Ṭhalai Unaupate U—Marka leh Timothea Entawn Rawh U

1-2. Eng harsatnate’n nge Marka leh Timothea chu mi dangte tâna tam lehzuala rawngbâwl lo tûra dâl thei?

ṬHALAI unaupate u, tam lehzuala Jehova rawngbâwlin kohhrana mi dangte ṭha lehzuala ṭanpui in duh em? In duh ang tih a chiang. Mi dangte rawngbâwlsak tûra inhuam ṭhalai unaupa tam tak an awm hi a va thlamuanthlâk tak êm! (Sâm 110:3) Mahse, chutianga tih chu harsa tih châng i nei thei a ni. I thil tawn tûrte i hriat loh avângin i rawngbâwlna zauh chu i hreh em? Inrin tâwkna i tlâkchham avângin chanvo eng emaw i hnâwl tawh ngai em? Chutiang a nih chuan, i mal lo tih hria ang che.

² Marka leh Timothea te pawhin chûng harsatnate chu an nei a. Mahse, an thil tawn tûr an hriat loh avângin emaw, inrin tâwkna an tlâkchham avângin emaw mi dangte rawngbâwlsak an ṭhulh chuang lo. Tirhkoh Paula leh Barnaba’n missionary nia an zin ṭum khatnaa an ruala kal ve tûra an sâwm lai khân, Marka chu a nu nên in nuam takah an khawsa niin a lang a. (Tirh. 12:12, 13, 25) Mahse, Marka chuan a rawngbâwlna zauh tûrin a in chu a chhuahsan a, Antiokei khuaah a kal a. Tichuan, Paula leh Barnaba rualin hmun hla tak takahte a zin ve ta a ni. (Tirh. 13:1-5) Chutiang bawkin, Timothea pawh Paula’n rawngbâwlnaa thawhpui atâna a sâwm lai khân a nu leh pate bula la chêng a nih hmêl a. Timothea chuan a la naupan avâng leh tawnhriat a la neih loh avângin, a sâwmna pawm tûrin inrin tâwkna a tlachham thei a. (1 Korinth 16:10, 11 leh 1 Timothea 4:12 khaikhin rawh.) Chuti chung chuan, Paula sâwmna chu pawmin malsâwmna tam tak a dawng a ni.—Tirh. 16:3-5.

3. (a) Eng ang khawpin nge Paula’n Marka leh Timothea chu a ngaihhlut? (2 Timothea 4:6, 9, 11) (Milem en bawk rawh.) (b) He thuziakah hian eng zawhnate nge kan sawiho vang?

³ Marka leh Timothea chuan an ṭhat laiin thiltawn hlu takte neiin mawhphurhna rit takte hlen dân an zir a. Anni chu Paula’n a ngaihhlut êm avângin a thih dâwn hnaihah a bula awm tûrin a duh a ni. (2 Timothea 4:6, 9, 11 chhiar rawh.) Eng miziate’n nge Marka leh Timothea chu Paula tâna mi hlu tak nihtîr? Engtin nge an rilru put hmang chu ṭhalai unaupate’n an entawn theih? Engtin nge ṭhalai unaupate chuan pa anga Paula thurâwn pêk chu an hlâwkpui theih?

MARKA ANGIN MI DANGTE RAWNGBAWLSAK INHUAM RAWH

4-5. Engtin nge Marka’n mi dangte rawngbâwlsak a inhuamzia a lantîr?

⁴ Hrilhfiahna pakhat chuan mi dangte rawngbâwlsak tih awmzia chu “taimâkna leh tumruhna” nêna anmahni ṭanpui tûra hmalâkna a ni tih a sawi a. Hemi kawngah hian, Marka chuan entawn tûr ṭha tak a siam a ni. Paula’n missionary nia a zin ṭum hnihnaa hruai tel a duh loh khân ani chu rilru nâ leh lunghnual taka a awm a rinawm. (Tirh. 15:37, 38) Mahse, Marka chuan a unaute rawngbâwlsak a ṭhulh chuang lo.

