho chhuah biangbiakna leh chan chawp video tam takte chuan nu leh pate chu Jehova fuihna mila an fate an enkawl seilennaah a ṭanpui thei a ni.b—Thuf. 2:4-6.

6. Engtin nge pa pakhatin a nupui nêna Jehova inawpna pâwl aṭanga an dawn kaihhruaina chu a ngaih?

⁶ Nu leh pa tam tak chuan Jehova’n a inawpna pâwl kal tlanga a buatsaih ṭanpuinate avânga an lâwmzia an sawi a. Pa pakhat Joe-a chuan: “Kan fa pathumte thutaka enkawl seilen chu thil awlsam a ni lo. Kan nupain Jehova ṭanpuina dîlin kan ṭawngṭai reng ṭhîn a. Kan dinhmun tawh mêkte hmachhawn thei tûra min ṭanpuitu thuziak emaw, video emaw chu a hun takah a lo chhuak ṭhîn ni hian kan hria. Jehova kaihhruainate chu englai pawhin kan rinchhan a ni,” tiin a sawi. Unau Joe-a leh a nupui chuan chûng thuziakte leh video-te’n an fate chu Jehova hnaih tûrin a ṭanpui tih an hmu a ni.

7. Engvângin nge nu leh pate tân entawn tûr ṭha siam tûra theih tâwp chhuah chu thil pawimawh tak a nih? (Rom 2:21)

⁷ Thu bul 2: Entawn tûr siamin zirtîr rawh u. Naupangte chuan an nu leh pate chu an thlîr reng a, anni chu an entawn ṭhîn a ni. Ni e, nu leh pa ṭha famkim tu mah an awm lo. (Rom 3:23) Chuti chung pawhin, nu leh pa fingte chuan an fate tâna entawn tûr ṭha siam tûrin theih tâwp an chhuah a ni. (Rom 2:21 chhiar rawh.) Pa pakhat chuan naupangte chungchângah: “Naupangte chu thil engkim mai hîp lûttu nawhfe thâwp ang an ni a. Kan zirtîr tum dân leh kan nungchang a inmil loh hunah an sawi chhuak tawp mai ang,” tiin a sawi. Chuvângin, kan fate chu Jehova hmangaih tûra kan duh chuan, Jehova kan hmangaihzia chu an hmuh a, an hriat chian a ngai a ni.

8-9. Unaupa Andrew-a leh Unaunu Emma-te thusawi aṭangin eng nge i zir?

⁸ Nu leh pate tân Jehova hmangaih tûra an fate an zirtîr theih dân kawng tam tak a awm a. Kum 17 mi unaupa Andrew-a sawi hi lo chhinchhiah teh: “Ka nu leh pa chuan ṭawngṭai a pawimawhzia an sawi reng ṭhîn a. Ka pa chuan mahnia ka ṭawngṭai hnuah pawh zan tin min ṭawngṭaisak ṭhîn. Ka nu leh pa chuan: ‘Jehova hnênah in duh hun apiangin in ṭawngṭai thei,’ tiin ka nau nên min hrilh fo va. Chutianga ṭawngṭai an ngaih pawimawhna chuan ka thinlung a hneh hle a, tûnah chuan Jehova hnêna ṭawngṭai hi nuam ka tiin, ani chu hmangaihna nei tak Pa angin ka thlîr a ni,” tiin a sawi. Nu leh pate u, Jehova in hmangaihna a nasat dânin in fate chunga nghawng a neih theih dân chu ngainêp ngai suh ang che u.

⁹ Unaunu Emma-i entawn tûr siam pawh hi han ngaihtuah teh. A pain an chhûngkua a chhuahsan chuan, an leiba tam tak chu a nu rulh atân a hnutchhiah a. Emma-i chuan: “Kan nu chuan sum tlâkchham châng vawi tam tak nei mah se, Jehova’n a chhiahhlawhte a ngaihsak dân leh a ṭanpui dânte min hrilh fo ṭhîn. Chumi a rinzia chu a nun dân aṭangin ka hmu thei a. Min zirtîrnate chu amah ngeiin a takin a nunpui a ni,” tiin a sawi. Zir tûr chu eng nge ni? Nu leh pate chuan an fate chu dinhmun harsa tak kârah pawh entawn tûr siamin an zirtîr thei tih hi a ni.—Gal. 6:9.

