Rinnain Kal Zêl Rawh

1. Engvângin nge tirhkoh Paula’n a nun a thlîr lêt chuan lungawina a neih?

TIRHKOH Paula chuan tihhlum a ni thuai dâwn tih a hria a. Mahse, a nun a thlîr lêt chuan, lungawinain a khat a ni. Chuvângin, “Ka tlânsiakna kawng ka hlen tawh a, rinna chu ka vawng reng tawh a ni,” tiin a sawi a ni. (2 Tim. 4:6-8) A nunah Pathian rawngbâwl a thlan avângin, a chungah Jehova a lâwm tih a chiang a. Keini pawhin Pathian tilâwmtu thu tlûkna ṭhate siam kan duh a ni. Engtin nge kan tih theih?

2. Rinnaa kal tih awmzia chu eng nge ni?

² Paula chuan amah leh Kristian mi rinawm dangte chungchângah: “Thil hmuh theihte ena kal lovin, rinnain kan kal zâwk si a,” tiin a sawi a. (2 Kor. 5:7, NWT) Eng a sawi duhna nge ni? Bible-a “kal” tih thu mal hian, tu emaw nun kawng thlan a kawh châng a awm ṭhîn a. A hmuh theihte ena kal chuan a thil hmuh, a thil hriat leh, rilru vei zâwngte ṭanchhan chauhvin thu tlûkna a siam ṭhîn. Chutih rualin, rinnaa kal chuan Pathian Jehova chunga a rinna ṭanchhanin thu tlûknate a siam a. A thiltihte chuan Pathianin lâwmman a pe ang tih leh, A thu, Bible-a Pathian thurâwnte’n hlâwkna a thlen ang tih a rin nghehzia a lantîr a ni.—Sâm 119:66; Heb. 11:6.

3. Rinnaa kalna chuan eng hlâwknate nge a thlen? (2 Korinth 4:18)

³ Ni e, kan zavai hian kan hriat theihnate ṭanchhanin thu tlûknate kan siam ṭhîn a. Mahse, thu tlûkna pawimawhte kan siam hunah kan hmuh leh kan hriat te ṭanchhan chauhva thu tlûkna kan siam a nih chuan, buaina lian tak kan tâwk thei a ni. Engvângin nge? Kan hriat theihnate chu a rin tlâk reng loh vâng a ni. Chu bâkah, Pathian duh zâwng leh a kaihhruainate chu kan ngaihthah thei bawk. (Thur. 11:9; Mt. 24:37-39) Rinnaa kan kal erawh chuan, “Lalpa lâwm zâwng” nêna inmilin thu tlûknate kan siam thei lehzual ang a. (Eph. 5:10) Pathian thurâwnte zawmna chuan chhûngrila thlamuanna leh hlimna dik tak min pe ang. (Sâm 16:8, 9; Is. 48:17, 18) Chu bâkah, rinnaa kan kal zêl chuan, chatuan nunna kan nei dâwn a ni.—2 Korinth 4:18 chhiar rawh.

4. Engtin nge rinnaa kan kal leh kal loh kan hriat theih ang?

⁴ Engtin nge rinnaa kan kal leh kal loh kan hriat theih ang? Hêng zawhnate hi kan ngaihtuah thei a ni: Eng ṭanchhanin nge thu tlûknate kan siam? Kan thil hmuh theihte chauhvah kan innghat em? Nge ni a, Pathian Jehova kan rinna leh a thurâwnte ṭanchhanin thu tlûknate kan siam zâwk? Tûnah, dinhmun pawimawh tak pathumtea rinnaa kan kal reng theih dân i lo ngaihtuah ang u. Chûngte chu: hna thawh tûr thlan hunah, kawppui tûr thlan hunah leh, theocratic kaihhruaina kan dawn hunah te a ni. Chûng dinhmun tinte atâna thu tlûkna ṭhate kan siam theih nâna ngaihtuah ngai thilte chu i lo sawiho vang u.

HNA THAWH TUR THLAN HUNAH

5. Hna thawh tûr kan thlan hunah eng nge kan ngaihtuah ang?

⁵ Kan zavai hian mahni leh kan chhûngte mamawh phuhrûksak theih chu kan duh ṭheuh va. (Thur. 7:12; 1 Tim. 5:8) Hna ṭhenkhat chu hlawh a ṭha hle a. Kan nî tin mamawhte bâkah, hma lam hun atâna inkhâwl lâwk thei tûrin min pui thei a ni. Hna dang lehte chu hlawh a tlêmin, chhûngkaw mamawh bulpuite chauh a phuhru pawh a ni thei. Ni e, hna thawh tûr kan thlan hunah kan hlawh zât tûr ngaihtuah chu thil inâwm tak a ni. Mahse, chumi ṭanchhan chauhva thu tlûkna kan siam a nih chuan, hmuh theihte ena kal kan ni ang.

