Kum Upat Hunah Pawh Hlimna Nei Reng Rawh

1-2. Engtin nge Jehova’n kum upa mi rinawmte chu a thlîr? (Sâm 92:12-14; milem en bawk rawh.)

KHAWVEL hmun hrang hranga mite’n kum upatna an chhân lêt dân chu a inang lo va. He entîrna hi han ngaihtuah teh: I sam ṭuak hmasa ber kha i la hria em? Mite hriat hmaa pawh chu i duh mai thei a ni. Mahse, sam ṭuak la ṭo zêl tûrte chu a dang thei lo tih i hria a. He entîrna hian, mi tam takin kum upatna do an tum nasatzia a târ lang a ni.

² Mahse, kum upa a chhiahhlawhte chunga kan Pa vâna mi thlîr dân erawh a dang lam a ni. (Thuf. 16:31) Anni chu thingkûng duah hluah hluah nên a tehkhin a. (Sâm 92:12-14 chhiar rawh.) Engvângin nge chutianga tehkhin chu thil inâwm tak a nih? Thingkûng upa tawh takte chuan hnah tam tak leh pâr rimtui tak takte an neih ṭhin avângin, an mawi thei hle a. Chutianga kum tam tak dam thingkûng chi khat chu Japan rama awm cherry thingkûng hi a ni a. Thingkûng mawi berte zînga ṭhenkhat chu kum sâng chuang an dam thei a ni. Kum upa mi rinawmte pawh chûng kum tam tak dam thingkûngte angin, Pathian mit hmuhah an mawi hle a. Jehova chuan an lu ṭuak mai piah lam a hmu a. An chhelna leh rinawmna ang chi an mize duhawm takte bâkah, kum tam tak rawng an lo bâwl tawhnate chu a ngaihlu tak zet a ni.

3. Jehova’n a thiltumte ti hlawhtling tûra kum upate a hman dân entîrna pe rawh.

³ Kum upatna chuan mi chu Jehova mit hmuha a hlutna a ti nêp lo va.a Dik tak chuan, Jehova’n a thiltumte tih hlawhtlin nân kum upate a hmang fo a ni. Entîr nân, Sari chu Jehova’n hnam chak takte nu leh Messia thlahtu a ni dâwn tia a sawi khân, kum upa tawh tak a ni a. (Gen. 17:15-19) Chutiang bawkin, Jehova’n Aigupta aṭanga Israelte hruai chhuak tûra Mosia a tirh khân, ani chu kum upa tawh tak a ni. (Ex. 7:6, 7) Tirhkoh Johana pawh Bible-a bu ngate ziak tûra thlarauva thâwk khum a nih khân kum upa tawh tak a ni.

4. Thufingte 15:15-a sawi angin, engin nge kum upate chu an hmachhawn harsatnate tuar chhuak tûra ṭanpui thei? (Milem en bawk rawh.)

⁴ Kum upate chuan an upat chhoh telh telh hian harsatna tam tak an hmachhawn a. Unanu pakhatin fiamthu ti tak deuh hian, “Kum upatna chu mi dâwizepte tân a ni lo,” tiin a sawi a ni. Chutih rualin, hlimnab chuan kum upate chu an harsatna tawhte chhel taka tuar chhuak tûrin a ṭanpui thei a. (Thufingte 15:15 chhiar rawh.) He thuziakah hian, hlimna nei reng tûra kum upate ṭanpuitu thil ṭhenkhatte kan sawiho vang a. Chu bâkah, mi dangte’n kohhrana kum upa unaute an ṭanpui theih dân pawh kan sawiho bawk ang. A hmasain, kan upat chhoh zêl ruala hlimna vawn reng a harsat theih chhan i lo sawiho vang u.

