ZIR TUR THUZIAK 37
HLA 114 Dawhthei Rawh U
Rorêl Dik Lohna Chhân Lêt Dân Ṭha Ber
“Rorêlna fel a beisei a; nimahsela, ngai teh, hnehchhiahna a lo awm ta zâwk a.”—IS. 5:7.
A TUM BER
Isua entawn tûr siamin Jehova lawm zâwnga rorêl dik lohna chhâng lêt tûra min ṭanpui dân.
1-2. Engtin nge mi tam takin rorêl dik lohna an chhân lêt a, eng nge kan ngaihtuah mai theih?
ROREL dik lohnaa khat khawvêlah kan chêng a. Mite chu an sum leh pai dinhmun, mipa leh hmeichhia nihna, ṭobul, a nih loh leh hnam ang chi chhan hrang hrang avângtein ṭha lo taka cheibâwl an ni ṭhîn a. Sumdâwng duhâm takte leh thuneitu eirûk chîngte avângin chhehvêl boruak chhiatnate chu an tuar bawk. Chutiang rorêl dik lohna nghawngte chu a ngial a nganin emaw, tu emaw kal tlangin emaw mi tinin kan tuar a ni.
2 He khawvêla thleng rorêl dik lohnate avânga mi tam tak thinrim taka an awm chu thil mak a ni lo. Him leh zahawm taka cheibâwl nih chu kan duh ṭheuh a ni. Chuvângin, mi ṭhenkhat chu khawtlâng siam ṭhat tuma hmalâknaahte an tel a. Ngennate siamin kawngte an zawh a, rorêl dik lohna do lêt tiamtu politics hruaitute chu an thlâwp bawk a ni. Mahse, Kristiante chu ‘khawvêla mite ang ni lo’ tûr leh Pathian Ramin rorêl dik lohna zawng zawng a rawn tih bo hun nghâk tûra zirtîr kan ni a. (Joh. 17:16, NWT) Chutih rualin, tu emaw dik lo taka cheibâwla a awm kan hmuh hian kan rilru a nuam lovin kan thin pawh a rim hial thei a ni. Heti hian kan ngaihtuah mai thei: ‘Eng nge ka tih theih? Rorêl dik lohna do lêt tûrin eng emaw tal tih theih ka nei em?’ tiin. Chûng chhânnate hmu tûrin, Jehova leh Isua’n rorêl dik lohna an thlîr dân chu i lo ngaihtuahho vang u.
JEHOVA LEH ISUA’N ROREL DIK LOHNA AN HUA
3. Engvângin nge rorêl dik lohna avânga thinrim chu thil inâwm tak a nih? (Isaia 5:7)
3 Bible-in rorêl dik lohna kan duh loh chhan chu a sawi a. Pathian Jehova’n a anpuiin min siam tih leh “felna leh rorêlna fel hi a ngaina” tih min hrilh a ni. (Sâm 33:5; Gen. 1:26) Dik lo takin thil a ti ngai lo va, tu mah chutianga ti tûrin a duh lo bawk! (Deut. 32:3, 4; Mik. 6:8; Zak. 7:9) Entîr nân, zâwlnei Isaia hun lai khân, an hnampuite kuta hnehchhiahna tuar Israel mi tam takte “mangang au thâwm” chu Jehova’n a hria a. (Isaia 5:7 chhiar rawh.) A Dân bawhchhiaa mi dangte dik lo taka cheibâwl ṭhînte chu a hrem a ni.—Is. 5:5, 13.
4. Isua’n rorêl dik lohna a thlîr dân chu Chanchin Ṭha bu-a chhinchhiah thilthleng pakhatin engtin nge a târ lan? (Milem en bawk rawh.)