10. Israel nu leh pate chuan an fate nêna inbiak pawh nân eng hun remchângte nge an neih? (Deuteronomy 6:6, 7)

¹⁰ Thu bul 3: In fate chu be ziah rawh u. Jehova chuan hmân lai Israel mite hnênah an fate chu a chungchâng zirtîr ziah tûrin a hrilh a. (Deuteronomy 6:6, 7 chhiar rawh.) Chûng nu leh pate chuan an fate thinlunga Jehova hmangaihna tuh tûrin ni khatah biak pawh theihna hun remchâng tam tak an nei a ni. Entîr nân, Israel mipa naupang chuan a pa chu lova thlai chînnaah leh a sengnaah dârkâr tam tak a ṭanpui pawh a ni thei a. A unaunu chuan a nu chu puan ṭhui te, puan tah te, leh in chhûng sekrek thiltihahte dârkâr tam tak a ṭanpui pawh a ni thei bawk. Nu leh pate leh fate’n hna an thawhho hian, thu pawimawh tak takte an sawiho thei a. Entîr nân, Jehova ṭhatnate leh an chhûngkua a ṭanpui dânte chu an sawiho thei a ni.

11. Kristian nu leh pate tân an fate an biak pawh theihna hun remchâng pakhat chu eng nge ni?

¹¹ Hunte chu a inthlâk danglam tawh a. Ram tam takah chuan, nu leh pate leh naupangte chuan ni lêngin hun an hmang dûn thei tawh lo. Nu leh pate chuan hna an thawh laiin, naupangte chu school-ah an kal a. Chuvângin, an fate an biak theih hun tûr, hun remchângte an zawn a ngai a ni. (Eph. 5:15, 16; Phil. 1:10, 11) Chhûngkuaa Pathian biakna chuan chutiang hun remchâng chu a neihtîr thei a. Ṭhalai unaupa Alexander-a chuan: “Ka pa chuan chhûngkuaa Pathian biakna atân ruahmanna a siam ziah a, eng mahin chutianga kan inhmuh khâwm hun chu a tihbuai a phal lo. Zirna kan neih zawhah kan titiho ṭhîn a ni,” tiin a sawi.

12. Chhûngkaw lû ber chuan chhûngkuaa Pathian biakna an neih laiin eng nge a hriat reng ang?

¹² Chhûngkaw lû ber i nih chuan, chhûngkuaa Pathian biakna chu i fate tâna nuam tak ni tûrin eng nge i tih theih? Engvângin nge Chatuanin I Hlim Thei! tih lehkhabu thar chu in zirpui loh vang? Chu lehkhabu zirpuina chuan i fate nêna titihona nuam tak nei tûrin hun remchâng ṭha tak a pe ang che. I fate chu an rilru vei zâwngte leh lungkhamnate inhawng taka sawi chhuak tûra i duh a nih chuan, chhûngkuaa Pathian biakna chu anmahni zilh nân emaw, hauh nân emaw hmang suh ang che. Chu bâkah, i fate’n Bible thu bulte nêna inmil lo ngaih dânte an sawi chhuak a nih pawhin, a lutuka chhân lêt loh chu tum ang che. Chu aiin, an rilru vei zâwngte tlang taka an sawi chhuah avângin lâwm la, chutianga ti zêl tûrin fuih zâwk rawh. Dik tak chuan, i fate rilrua awm i hriat chauhvin ṭanpuina ṭha ber i pe thei ang.

13. Nu leh pate’n Jehova hnaih tûra an fate ṭanpui nân eng hun remchâng dangte nge an la neih?

¹³ Nu leh pate u, Jehova hnaih tûra in fate ṭanpui theihna hun remchâng zawng reng ang che u. Hmangaihna nei tak kan Pathian chungchâng zirtîr nân Bible zirna pângngai tak neih hun chu in nghah kher a ngai lo. Nu pakhat Lisa-i chuan: “Kan fate chu Jehova leh thil siamte inkûngkaih dân hre thiam tûrin kan ṭanpui a. Entîr nân, kan uiin kan fate a tihnuih hian chu chu entîr nâna hmangin, Jehova chu Pathian hlim thei tak a ni tih leh keini pawh hlim tûrin min duh tih kan hrilhfiah ṭhîn a ni,” tiin a sawi.

14. Engvângin nge nu leh pate tân an fate’n fing taka ṭhian thlang tûra an ṭanpui chu thil pawimawh tak a nih? (Thufingte 13:20)

¹⁴ Thu bul 4: In fate chu ṭhian ṭhate nei tûrin ṭanpui rawh u. Bible chuan kan ṭhiante hian kan chungah a ṭha lamin emaw, a chhe lamin emaw nghawng an nei thei tih chiang takin min hrilh a ni. (Thufingte 13:20 chhiar rawh.) Nu leh pate u, in fate ṭhiante chu in hria em? Chûng an ṭhiante chu in hmu tawhin, in kâwm tawh ṭhîn em? In fate chu Jehova hmangaihtu ṭhiante nei tûrin engtin nge in ṭanpui theih? (1 Kor. 15:33) Chhûngkuaa thil in tihhonaah thlarau lama puitling unau ṭhenkhatte chu sâwmin, in fate chu ṭhian ṭhate nei tûrin in ṭanpui thei a ni.—Sâm 119:63.

