“Tu Rawng Nge In Bâwl Dâwn Thlang Mai Rawh U”

1. Hlimna dik tak nei tûrin eng nge kan tih ngai a, engvângin nge? (Isaia 48:17, 18)

KAN PA vâna mi chuan min hmangaih tak zet a, tûnah leh nakin hunah pawh hlim taka nung tûrin min duh a ni. (Thur. 3:12, 13) Thil ropui tak tak tih theihna neiin min siam mah se, mahnia ro inrêl tûr emaw, thil dik leh dik lo chungchânga tehna insiam tûr emawin theihna min pe lo. (Thur. 8:9; Jer. 10:23) Hlimna dik tak nei thei tûr chuan a rawng kan bâwl a, a duh zâwng anga kan nun a ngai tih a hria a ni.—Isaia 48:17, 18 chhiar rawh.

2. Setana’n eng nge ring tûra min duh a, chu dâwt thu chu engtin nge Jehova’n a chhân lêt?

² Setana chuan Jehova tel lovin kan hlim thei tih leh mihring ro inrêlna chu a hlawhtling thei tih ring tûrin min duh a. (Gen. 3:4, 5) Chu chu a dik lohzia finfiah tûrin Jehova chuan mihringte chu hun eng emawti chhûng mahnia ro inrêl a phalsak a ni. Mahse, mihring rorêlna a hlawhchham tih chu hnial rual lohvin a chiang a. Kawng leh lamah chuan, Jehova duh zâwng tia nun lungawithlâk tak nei, a hmei a pate chanchin tam tak chu Bible-ah a chuang a ni. Chûng zînga langsâr tak chu Isua Krista a ni a. A hmasain, Jehova rawngbâwl a thlan chhante chu lo enho ta ila. Tichuan, kan Pa vâna miin kan biak a phû chhan kan bih chiang ang a. A tâwp berah, Jehova rawngbâwl kan thlan chhan ṭhenkhat kan ennawn bawk ang.

ISUA’N JEHOVA RAWNGBAWL A THLAN CHHAN

3. Isua’n eng thlêmna nge a tawh a, eng duh thlanna nge a siam?

³ Isua leia a awm lai khân, tu rawng nge a bâwl dâwn tih chungchângah duh thlanna a siam a ngai a. Baptisma a chan hnu lawkah, Setana’n vawi khat lek chibai a bûk chuan khawvêla lalram zawng zawng a pêk tûr thu sawiin a thlêm a ni. Mahse, Isua chuan: “Setan, kal bo rawh! ‘I Pathian Jehova chauh chibai i bûk tûr a ni a, ama rawng chauh i bâwl tûr a ni,’ tih ziak a ni,” tiin a chhâng a ni. (Mt. 4:8-10, NWT) Engvângin nge Isua’n chu duh thlanna chu a siam? A chhan ṭhenkhat i lo ngaihtuah ang u.

4-5. Isua’n Jehova rawngbâwl a thlan chhan ṭhenkhat chu engte nge ni?

⁴ Isua’n Jehova rawngbâwl a thlan chhan bul ber chu hmangaihna vâng a ni a—a Pa a hmangaihna chu a thûkin tihchhiat theih a ni lo. (Joh. 14:31) Chu bâkah, Jehova rawngbâwl chu a tih tûr dik tak a ni tih a hria a. (Joh. 8:28, 29; Thup. 4:11) Jehova chu nunna Hnâr a ni tih leh, a rinchhan tlâkin a thil phal tih a hre bawk. (Sâm 33:4; 36:9; Jak. 1:17) Jehova’n ani chu thu dik a hrilh reng ṭhîn a, a neih zawng zawng pawh a pêk a ni. (Joh. 1:14) Chumi nêna inkalh takin, Setana chuan thihna a thlen a. Ani chu duhâmna leh mahni hmasialnaa khat dâwt pa a ni. (Joh. 8:44) Isua’n chûng zawng zawng chu a hriat avângin, Setana entawna Jehova laka hel chu a tum ngai lo.—Phil. 2:5-8.

⁵ Isua’n Jehova rawngbâwl a thlan chhan dang leh chu, a rinawmnain a hlen chhuah tûrte hmuh a châk vâng a ni a. (Heb. 12:2) A rinawm tlat chuan, a Pa hming a tithianghlim dâwn tih leh Diabola chawh chhuah tawrhna zawng zawng a titâwp thei dâwn tih a hria a ni.

JEHOVA’N KAN BIAK A PHU CHHAN

6-7. Engvângin nge tûn laia mite’n Jehova an biak loh va, engvângin nge ani chuan kan biak a phû?

