Jehova’n Mi Zawng Zawng Simtîr A Duh

1. Simnaah chuan engte nge tel?

THIL sual eng emaw kan tih hian simna kan lantîr a pawimawh tak zet a. Bible sawi dânin, simna lantîrtu tu emaw chuan a thil sual tih chungchânga a ngaih dân chu thlâk danglamin a inlamlêt a, tihnawn tawh loh a tum nghet tlat a ni.—Mt. 3:8; Tirh. 3:19; 2 Pet. 3:9.

2. Engvângin nge simna chungchâng chu kan hriatthiam ṭheuh a ngaih? (Nehemia 8:9-11)

² Nî tina thil kan tihsual ṭhin avângin mi zawng zawngin simna chungchâng kan hriatthiam a ngai a. Evi leh Adama thlah kan nih angin sual leh thihna kan rochun ṭheuh va. (Rom 3:23; 5:12) Tu mah bâng bîk kan awm lo. Tirhkoh Paula anga mi rinawm langsâr takte pawhin sual an do a ngai a ni. (Rom 7:21-24) A nih chuan, kan thil tihsualte avângin kan lunghnual reng tûr tihna a ni em? Ni lo ve, Pathian Jehova chu zahngaihnaa khat a ni a, hlim tûrin min duh a ni. Nehemia hun laia Judate kha lo ngaihtuah ta ila. (Nehemia 8:9-11 chhiar rawh.) Pathian chuan an thil tihsualte avânga lungngai taka an awm reng chu a duh lo va, amah an biakna aṭanga hlimna an neih chu a duh zâwk a ni. Simnain hlimna a thlen tih a hria a. Chuvângin, chumi chungchâng chu min zirtîr a. Kan sualte kan sim a nih chuan, kan Pa khawngaihna ngah tak chuan min ngaidam ang tih kan ring nghet tlat thei a ni.

3. He thuziakah hian eng nge kan sawiho vang?

³ Tûnah, simna chungchâng chu lo zir belh ta ila. He thuziakah hian chumi chungchânga thil pathum kan sawiho vang a. Pakhatnaah, Jehova’n Israel mite hnêna simna chungchânga a thil zirtîr chu kan sawiho vang a. Tichuan, thil sual titute an sim theihna tûra Jehova’n a ṭanpui dân kan ngaihtuahho bawk ang a. A tâwp berah, simna chungchânga Isua hnungzuitute thil zir chu kan sawiho bawk ang.

JEHOVA’N ISRAEL MITE A ZIRTIR SIMNA CHUNGCHANG CHU

4. Jehova’n Israel hnam chu simna chungchângah eng nge a zirtîr?

⁴ Jehova’n Israel mite chu hnam anga a rêlbâwl khân, thu a thlunpui a. A dânte an zawm chuan a vênghimin, mal a sâwm dâwn a ni. Chûng dânte chungchângah chuan: “He thupêk, tûna pêk che u hi in tân a har lutuk lo va, a hlat lo bawk che u a ni,” tiin a hrilh a ni. (Deut. 30:11, 16) Mahse, pathian dangte biakna ang chi thiltih hmanga a laka an hel chuan malsâwmna chu a la kîr leh ang a, hrehawm an tuar dâwn a ni. Chutiang hunah pawh Pathian duhsakna chu an dawng leh thei a. ‘Jehova, an Pathian lama hawiin a thupêkte chu an zâwm leh thei a ni.’ (Deut. 30:1-3, 17-20) Thu danga sawi chuan, an sualte an sim thei a. An sim chuan, Jehova’n a hnaihin mal a sâwm leh dâwn a ni.

5. Engtin nge Jehova’n a mite chungah a beidawng lo tih a lantîr? (2 Lalte 17:13, 14)

⁵ Jehova hnam thlan chu a lakah an hel nawn fo va. Milem an biak bâkah, thil tenawm dang tam tak an ti a. Chuvângin, hrehawm an tawrh phah a ni. Mahse, Jehova chu a mi thuawih lote chungah chuan a beidawng lo va. Sima, a hnêna kîr leh tûrin zâwlneite a tîr nawn fo a ni.—2 Lalte 17:13, 14 chhiar rawh.

