Kan Mal Ngai Lo

1-2. (a) Engvângin nge harsatnate chu mahniin kan hmachhawn ngai lo tia kan sawi theih? (b) He thuziakah hian eng nge kan sawiho vang?

HARSATNA lian tak kan tawh hian ram ngaw pilril taka kawng bo angin kan inhre thei a. Mahse, harsatnate chu mahni chauhvin kan hmachhawn lo. Hmangaihna ngah tak kan Pa vâna mi chuan kan harsatnate chu min hriatpui mai ni lovin, tuar chhuak thei tûra ṭanpui min tiam a. “Ka ṭanpui ang che u,” tih thu thlamuanthlâk tak chu a sawi a ni.—Is. 41:10.

² He thuziakah hian kawng chi litea Jehova min ṭanpui dân kan sawiho vang a. Chûngte chu: (1) min kaihhruai dân, (2) kan mamawhte min pêk dân, (3) min vênhim dân leh, (4) min thlamuan dân te a ni. Nunah eng harsatna pawh tâwk mah ila, min theihnghilh loh tûr thu min tiam a. Min thlahthlam ngai dâwn lo va. Chuvângin, kan mal ngai lo vang.

JEHOVA’N MIN KAIHRUAI

3-4. Engtin nge Jehova’n min kaihhruai? (Sâm 48:14)

³ Sâm 48:14 chhiar rawh. Jehova chuan mahnia inkaihruai tûrin min beisei lo. A nih leh, engtin nge tûn laiah amah betu rinawmte chu a kaihhruai? A kaihhruai dân kawng khat chu Bible hmangin a ni. (Sâm 119:105) Jehova chuan thlarauva thâwk khum a Thu hmangin, tûna nun hlimawm zâwk leh hma lam huna chatuana nunna nei tûra min ṭanpuitu thu tlûknate siam tûr leh miziate nei chho tûrin min ṭanpui a.a Entîr nân, lung nih lohna pai reng lo tûr te, kan thiltih zawng zawnga dik taka ti tûr te leh, mi dangte chu thinlung taka hmangaih tûrtein min zirtîr a. (Sâm 37:8; Heb. 13:18; 1 Pet. 1:22) Chûng miziate kan lantîr chuan nu leh pa, kawppui leh, ṭhian ṭha lehzual kan rawn ni ang.

⁴ Chu bâkah, Jehova chuan a Thu-ah kan harsatna ang tâwka kan rilru vei zâwng ang nei vete chanchin a chuantîr a. (1 Kor. 10:13; Jak. 5:17) Chûng mite chanchin chhiara kan zir theihte nunpui chu a lo berah kawng chi hnihin kan hlâwkpui a ni. A hmasain, kan dinhmun anga dinga hlawhtling taka hmachhawntute an awm avângin kan mal lo tih kan rawn hre chho va. (1 Pet. 5:9) A dawtah, kan harsatna tawhte hmachhawn dân tûr kan hre bawk a ni.—Rom 15:4.

5. Jehova’n nunna kawnga min kaihruai tûrin tute nge a hman?

⁵ Jehova chuan unaute hmangin kaihhruaina min pe bawk a.b Entîr nân, bial kantute chuan kohhrante chu tichak tûrin an tlawh ziah a. An thusawite chuan kan rinna a tichakin, kan inpumkhatna duhawm tak chu vawng tûrin min ṭanpui a ni. (Tirh. 15:40–16:5) Kohhran upate pawhin thuchhuahtu tinte hmakhua an ngai tak zet bawk a. (1 Pet. 5:2, 3) Nu leh pate chuan an fate chu thlarau lama kaihruaiin fîm taka ngaihtuahna hmang thiam tûr leh chîn dân ṭhate nei chho tûrin an ṭanpui a. (Thuf. 22:6) Kristian unaunu puitlingte pawhin ṭhalai unaunute tân entawn tûr ṭha an siam a, anni chu thurâwn ṭha takte pein ngilnei takin an fuih ṭhîn a ni.—Tit. 2:3-5.

6. Jehova kaihhruaina hlâwkpui tûrin eng nge kan tih ngai?

⁶ Pathian Jehova chuan kan mamawh kaihhruainate chu min pein a mawhphurhna a hlen tawh a ni. Engtin nge chûngte chu kan ngaihlu tih kan lantîr theih? Thufingte 3:5, 6-na chuan: “I thinlung zawng zawngin LALPA ring la, nangma hriatnaah innghat suh,” tiin a sawi a. Chutianga kan tih chuan “[kan] kawngte chu [min] kawhhmuh zêl ang.” A awmzia chu, buaina tam tak pumpelh tûr leh nun hlimawm zâwk nei tûrin min ṭanpui ang. Jehova chuan hmangaihna nei takin mi mal taka kan hlâwkpui tûr thurâwnte min pêk avângin kan va lâwm tak êm!—Sâm 32:8.

