Pathian Hmangaihna Kumkhuain A Awm Reng

1-2. Kristian tam takte chuan eng harsatna nge an hmachhawn?

THLIPUI na takin a nuai mêk lawng pakhat hi han mitthla teh. Tui fâwn na tak takte chuan a sêp a sêp a. Thîrchakai tel lo chuan, tuifâwnin a hruaina lam lamah a kal mai dâwn a. Thîrchakai chuan lawng chu thlipui hruaina lam lama kal bo lo tûrin a chelh ding tlat dâwn a ni.

² Fiahna khirh tak i hmachhawn hunah, chu lawng ang mai niin i inhre thei a ni. I rilru awm dânte chu a inthlâk reng thei a. Jehova’n a hmangaih chein a ṭanpui dâwn che tih i rin rualin, i harsatna tawhte a hriatpui tak zet che em tih rinhlelh châng pawh i nei a ni. (Sâm 10:1; 13:1) I ṭhian tu emaw thlamuanna chuan hun rei lo te chhûng a hnêm che pawh a ni thei a. (Thuf. 17:17; 25:11) Mahse, a hnuah, Jehova mithmuhah i hlu tak zet em tih i ringhlel leh a ni. Chutiang hunah chuan engtin nge entîr nei thîrchakaiina a chelh din lawng ang i nih theih? Thu danga sawi chuan, engtin nge Jehova’n a hmangaih chein, a ṭanpui dâwn che tih i rinngheh tlat theih?

3. Sâm 31:7 leh 136:1-a târ lan “ngilneihna,” a nih loh leh, hmangaihna rinawm tih awmzia chu eng nge ni? Engvângin nge Jehova chu chumi kawnga entawn tûr ṭha ber a ni tia kan sawi theih? (Milem en bawk rawh.)

³ Fiahna i tawh huna nghet taka i awm theih dân kawng khat chu Jehova hmangaihna rinawm hriat reng hi a ni a. (Sâm 31:7; 136:1 chhiar rawh.) “Hmangaihna rinawm” tih ṭawngkam chuan tu emawin mi dang chunga ngainatna thûk tak leh nghet tak a neih chu a kâwk a. Chumi kawngah chuan, Jehova chu entawn tûr ṭha ber a ni. Dik takin, Exodus 34:6, 7 leh Sâm 86:5-a “ngilneihna ngah” tih a tîra ṭawngkam chuan hmangaihna leh rinawmna chu Jehova miziate zînga mize pawimawh takte an ni tih a târ lang a. Chumi awmzia chu han ngaihtuah teh: Jehova chuan a chhiahhlawh rinawmte chu a thlahthlam lo tihna a nih chu! Jehova chu a rinawm tih hriat rengna chuan harsatna khirh tak i hmachhawn hunah a ti nghet dâwn che a ni.—Sâm 23:4.

JEHOVA HMANGAIHNA CHU BIBLE ZIRTIRNA BULPUI A NI TIH HRE RENG RAWH

4. Bible zirtîrna bulpui entîrna ṭhenkhat pe la, chûngte a dik tih kan rin ngheh chhan hrilhfiah rawh.

⁴ Fiahna i tawh huna nghet taka i awm theih dân kawng dang leh chu Jehova hmangaihna chu Bible zirtîrna bulpui a ni tih hriat reng hi a ni a. “Bible zirtîrna bulpui,” tih ṭawngkam hi engtin nge i hriatthiam? Bible thutak i lo hriat tawh; entîr nân, Pathian hming chu Jehova a ni tih te, Isua chu Pathian Fapa mal neih chhun a ni tih te, mitthite chuan engmah an hre lo tih te leh, mihringte chatuana an nunna tûr lei paradis a awm dâwn tih thutakte chu i ngaihtuah mai thei a. (Sâm 83:18; Thur. 9:5; Joh. 3:16; Thup. 21:3, 4) Chûng zirtîrnate i pawm chuan, rinhlelhna i nei tawh lo a ni. Engvângin nge? A chhan chu thu dik ṭanchhan zirtîrnate an ni tih i hriat vâng a ni a. Tûnah, Jehova hmangaihna chu Bible zirtîrna bulpui a ni tih hriatna chuan harsatna i tawh hunah Jehova’n a ngaihsak chein a ngaihven tak zet che em tih i rinhlelhna chu hneh tûra a ṭanpui theih dân che kan ngaihtuahho vang.