6. Hna thawh tûr thlan hunah engtin nge rinnaa kan kal theih ang? (Hebrai 13:5)

⁶ Rinnaa kan kal a nih chuan, kan hna thawh tûr thlanin Jehova nêna kan inṭhian ṭhatna a nghawng theih dân kan ngaihtuah tel bawk dâwn a. Heti hian kan inzâwt thei a ni: ‘He hna hian Jehova huat zâwng thiltihnaahte min inhnamhnawihtîr ang em?’ (Thuf. 6:16-19) ‘Ka thlarau lam thiltihte a tibahlahin ka chhûngte nên hun rei tak chhûng min inhlattîr ang em?’ tiin. (Phil. 1:10) Chûng zawhnate chu ‘aw’ tia i chhâng a nih chuan, hna hmuh a harsa hle a nih pawhin, chu hna pawm loh chu a finthlâk zâwk ang. Rinnaa kan kal avângin Jehova’n kan mamawhte min pe ang tih kan rinnghehzia lantîrtu thu tlûknate kan siam dâwn a ni.—Mt. 6:33; Hebrai 13:5 chhiar rawh.

7-8. Engtin nge South America-a unaupa pakhat chu rinnaa a kal? (Milem en bawk rawh.)

⁷ South America-a chêng unau Javier-aa chuan, rinnaa kal a pawimawhzia a hmu chhuak a. Heti hian a sawi a ni: “Ka hna hmasa aia hlawh a lêt hniha hmuh theihna, ka tui zâwng tak hna pakhat ka dîl a,” tiin. Mahse, Javier-a chuan pioneer thawh a châk êm êm a. Chuvângin, heti hian a sawi zawm a ni: “Hna pakhat atân interview ka chhâng a. Ka chhân hmain, Jehova’n ka tâna ṭha ber tûr a hria tih rinnghehna nên a hnênah ka ṭawngṭai a. Hna ṭha chu hmuh ka duh ngei mai; mahse, ka thlarau lam thiltumte hlen thei lo tûra min dâltu hna chu thawh ka duh lo a ni,” tiin.

⁸ Heti hian a sawi zawm leh a: “Interview ka chhân chhûng chuan, manager chuan hna thawh hun pângngai ai bâka ka thawh tam a ngaih ziah tûr thu a sawi a. Ka rawngbâwlna avângin chu chu ka tih theih loh tûr thu ṭha takin ka hrilh a ni,” tiin. Ni e, Javier-a chuan chu hna chu a pawm ta lo a ni. Chawlhkâr hnih hnuah pioneer a thawk ṭan ta zâwk a. Chumi kum vêkah chuan, hunbi neia thawh theih hna a hmu ta a ni. Ani chuan: “Pathian Jehova’n ka ṭawngṭainate min ngaihthlâksakin ka pioneer hun duan nêna inmil hna min pe a. Amah leh ka unaute rawngbâwlsak tûra hun tam lehzual ka hman theih avângin ka hlim tak zet a ni,” tiin a sawi.

9. Trésor-a thiltawn aṭangin eng nge i zir?

⁹ A nih leh, kan hna thawh mêkin rinnaa min kaltîr lo tih kan hriat chuan eng nge kan tih ang? Congo rama unau Trésor-a thiltawn hi lo ngaihtuah ta ila. “Ka hna thar chu ka hmuh theih azawnga hna ṭha ber a ni a. Mite zah ka kai a, ka hna hmasa aiin a lêt thumin ka hlawh a sâng bawk a ni,” tiin a sawi a. Mahse, Trésor-a chuan hun tam tak pea hna a thawh a ngaih avângin a inkhâwm thei lo ṭhîn a. Dik lo taka thiltih ṭhenkhat a thuppui a ngai bawk a ni. A hna aṭanga bân a duh a; mahse, hna nei lova awm a hlauthâwng a ni. Engin nge ani chu ṭanpui? “Habakuka 3:17-19-na hian hna ka chân a nih pawhin, Jehova’n min enkawl ang tih hre thiam tûrin min ṭanpui a. Chuvângin, ka hna aṭangin ka bâng a. Hnathawhna pu tam takte chuan mite’n hna ṭha hmu tûrin chhûngte leh thlarau lam thiltihte pawh tiamin, thil engkim chân an inhuam an ring a. Jehova leh ka chhûngte nêna kan inlaichînna ka humhim tlat theih avângin ka hlim a ni. Kum khat hnuah, samkhai taka nunga ka thlarau lam thiltihte atâna hun tam lehzual pe thei tûra min ṭanpuitu hna nghet hmu tûrin Jehova’n min ṭanpui a. Sum leh pai lamah harsatna tawh châng nei mah ila, Jehova kan dah hmasak ber chuan, min enkawl ang,” tiin a sawi a ni. Ni e, Jehova thurâwnte leh thutiamte kan ring a nih chuan, rinnain kan kal zawm zêl thei ang a, a malsâwmna kan dawng ang.

