Jehova’n Chhel Tûra Min Ṭanpui Dân

1. Engvângin nge chhelna kan mamawh a, tuin nge min ṭanpui ang? (1 Petera 5:10)

HENG ni hnuhnûng hun khirh takahte hian, Jehova mite chuan chhelna an mamawh a. An zînga ṭhenkhat chuan natna khirh tak an tuar a. Mi dangte chuan an hmangaih takte an sûn a ni. An chhûngte, a nih loh leh sawrkâr thuneitute hnên aṭanga dodâlna tâwkte pawh an awm a. (Mt. 10:18, 36, 37) I harsatna tawh chu eng pawh ni se, Jehova’n chhel tûrin a ṭanpui thei che tih ring nghet tlat ang che.—1 Petera 5:10 chhiar rawh.

2. Kristian chhelna chu tu hnên aṭanga kan dawn nge?

² Chhelna tih chu dodâlna, tih duhdahna, fiahna, a nih loh leh thlêmna tâwk chung pawha tawrh ṭâng ṭâng theihna leh beiseina vawn reng theihna a ni a. Kristian chhelna chu mahni theihna aṭanga lo awm ni lovin, “mihringte neih theih rual loh thiltihtheihna” min pe theitu Jehova hnên aṭanga kan dawn a ni. (2 Kor. 4:7, NWT) He thuziakah hian, chhel tûra min ṭanpui nâna Jehova min buatsaihsak thil pali chungchâng kan sawiho vang a. Chûngte kan hman ṭangkai theih dân kan sawiho bawk ang.

ṬAWNGṬAINA

3. Engvângin nge ṭawngṭaina chu thil mak hmanga inbiak pawhna tia kan sawi theih?

³ Pathian Jehova chuan chhel tûra min ṭanpui tûrin thil mak tak min buatsaihsak a. Sual fate ni mah ila, amah nêna inbiak pawh theihna min ruahmansak a ni. (Heb. 4:16) Han ngaihtuah teh: Jehova hnênah engtik lai pawhin eng chungchângah pawh kan ṭawngṭai thei a. Mi dangte hlatah kan awm emaw, lung inah kan tâng emaw pawh ni se, eng ṭawng pawhin min ngaihthlâksak thei a. (Jon. 2:1, 2; Tirh. 16:25, 26) Kan rilrua awmte sawi chhuak thei lo khawpa kan mangan hunah pawh, kan sawi tum chu min hriatthiamsak a ni. (Rom 8:26, 27) Ṭawngṭaina chu thil mak hmanga inbiak pawhna a va ni tak êm!

4. Engvângin nge chhelna dîla kan ṭawngṭainate chu Jehova duh zâwng nên a inmil tia kan sawi theih?

⁴ Jehova chuan a Thu-ah “eng pawh a duh zâwng anga kan dîl chuan anin min ngaihthlâksak” ang tih min tiam a. (1 Joh. 5:14) Chhelna min pe tûrin kan dîl thei em? Thei e! Chutianga tih chu a duh zâwng nêna inmil a ni. Engvângin nge chutianga kan sawi theih? Fiahnate chhel taka kan hmachhawn hian, Jehova chu amah sawichhetu Diabol Setana chhân lêt theihna kan pe a ni. (Thuf. 27:11) Chu bâkah, Pathianin “a lama rilru dik tak putute chunga a chakzia” lantîr chu a duh tih Bible-in a sawi a. (2 Chro. 16:9) Chuvângin, chhelna min pe tûrin theihna leh duhna a nei tih kan chiang thei a ni.—Is. 30:18; 41:10; Lk. 11:13.