⁶ Tûn laia mi tam takin Pathian Jehova an biak loh chhan chu a mize duhawm takte leh an tâna a thil tihsak zawng zawngte an hriat loh vâng a ni a. Chu chu Atheni khuaa tirhkoh Paula thusawi ngaithlatute chungchângah pawh a dik a ni.—Tirh. 17:19, 20, 30, 34.

⁷ Paula chuan Pathian chu “mite hnêna thaw te, nunna te leh, thil zawng zawngte petu a ni,” tih leh “amah avângin kan nung, kan chê, kan awm,” tiin a thu ngaithlatute chu a hrilhfiah a. Pathian chu ‘mi pakhat aṭanga lei pum pui luahtu tûr hnam zawng zawng’ Siamtu a ni a. Chuvângin, ani chuan kan biak a phû a ni.—Tirh. 17:25, 26, 28, NWT.

8. Jehova chuan eng nge a tih ngai loh vang? Hrilhfiah rawh.

⁸ Siamtu leh, lei leh vâna Chungnungber a nih angin, Jehova chuan mite chu a duh chuan Amah be tûrin a tilui thei a. Mahse, chutiang chuan a ti ngai lo vang. Chu aiin, a awm ngei a ni tih leh, mi tinte chu min hmangaih tak zet tih finfiahna min pe zâwk a. Ani chuan mi a tam thei ang berte chu chatuana a ṭhian ṭha takte ni tûrin a duh a ni. (1 Tim. 2:3, 4) Chuvângin, Jehova chuan mihringte tâna a thiltumte leh thil ṭha a la tihsak tûrte chungchâng chu mite hnêna hrilh tûrin zirtîrna min pe a. (Mt. 10:11-13; 28:19, 20) Ani chuan kohhran anga min rêlbâwlin, hmangaih taka min enkawltu tûr upate min pe a ni.—Tirh. 20:28.

9. Jehova’n eng kawngtein nge mi zawng zawng a hmangaih tih a târ lan?

⁹ Jehova hmangaihna chu amah a awm tih ring lotute a cheibâwl dân aṭangin a hriat theih a. Hêngte hi han ngaihtuah teh: Mihring chanchin tluan chhuakah, mi tam tak chu thil dik leh dik lo chungchângah mahni tehnate milin an nung a. Chuti chung chuan, an nun zawma nun hlimawm tak an neih theih nâna an mamawhte chu Pathianin a pe chhunzawm zêl a ni. (Mt. 5:44, 45; Tirh. 14:16, 17) Mi dangte nêna inlaichînna duhawm takte nei a, chhûngkuate din a, an hnathawh rahte seng theihna a pe bawk a. (Sâm 127:3; Thur. 2:24) Chûngte chuan, kan Pa vâna miin mi zawng zawng a hmangaih tih chiang takin a târ lang a ni. (Ex. 34:6) Tûnah chuan, Pathian Jehova rawngbâwl kan thlan chhante leh, a rawngbâwl thlangtute mal a sâwm dânte chu i lo enho vang u.

JEHOVA RAWNGBAWL KAN THLAN CHHAN

10. (a) Jehova rawng kan bâwl chhan bul ber chu eng nge ni? (Matthaia 22:37) (b) Jehova dawhtheihna chu engtin nge i hlâwkpui? (Sâm 103:13, 14)

¹⁰ Isua angin, Jehova rawngbâwl kan thlan chhan bul ber chu amah hmangaihna thûk tak kan neih vâng a ni a. (Matthaia 22:37 chhiar rawh.) A miziate chungchâng kan zir hian a lama hîpin kan awm a ni. Entîr nân, kan chunga dawhtheihna a lantîr dân hi han ngaihtuah teh. Israelte’n a thu an âwih loh khân, ani chuan: “Mi tinin an awm dân ṭha lo hawisan sela, in awm dân siam ṭha rawh u,” tiin a hrilh a. (Jer. 18:11) Jehova chuan ṭha famkim lo leh vaivut mai kan ni tih a hria a ni. (Sâm 103:13, 14 chhiar rawh.) Jehova dawhtheihna leh a mize dang duhawm takte i chhût ngun hian, chatuana a rawngbâwl tûra chêttîrin i awm a ni lo’m ni?

11. Kan Pa vâna mi rawng kan bâwl chhan ṭhenkhat chu engte nge ni?

¹¹ Jehova rawng kan bâwl chhan chu kan tih tûr dik tak a nih vâng a ni bawk a. (Mt. 4:10) Chu bâkah, rinawm taka a rawng kan bâwlnain a hlen chhuah tûr chu kan hre bawk. Kan rinawmna chuan Jehova hming a tithianghlim a, Setana chu dâwt pa a nihzia a finfiah bâkah, kan Pa thinlung a tilâwm a ni. Chuvângin, tûna Jehova rawngbâwl kan thlan chuan chatuana a rawngbâwl theihna kan nei ang!—Joh. 17:3.