KUM UPATNAIN HLIMNA A NGHAWNG THEIH DAN

5. Engin nge kum upa ṭhenkhatte chu ti lunghnual mai thei?

⁵ Engin nge ti lunghnual mai thei che? Tûn hmaa i thil lo tih ṭhinte i tih theih tawh loh avângin i lunghnual mai thei a. I tleirâwl ṭhat lai leh i hrisêl ṭhat laite chu i ngai ngawih ngawih pawh a ni thei a ni. (Thur. 7:10) Entîr nân, unaunu Ruby-i chuan: “Ka taksa a nat êm avâng leh ka chêt ṭhat theih loh avângin, kawr hâk tak ngial pawh ka harsat a. Mawza bun ang chi thil ho tê pawh ka tân a awlsam tawh lo hle. Ka kutte pawh a na ṭhêm ṭhûmin ka hmang ṭha thei lo,” tiin a sawi. Bethel-a rawngbâwl unau Harold-a chuan: “Hetianga ka’n awm ta hi pawm a harsain, a châng phei chuan ka lung ni lo hial a. Tûn hma chuan ka chak hle ṭhîn a. Baseball khelh hi nuam ka ti thei ṭhîn hle. Mite chuan, ‘Harold-a kha ball pe rawh u, ani kha a thiam ber,’ an ti ṭhîn a. Mahse, tûnah chuan ball vawm tak ngial pawh ka thei tawh lo a ni,” tiin a sawi.

6. (a) Eng chhan dang hrang hrang avângtein nge kum upate chu an lunghnual mai theih? (b) Kum upate chu lîrthei khalh an tâwpsan dâwn leh dâwn loh chungchânga thu tlûkna siam tûrin engin nge ṭanpui thei? (“Lîrthei Khalh Ka Tâwpsan Ang Em?” tih thuziak chu en rawh.)

⁶ Duh anga mahnia thil i tih theih tawh loh avângin, i lunghnual mai thei a. A bîk takin, mi dangte ṭanpuina i mamawh hian, a nih loh leh i fate ina i insawn a ngaih hian a ni lehzual thei a ni. Chu bâkah, i duhna hmuna mahnia kal kual thei lo khawp emaw, lîrthei khalh thei lo khawp emawa i hrisêlna a ṭhat tawh lohva, thil i hmuh fiah theih tawh loh avângin i lunghnual hle thei bawk. A va beidawnthlâk dâwn tak êm! Chutih rualin, Jehova leh mi dangte tâna kan hlutna chu mahni kan inngaihsak theih leh theih loh emaw, lîrthei kan khalh theih leh theih loh emawah a innghat lo tih hriat chu i thlamuanpui ngei ang. Jehova’n kan rilru vei zâwngte a hria tih kan chiang thei bawk a. A tâna pawimawh ber chu amah leh kan Kristian unaute tih tak zeta hmangaiha ngaihlutu kan chhûngril nihna zâwk hi a ni.—1 Sam. 16:7.

7. An dam chhûnga he kalhmang a la tâwp mai dâwn lo anga a lan avânga lunghnualte chu engin nge ṭanpui thei?

⁷ I dam chhûnga he kalhmang a la tâwp mai dâwn lo anga a lan avângin, i lunghnual thei bawk a. Chutianga i awm a nih chuan, engin nge ṭanpui thei che? Jehova’n he khawvêl suaksual tak a tih tâwp hun tûr chu dawhthei takin a nghâk tih i hre reng thei a ni. (Is. 30:18) A nih leh, engvângin nge Jehova’n dawhthei taka a nghah? A dawhtheihna chuan mi maktaduai tam tak chu amah hre tûr leh a rawngbâwl tûrin hun remchâng a pe a. (2 Pet. 3:9) Chuvângin, i lunghnual hunah, mi tam takin tâwpna a thlen hmaa Jehova dawhtheihna an hlâwkpui dân chu ngaihtuah tum tlat ang che. An zînga ṭhenkhat chu i chhûng leh kuate an ni thei ang em?