5. Engtin nge ṭawngṭaina chuan rilru thlamuanna min neihtîr theih? (Isaia 26:3)

⁵ Kan mangannate chungchânga tih tak zeta kan ṭawngṭai hian, “hriatthiam phâk rual loh Pathian thlamuanna chuan [kan] thinlung leh [kan] rilrute chu . . . [min] vênsak ang,” tih Bible-in a sawi a. (Phil. 4:7, NWT) Chumi awmzia chu han ngaihtuah teh. Jehova be lotute chuan harsatna an tawhin, kawng hrang hrang dapin rilru thlamuanna neih an tum a. Entîr nân, mi ṭhenkhat chuan inngaihtuah bingna hmangin an mangannate chawpa an rilru chu tih ruah vek an tum a. Mahse, chutianga rilru tih ruah chu thil hlauhawm tak a ni. (Matthaia 12:43-45 nên khaikhin rawh.) Chu bâkah, kan ṭawngṭai huna Pathian min pêk thlamuanna chu chutiang inngaihtuah bingna hmanga miin a neih eng ang thlamuanna ai pawhin a chungnung zâwk a. Jehova hnêna kan ṭawngṭai hian a chungah kan innghat pumhlûm tih kan lântîr avângin ‘thlamuanna’ min pe zawm zêl a ni. (Isaia 26:3 chhiar rawh.) Chutianga a tih dân kawng khat chu, a Thu aṭanga kan zir tawh thutak thlamuanthlâk takte hre chhuak tûra min ṭanpuina hi a ni a. Chûng thutakte aṭang chuan, Jehova’n min ngaihsakin hlawhtling tûrin min duh tih kan hriat avângin thin thiin kan awm thei a ni.—Sâm 62:1, 2.

6. Ṭawngṭai theihna ruahmanna chu a ṭha thei ang bera hlâwkpui tûrin eng nge i tih theih? (Milem en bawk rawh.)

⁶ I tih theih chu. I rinna fiahtu thil i hmachhawn a nih chuan, “i rit phurh chu LALPA chungah nghat la,” thlamuanna dîlin ṭawngṭai ang che. (Sâm 55:22) I harsatna tawhte hmachhawn thei tûra i mamawh finna chu dîl bawk la. (Thuf. 2:10, 11) Tih tak zeta chhelna dîla i ṭawngṭai rualin, lâwmthu sawi theihnghilh suh ang che. (Phil. 4:6) Harsatna i tawh chhûnga Jehova ṭanpui dân che chu hmuh tum la, chûngte avâng chuan lâwmthu hrilh ang che. I harsatna tawhte’n i malsâwmna dawn mêkte an hliahkhuh chu phal ngai suh.—Sâm 16:5, 6.

PATHIAN THU

7. Engtin nge Bible zirna chuan chhel tûra min ṭanpui theih?

⁷ Jehova chuan chhel tûra min ṭanpui tûrin a Thu min pe a. Chutah chuan, min ṭanpui ang tih a tiamna thu tam tak a chuang a ni. Entîrna pakhat lo ngaihtuah ta ila. Matthaia 6:8 chuan: “In Pa chuan in dîl hma pawhin in mamawhte chu a hre reng si a,” tiin a sawi a. (NWT) Chûng thute chu Isua sawi a ni a; ani chuan tu dang zawng aiin Jehova chu a hre chiang a ni. Chuvângin, harsatna kan hmachhawn hunah Jehova’n kan mamawhte a ngaihsak ang tih rinhlelh nachhan tûr kan nei lo. Bible-ah chhel tûra chakna min pe thei chutiang thu tam tak chu a chuang a ni.—Sâm 94:19.

8. (a) Chhel tûra min ṭanpui thei Bible thu bul pakhat târ lang rawh. (b) Kan mamawh tak Bible thu bulte chu a hun taka hre chhuak tûrin engin nge min ṭanpui thei?

⁸ Bible thu bulte chuan chhel tûrin min ṭanpui thei a. Chûng thu bulahte chuan, thu tlûkna ṭha takte siam tûra min ṭanpui thei thu fing takte a tel a ni. (Thuf. 2:6, 7) Entîr nân, a tûka a lo thlen dâwn leh dâwn loh pawh kan hriat loh thilte chungchânga a lutuka lungkham lova, vawiin atân chauhva ngaihtuah zâwk tûrin min fuih a. (Mt. 6:34) Bible chhiarna leh chhût ngunna chu tih ṭhana kan neih chuan, kan mamawh tak Bible thu bulte chu a hun taka hriat chhuah a awlsam lehzual ang.

9. Engtin nge Bible-a mite chanchin chuan Jehova’n min ṭanpui ang tih kan rinna chu a tih ngheh?

⁹ Bible-ah chuan Jehova rinchhana a ṭanpuina dawngtu mi pângngai ve maite chanchin pawh a chuang bawk a. (Heb. 11:32-34; Jak. 5:17) Chûng chanchinte chhût ngunna hmangin, Jehova chu “kan inhumhimna leh kan chakna, mangan laia ṭanpui vartu hnai reng a ni,” tih kan rinna chu kan ti nghet thei a ni. (Sâm 46:1) Hmân laia Jehova chhiahhlawhte rinawm dân kan ngaihtuah hian, an rinna leh chhelna chu entawn tûra chêttîrin kan awm a ni.—Jak. 5:10, 11.