JEHOVA’N KAN MAMAWHTE MIN PE

7. Jehova’n kan mamawhte min pêk dân kawng ṭhenkhat chu engte nge ni? (Philippi 4:19)

⁷ Philippi 4:19 chhiar rawh. Pathian Jehova chuan thlarau lama min kaihhruai mai bâkah, kan mamawh ei tûrte, thawmhnawte leh, chênna tûrte nei tûra kan thawh rimna chu mal min sâwmsak a. (Mt. 6:33; 2 Thes. 3:12) Kan tisa lam mamawhte ngaihtuah chu thil pângngai tak ni mah se, chûngte atâna a lutuka lungkham lo tûrin min fuih a ni. (Mt. 6:25) Engvângin nge? Kan Pa chuan a chhiahhlawh rinawmte’n ṭanpui an mamawh hunah a thlahthlam ngai dâwn loh vâng a ni a. (Mt. 6:8; Heb. 13:5) Kan mamawhte min pe ang tih a sawi chu kan ring thei a ni.

8. Jehova’n Davida chu eng nge a tihsak?

⁸ Jehova’n Davida a ṭanpui dân hi han ngaihtuah teh. Lal Saula laka a tlân chhiat chhûng, hun khirh takahte khân amah leh a mite’n dam khawchhuahna tûra an mamawhte chu a pe a. Chûng hun chhûnga Jehova’n a ngaihsak dân chu ngaihtuah lêtin, Davida chuan: “Naupang ka lo ni tawh a, tûnah tar ka lo ni ta a; nimahsela, mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo,” tiin a ziak a ni. (Sâm 37:25) Jehova’n a hnêna inpumpêk a chhiahhlawhte a ṭanpui dân chu nang pawhin i hmu tawh ngei ang.

9. Chhiatna a lo thlen hian a mite mamawh chu Jehova’n engtin nge a pêk? (Milem en bawk rawh.)

⁹ Chhiatna a lo thlen hunah pawh Jehova’n a mite mamawh chu a pe a. Entîr nân, kum zabi khatnaa ṭâm a tlâk khân, an unaute mamawh chu hmun hrang hranga awm Kristiante chuan an thawn a ni. (Tirh. 11:27-30; Rom 15:25, 26) Tûn laia Pathian mite pawhin chutiang thilphalna chu an lantîr a. Chhiatna a lo thlen hian, an thlenna hmuna ei tûr, tui, thawmhnaw leh, damdawi te ang chi mamawh zualpuite thawn tûrin Pathianin a mite chu a chêttîr a. Construction team-te chuan in leh Kingdom Hall chhiate chu an thawm ṭha a. Jehova mite chuan an in emaw, an hmangaih takte emaw chântute chu Bible thute hmangin an fuihin an thlamuan vat ṭhîn a ni.c

10-11. Borys-a thiltawn aṭangin eng nge kan zir?

¹⁰ Jehova chuan amah la be lotute mamawhte pawh phal takin a pe a. Jehova entawnin, keini pawh kan rinna min ṭâwmpui lotute chunga ngilneihna lantîr tûrin hun remchâng kan zawng ṭhîn a ni. (Gal. 6:10) Chu chuan thu hrilh theihna hun remchâng a siam fo va. Ukraine rama school principal pakhat Borys-a thiltawn hi lo ngaihtuah ta ila. Jehova Thuhretu ni lo mah se, Borys-a chuan Thuhretu zirlaite chu ngilnei taka cheibâwlin an rinna chu a zahsak a. A chênna hmuna indona a chhuah avânga ram chhûnga hmun him zâwk a pan chuan kan unaute’n an ṭanpui a ni. A hnuah, Borys-a chu Krista thih Hriatrengnaah a tel a. A thiltawn chu ngaihtuah lêtin, ani chuan: “Thuhretute chuan min ngaihvenin min ngaihsak hle a. An chungah ka lâwm tak zet a ni,” tiin a sawi.

¹¹ Mite’n kan rinna min ṭâwmpui emaw, ṭâwmpui lo emaw an chunga hmangaihna lantîrin zahngaihna ngah tak kan Pa vâna mi kan entawn thei a. (Lk. 6:31, 36) Mite chunga hmangaihna lantîr tûra ṭan kan lâkna chuan Krista hnungzuitute rawn ni tûra a chêttîr kan beisei a. (1 Pet. 2:12) Mahse, chutiang a nih loh pawhin, pêk chhuahna aṭanga lo awm hlimna nasa tak chu kan nei dâwn a ni.—Tirh. 20:35.