KAWPPUI TUR THLAN HUNAH

10. Kawppui tûr thlan hunah engin nge hmuh theihte ena kal min nihtîr thei?

¹⁰ Inneihna hi Pathian Jehova hnên aṭanga thilpêk a ni a. Chuvângin, kawppui neih duhna chu thil pângngai tak a ni. Unaunu chuan unaupa pakhat chu kawppui tûr atâna a ngaihtuah hunah a mizia, a lan dân, mite’n an hmuh dân, a sum leh pai dinhmun, a chhûngkaw mawhphurhnate leh, amah a tihhlim leh hlim loh te a ngaihtuah thei a.b Chûng chu thil pawimawh a ni teh meuh mai. Mahse, chûng thilte chauh a ngaihtuah a nih chuan hmuh theihte ena kal a ni dâwn a ni.

11. Kawppui tûr kan thlan hunah engtin nge rinnaa kan kal theih? (1 Korinth 7:39)

¹¹ Kawppui tûr an thlan huna a thurâwn zâwmtu unaute chu Jehova’n a va chhuang dâwn tak êm! Entîr nân, anni chuan ngaihzâwng an nei dâwn a nih pawhin, “naupan lutuk tawh loh” hun chauhva nei tûra fuihna chu an zâwm a. (1 Kor. 7:36) A bîk takin, Jehova’n pasal ṭha leh nupui ṭha ni tûra neih ngai mizia a sawite ṭanchhanin kawppui tûr an thlang a ni. (Thuf. 31:10-13, 26-28; Eph. 5:33; 1 Tim. 5:8) Thuhretu ni lote’n ngaihvenna an lantîr a nih pawhin, 1 Korinth 7:39-a târ lan, “Lalpaa awm mi chauh” nei tûra fuihna chu an zâwm tlat a. (Chhiar rawh.) Tu dang zawng aiin Jehova’n an rilru lam mamawh a phuhrûksak thei tih ring tlat chungin rinnain an kal chhunzawm zêl a ni.—Sâm 55:22.

12. Rosa-i thiltawn aṭangin eng nge i zir?

¹² Colombia rama pioneer unaunu Rosa-i thiltawn hi han ngaihtuah teh. A hnathawhnaah Thuhretu ni lo pa pakhat chuan ngaihvenna a lantîr a. Rosa-i pawh chuan a duh ṭan ta hle a. “Mi fel tak a ni a. Khawtlâng thiltihnaahte a inpe êm êm a, ka chungah a ṭha hle bawk a. Thuhretu a ni lo tih chauh lo chu, thil dang zawng zawngah chuan pasal atâna ka duh zâwng tak a ni. Chuvângin, amah hnâwl chu thil harsa tak a ni a. Kawppui neih châk hle mah ila, unaute zîngah ka kawppui tûr âwm ka hmu thei si lo. Mal ngawih ngawih ni hian ka inhria,” tiin a sawi. Mahse, Rosa-i chu a hmuh theihteah chauh a innghat lo va. A thu tlûkna siamin Jehova nêna an inṭhian ṭhatna a nghawng theih dân tûr a ngaihtuah a ni. Chuvângin, chu pa chu be tawh lovin theocratic thiltihnaahte a intibuai reng ta zâwk a. A hnu lawkah, Lalram Chanchin Ṭha Puangtute School-a kal tûra sâwm a ni a. Tûnah chuan, special pioneer niin rawng a bâwl mêk a ni. “Jehova’n nasa takin hlimna min pe,” tiin Rosa-i chuan a sawi. Kan rilru vei zâwng nêna inkûngkaih thilahte chuan rinnaa kal a awlsam reng lo thei a; mahse, chutianga tihna chuan hlâwkna min thlen ziah ṭhîn a ni.

THEOCRATIC KAIHHRUAINA KAN DAWN HUNAH

13. Theocratic kaihhruainate kan dawn hunah, engin nge hmuh theihte ena kal tûra min chêttîr thei?

¹³ Jehova kan biaknaa min ṭanpui tûrin—tualchhûng upate, bial kantute, branch office, a nih loh leh Governing Body hnên aṭangin—theocratic kaihhruaina kan dawng ṭhîn a. A nih leh, kaihhruaina ṭhenkhat min pêk chhan kan hriat thiam loh hunah engtin nge ni ang? Kaihhruainate’n kan tâna thil a tih harsat theih dânte chauh kan ngaihtuah mai thei a. Kaihhruaina min petu unaute ṭhat famkim lohna kan ngaihtuah ṭan pawh a ni thei a ni.