⁵ Marka chuan a laichîn Barnaba nên hmun dangah rawng an bâwl a. Kum 11 hnu vêlah, Rom khuaa Paula a tân hmasak ṭumin Marka chu amah ṭanpuitute zînga pakhat a ni a. (Philm. 23, 24) Paula’n Marka ṭanpuina chu a ngaihhlut êm avângin, ‘nasa taka min thlamuantu’ tiin a ko hial a ni.—Kol. 4:10, 11.

6. Marka chuan Kristian mi puitlingte nêna hun hmanhona chu engtin nge a hlâwkpui? (Footnote en rawh.)

⁶ Marka chuan Kristian mi puitlingte nêna hun hmanhona chu a hlâwkpui hle a. Rom khuaa Paula bula hun eng emaw chen a awm hnuah, Babulona kalin tirhkoh Petera a thawhpui a ni. Inlaichînna ṭha tak an neih avângin, Petera’n ani chu “ka fapa Marka,” tiin a ko va. (1 Pet. 5:13) Hun an hman dun laiin Petera chuan a ṭhian Marka chu Isua nun leh rawngbâwlna chanchin phûrawm takte a hrilh a rinawm a, chu chu a hnuah a Chanchin Ṭha bu-ah Marka’n a ziak a ni.a

7. Engtin nge ṭhalai unaupa Seung-Woo-a chuan Marka chu a entawn? (Milem en bawk rawh.)

⁷ Marka chu rawngbâwlnaa buai rengin unau puitlingte hnaihah a awm tlat a ni. Engtin nge ani chu i entawn theih? I beisei ang chanvo i dawn loh hunah pawh lunghnual mai lovin, Jehova leh kohhran tâna rawng i bâwl theih dân kawng dangte chu zawng ang che. Tûna upa nia rawngbâwl Seung-Woo-a chungchâng hi han ngaihtuah teh. A tleirâwl lai chuan ṭhalai unaupa dangte nên a inkhaikhin ṭhîn a. An zînga ṭhenkhat chuan chanvo hlute an dawng a ni. Seung-Woo-a chuan ngaihven hlawh lo nia inhriatna neiin unaupa puitlingte hnênah a rilrua awmte chu a hrilh a. Upa pakhat chuan a thiltih ṭhate chu mite’n an hmu lo a nih pawhin a theih ang anga mi dangte rawngbâwlsak tûrin thurâwn a pe a ni. Chu thurâwn chuan kum upate ṭanpui tûr leh inkhâwmnaa tel thei tûra puihna mamawhte ṭanpui tûrin a chêttîr a. A ngaihtuah lêtin, ani chuan: “Mi dangte tâna tam lehzuala rawngbâwl awmzia chu ka rawn hre thiam a. Mi dangte hnêna ṭanpuina ṭangkai tak pêkna aṭanga lo awm hlimna chu ka nei a ni,” tiin a sawi.

TIMOTHEA ANGIN MI DANGTE CHUNGAH NGAIHSAKNA LANTIR RAWH

8. Engvângin nge Paula’n Timothea chu zinpui atâna a sâwm? (Philippi 2:19-22)

⁸ Paula chuan dodâlna a lo tawhna khuate a tlawh leh khân khual zinpui tûr ṭhian huaisen takte a mamawh a. Ani chuan tawnhriat ngah tak Sila chu a thlang a. (Tirh. 15:22, 40) A hnuah Timothea pawh a sâwm a ni. Engvângin nge Timothea chu a thlan? A chhan pakhat chu, unaute zînga hming ṭha a chher vâng a ni a. (Tirh. 16:1, 2) Mite chu a ngaihsak tak zet bawk a ni.—Philippi 2:19-22 chhiar rawh.

