Joba Bu-in Hrehawm I Tawrh Hunah A Ṭanpui Thei Che

1-2. Joba bu chhiar a hlâwkna ṭhenkhat chu eng nge ni?

JOBA bu hi chhiar nuam i lo ti ṭhîn em? Kum 3,500 vêl liam taa ziah ni tawh mah se, he hmân lai lehkhabu hi khawvêla lehkhabu ṭha berte zînga chhiar tel a ni fo va. Mâwlmang taka a thu rem dân te, a ziah dân mawi tak te leh, a ṭawngkam hman fiah takte avângin, lehkhabu pakhat chuan a ziaktu chu “lehkha lama mi thiam chungchuang,” tiin a ko a ni. Mosia chu he lehkhabu danglam tak ziak chhuaktu ni mah se, a Ziaktu dik tak erawh Pathian Jehova a ni.—2 Tim. 3:16.

² Joba bu hi Bible-a bu pawimawh tak pakhat a ni a. Engvângin nge? A chhan pakhat chu finna nei thil siam zawng zawngte hmachhawn buaina lian tak—Jehova hming tih thianghlimna—chu fiah taka a târ lan vâng a ni. Chu bâkah, hmangaihna, finna, rorêl felna leh, thiltihtheihna ang chi Jehova mize ropui tak takte chungchâng min zirtîr bawk. Entîr nân, Joba bu chuan Jehova chu “Engkimtitheia,” tiin vawi 31 a târ lang a; chu chu Bible bu dang zawng zawnga târ lan belh khâwmte aia tam zâwk a ni a. He zawhna: Engvângin nge Pathianin hrehawm tawrhna awm a phal? tih pawh tiamin, mi tam takte hriat châk nuna zawhna tam tak chu a chhâng a ni.

3. Joba bu zirna chu engtin nge kan hlâwkpui theih?

³ Tlâng sâng hmun pakhat aṭanga kan chhehvêla thil awmte fiah taka kan hmu thei ang hian, Joba bu chuan Jehova thlîrna sâng tak aṭanga kan fiahna tawhte thlîr thiam tûrin min ṭanpui a ni. Tûnah, Joba buin hrehawm kan tawrh huna min ṭanpui theih dân i lo en ang u. Israel mite’n Joba chanchin an hlâwkpui theih dân tûr leh keini pawhin kan hlâwkpui theih dân kan zir ang a. Mi dangte ṭanpui tûra Joba bu kan hman theih dân pawh kan hre bawk ang.

PATHIANIN JOBA CHU HREHAWM A TAWRH A PHAL

4. Aigupta rama Israel mite leh Joba inan lohna langsâr tak chu eng nge ni?

⁴ Aigupta ramah Israel mite’n sal anga hrehawm an tawrh laiin, Ram Tiam chhak lam leh Arabia hmâr lam vêla awm ni thei Uz ramah chuan Joba an tih mi pakhat a awm a. Aigupta rama milem betu Israel mite nêna inang lo takin, Joba chuan rinawm takin Jehova rawng a bâwl a ni. (Jos. 24:14; Ezek. 20:8) Jehova’n Joba chungchângah: ‘Lei chungah hian amah ang tu mah an awm lo,’a tiin a sawi a. (Job. 1:8) Joba chu mi hausa tak leh Khawchhak rama chêng mi dang zawngte aiin mite zah a kai a ni. (Job. 1:3) Pathian rawngbâwl he mi rinawm tak a hmuh chuan Setana chu a va thinrim dâwn tak êm!

5. Engvângin nge Jehova’n Joba chu hrehawm a tawrh a phal? (Job. 1:20-22; 2:9, 10)

⁵ Setana chuan Joba’n hrehawm a tuar a nih chuan biakna dik a kalsan ang tih a sawi a. (Job. 1:7-11; 2:2-5) Jehova’n Joba chu hmangaih hle mah se, Setana puhna chuan thu buai lian tak tak a tih chhuah avângin, a puhna chu a dik leh dik loh finfiah tûrin hun a pe a ni. (Job. 1:12-19; 2:6-8) Setana chuan Joba berâm rualte leh ran rualte a lâksak a, a fa sâwmte chunga thihna a thlentîr bâkah, amah Joba ngei pawh a kephah hnuai aṭanga a lû thlengin pânchhia a veitîr a ni. Mahse, chu beihna râwng tak chuan Joba rinawmna chu a ti chhe thei chuang lo. (Joba 1:20-22; 2:9, 10 chhiar rawh.) A hnuah, Jehova’n Joba chu hausakna te, hrisêlna te leh, hming ṭhatnate pe lehin, fa sâwm dang pawh a pêk belh a. Chu bâkah, mak danglam takin, Joba dam chhûng chu kum 140-in a pawh seisak a, a thlahte pawh chhuan lina thlengin a hmuh theih phah a ni. (Job. 42:10-13, 16) Engtin nge a chanchin chu tûn hmaa mite’n an hlâwkpui theih a, keini pawhin kan hlâwkpui ve theih?