10. Engtin nge Pathian min buatsaihsak a Thu chu a ṭha thei ang bera kan hman theih?

¹⁰ I tih theih chu. Nî tin Bible chhiarin, Bible châng ṭha i tih bîkte chu chhinchhiah ang che. Mi tam tak chuan ni châng chhiarna chu Bible-a mi ti chak thei tak thute ngaihtuaha ni bul ṭan dân kawng ṭha tak a ni tih an sawi bawk a. Marie-ia chuan a nu leh pate chu cancer natna avânga a enkawl laiin chumi dikzia chu a tawng a ni. An thih hma thla rei lo te chhûng chuan engin nge ani chu chhel tûra ṭanpui? “Zîng tin Nî Tina Pathian Lehkha Thu Belh Chianna tih bua Bible chângte chu chhiarin ka chhût ngun ṭhîn a. Chutianga tih ziahna chuan, ka harsatna tawhte aiin Jehova chungchâng leh a Thu-a thil ropui tak tak min zirtîrte chu ngaihtuah zâwk tûrin min ṭanpui a ni,” tiin a sawi.—Sâm 61:2.

KRISTIAN UNAUTE

11. Engvângin nge harsatnate kan tawh hunah kan mal lo tih hriatna chuan min tih chak?

¹¹ Jehova’n chhel tûra min ṭanpui tûrin khawvêl pumah Kristian unaute min pe a. “[Kan] unau khawvêla awmhote chungah chuan [kan tawrh ang] tuarna chu a thleng ve” tih hriatna chuan kan mal lohzia min hriattîr a ni. (1 Pet. 5:9) Chuvângin, eng ang harsatna pawh tâwk mah ila, kan unaute’n chutiang chu an lo tuar tawhin, chhelna an lantîr tawh tih kan chiang thei a. Keini pawhin, chhel takin kan tuar chhuak ve thei a ni.—Tirh. 14:22.

12. Engtin nge kan unaute’n min ṭanpui theih a, an tân eng nge kan tih theih? (2 Korinth 1:3, 4)

¹² Harsatnate chhel taka kan tawrh laiin, kan unaute chuan min ti chak thei a. Chumi dikzia chu tirhkoh Paula’n a tawng a ni. Ina tântîr a nih laia amah ṭanpuitute chu an hming lamin an chunga a lâwmzia a sawi lang fo va. Anni chuan Paula chu thlamuana ti chakin, ṭanpuina ṭangkai takte an pe a ni. (Phil. 2:25, 29, 30; Kol. 4:10, 11) Tûn laiah pawh chutiang chu kan tawng ve thei a. Chhel tûra ṭanpuina kan mamawh hunah kan unaute chu kan tân an awm a; ṭanpuina an mamawhin an tân pawh kan awm ve a ni.—2 Korinth 1:3, 4 chhiar rawh.

13. Unaunu Maya-i chu chhel tûrin engin nge ṭanpui?

¹³ Russia rama chêng unaunu Maya-i chuan unaute hnên aṭangin thlamuanna nasa tak a dawng a. Kum 2020 khân thuneitute’n a in an dap a, a hnuah mi dangte hnêna a rinna chungchâng a hrilh avângin thu buai siamsak a ni. “Rilru lama ka chauh hle laiin, unaute chuan min rawn phone a, lehkhate min thawnin min hmangaihzia min hriat nawntîr a. Min hmangaihtu chhûngkaw hung tak ka nei tih hre tawh mah ila, kum 2020 aṭang zet chuan chumi dikzia chu chiang lehzualin ka hmu a ni,” tiin a sawi.

14. Kan unaute ṭanpuina hlâwkpui tûrin eng nge kan tih theih? (Milem en bawk rawh.)

¹⁴ I tih theih chu. Harsatnate i tawh hunah i Kristian unaute chu bêl tlat la. Upate hnêna ṭanpuina dîl chu hreh suh ang che. Anni chu “thlipui laka bîkna hmun ang leh thlihrâng laka inhumhimna ang” an ni thei a ni. (Is. 32:2) I unaute pawhin harsatnate an tuar tih hre reng la. Ṭanpui ngai tu emaw tâna thil ṭha tihna chuan i dinhmun chu inbûk tâwk tak leh a êng zâwnga thlîr thiam tûrin a ṭanpui ang che.—Tirh. 20:35.