6. Engtin nge Jehova’n a zâwlneite hmangin simna pawimawhzia a mite hnêna a zirtîr? (Milem en bawk rawh.)

⁶ Jehova’n a zâwlneite hmangin a mite chu a vaukhânin, a zilh fo va. Entîr nân, Jeremia hmangin: “Rinawm lo Israel, lo kîr rawh. . . . Thinrimin ka en reng lo vang che, zahngai thei tak ka ni si a. . . . Ka thinur reng dâwn si lo. Lalpa, in Pathian laka in hel hi thil sual in ti a ni tih hre rawh u,”tiin a sawi a ni. (Jer. 3:12, 13, C.L. Re-edited.) Joela kaltlangin: “In thinlung zawng zawngin . . . ka lam lo hawi rawh u,” tiin a sawi bawk a. (Joel. 2:12, 13) Isaia chu: “Intifai rawh u; ka mit hmuh phâk lohvah in thiltihte hi a sualna chu dah bo rawh u; sual tih hi bâng tawh ula,” tiin a sawitîr a. (Is. 1:16-19) Tichuan, Ezekiela pawh: “Mi sual thihnaah hian lâwmna rêng ka nei em ni? A kawngte chu a hawisana, a nunna zâwk lo chu? . . . Mî thihnaah chuan lâwmna ka nei hauh si lo va. . . . Chuvângin, inlamlêt ula, nung rawh u,” tia sawi tûrin a hrilh bawk a ni. (Ezek. 18:23, 32) Jehova chuan mite chu chatuana nung tûra a duh avângin, an inlamlêt, a nih loh leh an sim a hmuh hian a lâwm hle! Mahse, thil sual titute an inthlâk danglam hma chu ṭanpuina pe lovin a nghâk chut chut em? Entîrna dang ṭhenkhat i lo en ang u.

7. Jehova’n a mite chu zâwlnei Hosea te nupa chanchin hmangin eng nge a zirtîr?

⁷ Jehova’n a mite chu zâwlnei Hosea leh a nupui Gomeri nuna thilthlengte hmanga a zirtîr dân hi lo chhinchhiah ang che. Gomeri chuan Hosea chu mipa hrang hrangte lakah a uirêsan a ni. A dinhmun chu beisei bo a ni em? Thinlung hretu Pathian Jehova chuan Hosea hnênah: ‘Kal leh ta la, hmeichhia, mi dang duh lai, uirenu chu va hmangaih rawh, Israela thlahte chu pathian dang lam hawi mah se, LALPAN a hmangaih reng ang bawk hian,’ tiin a hrilh a ni. (Hos. 3:1; Thuf. 16:2) Hosea nupui chu a la sim lo tih chhinchhiah ang che. Chuti chung chuan, Hosea chu a nupui ngaidama hruai leh tûrin a hrilh a ni.a Chutiang bawkin, Jehova chu a mi luhlul takte chungah a beidawng lo va. Thil sual tam tak ti mah se, anni chu la hmangaih rengin, sima insiamṭha tûrin a ṭanpui chhunzawm zêl a ni. He entîrna hian, ‘thinlung fiahtu’ Jehova chuan tu emawin thil sual pawi tak a tih lai rengin sima inlamlêt tûrin a ṭanpui dâwn tih a târ lang em? (Thuf. 17:3) I lo en ang u.

JEHOVA’N THIL SUAL TITUTE CHU SIM TURA A TANPUI DAN

8. Engtin nge Jehova’n Kaina chu sim tûra a ṭanpui? (Genesis 4:3-7) (Milem en bawk rawh.)

⁸ Kaina chu Evi leh Adama te fa tîr a ni a. A nu leh pa hnên aṭangin sual tih châkna a rochun a ni. Chu bâkah, Bible chuan: “Ama thiltihte a sual a,” tiin a sawi bawk. (1 Joh. 3:12) Chu chu hâlral thilhlan a hlan laia Jehova’n ‘Kaina leh a thilhlan erawh chu a lawm ve’ loh chhan a ni thei a. Kaina chu insiamṭhat ahnêkin, “a thinur êm êm a, a hmêl chu a lo dur ta khup a.” Jehova’n eng nge a tih? Kaina chu a bia a ni. (Genesis 4:3-7 chhiar rawh.) Ani chu ngilnei taka chhûtpuiin, beiseina a pe a, thil sual a tih loh nân a vaukhân tih chhinchhiah ang che. Lungchhiatthlâk takin, Kaina chuan a zâwm duh lo va. Sim tûra Jehova ṭanpuina chu a pawm lo a ni. Chu chhân lêtna ṭha lo tak chu a hnua thil sual titute sim tûra ṭanpui loh phah nân Jehova’n a hmang em? Hmang lo ve!