6. Engtin nge Israel mite’n Pathianin hrehawm tawrhna awm a phal chhan hriatna chu an hlâwkpui theih ang? (Milem en bawk rawh.)

⁶ Israel mite’n an hlâwkpui theih dân tûr. Aigupta rama Israel mite nun chu a hrehawm hle a. Entîr nân, Josua leh Kaleba pawh kum tam tak chhûng sal angin an awm a. Chumi hnuah, an thiam loh vâng ni hauh lovin, thlalêrah kum 40 chhûng an vâkvai leh a ni. Israel mite’n Joba fiahna tawhte leh a nun tâwpa thilthlengte chu lo hre ta sela chuan, anmahni leh an thlahte chu hrehawm tawrhna awmtîrtu ber hre thiam tûrin a ṭanpui ngei ang. Chu bâkah, Pathianin hrehawm tawrhna awm a phal chhan leh mihringte rinawmna a ngaihhlutzia pawh an hre thiam lehzual ngei ang.

7-8. Engtin nge Joba bu chuan hrehawm tuarte chu a ṭanpui theih? Thiltawn pakhat sawi rawh.

⁷ Kan hlâwkpui theih dân. Lungchhiatthlâk takin, tûn laia mi tam tak chuan mi ṭhate chunga thil ṭha lo a thlen chhan an hriatthiam loh avângin Pathian chunga an rinna chu an hloh va. Rwanda rama unaunu Hazel-ib thiltawn hi han ngaihtuah teh. A naupan lai chuan Pathian a ring a; mahse, a hnuah thilte chu a inthlâk danglam a ni. A nu leh pate an inṭhen avângin ṭha lo taka amah cheibâwltu a pa hrawn enkawlna hnuaiah a seilian a. A tleirâwl chhoh chuan, pâwngsual a tâwk bawk a. Thlamuannate hmuh tumin biak inahte kal mah se, a hmu chuang lo. A hnuah, Hazel-i chuan Pathian hnênah hetiang hian lehkha a ziak a ni: “Lalpa, i hnênah ka ṭawngṭaiin, thil ṭhate tih ka tum ṭhîn a; mahse, nang chuan thil ṭha lovin min thungrûl a ni. Tûnah chuan, ka kalsan tawh dâwn che a, ka duh duh ka ti tawh ang,” tiin. Hazel-i anga an thiltawnte avânga an hrehawm tawrhnate chu Pathian thlentîr nia ngaitu mite chu kan va tawrhpui tak êm!

⁸ Keini chuan hrehawm tawrhna mawhphurtu chu Pathian ni lovin, Setana a ni tih Joba bu-a thilthlengte aṭangin kan hria a! Hrehawm tuarte chuan an thawh rah an seng tih ngaih dân chu a dik lo tih kan hre tawh bawk a. Bible chuan mi tinte chungah “hun leh beisei loh thilthlengte” chu englai pawhin a thleng thei tih min hrilh a ni. (Thur. 9:11; Job. 4:1, 8) Fiahnate rinawm taka kan tawrh chhuahna hmangin, Jehova chu Setana puhna chhâng lêt thei tûrin hun remchâng kan pe tih pawh kan hre bawk. Chu chuan A hming ṭhatna hum tûrin a ṭanpui a ni. (Job. 2:3; Thuf. 27:11) Chûng thutak kan hriatte chu kan ngaihlu hle a, a chhan chu keimahni leh kan hmangaih takte’n hrehawm kan tawrh chhan hre thiam tûra min ṭanpui vâng a ni. A hnuah, Hazel-i chuan Jehova Thuhretute nên Bible zirin a hrehawm tawrhte chu Pathian vâng a ni lo tih a rawn hre thiam a. Heti hian a sawi a ni: “Pathian hnênah thinlung takin ka ṭawngṭai leh a. Ka kalsan ang che ka tih khân, ka kalsan tak tak loh thu ka hrilh a. Dik tak chuan, Jehova chu ka lo hre chiang lo a ni. Tûnah chuan, min hmangaih tak zet tih ka hre tawh a. Hlimna leh lungawina ka nei tawh a ni,” tiin. Pathianin hrehawm tawrhna awm a phal chhan kan hre thiam thei chu kan va lâwm tak êm! Tûnah, Joba chanchinin fiahnate kan tawh huna mi mal taka min ṭanpui theih dân i lo enho vang u.