KAN BEISEINA

15. Engtin nge beiseina chuan Isua pawh tiamin, mi rinawmte chu a ṭanpui? (Hebrai 12:2)

¹⁵ Jehova chuan chhel tûra min ṭanpui tûrin beiseina nghet tak min pe a. (Rom 15:13) Beiseinain Isua chu a lei nuna hun hrehawm ber tuar chhuak tûra a ṭanpui dân hi han ngaihtuah teh. (Hebrai 12:2 chhiar rawh.) A rinawmna chuan Jehova hming tih thianghlimnaah nasa takin a ṭanpui dâwn tih a hria a. A Pa bula a awm leh hun tûr leh a hnua a unaute nêna vân Rama rawng an bâwlho hun tûr chu a nghâkhlel hle bawk. Chutiang bawkin, Pathian khawvêl thara chatuana nun beiseina chuan Setana khawvêla kan tawh eng harsatna pawh tuar chhuak tûrin min ṭanpui a ni.

16. Engtin nge beiseina chuan unaunu pakhat chu chhel tûra a ṭanpui a, a thusawi aṭangin eng nge i zir?

¹⁶ Lalram beiseinain Russia rama awm unaunu Alla-i a ṭanpui dân hi han ngaihtuah teh. A pasal chu man niin, tân lailâwktîr a ni a. Chutiang thil a tawh chuan: “Kan hma lam hun beiseina chungchâng ṭawngṭaina leh chhût ngunna chuan lunghnual lutuk lo tûrin min ṭanpui a. Thil ṭhate a lo inher chhuak dâwn tih ka hria a. Jehova chuan hnehna a chang ang a, keini pawh lâwmman min pe ang,” tiin a sawi a ni.

17. Engtin nge Bible ṭanchhan kan beiseina chu kan ngaihhlutzia kan lantîr theih? (Milem en bawk rawh.)

¹⁷ I tih theih chu. Jehova tiam hma lam hun ropui tak chungchâng ngaihtuah nân hun hmang la. Pathian khawvêl thara awm anga inmitthlain, chuta kan dawn tûr malsâwmnate chu ngaihtuah ang che. Paradis-a chatuan nunna nêna khaikhin chuan tûna kan hmachhawn mêk harsatnate hi “nêp tak, hun rei lo te chhûng atân chauh a ni.” (2 Kor. 4:17, NWT) Chu bâkah, i rinna chungchâng chu mi dangte hnênah theih tâwp chhuahin hrilh la. Hma lam hun atâna Pathian thiltum hre lova, Setana khawvêla buainate hmachhawn chu an tân a harsat dân tûr ngaihtuah ang che. Sawihona tawi tê pawhin kan Lalram beiseina chu a ngaihven ṭantîr thei a ni.

18. Engvângin nge Jehova thutiamte chu kan rin theih?

¹⁸ Joba chuan harsatna tam tak a tawrh chhuah hnuah, Jehova hnênah: “Engkim i ti thei tih ka hria e, i tum dâl rual eng mah a awm lo,” tiin a sawi a. (Job. 42:2) Jehova chu a thiltumte hlen tûrin eng mahin a dâl thei lo tih a hria a. Chu thu dik chuan harsatnate kan tawh hunah min ti chak thei a ni. Entîr nân, doctor tam takte’n a natna an tih dam theih loh avânga lunghnual taka awm hmeichhe pakhat hi han mitthla teh. Lunghnual takin awm mah se, doctor pakhat thiltawn ngah tak leh rin tlâk tak chu a tawng hlauh va; ani chuan a nat chhan chu hmu chhuakin a enkawl dân tûr chu a hrilh a ni. Dam ṭha leh tûrin hun duh dâwn mah se, chu chuan thlamuanna a pe a. A dam ṭha leh ngei dâwn tih a hriatna chuan chhel tûrin a ṭanpui a ni. Chutiang bawkin, keini pawh Paradis a lo thleng ngei dâwn tih kan rinnghehna chuan chhel tûrin min ṭanpui ang.

19. Chhelna nei tûrin eng nge kan tih ngai?

¹⁹ Kan hriat tawh angin, Jehova chuan ṭawngṭaina, a Thu, kan Kristian unaute leh, kan beiseina hmangin harsatnate kârah chhel tûrin min ṭanpui a. Tûnah eng harsatna pawh tuar mah ila, chûng Jehova min buatsaihsakte chu a ṭha thei ang bera kan hman chuan, Setana khawvêl leh harsatna zawng zawng a awm tawh loh hun a thlen hma chu chhel takin kan tuar ṭâng ṭâng thei dâwn a ni.—Phil. 4:13.