12-13. Jane-i leh Pam-i te thiltawn aṭangin eng nge kan zir?

¹² Kan naupan lai aṭangin Jehova hmangaihna thûk tak kan nei chho thei a. Kan upat zêl rualin chu hmangaihna chu a zual zêl dâwn a ni. Entîr nân, Jane-i leh Pam-i te unau chungchâng hi lo ngaihtuah ta ila.a Bible an zir ṭan chuan Jane-i chu kum sâwm pakhat a ni a, Pam-i chu kum sâwm a ni. An nu leh pate chuan Bible zirna neih duh lo mah se, chawlhkâr tâwpa an ruala an fate church-a an inkhâwm dâwn phawt chuan, Thuhretute nêna an inkawm chu an phalsak a ni. Jane-i chuan: “Bible aṭanga Thuhretute thil min zirtîr chuan ruih theih thil khawih tûr leh nungchang bawlhlawhnaa inhnamhnawih tûra ṭhiante nêksâwrna chu hnâwl thei tûrin min ṭanpui a ni,” tiin a sawi.

¹³ Kum rei lo te hnuah thuchhuahtu an rawn ni a. A hnuah, pioneer thawk pahin an nu leh pa upa tawh takte chu an enkawl a ni. Jane-i chuan an thiltawnte chu a ngaihtuah lêtin: “Jehova’n a ṭhiante chu a enkawl chhunzawm zêl tih leh, 2 Timothea 2:19-a sawi angin, ‘Lalpa chuan ama tate chu a hria,’ tih chu a takin ka tawng a ni,” tiin a sawi.

14. Engtin nge kan thusawi leh thiltihte’n Jehova hming chu sawichhiatna laka a tihthianghlim? (Milem en bawk rawh.)

¹⁴ Pathian Jehova hming chu sawichhiatna zawng zawng laka thenfai kan duh a. Hei hi han ngaihtuah teh: Ṭhian mi ngilnei, thil phal leh, ngaihdam peih tak i nei a. Ni khat chu, ani chu mi nunrâwng leh dik lo taka thil ti ṭhîn angin tu emaw chuan a puh a ni. Eng nge i tih ang? A hming ṭhatna chu i humhim dâwn a ni. Chutiang bawkin, Setana leh a thununna hnuaia awmte’n Jehova chungchânga dâwt thute theh darha a hming tihchhiat an tum hian, A chungchânga thutak chu mite hnêna hrilhin ṭhahnemngai takin a hming kan humhim a. (Sâm 34:1; Is. 43:10) Kan thusawi leh thiltihte hmangin, Jehova chu kan hmangaihin a rawngbâwl kan thlang tih kan lantîr a ni.

15. Tirhkoh Paula chuan a thiltumte siamrem chu engtin nge a hlâwkpui? (Philippi 3:7, 8)

¹⁵ Jehova pawm tlâka a rawngbâwl tûr, a nih loh leh tam lehzuala a rawngbâwl tûrin nuna kan thiltumte chu inhuam takin kan siamrem a. Entîr nân, tirhkoh Paula chuan Krista hnung zuia Jehova rawngbâwl tûrin khawtlânga a dinhmun sâng tak chu a kalsan a ni. (Gal. 1:14) Chuvângin, Jehova rawngbâwlnaah thiltawn ṭha tak tak a neih bâkah, Krista nêna vâna rorêl theihna chanvo pawh a dawng a ni. Pathian rawngbâwl tûra a thu tlûkna siam avâng chuan a inchhîr ngai lo va, keini pawh kan inchhîr ngai lo vang.—Philippi 3:7, 8 chhiar rawh.

