“Ka Hnênah Paradis-ah I Awm Ve Ang”

1. Isua’n a thih hma lawk khân, a bula mi sual pakhat hnênah eng thu nge a sawi? (Luka 23:39-43)

ISUA leh a bula mi sual pahnihte chu hrehawm tuarin thi mai thei dinhmunah an ding mêk a. (Lk. 23:32, 33) Chûng mi sual pahnihte chuan Isua chu an nuihsawh a, chu chuan a zirtîr an ni lo tih a tichiang hle. (Mt. 27:44; Mk. 15:32) Mahse, pakhat zâwk chuan a rilru a thlâk a. Ani chuan: “Isu, i Ram i thlen hunah mi hre reng ang che,” tiin a sawi a. Isua chuan: “Vawiinah hian tih tak meuhvin ka hrilh a che, ka hnênah Paradis-ah i awm ve ang,” tiin a chhâng a ni. (Luka 23:39-43 chhiar rawh.) He mi sual hian Isua’n a rawngbâwl chhûnga “vân Ram” chungchâng a hrilh ṭhin chu a pawm thu finfiahna pakhat mah a awm lo. Chu bâkah, Isua pawhin chu pa chu vân Rama a kal tûr thu a sawi hek lo. (Mt. 4:17) Isua sawi chu leia Paradis lo awm tûr chungchâng a ni. Engvângin nge chutianga kan sawi theih?

2. Engtin nge mi sual inlamlêta chu Juda mi a ni tih kan hriat?

² Chu mi sual inlamlêta chu Juda mi a nih ngei a rinawm a. Ani chuan pakhat zâwk hnênah: “Pathian meuh pawh i hlau na nge? Thuhmun rengin an hrem che hi?” tiin a sawi a ni. (Lk. 23:40) Juda mite chuan Pathian pakhat chauh an bia a; mahse, hnam dangte chuan pathian tam tak an ring thung. (Ex. 20:2, 3; 1 Kor. 8:5, 6) Chûng mi sualte chu Juda mi ni lo se chuan, mi sual inlamlêta chuan heti hian a zâwt mai thei, “Pathiante meuh pawh i hlau na nge?” tiin. Chu bâkah, Isua chu hnam dangte ni lovin, “Israel hnam berâm bo hnênah” tirh a ni. (Mt. 15:24) Pathianin Israelte hnênah mitthite a kaitho leh ang tih a hriattîr tawh a. Mi sual inlamlêta chuan chumi chungchâng chu a hriat ngei a rinawm a, a thusawi aṭangin Jehova’n Isua chu Pathian Rama rorêl tûrin a kaitho vang tih a ring niin a lang. Ani chuan Pathianin a kaitho vang tih a inbeisei niin a lang bawk.

3. Isua’n Paradis chungchâng a sawi khân mi sual inlamlêta chuan eng nge a ngaihtuah mai theih? Hrilhfiah rawh. (Genesis 2:15)

³ Mi sual inlamlêta chuan Juda mi a nih angin, Jehova’n Evi leh Adama a dahna hmun Paradis chungchâng chu a hre ngei ang a. Chuvângin, ani chuan Isua sawi Paradis chu he leia awm huan mawi tak a ni tih a hre chiang hle ang.—Genesis 2:15 chhiar rawh.

4. Mi sual pakhat hnêna Isua thusawi chuan eng nge min ngaihtuahtîr ang?

⁴ Chu mi sual hnêna Isua thusawi chuan Paradis-a nun chu eng ang nge ni ang tih ngaihtuah tûrin min chêttîr tûr a ni. A nihna takah chuan, Lal Solomona rorêlna muanawm tak aṭangin Paradis chungchângah thil ṭhenkhat kan zir thei a. Solomona ropui zâwk Isua leh a rorêlpuite’n he leiah hian dinhmun ṭha zâwk an thlentîr ang tih kan beisei thei a ni. (Mt. 12:42) ‘Berâm dangte’ chuan Paradis-a chatuana nung thei tûra an tih ngaite an ngaihven tûr a ni tih a chiang hle.—Joh. 10:16.