14. Theocratic kaihhruainate kan dawn hunah engin nge rinnaa kal tûra min ṭanpui ang? (Hebrai 13:17)

¹⁴ Rinnaa kan kal chuan, thil engkim hi Jehova thununna hnuaiah a awm tih leh, kan dinhmunte a hria tih chu kan ring a. Chuvângin, kaihhruainate chu inhuam takin kan zâwm vat a ni. (Hebrai 13:17 chhiar rawh.) Chutianga kan zawmna chuan kohhranah inpumkhatna a tinghet tih kan hria a. (Eph. 4:2, 3) Hmahruaitu unaute chu ṭha famkim lo ni mah se, Jehova’n kan thuawihna chu mal a sâwm ang tih kan ring tlat a. (1 Sam. 15:22) A hun takah, tihdanglam ngai kaihhruaina eng pawh chu a rawn siam ṭha dâwn a ni.—Mik. 7:7.

15-16. Engin nge unaupa pakhat chu kaihhruaina a dawn chungchânga rinhlelhna nei chung pawha rinnaa kal tûra ṭanpui? (Milem en bawk rawh.)

¹⁵ Rinnaa kal hlâwkna târ langtu thiltawn pakhat hi lo ngaihtuah ta ila. Peru-ah chuan Spanish ṭawng chu hman tam ber ni mah se, mi tam tak chuan tualchhûng ṭawngte an hmang a. Chûng ṭawngte zînga pakhat chu Quechua ṭawng a ni a. Kum eng emawti chhûng chu, Quechua ṭawng hmang unaute chuan an rawngbâwlna bialah Quechua ṭawng hmangte chu an zawng ṭhîn a ni. Mahse, sawrkâr thupêk zûlzuiin thu hrilh dân chu siamrem a ni a. (Rom 13:1) Chuvângin, mi ṭhenkhat chuan rawngbâwlna a ṭhuanawp an ring a ni. Mahse, unaute’n tih dân thar chu an zawm avângin, Jehova’n an thawhrimna chu mal a sâwm a, Quechua ṭawng hmang tam tak an hmu thei ta a ni.

¹⁶ Quechua ṭawng hmang kohhrana kohhran upa Kevin-a chuan, kaihhruaina thar an dawn laia a chhân lêt dân chungchângah: “‘Quechua ṭawng hmangte chu engtin nge kan zawn hmuh tâk ang?’ tiin ka ngaihtuah a,” tiin a sawi. Kevin-a chuan eng nge a tih? “Thufingte 3:5 hi ka ngaihtuah a, Mosia chungchâng pawh kha ka ngaihtuah a. Jehova’n Aigupta ram aṭanga Israel mite hruai chhuaka Tuipui Sen lama hruai tûra Mosia a tih khân, Aigupta mite man mai theihna dinhmunah an ding a ni. Mahse, Jehova thu a âwih a, a thuawihna chu nasa taka malsâwmin a awm a ni,” tiin a sawi. (Ex. 14:1, 2, 9-11, 21, 22) Kevin-a chuan a thu hrilh dân chu inhuam takin a siamrem a ni. Eng nge a rah chhuah? Heti hian a sawi zawm a ni: “Jehova’n mal min sâwm dân hi mak ka ti. Tûn hma chuan, rawngbâwlnaa kan kal fê hnuah chauh Quechua ṭawng hmang mi pahnih khat kan hmuh châng a awm ṭhîn a. Tûnah chuan, Quechua ṭawng hmang mi tam tak awmna bialahte kan kal tawh zâwk a ni. Chuvângin, tîtîna nuam tak te, tlawhkîr te leh, Bible zirpui tam lehzualte kan nei thei a ni. Inkhâwm zât pawh kan pung sawt a ni,” tiin. Ni e, rinnaa kan kal hian Jehova’n mal min sâwm ziah ṭhîn a ni.

17. He thuziak aṭangin eng nge i zir?

¹⁷ Dinhmun pawimawh tak pathuma rinnaa kan kal zawm zêl theih dân kan sawiho tawh a. Chutih rualin, intihhlimna, zirna, a nih loh leh fa enkawl dân chungchânga thu tlûkna kan siam hunte pawh tiamin, kan nun kawng tinrêngah rinnaa kan kal chhunzawm zêl a ngai a ni. Thu tlûkna eng pawh kan siam a ngaih hunah kan hmuh theihte chauh ni lovin, Jehova nêna kan inlaichînna, a thurâwnte leh, min enkawl tûra a thutiamte ṭanchhanin thu tlûkna kan siam tûr a ni. Chutianga kan tih chuan “LALPA kan Pathian chu kumkhuain” kan be thei ang.—Mik. 4:5.