JOBA CHANCHININ CHHEL TURA MIN ṬANPUI DAN

9. Hrehawm tuar Joba chungchâng chu engtin nge i hrilhfiah ang? (Jakoba 5:11)

⁹ Joba, pânchhia veia a hrehawm tawrh avânga kun ngawih ngawih chunga vaivuta a ṭhu lai chu han mitthla teh. Pânchhia avângin a vunte chu a thimin, amah pawh a chêr chhe hle a. A chauh tawh êm avângin, a pânchhiate bêl keh thema hiah paha phunnawi tih mai loh chu thil dang eng mah tih theih nei tawh lo angin a lang thei a. Mahse, Joba chuan a nung satliah mai ni lovin, chhelna a lantîr a ni. (Jakoba 5:11 chhiar rawh.) Engin nge Joba chu chhel tûra ṭanpui?

10. Joba chuan Jehova nên eng inlaichînna nge a neih? Hrilhfiah rawh.

¹⁰ Joba’n a rilrua awmte chu Jehova hnênah a hrilh a. (Job. 10:1, 2; 16:20) Entîr nân, bung 3-na chuan a chunga thleng chûng chhiatnate chu Jehova thlentîr nia ngaiin a phunnawi nasa hle tih min hrilh a ni. A hnua a ṭhian pathumte nêna an inhnialnaah pawh, Joba chuan Pathian Jehova chunga a rinawmzia chu a sawi lang fo va. Joba thusawite chuan hun eng emaw chhûng Pathian aia fel zâwk nia a inngaih thu a târ lang a ni. (Job. 10:1-3; 32:1, 2; 35:1, 2) Mahse, a rinawmzia hum a tumna lamah a châng chuan ‘thu bung’ tak takte a sawi tih a pawm a. (Job. 6:3, 26) Bung 31-naah chuan, Joba’n thil sual eng mah a tih lohzia Pathian aṭang ngeia chhânna a beisei thu kan chhiar bawk a. (Job. 31:35) Dik tak chuan, Joba’n chutianga a beisei chu a ti dik lo a ni.

11. Engtin nge Jehova’n Joba chu a rinawmna chungchângah a chhân lêt?

¹¹ Joba’n Jehova a biak dân aṭangin, Pathian nêna an inlaichînna a nghehzia leh a chungah dik takin ro a rêl ang tih a rinnghehzia kan hre thei a. A hnuah, Jehova’n Joba chu ṭhâwngaleivir aṭanga a chhân chuan a hrehawm tawrh chhante chu chipchiar takin a hrilh lo va. A phunnawi avâng leh sualna nei lo nia a insawi avângin a dem hek lo. Chu aiin, Jehova chuan Joba chu fapa angin thu a hrilh zâwk a. Chu chu Joba a ṭanpui theih dân kawng ṭha ber a ni. A tâwpah, Joba chuan a hriat tlêmzia inngaitlâwm taka pawmin ngaihtuah chiang lova thu a sawi avângin a inchhîr a ni. (Job. 31:6; 40:4, 5; 42:1-6) Engtin nge tûn hmaa mite’n Joba chanchin chu an hlâwkpui theih ang a, keini pawhin kan hlâwkpui theih ang?