4 Jehova ang bawkin, Isua pawhin rorêl dikna a ngainain, dik lo taka thiltihte chu a hua a ni. Ṭum khat chu, leia rawng a bâwl laiin kut zeng pakhat a hmu a. A khawngaih êm avângin a ti dam a; mahse, sakhaw hruaitute’n chu chu an hmuhin an thin a rim a ni. Chu mi ṭanpui aiin Sabbath dân khauh taka kenkawh chu an ngai pawimawh zâwk a. Chutianga an chhân lêt avângin Isua chu engtin nge a awm? “An thinlung a sak êm avângin pawi a ti hle” a ni.—Mk. 3:1-6, NWT.
Juda sakhaw hruaitute chuan ṭanpui ngaite chu an khawngaih lo; Isua erawh chuan a khawngaih (Paragraph 4-na en rawh)
5. Rorêl dik lohna avânga kan thinrimna chungchângah eng nge kan hriat reng ngai?
5 Jehova leh Isua pawh rorêl dik lohnain a tih thinrim avângin, thinrima kan awm ve chu thil sual a ni lo. (Eph. 4:26) Chutih rualin, kan thinrimna eng pawh chuan dinhmun chu a siam ṭha dâwn lo va. Thinrimna pai rengna, a nih loh leh thunun lohna chuan rilru lam leh tisa lamah min nghawng thei a ni. (Sâm 37:1, 8; Jak. 1:20) A nih chuan, rorêl dik lohna chu engtin nge kan hmachhawn ang? Isua entawn tûr siam aṭangin thil tam tak kan zir thei a ni.
ISUA’N ROREL DIK LOHNA A HMACHHAWN DAN
6. Isua leia a awm laiin eng rorêl dik lohnate nge hluar? (Milem en bawk rawh.)
6 Isua chuan leia a awm laiin rorêl dik lohna tam tak a hmu a. Sakhaw hruaitute’n mi nâwlpuite an hnuaichhiah dân chu a hmu a ni. (Mt. 23:2-4) Rom thuneitute’n ṭha lo taka mite an cheibâwl dân chu a hre bawk a. Juda mi tam tak chuan Rom awpna aṭanga zalenna hmuh an duh hle a ni. Sakhaw âtchilh pâwla mite chuan zalenna sual chhuah an tum a. Mahse, Isua chuan khawtlâng siam ṭhat tuma hmalâknate chu bul a ṭan loh bâkah, a thlâwp lo bawk a. Mite’n lala siam an tum tih a hriatin, a kal hrang ta zâwk a ni.—Joh. 6:15.
Mite’n politics thila inhnamhnawihtîr an tum chuan Isua chu a kal hrang (Paragraph 6-na en rawh)
7-8. Engvângin nge Isua’n leia a awm lai khân rorêl dik lohnate chu chinfel a tum loh? (Joh. 18:36)
7 Leia a awm lai khân, rorêl dik lohnate chingfel tûrin Isua’n a hun laia sawrkârte chu a thawhpui lo. Engvângin nge? Mihringte’n mahnia ro inrêl tûrin dikna emaw, theihna emaw an nei lo tih a hriat vâng a ni a. (Sâm 146:3; Jer. 10:23) Rorêl dik lohna thlen chhan berte chu an chingfel thei lo tih a hre bawk. Dik takin, he khawvêl hi a thuneihna hmanga rorêl dik lohnate awmtîrtu thlarau thilsiam suaksual tak Diabol Setana rorêlna hnuaiah a awm a. (Joh. 8:44; Eph. 2:2) Chu bâkah, ṭhat famkim lohna avângin rilru dik pute tân pawh dik taka thil tih reng a theih loh a ni.—Thur. 7:20.
8 Isua chuan Pathian Ram chauhvin rorêl dik lohna thlentîrtu berte chu a chingfel vek dâwn tih a hria a. Chuvângin, ‘thu hrilh leh Pathian Ram chanchin ṭha puannaah’ a hun leh tha a hmang a ni. (Lk. 8:1, NWT) “Felnaa rilṭâma tuihâlte” hnênah eirûkna leh rorêl dik lohna a tâwp dâwn tih a tiam a. (Mt. 5:6, NWT; Lk. 18:7, 8) Mahse, chu chu khawtlâng siam ṭhat tuma hmalâkna ni lovin, “he khawvêla mi” ni lo Pathian vân sawrkâr rorêlna hmanga thlentîr a ni ang.—Johana 18:36 chhiar rawh.