PARADIS-A NUN CHU ENG ANG NGE NI ANG?

5. Paradis-a nun chu eng ang nge a nih i rin?

⁵ Paradis-a nun chungchâng i ngaihtuah hian i rilruah eng nge lo lang? Chawlh hahdamna huan mawi tak, Eden huan ang chu i mitthla pawh a ni thei a. (Gen. 2:7-9) Zâwlnei Mika’n Pathian mite chungchânga “mi tinte chu an grêp hrui hnuaiah leh an theipui kûng hnuaiah an ṭhu zâwk ang,” tia hrilh lâwkna thu a ziah chu i hre chhuak mai thei bawk a. (Mik. 4:3, 4) Ei tûr tam tak a awm tûr thu sawina Bible chângte chu i rilruah a lo lang mai thei bawk. (Sâm 72:16; Is. 65:21, 22) Ei tûr tuihnai tak taka khat dawhkân kîla huan mawi taka ṭhu angin i inmitthla thei bawk a ni. Boruak chu thlaite leh pangpâr rimtui tak taktea khat angin i mitthla thei bawk ang. Chu bâkah, mitthi tho lehte pawh tiamin, i chhûngte leh i ṭhiante hlim taka an inkâwm khâwma an nui rite pawh i hriat ngei a rinawm. Chûng zawng zawng chu duhthusâm mai a ni lo. He leiah hian a thleng ang tih kan chiang thei a ni. Chutih rualin, Paradis-ah chuan hna lungawithlâk takte pawh kan thawk bawk ang.

6. Paradis-a nun chu eng ang nge ni ang? (Milem en rawh.)

⁶ Jehova chuan kan hnathawha hlimna nei tûrin min siam a. (Thur. 2:24) A bîk takin, Krista Kum Sâng Rorêl chhûng chuan kan buai hle ang. Hrehawm nasa tak ata dam khawchhuakte leh mitthi tho leh maktaduai têlte chuan thawmhnaw te, ei tûr te, leh chênna tûr hmunte an mamawh dâwn a. Chûng mamawhte pe tûr chuan hnathawh tûr hlimawm tak tak a va tam dâwn êm! Evi leh Adama’n an chênna huan an enkawl a ngai ang khân, keini pawhin lei Paradis enkawl theihna chanvo hlu kan nei ang. Jehova leh a thiltum chungchâng hriatna nei mang lo, tho leh mi maktaduai tam takte zirtîr leh Isua hun hma daiha mite hnêna an thih hnua thilthleng chanchin hre tûra ṭanpui a hlimawm dân tûr chu han mitthla bawk teh!

7. Eng nge kan rin ngheh tlat theih a, engvângin nge?

⁷ Paradis lo thleng tûrah chuan inrem takin kan chêng ang a, kan mamawh apiangte kan neiin, ṭha taka inrêlbâwl a ni ang tih kan ring nghet tlat thei a ni. Engvângin nge? Jehova’n a Fapa rorêlna hnuaia nun chu eng ang nge ni ang tih min hmuhtîr tawh vâng a ni a. Chu chu Lal Solomona rorêlna chanchin aṭangin kan hre thei a ni.

LAL SOLOMONA RORELNA—PARADIS TEMCHHINNA

8. Engtin nge Sâm 37:10, 11, 29-a thute hi Lal Davida’n a ziah hnuah a thlen famkim? (He magazine-a “Chhiartute Zawhna” tih chu en rawh.)

