Thil Dik leh Dik Lo: Kan Zavai Atâna Zawhna

I kal ngai lohna hmunah zin dâwn ta la, eng nge i tih ang?

1. 1. I kalna tûr nia i hriatna lamah i kal ang.

2. 2. Kawng hre tûra i ngaihte chu i zui ang.

3. 3. Kaihruaitu rin tlâk, GPS, map, a nih loh leh chu kawng hre chiangtu ṭhian rinchhan tlâk tak chu i râwn ang.

Pakhatna emaw, pahnihna emaw kan thlang a nih chuan kan kal duhna hmuna thleng lovin, hmun dang daihah kan thleng pawh a ni thei a. Mahse, pathumna kan thlang a nih chuan, kan kal tumna hmunah kan thleng ngei ang tih kan chiang thei a ni.

Kan nun hi hma lam hun hlimawm taka mi hruai tûra kan beisei zin kawng ang a ni a. Mahse, kan tum rama kan thlen leh thlen loh chu thu tlûkna kan siam huna kaihhruaina kan zawnah a innghat thui hle a ni.

Thu tlûkna kan siam a tam zâwk chuan kan nunah nghawng thui tak a neih loh rualin, thu tlûkna dangte chu a pawimawh hle a. Chûngte chuan nungchang lama kan thlîr dân—thil dik leh dik lo chungchânga kan thlîr dân—chu a târ lang a ni. Chûng thu tlûknate chuan keimahni leh kan hmangaih takte chu a ṭha zâwngin emaw, a ṭha lo zâwngin emaw hun rei tak chhûng a nghawng dâwn a. Chûng zîngah chuan hêngte hi a tel a ni:

• Mipat hmeichhiatna leh inneihna

• Rinawmna, hna leh, sum leh pai

• Fate enkawl seilen dân

• Mi dangte cheibâwl dân

Engtin nge chûng dinhmuna i thu tlûkna siam chuan nangmah leh i chhûngte tân hma lam hun hlimawm tak a thlen ang tih i chian theih?

Kan zavai atâna zawhna chu hei hi a ni: Engin nge thil dik leh dik lo chungchânga thu tlûkna ṭha siam tûra min ṭanpui thei?

He magazine hian Bible chu nungchang lama kaihruaitu rinchhan tlâk a nih chhan leh Bible-in a ṭanpui theih dân che a târ lang ang.