15. Nu leh pate chuan an fate’n ṭhian ṭha an neih theih nâna ṭanpui tûrin eng nge an tih theih?

¹⁵ Pa pakhat Tony-a thiltawn hi han ngaihtuah teh. An fate’n ṭhian ṭha an neih theih nâna an nupaa an ṭanpui dân chu heti hian a sawi a ni: “Kum eng emaw zât chhûng chu, kan nupa hian kum leh ṭobul inang lo unaute chu kan ina lêngah kan sâwm ṭhîn a. Chawte kan eihovin, chhûngkuaa Pathian biaknate kan neiho va. Chu chu Jehova hmangaihtu leh hlim taka a rawngbâwltute hriat theih dân kawng ṭha tak a ni. Chu bâkah, bial kantu te, missionary te, leh unau dangte chu kan inah an rawn thleng ṭhîn a. An thiltawn te, an ṭhahnemngaihna te, leh an inpêkna rilru put hmangte chuan kan fate chungah nghawng ṭha tak a neiin, Jehova hnaih tûrin a ṭanpui a ni,” tiin. Nu leh pate u, ṭhian ṭha nei tûra in fate ṭanpui chu tum tlat ang che u.

BEISEI TLAT RAWH!

16. In fate zînga pakhatin Jehova rawngbâwl a duh loh thu a sawi chuan engtin nge ni ang?

¹⁶ Theih tâwp in chhuah chung pawha, in fate zînga pakhatin Jehova rawngbâwl a duh loh chuan, engtin nge ni ang? Nu leh pa nih tling lo angin inngai suh ang che u. Jehova chuan in fate pawh tiamin, kan za hian a rawng kan bâwl dâwn leh dâwn loh chungchângah zalên taka duh thlan theihna min pe ṭheuh va. In fain Jehova kalsan a thlang a nih chuan, engtik nîah emaw a lo kîr leh ang tih beisei tlat ula. Fapa tlân bo tehkhin thu kha hre reng ang che u. (Lk. 15:11-19, 22-24) Chu ṭhalai chuan felna kawng chu a kalsan thui hle a; mahse, a tâwpah a lo kîr leh a ni. Mi ṭhenkhat chuan, “Chu chu tehkhin thu mai alâwm. A takah a thleng thei dâwn em ni?” tiin an sawi mai thei. Thleng thei teh meuh mai! Chutiang chiah chuan ṭhalai Elie-a chungah a thleng a ni.

17. Engtin nge Elie-a thiltawnin a tihchak che?

¹⁷ Elie-a chuan a nu leh pate chungchângah: “Ka nu leh pa chuan Jehova hmangaih a, a Thu, Bible ka ngainat theih nân theih tâwp an chhuah a. Mahse, ka rawn tleirâwl chhoh chuan, an thu ka awih lo ṭan a ni,” tiin a sawi. Elie-a chuan nun kawng chi hnih zawh ṭanin, thlarau lama a nu leh pate ṭanpuina zawng zawng chu a hnâwl vek a. In a chhuahsan hnu chuan nungchang bawlhhlawhnaah a inhnamhnawih a ni. Chuti chung pawhin, a châng chuan, a ṭhiante zînga pakhat chu Bible thute a sawipui ṭhîn a. Ani chuan: “Ka ṭhianpa hnêna Jehova chungchâng ka hrilh tam poh leh, keimah ngei pawhin ka ngaihtuah nasa lehzual a. Ka thinlunga ṭhang chho lova awm reng Bible thutak chi—ka nu leh pate’n theih tâwp chhuaha ka thinlunga ṭhantîr an tum—chu zawi muangin a ṭhang chho ṭan a ni,” tiin a sawi. A tâwpah, Elie-a chu thutakah a rawn kîr leh a ni.c A naupan têt aṭanga Jehova hmangaih tûra theih tâwp chhuaha an lo zirtîr avânga a nu leh pate lâwm dân tûr chu han mitthla teh!—2 Tim. 3:14, 15.

18. Engtin nge Jehova hmangaih tûra theih tâwp chhuaha an fate zirtîrtu nu leh pate chu i thlîr?

¹⁸ Nu leh pate u, Jehova chibai bûktu tûr chhuan thar enkawl seilian tûra chanvo ropui tak pêk in ni a. (Sâm 78:4-6) Chu chu thil awlsam a ni lo; theih tâwp chhuaha in fate in ṭanpui avângin thinlung takin kan fak a che u! In fate chu Jehova hmangaih tûr leh a kaihhruaina mila enkawl seilian tûra theih tâwp chhuaha in ṭanpui zawm zêl a nih chuan, hmangaihna nei tak kan Pa vâna mi chu a lâwm hle ang tih in chiang thei a ni.—Eph. 6:4.