9. Engtin nge Timothea chuan unaute a ngaihsak tak zet tih a lantîr?

⁹ Paula nêna rawng an bâwl ṭan aṭangin Timothea chuan mahni aia mi dangte a ngaihsak zâwkzia a lantîr a. Chuvângin, Paula chuan Beroia khuaah zirtîr tharte tichak tûrin ngaihngam takin a hnutchhiah a ni. (Tirh. 17:13, 14) Chumi ṭum chuan Timothea chuan Beroia khuaa châmbâng ve tho Sila hnên aṭangin thil tam tak a zir ngei ang. A hnuah Paula’n Timothea chu Thessalonika khuaa Kristiante tichak tûrin a tîr leh a. (1 Thes. 3:2) A hnu kum 15 chhûngin, ‘ṭapte chu ṭahpuiin’ hrehawm tuarte tawrhpui dân a zir a ni. (Rom 12:15, NWT; 2 Tim. 1:3-4) Engtin nge unaupate chuan Timothea chu an entawn theih?

10. Engtin nge unaupa Woo Jae-a chuan mi dangte chunga mi mal ngaihsakna lantîr lehzual dân a zir?

¹⁰ Unaupa Woo Jae-a chuan mi dangte chunga mi mal ngaihsakna lantîr lehzual dân a zir a. A naupan deuh lai chuan, kum upa unaute biak dân a thiam vak lo va. Chuvângin, inkhâwmnaa chibai mai bâk chu a be zui ṭhîn lo. Kohhran upa pakhat chuan unaute chungchânga a ngaihhlutna laite târ langa tîtîna neihpui ṭan tûrin thurâwn a pe a. Mi dangte ngaihven tûr zâwng thilte chu ngaihtuah tûrin a fuih bawk a ni. Woo Jae-a chuan kohhran upa thurâwn ang chuan a ti a. Tûnah chuan Woo Jae-a chu kohhran upa a ni tawh a. Ani chuan: “Mi chi hrang hrangte biak chu awlsam ka ti tawh a. Mi dangte harsatnate chu ṭha lehzuala ka hriatthiampui theih avângin ka lâwm hle a. Chu chuan unaute mamawh hriaa ṭanpui thei tûrin min pui a ni,” tiin a sawi.

11. Engtin nge ṭhalai unaupate chuan an kohhrana mi dangte chunga ngaihsakna lantîr dân an zir theih? (Milem en bawk rawh.)

¹¹ Nangni ṭhalai unaupate pawhin mi dangte chunga ngaihsakna lantîr dân in zir thei a. Inkhâwmnaahte chuan, ṭobul leh kum zât inang lo mi chi hrang hrangte chu bia la. An dam leh dam lohte zâwtin ṭha takin ngaihthlâksak ang che. Chutiang chuan i ṭanpui theih dân tûr i hre thei dâwn a ni. Kum upa nupa tuak khatin JW Library^® app hman dân an thiam lo tih i hria pawh a ni thei a. A nih loh leh, rawngbâwlnaah thawhpui tûr an nei lo tih i hria pawh a ni thei. Anni chu an phone/tablet hman dân i zirtîr thei ang em? A nih loh leh, rawngbâwlnaah i thawhpui thei ang em? Mi dangte ṭanpui tûra hma lain, mi zawng zawng tân entawn tûr ṭha i siam thei a ni.

PA ANGA PAULA THURAWN PEK CHU HLAWKPUI RAWH

12. Engtin nge ṭhalai unaupate chuan Timothea hnêna Paula thurâwn pêk chu an hlâwkpui theih?

¹² Paula chuan Timothea chu nun hlimawm zâwk neia Pathian rawng tam lehzuala bâwl thei tûrin a ṭanpui a. (1 Tim. 1:18; 2 Tim. 4:5) Nangni ṭhalai unaupate pawhin pa anga Paula thurâwn pêk chu in hlâwkpui thei a ni. Engtin nge? Timothea hnêna Paula lehkhathawn pahnih chu in hnêna ziah anga ngaiin, a fuihnate chu nunpui tum ang che u. Chûng a fuihna ṭhenkhatte chu lo ngaihtuah ta ila.