⁸ Lal Davida chu, lal fing leh rinawm takin ro a rêl huna nun awm dân tûr chungchâng ziak tûra thlarauva thâwk khum a ni a. (Sâm 37:10, 11, 29 chhiar rawh.) Mite hnêna Paradis lo thleng tûr chungchâng kan sawipui hian, Sâm 37:11 thu hi kan chhiarpui fo ṭhîn a. Chutianga kan tih chhan chu Isua’n Tlâng Chunga a Thusawiah, chu thu chuan hma lam hunah thlen famkimna a la nei dâwn tih a târ lan vâng a ni. (Mt. 5:5) Mahse, Davida thusawite chuan Lal Solomona hun laia nun awm dân tûr chungchâng a târ lang bawk. Israel rama Solomona a lal lai khân, Pathian mite chuan “hnute tui leh khawizu luanna” ramah remna leh hausakna nasa tak an chên a ni. Pathianin: “Ka thuruatte chu in zawm . . . chuan, . . . he ram hi râlmuang takin ka awmtîr ang a, in mu hle hle ang a, tu man an tihlau lo vang che u,” tiin a lo sawi tawh si a. (Lev. 20:24; 26:3, 6) Chûng thutiamte chu Solomona rorêl chhûngin a thleng dik a ni. (1 Chro. 22:9; 29:26-28) Chu bâkah, Jehova chuan mi suaksualte an “awm tawh dâwn si lo” tiin a tiam bawk. (Sâm 37:10) Chuvângin, Sâm 37:10, 11, 29-a thute hi hmân lai hunah a thleng famkim tawh a, kan hma lawkah a thleng famkim leh bawk ang.

9. Seba lalnuin Lal Solomona rorêlna chungchângah eng nge a sawi?

⁹ Lal Solomona rorêlna hnuaia Israelte’n remna an chen thu chuan Seba lalnu beng a lo thleng a. Ani chu thil nih dân dik tak hre tûrin hmun hla tak aṭangin Jerusalem panin a zin a ni. (1 Lal. 10:1) Solomona lalram a enfiah hnuah, ani chuan: “A zâtve pawh mi lo hrilh hlei nêm, . . . I mite, hêng i chhiahhlawh, i bula awm fova i finna thu ngaithla fovate hi an nihlawh e!” tiin a sawi a ni. (1 Lal. 10:6-8) Mahse, Solomona rorêlna hnuaia dinhmunte chu Jehova’n a Fapa Isua hmanga mihringte tâna thil a tihsak tûrte temchhinna lek a ni.

10. Eng kawngtein nge Isua chu Solomona aia a ropui zâwk?

¹⁰ Isua chu Solomona aiin kawng engkimah a ropui zâwk a. Solomona chu mi ṭha famkim lo, a rorêlnaa thil sual pawi takte titu, a hnua Pathian mite chunga harsatna thlentu a ni a. Isua erawh chu Rorêltu ṭha famkim, thil tisual ngai lo a ni. (Lk. 1:32; Heb. 4:14, 15) Ani chuan Setana thlentîr fiahna khirh takte a paltlang a. Krista chuan thil sual a ti ngai lo vang tih leh a khua leh tuite tân thil ṭha lo a thlentîr ngai lo vang tih a finfiah tawh a. Ani chu kan neih theih azawnga Lal ṭha ber a ni.

11. Tute’n nge Isua chu rorêlpui ang?

¹¹ Isua chuan mihringte ngaihsak tûr leh lei atâna Pathian thiltum tithleng famkim tûra a rorêlpui tûr mi 1,44,000 a nei ang. (Thup. 14:1-3) Anni chuan leia an awm laiin fiahnate leh harsatna tam tak an paltlang tawh avângin leia awmte thiltawn chu an hriatthiampui ang. A bîk takin, hêng a rorêlpuite hian eng nge an thawh dâwn?

HRIAK THIHTE’N ENG NGE AN TIH ANG?