9. Engtin nge Jehova’n Davida chu sim tûra a ṭanpui?

⁹ Jehova’n Lal Davida chu a hmangaih êm êm a. “Ka thinlung ang pu mi,” tiin a ko hial a ni. (Tirh. 13:22) Mahse, Davida chuan uirêna leh tualthahna pawh tiamin sual pawi tak a ti a. Mosia dân ṭanchhan chuan, ani chu thi tlâk a ni. (Lev. 20:10; Num. 35:31) Mahse, Jehova’n sim tûrin a duh a.b Chuvângin, Davida’n simna a lantîr hma pawhin zâwlnei Nathana chu a hnênah a tîr a ni. Nathana chuan Davida rilru hneh tûrin entîrna a hmang a. Chu chuan a rilru a khawih êm avângin a sim ta a ni. (2 Sam. 12:1-14) A simzia târ langtu fakna hla a phuah a. (Sâm 51, a chunga thuziak) Chu fakna hla chuan thil sual titu mi tam tak chu a thlamuanin, sim tûrin a chêttîr a ni. Jehova’n a chhiahhlawh duh tak Davida chu sim tûra hmangaihna nei taka a ṭanpui avângin kan lâwm hle a ni lâwm ni?

10. Jehova chu kan chungah a dawhtheiin, ngaihdam a peih tih hriatna chuan engtin nge a awmtîr che?

¹⁰ Jehova’n sual chu a hua a, engti kawng zâwng mahin a ngaizam lo a ni. (Sâm 5:4, 5) Mahse, sualna kan nei vek tih a hria a, min hmangaih êm avângin sual chu do thei tûrin min ṭanpui a. Sual râpthlâk tak titute pawh inchhîra, amah hnaih tûra ṭanpui a tum reng bawk a ni. Chumi hriat chu a va thlamuanthlâk tak êm! Jehova dawhtheihna leh ngaihdam peihna kan ngaihtuah hian, a chunga rinawm reng tûr leh thil sual kan tih hunah pawh sim vat tûra chêttîrin kan awm a ni. Tûnah, Kristian kohhrana mite chu simna chungchâng zirtîr an nih dân i lo sawiho vang u.

SIMNA CHUNGCHANGA ISUA HNUNGZUITUTE ZIR CHU

11-12. Isua’n a thu ngaithlatute hnênah a pa ngaihdamna ngahzia engtin nge a zirtîr? (A milem en rawh.)

¹¹ C.E. kum zabi khatnaah chuan Messia a lo lang a. Thuziak hmasaa kan zir tawh angin, Jehova chuan Baptistu Johana leh Isua Krista chu mite hnêna sim a pawimawhzia zirtîr tûrin a hmang ve ve a ni.—Mt. 3:1, 2; 4:17.

¹² Isua chuan rawng a bâwl chhûngin, a thu ngaithlatute hnênah a Pa ngaihdamna ngahzia a zirtîr a. Fapa tlân bo tehkhin thu a sawi khân, chu chu chiang takin a târ lang a ni. Hun eng emawti chhûng chu, chu tlangvâl chuan sual kawng a zawh a. Mahse, “a inhriat chhuah vêleh” a pa hnênah a kîr leh a ni. Engtin nge a pa chuan a lo dawnsawn? A fapa chu “hla taka a la awm laiin a pain a lo hmu a, a khawngaih êm êm a, a tlân a, a ir a chuktuah a, a fâwp ngaih ngawih a,” tiin Isua’n a sawi a ni. A pa ina hlawhfa anga awm tûrin dîl a tum a; mahse, a pa chuan “ka fapa” tia duat taka kovin a chhûngkuaah a lâwm lût leh a ni. A pa chuan: “A bo va, kan hmu leh ta a nih hi,” tiin a sawi a ni. (Lk. 15:11-32, NWT.) Isua leia a lo kal hma, vâna a awm lai khân, a pain an simzia lantîrtu mi tam tak chunga chutiang khawngaihna a lantîr dân chu a hmu ngei ang. Isua tehkhin thu hian min thlamuanin, kan Pa zahngaihna ngahzia a va târ lang chiang tak êm!

