ZIR TUR THUZIAK 28
HLA 88 I Kawngte Chu Min Hriattîr Ang Che
Engvângin Nge Thurâwn Kan Lâk Ang?
“Mi râwn ṭhin hi a finthlâk zâwk a ni.”—THUF. 13:10, C.L. Re-edited.
A TUM BER
Thurâwn kan dawnte hlâwkpui pumhlûm tûra kan tih ngaite.
1. Engtin nge thu tlûkna fingte siama kan ruahmanna siamte kan tihhlawhtlin theih ang? (Thufingte 13:10; 15:22)
KAN zavai hian thu tlûkna fing takte siam kan duh ṭheuh va. Kan ruahmanna siamte tih hlawhtlin kan duh ṭheuh bawk. Pathian Thu chuan chutianga kan tih ve ve theih dân chu min hrilh a ni.—Thufingte 13:10; 15:22 chhiar rawh.
2. Eng nge Jehova’n tihsak min tiam?
2 Ni e, finna leh thurâwn ṭha ber min pe theitu chu kan Pa Jehova a ni a. Ani chuan: “Ka mita en reng chung chein rem ka ruatsak zêl ang che,” tia sawiin ṭanpui min tiam a ni. (Sâm 32:8) He thu hian, Jehova’n thurâwn min pêk mai aia tam a ti tih a târ lang a—mi mal taka min ngaihvenin a thurâwn min pêkte nunpui tûrin min ṭanpui a ni.a
3. He thuziakah hian eng nge kan sawiho vang?
3 He thuziakah hian, Pathian Thu-in hêng zawhna palite atâna chhânna a pêk dân chu kan sawiho vang: (1) Thurâwn ṭhate hlâwkpui tûrin eng miziate nge ka neih ngai? (2) Tuin nge thurâwn ṭha min pe thei ang? (3) Engtin nge rilru inhawng tak ka nih theih ang? (4) Engvângin nge mi dangte chu ka tân thu tlûkna ka siamtîr loh vang?
ENG MIZIATE NGE KA NEIH NGAI?
4. Thurâwn ṭhate hlâwkpui tûr chuan eng miziate nge kan neih ngai?
4 Thurâwn ṭhate hlâwkpui tûr chuan inngaihtlâwmna leh thuhnuairawlhna kan neih a ngai a. Mahnia thu tlûkna fing tak siam tûrin thiltawn leh hriat kan nei tam tâwk lo thei tih kan pawm a ngai a ni. Inngaihtlâwmna leh thuhnuairawlhna kan neih loh chuan Pathian Jehova’n min ṭanpui thei dâwn lo va. Chuvângin, Bible chhiarna aṭanga thurâwn kan hmuhte pawh a lothlâwn mai a ni ang. (Mik. 6:8; 1 Pet. 5:5) Chutih rualin, inngaihtlâwmna leh thuhnuairawlhna kan neih chuan, Bible ṭanchhan thurâwnte chu kan nunpui vat dâwn a ni.
5. Eng a thil hlen chhuahtein nge Lal Davida chu chapo tak nihtîr thei?
5 Lal Davida entawn tûr siam hi lo ngaihtuah ta ila. A thil hlen chhuahte chuan chapo tak a nihtîr thei a. Lal a nih hma aṭang tawhin, rimawi tum thiam tak a nih avânga hriat hlawh a lo ni tawh a. Lal tâna rimawi tum tûra tih a ni hial a ni. (1 Sam. 16:18, 19) Davida chu lal ni tûra hriak thih a nih hnuah, Jehova’n a thlarau thianghlimin a thuam a. (1 Sam. 16:11-13) Philistia mi hrawl tak Goliatha pawh tiamin, hmêlmate a hnehsak avângin Israelte zîngah a hmingthang leh hle a ni. (1 Sam. 17:37, 50; 18:7) Mi chapo takin chutiang thil ropui takte chu hlen chhuak ta se, mi dangte hnên aṭanga thurâwn lâk mamawh lo niin a inngai ngei ang. Mahse, Davida erawh chutiang chu a ni lo.
6. Engtin nge Davida’n mi dangte hnên aṭanga thurâwn lâk a duh tih kan hriat? (A kâwma milem en bawk rawh.)
6 Lal a nih hnuah chuan, Davida’n amah thurâwn petute chu ṭhianah a siam a. (1 Chro. 27:32-34) Dik tak chuan, lal a nih hma aṭang tawhin mi dangte thurâwn ṭha pêkte chu inhuam takin a ngaithla ṭhîn a ni. Mipate hnên aṭang chauh ni lovin, mi dangte zahna nei lo, lâwm nachâng hre lo leh, mahni hmasial tak Nabala nupui Abigaili hnên aṭang pawhin thurâwn a la a. A thurâwn pêk chu Davida’n inngaitlâwm taka a zawm avângin, sual pawi tak tihna a pumpelh thei a ni.—1 Sam. 25:2, 3, 21-25, 32-34.