JEHOVA’N MIN VENGHIM

12. Jehova’n a mite chu a huhovin engtia vênhim nge a tiam? (Sâm 91:1, 2, 14)

¹² Sâm 91:1, 2, 14 chhiar rawh. Tûn laiah, Jehova’n thlarau lama vênhim min tiam a. Setana’n biakna dik a tihbawrhbân chu a phal ngai lo vang. (Joh. 17:15) Chu bâkah, “hrehawm nasa tak” a lo thlen hunah chuan Jehova’n a mite thlarau lam mai bâkah, tisa lama vênghim tûra a thutiam chu a hlen ang tih kan ring nghet tlat thei a ni.—Thup. 7:9, 14.

13. Eng kawngtein nge Jehova’n mi mal taka min vênhim?

¹³ Jehova’n a mi mal angin engtin nge min vênhim? Bible hmangin thil dik leh dik lo thliar hrang thiam tûrin min ṭanpui a. (Heb. 5:14) Bible thu bulte nunpuina chuan thlarau lam leh tisa lamah min vênghim a ni. (Sâm 91:4) Chu bâkah, Jehova’n kohhran kaltlangin min vênghim bawk a. (Is. 32:1, 2) Jehova hmangaiha a thu bulte nunpuitute hnaiha kan awm hian, thununna ṭha lote do lêt thei tûrin fuihna leh chakna kan dawng a ni.—Thuf. 13:20.

14. (a) Engvângin nge Pathianin harsatna zawng zawng laka min vênhim loh? (b) Sâm 9:10-na chuan eng nge min tiam? (Footnote en bawk rawh.)

¹⁴ Jehova chuan hmân laia amah betute chu tisa lama vênhim châng a nei a. Mahse, chutiang chuan a ti reng lo. “Beisei loh thilthlengte” avânga tawrh châng kan nei a. (Thur. 9:11, NWT) Chu bâkah, Setana chu bum hmang a ni tih finfiah tûrin A chhiahhlawh ṭhenkhatte’n tihduhdahna leh thihna hial pawh an hmachhawn a phal a ni. (Job. 2:4-6; Mt. 23:34) Tûn laiah pawh chutiang chu a ni a. Jehova’n kan harsatna tawhte chu la bo lo mah se, amah hmangaihtute chu a thlahthlam ngai lo vang tih kan chiang thei a ni.d—Sâm 9:10.

JEHOVA’N MIN THLAMUAN

15. Engtin nge ṭawngṭaina, Pathian Thu leh, kan Kristian unaute chuan min thlamuan? (2 Korinth 1:3, 4)

¹⁵ Korinth thawn hnih 1:3, 4 chhiar rawh. Lu sûnna, lungkhamna, a nih loh leh rilru hahna neih châng kan nei a. Mal nia inhriatna neihtîrtu che dinhmun khirh tak i tâwk mêk pawh a ni thei. I rilru awm dân hriatthiampuitu che an awm em? Jehova’n a hriatthiampui che. Ani chuan min tawrhpui mai bâkah, “kan fiahna tawh zawng zawngah min thlamuan ṭhîn” a ni. Engtin nge? Jehova hnêna thinlung leihbuaa kan ṭawngṭai hian “Pathian thlamuanna, rilru rêng rênga hriat sên loh” chu min pe a ni. (Phil. 4:6, 7) Bible chhûnga Jehova thute kan chhiar hian thlamuanna kan hmu bawk a. Chuta chuang hmangaihna, finna leh, beiseina thute chuan min tiharhvâng a. Chu bâkah, Kristian inkhâwmnate chuan unaute nêna inkawmho theihna hun remchâng duhawm tak leh Bible ṭanchhan fuihnate min pein min thlamuan a ni.