13-14. Tirhkoh Petera’n simna chungchângah eng nge a zir a, mi dangte hnênah chumi chungchâng eng nge a zirtîr? (Milem en bawk rawh.)

¹³ Tirhkoh Petera chuan Isua hnên aṭangin simna leh ngaihdamna chungchâng tam tak a zir a. Ani chuan vawi tam tak thil tisual mah se, Isua’n ngaihdam a peih reng a ni. Entîr nân, a Lalpa chu a hriat loh thu vawi thum lai a pha a. Chuvângin, inthiam lohna nasa tak neiin lungchhe takin a awm a ni. (Mt. 26:34, 35, 69-75) Mahse, a thawh leh hnuah Isua chu Petera hnênah a inlâr a; amaha a awm laia inlâr a nih a rinawm. (Lk. 24:33, 34; 1 Kor. 15:3-5) Chumi ṭumah chuan Isua’n a simzia lantîrtu a tirhkoh chu hmangaihna nei takin a thlamuan a ni.—Mk. 16:7.

¹⁴ Petera chuan ama thiltawn ngei aṭangin mi dangte chu simna leh ngaihdamna chungchâng a zirtîr thei a. Pentikost kût ni hnu rei vak lovah, Petera chuan thu sawiin Juda mi tam tak hmaah Messia chu an tihhlum a nih thu a sawi a. Chutih rualin, “In sualte ngaihdam a nih theih nân sim ula, hawikîr leh rawh u. Chutichuan, Jehova hnên aṭang ngeiin hahdamna hunte a lo thleng thei ang,” tia sawiin anni chu hmangaihna nei takin a fuih a ni. (Tirh. 3:14, 15, 17, 19, NWT.) Chuvângin, simna chuan thil sual titu chu hawi kîra—a ngaihtuah dânte leh a thiltih dân ṭha lote siam ṭhaa—Pathian tilâwmtu nun thar zawh tûrin a chêttîr tih Petera’n a târ lang a ni. Jehova’n an sualnate chu a thai bo, a nih loh leh a tibo hmak ang tih a târ lang bawk. Kum tam tak hnuah, Petera chuan Kristiante hnênah: ‘Jehova chuan tu ma boral a duh lo va, mi zawng zawng simtîr duhin nangmahni lamah a dawhthei a ni zâwk,’ tiin a sawi a ni. (2 Pet. 3:9) Chu chu Kristiante tân sual pawi tak pawh tiamin, thil sualte an tih huna beisei tûr thlamuanthlâk tak a va ni êm!

15-16. (a) Engtin nge tirhkoh Paula’n ngaihdamna chungchâng chu a zir? (1 Timothea 1:12-15) (b) A dawta thuziakah eng nge kan sawiho vang?

¹⁵ Tarsa khaw mi Saula chu ngaihdam a nih theih nân a sim a ngai a. Ani chu Krista duh tak hnungzuitute râwng taka tiduhdahtu a ni. Kristian tam tak chuan a dinhmun chu ṭanpui theih loh, beisei bo anga an thlîr a rinawm. Mahse, tho leh Isua erawh chuan chutiang mihring ngaihtuah dân ṭha famkim lo chu a nei ve lo. A Pa nên Saula mize ṭhate chu an hmu a. Chuvângin, Isua chuan: “Ani chu . . . ka thlan a ni,” tiin a sawi a. (Tirh. 9:15, NWT.) Saula chu sim tûra ṭanpui nân thilmak tihtheihna hial a hmang a ni. (Tirh. 7:58–8:3; 9:1-9, 17-20) Saula, a hnua tirhkoh Paula tia hriat chuan Kristian a nih hnuah, a chunga lantîr khawngaihna leh zahngaihna chu a sawi lang fo va. (1 Timothea 1:12-15 chhiar rawh.) Chu lâwmnaa khat tirhkoh chuan: “Pathianin i sim theihna tûrin ngilnei takin ṭanpui che a tum,” tiin a zirtîr a ni.—Rom 2:4, NWT.

¹⁶ Paula’n Korinth khuaa Kristian kohhrana nungchang bawlhhlawhna nêna inkaihhnawih thilthleng a hriat khân, engtin nge hma a lâk? A hmalâk dân chuan hmangaihna nei taka Jehova zilhhauna leh zahngaihna lantîr a pawimawhzia chungchâng thil tam tak min zirtîr a ni. A dawta thuziakah chu thilthleng chu chiang lehzualin kan sawiho vang.