8. Kum upate’n an dam lohva hrehawm an tawrh hian, eng nge an tih palh theih?

⁸ Kan kum zât chu eng pawh ni se, kan dam ṭhat loh hian, kan inchhîr lehna tûr thilte kan sawiin kan ti fo ṭhîn a. (Thur. 7:7; Jak. 3:2) Entîr nân, mi rinawm Joba’n hrehawm a tawrh khân, a ‘thute chu a bung’ hle a ni. (Job. 6:1-3) Chu bâkah, an natna avângin kum upate chuan an sawi ngai lohte sawiin, an tih ngai lohte an ti mai thei a. Chutih rualin, kum upatna leh hrisêl lohnate chu chhuanlama siamin, ngilnei lo taka mi dangte cheibâwl leh engkim tihsak tûra phût chu kan duh ngai lo vang. Chu bâkah, tu emaw hnênah thu pawi kan sawi tih kan hre chhuak a nih chuan, ngaihdam dîl kan hreh tûr a ni lo.—Mt. 5:23, 24.

HLIMNA VAWN RENG THEIH DAN

9. Engvângin nge mi dangte ṭanpuina i pawm a ngaih? (Milem en bawk rawh.)

⁹ Mi dangte ṭanpuina pawm rawh. (Gal. 6:2) A tîr chuan, chutianga tih chu harsa i ti mai thei a. Unaunu Gretl-i chuan: “Mi dangte tâna phurrit nih ka duh loh avângin, an ṭanpuina pawm harsa tih châng ka nei a. Hun eng emaw chen a liam hnuah chauh, ka ngaihtuah dân chu thlâkin, mi dangte ṭanpuina ka mamawh tih ka pawm thei ta a ni,” tiin a sawi. Mi dangte ṭanpuina i pawm hian, pêkna aṭanga lo awm hlimna chu i neihtîr ang a ni a. (Tirh. 20:35) Chu bâkah, mi dangte’n an hmangaih chein, an ngaihsak tak zet che tih i hmuh hunah i hlim hle ngei ang.

10. Engvângin nge lâwmna lantîr nachâng i hriat a ngaih? (Milem en bawk rawh.)

¹⁰ Lâwmna lantîr rawh. (Kol. 3:15; 1 Thes. 5:18) Mi dangte’n kan chunga thil ṭha an tih hian, lâwm hle mah ila, lâwmna lantîr kan theihnghilh thei a. Mahse, hlim hmêl pua lâwmthu kan sawina chuan kan ṭhiante chu ngaihhlut nia inhriatna a neihtîr a ni. Bethel-a kum upate enkawltu unaunu Leah-i chuan: “Ka enkawl mêk unaunu pakhat chuan lâwmthu sawina thu tâwi tê min hnutchhiah ṭhîn a. Thu tâwi tê ni mah se, rilru a khawih thei hle. Chûng thute chuan ka ṭanpuina a ngaihlu tih min hriattîr avângin, min ti lâwm tak meuh a ni,” tiin a sawi.

11. Engtin nge mi dangte i ṭanpui theih? (Milem en bawk rawh.)

¹¹ Mi dangte ṭanpui tum rawh. I hun leh thate mi dangte tâna hmanna chuan i harsatnate chauh ngaihtuah lo tûrin a ṭanpui ang che. Africa thufing pakhat chuan kum upate chu finna tam tak chuanna lehkhabu-a khat library nên a tehkhin a. Mahse, chûng lehkhabute chu kan chhiar lo a nih chuan, eng mah kan zir thei lo vang. Chutiang bawkin, ṭhalaite chu i biak lohva, i thil hriatte i hrilh loh chuan, i hnên aṭangin eng mah an zir thei dâwn lo a ni. Chuvângin, zawhnate zâwtin an thusawite ngaihthlâksak la. Jehova tehna mila nun chu a ṭhat ber chhan leh chu chuan hlimna a thlen theih chhante hrilh ang che. Ṭhalaite i thlamuanna leh i tih chakna chuan hlimna a neihtîr ngei ang che tih i chiang thei a ni.—Sâm 71:18.