Lal Davida chuan Abigaili thurâwn chu inngaitlâwm taka pawmin a zâwm (Paragraph 6-na en rawh)
7. Davida hnên aṭangin eng nge kan zir theih? (Thuhriltu 4:13) (Milem en bawk rawh.)
7 Davida hnên aṭangin thil ṭhenkhat zir theih kan nei a. Entîr nân, thiamna eng emaw bîk, a nih loh leh thuneihna eng emaw chen kan nei pawh a ni thei a. Mahse, thil hre vek leh thurâwn mamawh lo niin kan inngai tûr a ni lo. Davida angin, thurâwn ṭha chu tu hnên aṭang pawh ni se, lâk kan inhuam tûr a ni. (Thuhriltu 4:13 chhiar rawh.) Chutianga kan tih chuan, mahni leh mi dangte chunga buaina thlen thei sual lian tak tih kan pumpelh theih ngei a rinawm.
Thurâwn ṭha min petu chu tu pawh ni se, pawm kan inhuam tûr a ni (Paragraph 7-na en rawh)d
TUIN NGE THURAWN ṬHA MIN PE THEI?
8. Engvângin nge Jonathana’n Davida chu thurâwn ṭha a pêk theih?
8 Davida hnên aṭanga kan zir theih thil dang pawh lo ngaihtuah ta ila. Pathian Jehova nêna inlaichînna ṭha nei leh a harsatna tawh chungchâng hre chiang bawktute hnên aṭanga a dawn thurâwnte chu a pawm a ni. Entîr nân, Lal Saula nêna inlaichînna ṭha siam leh a duh khân, a fapa Jonathana thurâwn pêkte chu a zâwm a. Engvângin nge Jonathana chuan thurâwn ṭha a pêk theih? Pathian nêna inlaichînna ṭha a neih mai bâkah, Saula a hriat chian vâng a ni. (1 Sam. 20:9-13) Chuta ṭang chuan eng nge kan zir theih?
9. Thurâwn kan mamawh hunah tu nge kan pan ang? Hrilhfiah rawh. (Thufingte 13:20)
9 Thurâwn lâk kan mamawh hunah, Jehova nêna inlaichînna ṭha nei leh ṭanpui kan mamawhna thila tawnhriat nei, tu emaw pan chu a finthlâk a.b (Thufingte 13:20 chhiar rawh.) Entîr nân, ṭhalai unaupa pakhat chuan a kawppui âwm mi zawn a duh a. Tuin nge thurâwn ṭha pe thei ang? Kawppui nei lo a ṭhian chuan Bible thu bulte ṭanchhanin thurâwn ṭhate a pe thei ngei ang. Mahse, unaupa chuan amah hre chiang a, hun eng emaw chen hlim taka lo innei tawh thlarau lama puitling nupa tu emaw chu a râwn a nih chuan, mi mal taka a hlâwkpui theih tûr thurâwn chu a dawng thei ngei ang.
10. Tûnah eng nge kan sawiho vang?
10 Kan neih ngai mize pahnih leh thurâwn ṭha min pe theitute chungchâng kan sawiho tawh a. Tûnah chuan, rilru inhawng tak kan nih a ngaih chhan leh kan tâna mi dangte thu tlûkna siamtîr a ṭhat leh ṭhat loh i lo sawiho vang u.
ENGTIN NGE RILRU INHAWNG TAK KA NIH THEIH ANG?
11-12. (a) A châng chuan, eng nge kan tih mai theih? (b) Thu tlûkna pawimawh tak siam a ngaih khân, Lal Rehoboama’n eng nge a tih?
11 A châng chuan, tu emaw chu thurâwn la duh niin a lang thei a; mahse, a nihna takah chuan a thu tlûkna siam tawh thlâwppuitu tûr a zawng mai a ni thei. Chutiang a nih chuan, mi rilru inhawng a ni tak tak thei lo. Ani chu Lal Rehoboama chunga thilthleng aṭangin a inzir tûr a ni.