13. Pathian Jehova tihlâwm duhna neia a chunga rinawm tlatnaah chuan eng nge tel?

¹³ “Pathian ngaihsak tûrin insawizawi rawh.” (1 Tim. 4:7b) Pathian ngaihsak tih awmzia chu eng nge ni? Amah tihlâwm duhna neia a chunga rinawm tlatna a ni a. Mahse, chu chu kan pianpui mizia a nih loh avângin, nei tûra ṭan kan lâk a ngai a ni. Engtin nge? “Insawizawi” tia lehlin Grik thu mal chu intihsiakna atâna nasa taka inbuatsaih infiam mite tâna hman a ni a. Chûng infiam mite chu mahni invawng thei tak an nih a ngai a. Keini pawh Pathian Jehova hnaih lehzual tûra min ṭanpuitu chîn dân ṭhate nei chho tûrin mahni invawng thei tak kan nih a ngai a ni.

14. Bible kan chhiar chhan ber chu eng nge ni? Entîrna pe rawh.

¹⁴ Bible chhiar chu chîn ṭhana neih a pawimawh hle a. Chutih rualin, chutianga i tih chhan chu Pathian Jehova hnaih lehzual i duh vâng a ni tih hre reng ang che. Entîr nân, rorêltu tlangvâl hausa leh Isua inbiakna aṭangin eng nge i zir theih? (Mk. 10:17-22) Chu tlangvâl chuan Isua chu Messia a ni tih ring mah se, a hnung zui tûrin rinna a nei tam tâwk lo va. Chuti chung chuan, Isua’n ani chu “a hmangaih ta hle a.” Ngilnei takin a bia a ni. Isua’n ani chu thu tlûkna ṭha siam tûrin a duh tih a chiang hle. Chu tlangvâl a cheibâwl dânah chuan Jehova hmangaihna a lantîr a ni. (Joh. 14:9) Hemi chanchin leh i dinhmunte i ngaihtuah rualin, heti hian inzâwt ang che: ‘Jehova hnaih lehzual tûr leh mi dangte rawng tam lehzuala bâwlsak thei tûrin eng nge ka tih ngai?’ tiin.

15. Engvângin nge ṭhalai unaupate chuan mi dangte tâna entawn tûr ṭha an siam a pawimawh? Entîrna pe rawh. (1 Timothea 4:12, 13)

¹⁵ “Ringtute tihhmuhtu ni zâwk ang che.” (1 Timothea 4:12, 13 chhiar rawh.) Paula chuan Timothea chu thu chhiar leh zirtîrna pêk ang chi thiamnate chauh ni lovin, hmangaihna, rinna leh, thianghlimna ang chi miziate pawh nei chho tûrin a fuih a. Engvângin nge? Entawn tûr ṭha chuan thusawi aiin thil a tih theih zâwk vâng a ni. Entîr nân, rawngbâwlnaa ṭhahnemngaihna neih lehzual chungchâng thu sawi tûra tih i ni a. Rawngbâwlnaa theih tâwp i chhuah chuan inrintâwkna nei takin i sawi thei ang a. I entawn tûr siam chuan i thusawi chu awmzia a neihtîr lehzual dâwn a ni.—1 Tim. 3:13.

16. (a) Eng dinhmun pangaahte nge Kristian ṭhalaite chuan entawn tûr ṭha an siam theih? (b) Engtin nge ṭhalai unaupate chuan “thusawi kawngah” entawn tûr ṭha an siam theih?