12. Isaia 46:4-a sawi angin, Jehova’n kum upate chu eng nge tihsak a tiam? (Milem en bawk rawh.)

¹² Chakna dîlin Jehova hnênah ṭawngṭai rawh. Tisa lam leh rilru lamah i chau hle pawh a ni thei a; mahse, Jehova chu ‘a chau ngai lo va, a hah ngai hek lo.’ (Is. 40:28) Engtin nge Jehova chuan a chakna nasa tak chu a hman? A hman dân kawng khat chu mi rinawm kum upate tih chak hi a ni a. (Is. 40:29-31) Dik tak chuan, anni chu ṭanpui a tiam a ni. (Isaia 46:4 chhiar rawh.) Ani chuan a thutiamte chu a hlen reng ṭhîn a. (Jos. 23:14; Is. 55:10, 11) I ṭawngṭaia Jehova hmangaihna leh ṭanpuina i dawn hian, hlimna nasa tak i nei a ni.

13. Korinth thawn hnih 4:16-18-a sawi angin, eng nge kan hriat reng ngai? (Milem en bawk rawh.)

¹³ I dinhmun chu hun rei lo tê atân chauh a ni tih inhriat nawntîr ṭhîn rawh. Dinhmun khirh tak kan tawhte chu hun rei lo tê atân chauh a ni tih hriatna chuan tawrh a ti awlsam lehzual a. Bible chuan kum upatna leh hrisêl lohna chu hun rei lo tê atân chauh a ni tih min hrilh a. (Job. 33:25; Is. 33:24) Chuvângin, i hun ṭha berte chu hun kal tawhah ni lovin, i hma lam hunah a awm tih hriain i hlim thei a ni. (2 Korinth 4:16-18 chhiar rawh.) Chutih rualin, mi dangte’n engtin nge an ṭanpui theih che?

KUM UPATE KAN ṬANPUI THEIH DAN

14. Engvângin kum upate tlawh leh biak chu a pawimawh?

¹⁴ Kum upa unaute chu tlawhin be fo rawh. (Heb. 13:16) Kum upate chuan mal ngawih ngawih nia inhriat châng an nei thei a. In chhuahsan thei lo unau Camille-a chuan: “Ni lênga ina ka awm tlawk tlawk ṭhin avângin, a ninawm thei hle. A châng chuan, sakeibaknei khung beh tlat ang mai hian ka inhria a, ka thin a chhe thei hle a ni,” tiin a sawi. Kum upate kan tlawh apiang hian, anni chu kan tân an pawimawhin, kan hmangaih tih kan lantîr a ni a. Kan za hian, kohhrana kum upate tlawh emaw, biak emaw tumin, a hnua theihnghilh leh châng kan nei ṭheuh ngei ang. Kan buai theih êm avângin, kum upate tlawh pawh tiamin, engin nge ‘thil pawimawh zâwkte fiah thei tûra’ min ṭanpui ang? (Phil. 1:10, NWT) Kohhrana kum upate message thawn emaw, tlawh emaw i theihnghilh loh nân calendar-a chhinchhiahna ziah chu ṭangkai i ti thei a. A remchân hunah chauh ni lovin, anmahni tlawh tûrin ruahmanna i siam thei bawk a ni.

15. Ṭhalaite leh kum upate’n eng nge an tih dun theih?