5. Tu emawin zirtîrna dik lote a hnâwl theih dân hrilhfiah rawh.

⁵ Bible i zir ṭan khân, engin nge zirtîrna dik lote hnâwl thei tûra ṭanpui che? Zirtîrna i lo dawn tawhte leh Bible-a thutak i zirte khaikhinna chuan a ṭanpui che a ni thei a. Entîr nân, Isua chu Pathian Engkimtitheia angin i lo hre ṭhîn a. Mahse, Bible i han zir chuan, ‘He zirtîrna hi a dik tak tak em?’ tiin i inzâwt a. Bible-a finfiahnate i zir chian hnu chuan, a dik lo tih i hre chhuak ta a. Chu veleh, chu zirtîrna dik lo chu thlahin, Isua chu “thil siam zawng zawnga piang hmasa ber” leh, “Pathian Fapa mal neih chhun” a ni tih Bible thutak i zir chu i vuan tlat thei ta a ni. (Kol. 1:15, NWT; Joh. 3:18, NWT) Dik takin, zirtîrna dik lote chu tih chhiat harsa tak “kulhpui nghet takte” ang an ni thei a. (2 Kor. 10:4, 5, NWT) Mahse, thutak i zir hnu chuan, chûng zirtîrna dik lote chu i hnâwl hlen tawh a ni.—Phil. 3:13.

6. Engvângin nge Jehova “hmangaihna rinawm chu kumkhuain a awm” tih i chian theih?

⁶ Nang pawh, fiahna i tawh hunah, Jehova hmangaihna chungchânga rinhlelhna i nei a nih chuan, chutiang chuan i ti ve thei a ni. ‘Ka ngaihtuahna a fîm em?’ tiin i inzâwt thei a. Jehova hmangaihna chungchânga i rinhlelhna chu he thuziak ṭanchhan Bible châng Sâm 136:1-naa thu nên khaikhin ang che. Engvângin nge Jehova’n a hmangaihna chu “rinawm” tia a sawi? Engvângin nge “a hmangaihna rinawm chu kumkhuain a awm” tih thu chu vawi 26 lai târ lan a nih? Kan sawiho tâk ang khân, a mite tâna Pathian hmangaihna rinawm chu i lo pawm tawh zirtîrna dangte ang bawka Bible zirtîrna bulpui pakhat a ni a. Chuvângin, Jehova mit hmuha hlu lo leh hmangaih tlâk lo nia inngaih chu a dik lo a ni. Zirtîrna dik lote i hnâwl ang bawkin, chu ngaihdân dik lo chu hnâwl ang che!

7. Jehova’n min hmangaih tih finfiahtu Bible châng ṭhenkhat târ lang rawh.

⁷ Bible-ah Jehova’n min hmangaih tih finfiahna tam tak târ lan a ni a. Entîr nân, Isua’n a zirtîrte hnênah: “Chawngzawng tam tak aiin in hlu zâwk hle si a,” tiin a sawi a ni. (Mt. 10:31, NWT) Jehova ngeiin a mite chu: “Ka tichak ang che u a, a ni, ka ṭanpui ang che u; ka felna kut ding lamin ka chelh reng ang che u,” tiin a hrilh bawk a. (Is. 41:10) Han ngaihtuah teh: Isua’n, ‘In hlu zâwk mai thei,’ tiin emaw, Jehova’n, ‘Ka ṭanpui mai thei che,’ tiin emaw an sawi lo va. Chu aiin, “In hlu zâwk hle,” tiin leh, “Ka ṭanpui ang che u,” tiin an sawi zâwk a ni. Chu chu a chhinchhiah tlâk hle! Fiahna i tawh hunah Jehova hmangaihna i ringhlel a nih chuan, chûng Bible chângte chuan Jehova hmangaih nia inhriatna neih mai aia tam, a hmangaih che tih rinnghehna nei tûrin a ṭanpui dâwn che a ni. Chûng thute chuan thu dik an ṭanchhan a. Ṭawngṭaina nêna chhût ngunna chuan 1 Johana 4:16-a [NWT]: “Pathian min hmangaihna chu kan hria a, kan ring bawk a ni,” tih thu hi ṭâwmpui tûrin a chêttîr ang che.a

8. Jehova’n a hmangaih che tih rinhlelh châng i neih chuan, eng nge i tih theih?

⁸ Jehova’n a hmangaih che tih rinhlelh châng i la nei cheu a nih chuan, engtin nge ni ang? I rilru awm dân leh thu dik i hriat chu i khaikhin thei a ni. Kan rilru awm dânte chu thu dik anga rinchhan tlâk a ni lo va; Bible-in min zirtîr Jehova hmangaihna erawh thu dik a ni. Chuvângin, Jehova’n min hmangaih tih kan ring lo a nih chuan, a mize ropui ber—a hmangaihna chu pawm lo ang kan ni dâwn a ni .—1 Joh. 4:8.

