‘Thlarau Thianghlimin Inpumkhat Zawm Zêl Rawh U’
TIRHKOH Paula chuan Ephesi khuaa Kristiante chu “hmangaihnain indawh tawn rawh u. Thlarau thianghlimin in inpumkhat tawh a, inrem taka awmin, inpumkhat zawm zêl tum tlat rawh u,” tiin a fuih a ni.—Eph. 4:2, 3, NWT
Kan ‘inpumkhatna’ hi Pathian thlarau thianghlim ṭanpuina avânga kan neih a ni a. Mahse, kan inpumkhatna chu kan vawn tlat a ngai tih Paula’n a sawi a. Engtin nge? ‘Thlarau thianghlima inpumkhat zawm zêl’ tûr chuan Kristian tinte’n ṭan kan lâk ṭheuh a ngai a ni.
Entîr nân, tu emawin car thar a pe che angah han inchan teh. Chu car vawn ṭhat chu tu mawhphurhna nge ni ang? A chhânna chu a chiang sa reng mai. Kan ngaihsak loh avânga car a lo chhia a nih chuan, car min petu chu kan mawhpuh thei dâwn lo a ni.
Chutiang bawkin, kan Kristian inpumkhatna hi Pathian thilpêk hlu tak a nih avângin, chumi vawn ṭhat chu mi tinte mawhphurhna a ni a. Unau tu emaw nên kan inrem lo a nih chuan, heti hian kan inzâwt thei a ni: ‘Kohhranah inpumkhatna a awm reng theih nân theih tâwp ka chhuah em?’ tiin.
INPUMKHATNA VAWN ‘TUM TLAT RAWH’
Paula sawi angin, thlarau thianghlim ṭanpuina avânga kan neih inpumkhatna vawng tlat tûr chuan theih tâwp kan chhuah a ngaih châng a awm thei a. A bîk takin, unau tu emawin min tih lungnih loh hunah ṭan kan lâk lehzual a ngai a ni. Inpumkhatna vawng reng tûrin, buaina chingfel tûra kan va pana, kan rilru awm dânte kan va sawi reng a ngai tihna a ni em? Ni lo. Heti hian kan inzâwt thei a ni: ‘Kan lungnih lohna sawi chhuahna chuan dinhmun chu a ti ṭha dâwn nge, a ti chhe zâwk dâwn?’ tiin. A châng chuan ngaihthah leh ngaihdam mai chu thil finthlâk tak a ni zâwk ṭhîn.—Thuf. 19:11; Mk. 11:25.
Heti hian i inzâwt thei a ni: ‘Kan lungnih lohna sawi chhuahna chuan dinhmun chu a ti ṭha dâwn nge, a ti chhe zâwk dâwn?’ tiin.
Tirhkoh Paula ziah angin, ‘hmangaihnain i indawh tawn’ ṭheuh vang u. (Eph. 4:2, NWT) Lehkhabu pakhat chuan chu ṭawngkam chu “an nihna angin pawm tawp rawh,” tia sawi theih a nih thu a târ lang a. Kan Kristian unaute chu keimahni ang bawkin an ṭha famkim lo tih kan pawm tihna a ni a. Ni e, ‘mize thara inthuam’ chu kan tum ṭheuh ngei mai. (Eph. 4:23, 24, NWT) Amaherawhchu, tu mahin ṭha famkimin thil kan ti thei lo. (Rom 3:23) Chu thu dik chu kan pawm a nih chuan, indawh tawn te, inngaihdam tawn te leh, ‘thlarau thianghlima inpumkhat’ chu kan tân a awlsam lehzual ang.
Mi mal inkâra intih thiam lohnate chu ngaidam a, kan theihnghilh bo thei a nih chuan ‘inrem takin kan awm’ zawm zêl thei ang. Ephesi 4:3-naa “inpumkhat,” tia lehlin Grik thu mal chu nghet taka ruh thlung zawmtu pangti mûr sawi nân pawha hman theih a ni a. Chutiang bawkin, unaute kan hmangaihna bâkah, remna chuan inhmuh thiam lohnate a awm hunah pawh inlaichînna ṭha nei zawm zêl tûrin min ṭanpui ang.
Chuvângin, unau tu emawin a tih lungnih loh che a, a ti thinrim che a nih chuan, sawisêl aiin ani chu hriatthiam tum zâwk ang che. (Kol. 3:12) Mihring ṭha famkim lo kan nih avângin, nang pawhin mi dangte tih nat châng i nei thei a. Chumi hriat rengna chuan ‘thlarau thianghlima inpumkhat zawm zêl’ tûra i tih ngaite ti tûrin a ṭanpui dâwn che a ni.