16. Julia-i thiltawn aṭangin eng nge kan zir? (Milem en bawk rawh.)

¹⁶ Jehova rawngbâwl chu kan nuna kan dah pawimawh ber chuan, tûnah leh nakin hunah mal min sâwm dâwn a ni. Unaunu Julia-i thiltawn hi han ngaihtuah teh. Thutak a hriat hma chuan, a naupan têt aṭangin church-a zaipâwlah a tel ṭhîn a. Opera zai thiam tak pakhat chuan a theihna chu hmuhsakin zirtîrna a pe ta a. A hnu lawkah, Julia-i chu rawn lâr chhovin hmun hming thang tak takahte a zai ṭhîn a ni. Rimawi lam zirna school lâr taka a kal laiin a classmate pakhat chuan Pathian chungchâng sawipuiin, Pathian hming chu Jehova a ni tih a hrilh a. A hnu lawkah chuan, kâr khatah vawi hnih Bible a zir ta a. Tichuan, zaia ei zawn aiin Jehova rawngbâwl chu a nuna dah pawimawh ber tûrin thu tlûkna a siam ta a ni. Chu chu thu tlûkna awlsam a ni lo. “Mi tam tak chuan ka theihna chu a lo thlâwnah ka chantîr a ni tiin min hrilh a. Mahse, ka nun pum chu Jehova rawngbâwlnaa hman ka duh a ni,” tiin a sawi. Tûnah, kum 30 chuang kal taa a thu tlûkna siam chu engtin nge a ngaih? Julia-i chuan: “Rilru thlamuanna ka nei a, Jehova’n nakinah ka thinlung duh zâwng zawng zawng min phuhrûksak ang tih ka ring nghet tlat a ni,” tiin a sawi.—Sâm 145:16.

JEHOVA RAWNG CHU BAWL CHHUNZAWM ZEL RAWH!

17. Hun hmanhmawhthlâk taka kan awmna chuan Pathian rawngbâwl tûra duh thlanna siam tawhte leh la siam lote chungah eng nghawng nge a neih?

¹⁷ Kan chênna hun hi a hmanhmawhthlâk tawh hle a. Tirhkoh Paula chuan: “Rei lo tê achinah lo kal tûra chu a lo kal dâwn si a, rei a rial tawh lo vang,” tiin a sawi a ni. (Heb. 10:37) Chu chuan kan chungah eng nghawng nge a neih? Mite’n Jehova rawngbâwl tûra duh thlanna an siam theih hun chu a tam tawh lo va. (1 Kor. 7:29) Pathian rawngbâwl kan thlang tawh a nih chuan fiahnate tâwk mah ila, chu chu “rei lo tê” chauh a ni dâwn tih kan hria a ni.

18. Isua leh Jehova’n eng ti tûrin nge min fuih?

¹⁸ Isua’n a zirtîrte chu a hnung zui tûr mai ni lovin, zui reng tûrin a fuih a. (Mt. 16:24) Chuvângin, kum tam tak chhûng Jehova rawng kan lo bâwl tawh a nih chuan, a rawngbâwl chhunzawm zêl tûrin theih tâwp i chhuah ang u. A rawngbâwl tûra kan duh thlanna mila nung tûrin kan thawh rim a ngai a. Chu chu thil awlsam ni lo mah se, tûnah ngei pawh hlimna leh malsâwmna tam tak kan nei thei a ni.—Sâm 35:27.

19. Gene-a thiltawn aṭangin eng nge kan zir?

¹⁹ Mi ṭhenkhat chuan Jehova rawngbâwl tûr chuan a lutuka inpêk a ngai niin an hria a. Ṭhalai i nih chuan, Jehova rawng i bâwl avângin chân nei niin i inhria em? Ṭhalai unaupa Gene-a chuan: “Jehova Thuhretu ka nih avângin khuahkhirha awm niin ka inhria a. Inkhâwmte leh rawngbâwlna atâna hun ka hman laiin, ka ṭhian tam tak chu party-naahte kalin ngaihzâwngte an nei a, tharum thawhna tel video games-te khêlin nun nuam tak an hmang niin ka hria a ni,” tiin a sawi. Chutianga ngaihtuahna chuan a chungah eng nghawng nge a neih? Ani chuan: “Nun chi hnihin ka nung ṭan a. A tîrah chuan a nuam hle. Mahse, chu chuan hlimna tluantling min pe lo. Chuvângin, Bible sawite nunpui a hlâwkzia ka ngaihtuah ṭan a; tichuan, thinlung zawng zawnga Jehova rawngbâwl tûrin thu tlûkna ka siam a ni. Chuta chin chu, Jehova’n ka ṭawngṭaina zawng zawng min chhânsak niin ka hria,” tiin a sawi a ni.

20. Eng nge tih kan tum tlat ang?

²⁰ Sâm ziaktu chu Jehova hnêna zaiin heti hian a sawi a: “Mi, i biak in hung chhûng kawtlaiahte awm thei tûra i thlana, i kiang i pantîra chu, a eng a thâwl e,” tiin. (Sâm 65:4) Chuvângin, Josua’n: “Kei leh ka chhûngte erawh hi zawngin LALPA rawng a ni kan bâwl dâwn ni,” tia sawia thu tlûkna a siam angin, keini pawh Jehova rawngbâwl chhunzawm zêl i tum tlat ang u.—Jos. 24:15.