JEHOVA’N A ‘HMANGAIH DAN CHE’ CHU NGAIHTUAH RAWH

9-10. Johana 16:26, 27-a Isua’n “Pa ngeiin a hmangaih si che u a,” tia a sawi hian, eng a sawina nge? (Milem en bawk rawh.)

⁹ “Pa ngeiin a hmangaih si che u a,” tia Isua’n a zirtîrte hnêna a thusawi aṭangin Jehova hmangaihna chungchâng kan zir belh thei a. (Johana 16:26, 27 chhiar rawh.) Chu chu Isua’n a zirtîrte ngaih ṭhat nân maia sawi a ni lo. Dik takin, a chung leh hnuaia thute aṭangin, a zirtîrte rilru vei zâwng chungchâng a sawi lo tih kan hre thei a. Chu aiin, thil dang daih, ṭawngṭaina chungchâng a sawi zâwk a ni.

¹⁰ Isua’n a zirtîrte chu a hnênah ni lovin, amah kal tlanga ṭawngṭai tûrin a lo hrilh tawh a. (Joh. 16:23, 24) Chu chu an hriat a pawimawh a ni. Isua a thawhleh khân, a zirtîrte’n a hnêna ṭawngṭai an duh mai thei a. A chhan chu, an ṭhian a nih angin, anmahni a hmangaihna chuan an dîlna te ngaihthlâksaka, a Pa hnêna thlen tûrin Isua chu a chettîr dâwn niin an ngai thei a ni. Mahse, Isua’n chutiang ngaih dân chu nei lo tûrin a hrilh a ni. Engvângin nge? “Pa ngeiin a hmangaih si che u a,” tia a sawi vâng a ni. Chu chu ṭawngṭaina chungchânga Bible zirtîrna bulpui pakhat a ni a. Chumiin i tâna awmzia a neih chu han ngaihtuah teh: Bible i zirna aṭangin, Isua chu i rawn hre chiangin i rawn hmangaih a. (Joh. 14:21) Mahse, kum zabi khatnaa zirtîrte ang bawkin, ‘Pa ngeiin a hmangaih che,’ tih i hriat avângin, Pathian hnênah inrintâwkna nei takin i ṭawngṭai thei ta a. Chutianga i tih apiangin, Isua thusawite chu a ring tih i lantîr a ni.—1 Joh. 5:14.

RINHLELHNA NEIHTIRTU CHE CHU HRIAT TUM RAWH

11. Jehova hmangaihna kan ringhlel a nih chuan, engvângin nge Setana a hlim ang?

¹¹ Jehova hmangaihna chungchânga rinhlelhnate chu khawi aṭanga lo awm nge? Setana avânga lo awm niin i ngai mai thei a; chu chu a dikna lai a awm a ni. Diabola chu ‘a ei theih tûr zawnga a vah ruai ṭhin’ avângin, Jehova hmangaihna chunga rinhlelhna kan nei a nih chuan a lâwm hle ang. (1 Pet. 5:8, NWT) Dik takin, hmangaihna chuan Jehova chu tlanna pe tûrin a chêttîr a—chu chu phû lo nia inhre tûrin Setana’n min duh a ni. (Heb. 2:9) Mahse, Jehova hmangaihna kan ringhlel a nih chuan, tu nge hlim ang? Setana a hlim dâwn a ni. A nih leh, harsatna kan tawh huna kan beidawng a nih chuan, tu thiltum nge hlawhtling ang? Setana thiltum a ni. Jehova hmangaihna rinhlelhtîr tuma Setana hma lâk dân hi han ngaihtuah teh. Dik takin, ani chuan Jehova hmangaihna chu kumkhua atân a hloh tawh a. Mahse, a “thil tih verther” berte zînga pakhat chu, Jehova hmangaih loh leh hnâwl nia kan inhriat theih nâna a hma lâkna hi a ni a. (Eph. 6:11, NWT) Kan hmêlma, Diabola hma lâk dân hriatna chuan amah ‘dodâl’ tûra kan tumna chu a ti nghet thei a ni.—Jak. 4:7, NWT.