12 Rehoboama chu Lal Solomona dawtah Israel lal a rawn ni a. Ani chu hnam hausa tak chunga rorêltu a rawn ni a; mahse, mipuite chuan Solomona’n an lakah a phût sâng lutuk niin an ngai a ni. Chuvângin, an phur tih zânsak tûra ngên tûrin a hnênah an rawn kal a. Rehoboama chuan thu tlûkna siam tûr chuan hun a mamawh thu a lo hrilh a ni. Solomona lo ṭanpui ṭhîntu upate hnên aṭanga thurâwnte lain ṭha takin bul a ṭan zet a. (1 Lal. 12:2-7) Mahse, an thurâwn pêk chu a hnâwl a ni. Engvângin nge? Rehoboama chuan thu tlûkna siam fel tawhin, chumi thlâwptu tûr a zawng mai a ni thei ang em? Chutiang a nih chuan, a duh ang thlâwpna chu a rualpui a ṭhiante hnên aṭangin a hmu a ni. (1 Lal. 12:8-14) A ṭhiante thurâwn pêk ang chiah chuan mipuite chu a chhâng a. Chuvângin, ram chu a lo inṭhen a, Rehoboama chuan buaina a tâwk ta reng mai a ni.—1 Lal. 12:16-19.
13. Engtin nge rilru inhawng tak kan ni tih kan inhriat theih?
13 Rehoboama hnên aṭangin eng nge kan zir theih? Thurâwn kan lâk hunah, rilru inhawng tak kan nih a ngai a. Chutiang chu kan ni tih engtin nge kan hriat theih? ‘Thurâwn ka lâk hian ka hriat duh zâwng a nih loh avângin ka hnâwl nghâl mai ṭhîn em?’ tiin kan inzâwt thei a ni. Entîrna pakhat i lo ngaihtuah ang u.
14. Thurâwn kan dawn hunah, eng nge kan hriat reng ang? Entîrna pe rawh. (Milem en bawk rawh.)
14 Entîr nân, unaupa pakhatin hnathawh tûr ṭha tak a lo hmu ta a. Hna a zawm hmain, upa pakhat chu thurâwn a dîl a ni. Chu hna avâng chuan a chhûngte hlata hun rei tak chhûng a awm a ngaih tûr thu a sawi a. Upa chuan a mawhphurhna pawimawh ber chu a chhûngte thlarau lam mamawh ngaihsak a ni tih Bible thu bul hmangin a hriat nawntîr a ni. (Eph. 6:4; 1 Tim. 5:8) Unaupa chuan chu upa thusawi chu pawm duh lovin, a hriat duh zâwng a hriat hma loh unau dangte zâwt kual ta se, engtin nge ni ang? Unaupa chuan thurâwn a zawng tak tak nge ni a, a thu tlûkna siam tawh thlâwppuitu tûr a zawng mai zâwk? Kan thinlung hi bumhmang a ni tih kan hriat reng a ngai a. (Jer. 17:9) A châng chuan, thurâwn kan hriat duh loh ber chu kan mamawh ber a lo ni ṭhîn.
Thurâwn ṭha lâk kan duh tak tak nge ni a, kan thu tlûkna siam min thlâwppuitu tûr kan zawng mai zâwk? (Paragraph 14-na en rawh)
MI DANGTE CHU KA TAN THU TLUKNA KA SIAMTIR TUR A NI EM?
15. Eng nge ti lo tûra kan fîmkhur ngai a, engvângin nge?
15 Mahni tâna thu tlûkna siam tûrin mawhphurhna kan nei ṭheuh va. (Gal. 6:4, 5) Kan sawiho tawh angin, thu tlûkna siam hmaa Bible aṭang leh Kristian mi puitlingte hnên aṭanga thurâwn lâk chu a pawimawh hle a. Chutih rualin, mi dangte chu kan tâna thu tlûkna siamtîr lo tûrin kan fîmkhur tûr a ni. Mi ṭhenkhat chuan an mi zah zâwngte hnênah, “Nang ni ta la, eng nge i tih ang?” tia tlang taka zâwtin chutiang chuan an ti mai thei a. Ṭhenkhat erawh chuan ngun taka ngaihtuah lêm lovin, mi dangte thu tlûkna siam ang chu an zui ve mai pawh a ni thei a ni.