12. Jehova’n mi 1,44,000-te hnênah eng hnathawh tûr nge a pêk ang?

¹² Isua leh a rorêlpuite thawh tûr chu Solomona hnathawhte aiin a ropui zâwk hle a. Lal Solomona chuan ram pakhat chhûnga mipui maktaduai têl a enkawl a ngai a. Mahse, Pathian Rama rorêltute chuan khawvêl puma chêng mi tlûklehdingâwn têlte ngaihsaka an ṭanpui a ngai ang. Jehova’n mi 1,44,000-te hnêna chanvo a pêk chu a va ropui tak êm!

13. Eng mawhphurhna danglam bîk tak nge Isua rorêlpuite’n an neih ang?

¹³ Isua angin mi 1,44,000-te chuan lal leh puithiam niin rawng an bâwl ang. (Thup. 5:9, 10) Mosia Dân hnuaiah puithiamte chuan mite thlarau lam hrisêlna an ngaihsak rualin, an mawhphurhna bul ber chu an tisa lam hrisêlna vênhimsak a ni. Dân chu ‘thil ṭha, lo awm tûrte hlimthla’ a ni a, chuvângin Pathian mite tisa lam leh thlarau lam mamawh ngaihsak tûrin Isua rorêlpuite’n chanvo danglam bîk tak an nei tûr anga thutâwp siam chu a inâwm hle. (Heb. 10:1) Hêng lal leh puithiamte’n he leia awm Pathian Ram khua leh tuite an biak pawh dân tûr chu tûnah chuan kan la hre lo va. Jehova ruahmanna chu eng pawh ni se, Paradis lo awm tûrah chuan leia awmte’n an mamawh ang kaihhruaina an dawng ang tih chu kan ring tlat thei a ni.—Thup. 21:3, 4.

PARADIS-A NUNG THEI TURIN ‘BERAM DANGTE’ CHUAN ENG NGE AN TIH NGAI?

14. ‘Berâm dangte’ leh Krista unaute inlaichînna chu eng nge ni?

¹⁴ Isua’n a rorêlpui tûrte chu “pâwl tlêmte” tiin a ko va. (Lk. 12:32) Ani chuan pâwl dang “berâm dang” tia sawi a nei bawk. Hêng pâwl pahnihte hi pâwl khatah an infinkhâwm a ni. (Joh. 10:16) Anni chuan hna an thawkho mêk a, lei hi Paradis-a siam a nih hunah pawh an la thawk chhunzawm zêl ang. Chutih hunah chuan, “pâwl tlêmte” chu vânah an awm ang a, ‘berâm dangte’ erawh chuan leiah chatuana nun beiseina an nei ang. Mahse, Paradis-a nung thei tûrin ‘berâm dangte’ chuan tûnah hian thil tih ngai an nei a ni.

15. (a) Engtin nge ‘berâm dangte’ chuan Krista unaute an ṭanpui? (b) Engtin nge dâwra unaupa chu i entawn theih? (Milem en rawh.)

¹⁵ Mi sual inlamlêta khân a thih hmain Krista’n a tâna a tihsakte avânga a lâwmzia lantîr theihna hun remchâng a nei hman lo va. Chumi nêna inang lo takin, keini ‘berâm dangte’ hian Isua chunga kan lâwmzia lantîr theihna hun remchâng tam tak kan nei thung. Entîr nân, amah kan hmangaihzia chu hriak thih a unaute kan cheibâwl dân hmangin kan lantîr a ni. Isua chuan a unaute an cheibâwl dân azirin berâmte chu ro a rêlsak ang. (Mt. 25:31-40) Krista unaute chu thu hrilh leh zirtîr siamna hnaa ṭhahnemngai taka telin kan ṭanpui thei a. (Mt. 28:18-20) Chuvângin, Bible zirna ṭanpuitu atâna min pêk, Chatuanin I Hlim Thei! tih lehkhabu ang chîte chu ṭha taka hman kan duh a ni. Bible zirpui i la nei rih lo a nih chuan, engvângin nge mi a tam thei ang berte Bible zirpuia sâwm chu thiltuma i insiam loh vang?