12-13. Engtin nge kan rochun sual chuan Jehova hmangaihna min rinhlelhtîr theih?

¹² Jehova hmangaihna chunga rinhlelhna chu thil dang aṭang pawhin a lo awm thei a. Chu chu eng nge ni ang? Kan rochun sual a ni. (Sâm 51:5; Rom 5:12) Sual chuan min Siamtu nêna kan inlaichînna chu a ti chhia a. Kan rilru, thinlung leh, tisa a ti chhe bawk a ni.

¹³ Sual chuan inthiam lohna, lungngaihna, insitna leh zahna min neihtîr a. Thil sual kan tih hian chutiang chuan kan awm ṭhîn a ni. Chu bâkah, ṭha famkim lo kan ni tih kan inhriat reng avângin, chutiang chuan kan awm thei bawk a—chu chu a tîra Jehova’n mihringte a siam dân a ni lo. (Rom 8:20, 21) Motor ke thêp chu a nih dân tûr anga a tlân ṭha thei lo ang hian, ṭha famkim lo mihringte pawh duan kan nih angin kan awm thei lo va. Chuvângin, Jehova hmangaihna rinhlelh châng kan nei pawh hi a mak lo ve. Chutiang hunah chuan, Jehova chu ‘Pathian ropui leh hlauhawm, amah hmangaiha a thupêk pawmtute chunga thuthlung hlena khawngaihna tilangtu,’ a ni tih kan hre reng tûr a ni.—Neh. 1:5.

14. Engtin nge tlanna chungchâng chhût ngunna chuan Jehova’n min hmangaih thei ngai lo vang tih ngaih dân chu hnâwl tûra min ṭanpui theih? (Rom 5:8) (“‘Sual Bumna Thiltithei Tak’ Chu Do Rawh,” tih bâwm chu en bawk rawh.)

¹⁴ Ni e, Jehova hmangaihna dawn phû lo nia inhriat châng kan nei thei ngei mai. Dik takin, chu chu kan phû lo rêng a. Chu tak chu a ni, kan chunga a hmangaihna hlut zualtîrtu chu! Kan thil tih hmangin Jehova hmangaihna kan hlawh chhuak thei ngai dâwn lo va. Min hmangaih avângin, kan sualte khuh bo tûrin tlanna thilpêk min pe zâwk a ni. (1 Joh. 4:10) Isua chu ṭha famkimte ni lovin, mi sualte chhandam tûra lo kal a ni tih hre reng bawk ang che. (Rom 5:8 chhiar rawh.) Tu mahin ṭha famkimin thil kan ti thei lo va, chutianga kan tih chu Jehova’n min beisei lo bawk. Kan rochun sualin Jehova hmangaihna ringhlel tûrin min siam thei tih kan hriat avângin, chu chu theih tâwp chhuaha do kan duh a ni. —Rom 7:24, 25.

RINAWM TUM TLAT RAWH

15-16. Jehova chunga kan rinawm tlat chuan, eng nge kan chian theih a, engvângin nge? (2 Samuela 22:26)

¹⁵ Jehova chuan duh thlanna dik siama, ‘amah vuan tlat’ tûrin min duh a. (Deut. 30:19, 20) Chutianga kan tih chuan, kan chungah a rinawm tlat ang tih kan chiang thei a ni. (2 Samuela 22:26 chhiar rawh.) Jehova chunga kan rinawm tlat chuan, kan nunah eng dinhmun pawh tâwk mah ila, min ṭanpui ang tih kan ring nghet tlat thei bawk.

¹⁶ Kan sawiho tâk angin, fiahna kan tawh hunah nghet taka awm theihna tûr chhan tam tak kan nei a. Jehova’n min hmangaihin, min ṭanpui ang tih kan hria a ni. Chu ngei chu a ni, Bible-in min zirtîr chu! A hmangaihna rinhlelh châng kan nei a nih chuan, dik nia kan hriatte aiin kan zir tawh thu dikte chu kan ngaihtuah thei a ni. Jehova hmangaihna rinawm chu kumkhuain a awm ang tih Bible ṭanchhan thutak hi i ring nghet tlat ang u!