ROREL DIK LOHNA I HMACHHAWN HUNAH ISUA ENTAWN RAWH
9. Pathian Ram chauhvin rorêl dik lohna zawng zawng a rawn ti bo dâwn tih engin nge rin nghehtîr che?
9 Isua leia a awm lai aiin tûn laiah rorêl dik lohna a tam lehzual a. Chutih rualin, hêng ‘ni hnuhnûng’ chhûnga rorêl dik lohna thlentîrtu ber chu Setana leh a thununna hnuaia awm mi ṭha famkim lote an la ni chhunzawm zêl a ni. (2 Tim. 3:1-5, 13; Thup. 12:12) Isua angin, Pathian Ram chauhvin rorêl dik lohna thlentîrtu berte chu a rawn ti bo dâwn tih kan hria a. Pathian Ram chu kan thlâwp tlat avângin, rorêl dik lohna do lêt tûra khawvêl mite kawngzawhna leh hmalâkna dangahte chuan kan inhnamhnawih lo a ni. Unaunu Stacy-ia thiltawn hi han ngaihtuah teh. Thutak a zir hma chuan, khawtlâng siam ṭhat tuma hmalâknaahte a tel ziah ṭhîn a. Mahse, a thiltih chuan nghawng ṭha a neih tak tak leh tak tak loh a ringhlel ṭan a. “Kawng zawhnaa ka tel hian, ka ṭan lam chu a dik leh dik loh rinhlelhna ka nei ṭhîn a. Tûnah chuan Pathian Ram ka thlâwp tawh avângin, ka ṭan lam a dik tih ka chiang a. Jehova chuan ka theih aia ṭhain hnehchhiahna tuar zawng zawngte chu a ṭanpui ang tih ka hria a ni,” tiin a sawi.—Sâm 72:1, 4.
10. Khawtlâng siam ṭhat tuma hmalâknate chu Matthaia 5:43-48-a Isua zirtîrna nên eng kawngin nge a inmil loh? (Milem en bawk rawh.)
10 Khawtlâng siam ṭhat tuma hmalâknate chu mahnia dinchan duhna leh lungawi lohna thinlung aṭanga lo chhuak a ni fo va; chu chu Isua entawn tûr siam leh zirtîrna nên a inkalh a ni. (Eph. 4:31) Unau Jeffrey-a chuan: “Kawngzawh muanawm tak anga langte pawh rei lo te chhûngin tharum thawhna leh insuamnaah a chang thei tih ka hria a ni,” tiin a sawi. Dik takin, Isua chuan kan rinna min ṭâwmpui lotute leh min ti duhdahtute pawh tiamin, mi zawng zawng chu hmangaihna nei taka cheibâwl tûrin min zirtîr a. (Matthaia 5:43-48 chhiar rawh.) Kristiante kan nih angin, Isua’n entawn tûr min hnutchhiahte nêna inmil lo thiltih eng pawh chu theih tâwp chhuahin kan pumpelh a ni.
Tûn laia politics leh khawtlâng buainate chungchânga tualdâwih tûr chuan tumruhna kan neih a ngai (Paragraph 10-na en rawh)