16. Nathan-a leh Priscilla-i te thiltawn aṭangin eng nge i zir?

¹⁶ Jehova’n a Thu hmanga thlamuanna leh fuihna min pêk dân entîr nân, United States rama chêng Nathan-a leh Priscilla-i te thiltawn hi lo ngaihtuah ta ila. Kum eng emaw zât kal ta khân, Lalram thuchhuahtu mamawh zualna hmunah an insawn a. Nathan-a chuan, “Jehova’n kan thawh rimnate mal a sâwm kan ring a,” tiin a sawi a ni. Mahse, an rawngbâwlna tûr hmun thara an thlen hnu chuan, beisei loh takin hrisêlna lam leh sum leh pai lamah harsatna an hmachhawn a. An nupa chuan an haw leh a ngai a, chutah pawh chuan sum leh pai lamah harsatna an la nei reng a ni. Nathan-a chuan, “Pathianin kan beisei anga mal min sâwm loh chhan chu kan ngaihtuah a. Thil tihsual ka neih leh neih loh ka inngaihtuah ṭan hial a ni,” tiin a sawi. A hnuah chuan, Nathan-a leh Priscilla-i te chuan Pathianin a thlahthlam lo tih an hre chhuak ṭan a. “Chûng hun khirh tak chhûng chuan, Bible chu kan tân fuihna leh kaihhruaina min petu ṭhian fing tak ang a rawn ni a. Kan harsatna tawhte ni lovin, chûngte tuar chhuak tûra Jehova min ṭanpui dân ngaihven tlatna chuan, nakina kan la tawh tûr fiahnate atân min buatsaih a ni,” tiin Nathan-a chuan a sawi leh a ni.

17. Unaunu Halga-i chuan engtin nge thlamuanna a dawn? (Milem en bawk rawh.)

¹⁷ Kan unaute pawhin thlamuanna min pe thei a ni. Engtin nge? Hungary rama chêng Helga-i thiltawn hi han ngaihtuah teh. Kum tam tak chhûng chu, lungkhamna leh hlu lo nia inhriatna neihtîrtu harsatna chi hrang hrang a hmachhawn a. Mahse, a thlîr lêt chuan, kohhran hmanga Jehova’n a thlamuan dân chu a hmu thei a ni. Ani chuan: “Ka hna avâng te, ka fa dam lo enkawl a ngaih avâng te leh, harsatna dang avângtea chakna tlachhama ka awmin Jehova’n min ṭanpui ziah ṭhîn a ni. Kum 30 liam ta chhûng khân, min thlamuan tûra a thutiam chu hlen loh lai a nei ngai lo. Mi dangte hnên aṭanga thu ngilnei tak, min ngaihsakzia leh ngaihhlutzia lantîrna thute hmangin min tichak ṭhîn a. Ka mamawh lai berin text message-te, card-te leh, fakna thute ka dawng ṭhîn,” tiin a sawi a ni.

18. Engtin nge mi dangte kan thlamuan theih?

¹⁸ Mi dangte thlamuanin kan Pathian entawn theihna chanvo hlu kan nei a ni. Engtin nge chutianga kan tih theih ang? Mi dangte thusawi chu dawhthei takin kan ngaihthlâksak thei a, ṭawngkam dam taka biain ṭanpuina ṭangkai takte kan pe thei a ni. (Thuf. 3:27) Pathian la be lotute pawh tiamin, harsatna tuar zawng zawngte chu thlamuan kan tum thei a. Kan ṭhenawmte’n lu sûnna, natna, a nih loh leh rilru hahna an hmachhawn hunah, anni chu tlawha an thusawite ṭha taka ngaihthlâksakin Bible-a thu thlamuanthlâk takte chu kan hrilh a ni. “Thlamuanna zawng zawng Pathian,” Jehova kan entawn hian, harsatna tuar chhuak tûra kan unaute kan ṭanpui bâkah, ring lotute pawh biakna dik zâwm tûrin an thinlung kan tinêm thei a ni.—Mt. 5:16.

JEHOVA CHU KAN TAN A AWM RENG

19. Jehova’n eng nge min tihsak a, engtin nge amah kan entawn theih?

¹⁹ Jehova chuan amah hmangaihtu zawng zawngte chu a ngaihsak hle a. Harsatna kan neih hunah min thlahthlam ngai lo. Nu leh pate’n an fate hmangaih taka an enkawl angin, Jehova chuan rinawm taka amah betute chu a enkawl a. Ani chuan min kaihruaiin kan mamawhte min pe a, min vênghimin min thlamuan a ni. Mi dangte’n harsatna an tawh huna kan ṭanpuia kan tihchak hian hmangaihna ngah tak kan Pa vâna mi chu kan entawn a. Harsatnate leh rilru natnate nei mah ila, Jehova’n min awmpui tih kan ring nghet tlat thei a ni. Dik tak chuan, “Hlau suh u, kei in hnênah ka awm si a,” tiin min tiam tawh a. (Is. 41:10) He thutiam hian Jehova’n min awmpui avângin kan mal ngai lo tih min hriat chiantîr a ni.