16. Pathian Ram khua leh tui ni tûra inbuatsaih tûrin tûnah eng nge kan tih theih?

¹⁶ Jehova’n Paradis-a chêng tûra a duh zâwng ang mi ni tûrin chuta kan chên hun chu kan nghah kher a ngai lo va. Tûnah pawh hian kan thusawi leh thiltiha rinawm a, insûm thei tak niin a duh zâwng mi kan ni thei a ni. Pathian Jehova, kan kawppui te, leh kan Kristian unaute chungah kan rinawm thei bawk. He khawvêl suaksuala kan awm laia Pathian tehnate zawm kan tum nasat poh leh Paradis-a a duh zâwng anga nun chu a awlsam lehzual ang. Kan thiamna leh nungchangte tihmasâwnin chuta chêng tûr chuan kan inbuatsaih tih kan lantîr thei bawk. He magazine-a “‘Lei Rochung’ Tûrin I Inpeih Tawh Em?” tih thuziak chu en rawh.

17. Hun kal tawha kan thil sual tih avângin lunghnualin kan awm reng tûr a ni em? Hrilhfiah rawh.

¹⁷ Hun kal tawha kan thil sual tih pawi takte avânga inthiam lohna kan neih chu theihnghilh tûrin theih tâwp kan chhuah tûr a ni a. Tlanna inthawina chu thil “tihsual luih” nâna chhuanlama hman kan tum ngai tûr a ni lo. (Heb. 10:26-31) Mahse, thil sual pawi tak kan tih a, kan inchhîr tak zet a, Jehova ṭanpuina zawnga kan nungchang kan siam ṭha a nih chuan, ani chuan nasa takin min ngaidam ang tih kan ring nghet tlat thei a ni. (Is. 55:7; Tirh. 3:19) Isua’n Pharisaite hnêna: “Mi fel takte lam tûra lo kal ka ni lo va, mi sualte zâwk lam tûra lo kal ka ni asin,” tia a sawi hi hre reng ang che. (Mt. 9:13) Tlanna inthawina chuan kan sualna zawng zawng khuh bo tûr khawpin thil a tithei a ni.

PARADIS-AH CHATUANIN I NUNG THEI

18. Isua bula thi, mi sual pa chu eng thu nge sawipui i duh ang?

¹⁸ Paradis-a Isua betu mi sual pa bia angin i inmitthla thei em? In pahnih chuan Isua tlanna avânga in lâwmzia in sawi ngei ang. Isua lei lam nun tâwp lam dârkâr rei lote chhûnga thilthleng chungchâng leh Isua’n a dîlna a chhân lêt laia a awm dân tam lehzuala hrilh tûr chein i zâwt pawh a ni thei. Kawng leh lamah chuan, ani pawhin Setana kalhmang tâwpna hun chhûnga nun chu eng ang nge ni tih a zâwt mai thei che. Amah ang mite hnêna Pathian Thu zirtîr chu chanvo ropui tak a va ni dâwn êm!—Eph. 4:22-24.

19. Engvângin nge Paradis-a nun chu thil ninawm a nih loh vang? (A kâwma milem en rawh.)

¹⁹ Paradis-a nun chu a ninawm ngai lo vang. Mi hmuh châkawm tak takte leh hna lungawithlâk tak takte thawh tûr kan nei reng ang. Chûng zawng zawng aia ṭha zawk chu nî tin kan Pa vâna mi kan hre chiang lehzual thei ang a, a thil min pêkte kan hlimpui thei bawk ang. A chungchâng zir belh tûr tam tak a awm ang a, a thil siam chungchâng zir tûr tam tak a awm bawk ang. Kan dam rei poh leh Pathian kan hmangaihna chu a thûk zual zêl ang. Paradis-ah chatuanin kan nung thei tih min tiamtu Pathian Jehova leh Isua chungah kan va lâwm tak êm!