11. Khawtlâng siam ṭhat tuma hmalâknate thlâwp lo tûra kan tumna chu engin nge fiah thei?
11 Pathian Ramin rorêl dik lohna chu chatuan atân a ti bo dâwn tih hre mah ila, dik lo taka cheibâwl kan nih hian Isua entawn chu harsa kan ti thei a ni. Inthliarhranna tâwktu Janiya-i sawi hi han ngaihtuah teh. “Ka thinrim êm êm a. Ka rilru a nain, chûng mite hrem ngei an nih chu ka duh a. Chuvângin, hnam inthliarna dova kawngzawhna thlâwp chu ka tum ta a. Chutianga tih chu ka thinrimna lan chhuahtîr dân kawng ṭha tak niin ka ngai a ni,” tiin a sawi. Mahse, a hnuah chuan inthlâk danglam a ngai tih a hria a. “Jehova aia mihringte rinchhan zâwk tûrin mi dangte ka inthununtîr reng hi a lo ni a. Chuvângin, chu kawngzawha telte nêna inkûngkaihna neih tawh loh chu ka thlang ta a ni,” tiin a sawi. Ni e, chhan ṭha tak neia kan thinrimna eng pawh chu he khawvêl politics leh khawtlâng buainaa tualdâwih tûra kan tumna tih chhiattîr lo tûrin kan fîmkhur tûr a ni.—Joh. 15:19.
12. Engvângin nge kan thu ngaihven zâwngte chungchânga fîmkhur chu a finthlâk?
12 Engin nge rorêl dik lohna avânga kan thinrimnate chu thunun tûra min ṭanpui thei? Mi tam tak chuan an thu chhiar te, an thu ngaihthlâk te leh, an thil ente fîmkhur taka thlan chu an hlâwkpui a. Social media-a thu ṭhenkhat chu dik lo taka thiltihnate sawivunga khawtlâng siam ṭhat tuma hmalâkna thlâwp tûr zâwnga târ lan a ni fo va. Chanchin tharte pawh ṭan lam neia puan a ni ṭhîn bawk. Rorêl dik lohna thleng tak tak kan hria a nih pawhin, chumi chungchâng ngaihtuah reng chu kan ṭangkaipui ang em? Chûng thilte atâna hun tam tak kan pêk chuan, ṭûl lo taka rilru hah leh lunghnualin kan awm phah thei a. (Thuf. 24:10) Chu aia pawi zâwk chu, rorêl dik lohna zawng zawng chingfel hlentu tûr Pathian Ram chu kan ngai pawimawh lo ṭan thei a ni.
13. Bible chhiarna hun duan ṭha tak neihna chuan rorêl dik lohna chungchânga thlîr dân dik nei tûrin engtin nge min ṭanpui theih?
13 Bible chhiarna leh chhût ngunna hun duan ṭha tak neihna chuan rorêl dik lohna hmachhawnnaah min ṭanpui thei a. Unaunu Alia-i chu a awmna khuaa mite dik lo taka cheibâwl an nih a hmuh chuan a rilru a hrehawm hle a. Chutianga dik lo taka cheibâwltute chu hrem an nih loh avângin a thinrim hle a ni. Ani chuan: “‘Jehova’n hêng buainate hi a chingfel dâwn tih ka ring tak tak em?’ tiin ka inzâwt a. Tichuan, Joba 34:22-29 hi ka chhiar a. Chûng Bible chângte chuan, Jehova’n engkim a hmu tih min hriat nawntîr a. Amah chauhvin rorêlna ṭha famkim awmzia a hria a; buaina zawng zawng a chingfel dâwn a ni,” tiin a sawi. Chutih rualin, rorêl dikna rawn thlen tûra Pathian Ram kan nghah mêk lai hian, rorêl dik lohna kan tawhte chungchângah thil eng emaw kan tih a ngai a ni. Eng nge kan tih theih?
ROREL DIK LOHNA CHUNGCHANGA TUNA KAN TIH THEIHTE
14. Tûna kan tih theih pakhat chu eng nge ni? (Kolossa 3:10, 11)
14 Mi dangte thiltih dik lote chu thunun thei lo mah ila, kan thiltihte chu kan thunun thei a. Kan sawiho tawh angin, hmangaihna lantîrin Isua kan entawn thei a ni. Chutiang hmangaihna chuan min ti duhdahtute pawh tiamin, mi dangte chu zah taka cheibâwl tûrin min chêttîr thei a. (Mt. 7:12; Rom 12:17) Mi zawng zawng ngilnei tak leh dik taka kan cheibâwl hian Jehova a lâwm a ni.—Kolossa 3:10, 11 chhiar rawh.