¹⁵ Kum naupang i nih chuan, kum upate nêna in tih dun theih tûrte emaw, in sawi dun theih tûrte emaw i hre kher lo mai thei a. Mahse, hlauthâwng lutuk duh suh. Chu aiin, an tân ṭhian ṭha nih tum la. (Thuf. 17:17) Inkhâwm ṭan hma leh bân hnuahte hun pein be ṭhîn ang che. An Bible châng duh ber emaw, an naupan laia an thiltawn nuihzatthlâkte emaw i zâwt thei a. JW Broadcasting® program enpui tûrin i sâwm thei bawk a ni. Kum upate chu ṭanpuina ṭangkai takte i pe thei bawk a. Entîr nân, an phone leh tablet-te i update-sak theiin, thu leh hla chhuah chhuak thar ber berte i download-sak thei a ni. Unaunu Carol-i chuan: “Kum upate chu nuam i tih zâwngte tihpuiah i sâwm thei a. Kum upa tak ni tawh mah ila, hlim taka nun hman ka la duh a. Pâwn chhuaka thil lei te, ei te leh, Pathian thilsiamte thlîr hi nuam ka ti thei hle,” tiin a sawi. Unaunu Maira-i pawhin: “Ka ṭhian pakhat chu kum 90-a upa a ni a. Kum 57-in kan inthlau a ni. Mahse, movie-te kan en dûn a, kan hlim theih êm avângin kan kum inthlauh zât chu ka hre chang tawh ṭhîn lo. Harsatnate kan neih hunah, kan inṭanpui tawn ṭhîn bawk a ni,” tiin a sawi.

16. Engvângin nge kum upate doctor-te hnêna kalpui chu a ṭhat?

¹⁶ Doctor hmuh a ngaih hunah kalpui rawh. Kum upate chu damdawi ina i kalpui mai bâkah, doctor leh nurse-te’n ṭha takin an cheibâwlin an ngaihsak tih i chian theih nân i awmpui thei a. (Is. 1:17) Chu bâkah, doctor-te thu hrilh chu ṭha takin i lo chhinchhiahsak thei bawk. Kum upa unaunu Ruth-i chuan: “Mahni chauhva doctor ka va hmuh hian, min ngai pawimawh lo ṭhîn a. Anni chuan, ‘I ṭha vek alâwm; nâ angin i inngaihbel mai mai a nih kha,’ tihte’n an lo hrilh mai thei che a. Mahse, tu emaw kalpui ka neih hi chuan, doctor-te min cheibâwl dân chu a danglam thei hle. Hun pea min kalpui ṭhîntu ka unaute chungah ka lâwm tak zet a ni,” tiin a sawi.

17. Eng kawngtein nge kum upate chu rawngbâwlnaa i telpui theih?

¹⁷ Rawngbâwlnaah thawhpui rawh. Kum upa ṭhenkhat chu an chak tawh loh avângin, in tin kal an harsat thei a. Chuvângin, kum upa unaunu tu emaw chu nawrlirh hmanga thu hrilhnaa thawhpuiah i sâwm thei ang em? Nawrlirh bula a ṭhut theih nân ṭhutthlêng i buatsaihsak thei bawk a ni. A nih loh leh, kum upa unaupa tu emaw chu i Bible zirnaa tel tûrin i sâwm thei a; a theih chuan, a inah Bible zirna chu in neiho thei a ni. Kohhran upate chuan kum upate tâna tel a awlsam lehzual nân, rawngbâwlna atâna inhmuh khâwmna chu an ina nei tûrin ruahmannate an siam thei bawk. Kum upate chawimawi tûra kan thil tih eng pawh chu Jehova’n a ngaihlu a ni.—Thuf. 3:27; Rom 12:10.

18. A dawta thuziakah eng nge kan sawiho vang?

¹⁸ Jehova’n kum upate chu a hmangaihin a ngaihlu tih kan hre tawh a. Kohhrana unaute pawhin kan ngaihlu a ni. Kum upatna chuan harsatna tam tak thlen thei che mah se, Jehova ṭanpuinain i hlimna chu i vawng reng thei a ni. (Sâm 37:25) I hun ṭha berte chu hun kal tawhah ni lovin, i hma lam hunah a awm tih hriat chu a va thlamuanthlâk tak êm! A nih leh, chhûngkuaa dam lo kum upa, naupang, a nih loh leh ṭhian tu emaw enkawltute chungchâng hi engtin nge ni ang? Engtin nge an hlimna an vawn reng theih ang? A dawta thuziakah chu zawhna chhânna chu kan sawiho dâwn a ni.