16. Korinth khuaah chuan milem hnêna hlan tawh sa ei chungchângah eng thil nge thleng a, chûng sa an ei dâwn leh dâwn loh chu tuin nge thu tlûkna siam ang? (1 Korinth 8:7; 10:25, 26)
16 Milemte hnêna hlan tawh sa ei chungchânga kum zabi khatnaa Korinth kohhrana thilthleng hi han ngaihtuah teh. Paula’n chu kohhran hnênah chuan: “Khawvêlah hian milem chu eng mah a ni lo tih leh Pathian pakhat chauh lo chu a dang rêng rêng an awm lo tih kan hria,” tiin a ziak a. (1 Kor. 8:4, NWT) Chu thu avâng chuan, mi ṭhenkhat chuan milem hnêna hlan tawh bazâra sa zawrhte chu an ei thei niin thu tlûkna an siam a. A ṭhen erawh chuan an chhia leh ṭha hriatna a tih buai avângin, ei loh an thlang a ni. (1 Korinth 8:7; 10:25, 26 chhiar rawh.) Chumi chungchânga thu tlûkna chu mi mala siam tûr a ni a. Paula chuan Korinth khaw mite chu mi dangte tâna thu tlûkna siam tûrin emaw, an tih dân zui ve tûrin emaw a fuih lo. An zavaiin ‘Pathian hmaah mahni chanchin an sawi ṭheuh zâwk dâwn a ni.’—Rom 14:10-12, NWT.
17. Mi dangte tih dân kan zui chuan eng nge thleng thei? Entîrna pe rawh. (Milem en bawk rawh.)
17 Tûn laiah pawh chutiang chu engtin nge a thlen theih? Thisen them te tak tê tête chungchâng hi han ngaihtuah teh. Kristian tinte’n chûng thisen themte an dawn dâwn leh dâwn loh chu mahniin thu tlûkna an siam tûr a ni a.c Chumi chungchâng hriatthiam vek chu harsa kan ti mai thei a; mahse, chutiang thu tlûkna siam chu mi tinte phurh tûr phur a ni. (Rom 14:4) Mi dangte tih dân kan zui ve mai chuan, kan chhia leh ṭha hriatna chu a thawk ṭha lo ṭan thei a. Kan chhia leh ṭha hriatna thawk ṭha tûr chuan kan sawizawia kan hman a ngai a ni. (Heb. 5:14) A nih leh, eng hunah nge Kristian mi puitling hnên aṭanga thurâwn kan lâk ang? Mahnia zir bingna kan neih hnu pawha, kan dinhmun nêna inkûngkaihna nei Bible thu bulte zawm dân kan hriat loh hunah chauh a ni.
Mahnia zir bingna kan neih hnuah chauh thurâwn kan la tûr a ni (Paragraph 17-na en rawh)
THURAWN LA ZAWM ZEL RAWH
18. Jehova’n eng nge min tihsak?
18 Jehova chuan mahnia thu tlûkna siam min phalsakin min rin tâwkzia a lantîr a. A Thu, Bible min pêk bâkah, Bible thu bulte chhût thiam tûra min ṭanpuitu ṭhian fing takte min pe bawk a. Chutiang chuan, Pa a nih anga a mawhphurhna chu a hlen a ni. (Thuf. 3:21-23) A chunga kan lâwmzia lantîr tûrin eng nge kan tih theih?
19. Engtin nge Jehova chu kan tihlâwm zêl theih?
19 He thu dik hi han ngaihtuah teh: Nu leh pate’n an fate chu mi dangte ṭanpui ṭhîntu Jehova chhiahhlawh fing takte niin an rawn puitling chho tih an hmuh hian an hlim hle a. Chutiang bawkin, keini pawh thlarau lama kan puitlin chhoh zêl a, mi dangte hnên aṭanga thurâwnte la a, amah chawimawitu thu tlûknate kan siam tih a hmuh hian Jehova chu a hlim êm êm a ni.
HLA 127 Eng Ang Mi Nge Ka Nih Ang?
a Bible-a “thurâwn,” tih leh “zilhna,” tih thu malte chuan thil thuhmun a kâwk thei a. He thuziak leh a dawta thuziakah chûng thu malte chu hman kawp a ni ang.
b Kristiante chuan an remhriatna hmangin sum leh pai, inenkawlna leh, thil dangte chungchângah Jehova be lotute an râwn châng a awm thei a ni.
c Hemi chungchâng chipchiar lehzuala hre tûrin, Chatuanin I Hlim Thei! tih lehkhabu zirlai 39 point 5-na leh “Zir Belhin Hmun Belh Rawh,” tih section chu en rawh.
d MILEM HRILHFIAHNA: Upa pakhat chuan upa dang chu tûn hnaia inhmuh khâwmnaa a thusawi dân chungchângah thurâwn a pe.