15. Bible thutak hrilhna chuan tûn laia rorêl dik lohna thlengte chungah eng nghawng nge a neih?
15 Rorêl dik lohna kan chhân lêt theih dân kawng pawimawh ber chu mite hnêna thutak hrilh hi a ni. Engvângin nge chutianga kan sawi theih? ‘Jehova hriatna’ chuan mi thinram leh tharum thawh chîngte pawh mi ngilnei leh remna duh mia a thlâk danglam theih vâng a ni. (Is. 11:6, 7, 9) Thutak a hriat hmain, unaupa Jemal-a chuan, sawrkârte’n mipuite an hnehchhiah nia a hriat avângin hel pâwl pakhat a zawm a. Ani chuan: “Mite chu inthlâk danglam tûrin i nawrlui thei lo. Kei pawh tih luihna vâng ni lovin, Bible thutak ka zirte avâng chauhva inthlâk danglam thei ka ni,” tiin a sawi. A thu zirte chuan sawrkâr do chhunzawm lo tûrin a chêttîr a. Bible thutakin a thlâk danglam an tam poh leh, rorêl dik lohna ti zualkaitu an tlêm ting dâwn a ni.
16. Engvângin nge mite hnêna Lalram beiseina hrilh chu i châk?
16 Isua angin, Pathian Ram chauhvin rorêl dik lohnate a chingfel hlen thei tih mite hrilh chu kan phûr hle a. Chu beiseina chuan ṭha lo taka cheibâwla awmte chu a ti chak thei a ni. (Jer. 29:11) Kan târ lan tâk Stacy-i chuan: “Thutak ka zirte chuan rorêl dik lohna ka hmuhte leh ka tawhte hmachhawn thiam tûrin min ṭanpui a. Jehova chuan Bible thuchah hmangin mite chu a thlamuan a ni,” tiin a sawi. Bible thutiamte hmanga mite thlamuan tûr chuan ṭha taka kan inbuatsaih a ngai a. He thuziaka kan sawiho tâk Bible thute dikzia i rin ngheh poh leh, school-ah emaw, hnathawhna hmunah emaw fing thiam takin mite i sawipui thei lehzual ang.b
17. Engtin nge Pathianin rorêl dik lohnate hmachhawn thei tûra min ṭanpui?
17 Setana chu “he khawvêl rorêltu” a nih chhûng chuan rorêl dik lohnate kan hmachhawn zêl dâwn tih kan hria a. Mahse, “paih chhuah” a nih hun tûr kan nghah chhûng hian ṭanpuitu nei lo emaw, beisei bo emawin kan awm lo. (Joh. 12:31, NWT) Pathian Jehova chuan Bible hmangin rorêl dik lohnate a hluar chhan bâkah, chumi avânga kan tawrhnate min hriatthiampuizia min hrilh a. (Sâm 34:17-19) A Fapa hmangin tûna rorêl dik lohnate kan chhân lêt dân tûr leh a Lalramin nakin lawka rorêl dik lohnate chatuan atâna a tih bo dân tûr pawh min hrilh bawk a ni. (2 Pet. 3:13) Chuvângin, leilung hi ‘dikna leh felnaa’ a khah hun tûr thlîr tlat chungin Lalram chanchin ṭha chu ṭhahnemngai takin i hril chhunzawm zêl ang u!—Is. 9:7.
HLA 158 “A Tlai Chuang Lo Vang!”
a Hming ṭhenkhat chu thlâk a ni.
b Mite Hmangaih La—Zirtîrahte Siam Rawh tih lehkhabu-a thu belhna A point 24-27 chu en bawk rawh.