¹⁶ Timothea thawn khat 4:12-ah Paula chuan ṭhalai unaupate’n entawn tûr ṭha an siam theihna dinhmun panga a târ lang a. Mi mala inzirna i neih hunah, engvângin nge chûng dinhmun tinte chu i zir chian loh vang? Entîr nân, “thusawi kawngah” entawn tûr ṭha lehzual siam i duh a. I thusawi hmanga mi dangte i tihchak theih dân kawngte chu ngaihtuah ang che. I nu leh pate bulah i la chêng a nih chuan, i tâna an thiltihte chunga i lâwmzia chu zing lehzualin i lantîr thei ang em? Inkhâwm bânah, chanvo neitute hnênah an chanvoa i duhna laite chu i hrilh thei ang em? Inkhâwmahte chuan i irâwm chhuakin chhânnate i pe thei bawk a. Thusawi kawnga entawn tûr ṭha siam tûra theih tâwp i chhuahna chuan thlarau lamah hma i sâwn tih a târ lang dâwn a ni.—1 Tim. 4:15.

17. Engin nge ṭhalai unaupate chu an thlarau lam thiltumte hlen tûra ṭanpui ang? (2 Timothea 2:22)

¹⁷ ‘Tleirâwl châknate chu tlânsan la, felna chu ûm rawh.’ (2 Timothea 2:22 chhiar rawh.) Paula chuan Timothea chu a thlarau lam thiltumte laka a rilru la pênga Pathian Jehova nêna an inlaichînna tichhe thei châknate chu do lêt tûrin a fuih a. Thiltih ṭhenkhat chu thil dik lo ni lo mah se, thlarau lam thiltihte atân i hun hman tûr tam tak a la hêk thei tih i hriat ngei a rinawm. Entîr nân, infiam nân, internet hman nân leh, video games khelh nâna i hun hman zât chu han ngaihtuah teh. Chûngte atâna i hun hman zât ṭhenkhat chu thlarau lam thiltihnate atân i hmang thei ang em? Tualchhûng Kingdom Hall thawmṭhatna, a nih loh leh nawrlirh hmanga thu hrilhna chu i ṭawiâwm thei bawk a ni. Chûng thiltihnatea i tel chuan, thlarau lam thiltumte insiama hlen tûra ṭanpuitu che ṭhian tharte i siam thei ang.

MI DANGTE RAWNGBAWLSAKNA CHUAN MALSAWMNA A THLEN

18. Engvângin nge Marka leh Timothea chuan nun hlimawm leh lungawithlâk tak an nei tia kan sawi theih?

¹⁸ Marka leh Timothea chuan mi dangte rawng tam lehzuala bâwl tûrin inpêknate an nei a; chu chuan, nun hlimawm leh lungawithlâk tak a neihtîr a ni. (Tirh. 20:35) Marka chu a unaute rawngbâwlsak tûrin khawvêl hmun hrang hrangah a zin kual a. Isua nun leh rawngbâwlna chanchin phûrawm tak chu a ziak bawk a ni. Timothea chuan Paula chu kohhrante dina unaute tihchakna kawngah a ṭanpui bawk a. Jehova chuan Marka leh Timothea te lantîr mahni inpêkna rilru put hmang chu a lâwm tih a chiang hle.

19. Engvângin nge ṭhalai unaupate chuan Timothea hnêna Paula thurâwn pêkte chu an ngaihven ang a, chu chuan eng rah nge a chhuah ang?

¹⁹ Paula’n Timothea a ngainatzia chu a hnêna a lehkhathawnte aṭangin a hriat theih a. Chûng thlarau thâwk khuma ziah lehkhathawnte chuan, Jehova’n nangni ṭhalai unaupate a hmangaihzia che u chu a târ lang a ni. A rawngbâwlnaa nun hlimawm tak in neih a duh a. Chuvângin, pa anga Paula thurâwn pêkte chu zuiin mi dangte rawng tam lehzuala bâwl duhna neih tum ang che u. Chutianga in tih chuan, tûnah nun lungawithlâk tak neiin nakina lo awm tûr ‘nunna tak tak chu in vuan’ thei ang.—1 Tim. 6:18, 19.