12. Engtin nge Israel mite’n Joba chanchin chu an hlâwkpui theih ang?

¹² Israel mite’n an hlâwkpui theih dân tûr. Israel mite chuan Joba chunga thilthleng aṭangin an inzir thei a. Mosia chungchâng hi han ngaihtuah teh. Israel mite hruaitu a nih lai khân harsatna te, lunghnualna te leh, beidawnnate a tawrh a ngai a. Jehova chunga phunnawi fo ṭhîn hel hmang Israelte nêna inang lo takin, ani chuan a lungkhamnate chu Jehova hnênah a hrilh ṭhîn a. (Ex. 16:6-8; Num. 11:10-14; 14:1-4, 11; 16:41, 49; 17:5) Chu bâkah, amah ngeiin zilhna a tawh khân chhelna a lantîr a ngai a ni. Entîr nân, Israel mite thlalêra kum 40 an vahvaih chhûnga Kades hmuna an chawlh lai khân, Mosia chuan ‘a hmuia ṭha lo taka sawiin,’ Jehova hming a chawimawi lo a ni. (Sâm 106:32, 33) Chuvângin, Jehova chuan Mosia chu Ram Tiamah luh a phal lo va. (Deut. 32:50-52) Chu zilhna chu Mosia tân na hle mah se, inngaitlâwm takin a pawm a ni. A hnua Israel thlah la awm tûrte chu Joba chanchin chuan an hmachhawn fiahnate tuar chhuak tûrin a ṭanpui thei ngei ang. Chumi chanchin chhût ngunna hmangin, mi rinawmte chuan Jehova hnêna an rilrua awmte sawi chhuah dân leh mahni thiamthu sawi pumpelh dân an zir thei ang a. Inngaitlâwm taka Jehova zilhna pawm dân pawh an zir thei bawk ang.

13. Engtin nge Joba bu chuan chhelna lantîr tûra min ṭanpui theih? (Hebrai 10:36)

¹³ Kan hlâwkpui theih dân. Kristiante kan nih angin, chhelna kan neih a ngai a. (Hebrai 10:36 chhiar rawh.) Entîr nân, kan zînga ṭhenkhat chuan tisa lam leh rilru lama harsatna te, chhûngkaw buaina te, hmangaih tak tu emaw chânna te leh, harsatna dang khirh tak takte kan hmachhawn a. Mi dangte thusawi leh thil tihte chuan kan dinhmun a tih harsat zual chângte pawh a awm thei a ni. (Thuf. 12:18) Mahse, Joba bu chuan kan rilru chhûngrila awmte Jehova hnênah kan hrilh theiin, min ngaihthlâksak dâwn a ni tih min zirtîr a. (1 Joh. 5:14) Joba anga thinlung taka kan dîlnate chu a lo “bung” deuh a nih pawhin, Jehova’n min dem lo vang. Chu aiin, chhel taka tuar chhuak tûra kan mamawh chakna leh finna min pe zâwk dâwn a ni. (2 Chro. 16:9; Jak. 1:5) Joba chunga a tih angin, a âwm tâwkin min zilh pawh a ni thei a. Joba bu chuan Bible, Jehova inawpna pâwl leh, ṭhian puitling takte hnên aṭanga zilhna kan dawn hunah chhelna lantîr dân min zirtîr bawk. (Heb. 12:5-7) Joba ang bawkin, keini pawh zilhna kan dawnte inngaitlâwm taka pawm chu kan hlâwkpui ve thei a ni. (2 Kor. 13:11) Joba hnên aṭangin zir tûr ṭha tak kan nei tih a chiang hle! Tûnah, mi dangte ṭanpui nâna Joba bu kan hman theih dân i lo ngaihtuahho vang u.

MI DANGTE ṬANPUI NAN JOBA BU HMANG RAWH

14. Rawngbâwlnaah hrehawm tawrhna a awm chhan hrilhfiah nân, engtin nge mite chu kan chhûtpui theih?

¹⁴ Rawngbâwlnaah hrehawm tawrhna a awm chhan zâwttu che i tawng tawh ngai em? Engtin nge a zawhna chu i chhân? Eden huana thilthleng chungchânga Bible sawi chu i hrilh pawh a ni thei a. Thlarau sual pakhat Setana chuan Pathian laka hel tûra nupa tuak hmasa berte hnêna dâwt a hrilh dân aṭangin i sawi ṭan pawh a ni thei. (Gen. 3:1-6) Evi leh Adama hel hnuah chuan khawvêl chu hrehawmna leh thihnain a lo khat tih i hrilh zawm pawh a ni thei a. (Rom 5:12) A tâwpah, Setana dâwt thu sawi hai lan nân leh mihringte chu an ṭha famkim leh dâwn tih chanchin ṭha puan darh nân Pathianin hun eng emaw chen a liam a phal thu i hrilh pawh a ni thei bawk. (Thup. 21:3, 4) Chu chu chhûtpui dân kawng ṭha tak niin, rah ṭha tak pawh a chhuah thei ngei ang.

15. Engtin nge Joba bu chu hrehawm kan tawrh chhan min zâwttu tu emaw ṭanpui nâna kan hman theih? (Milem en bawk rawh.)

¹⁵ Hrehawm kan tawrh chhan kan hrilhfiah theih dân kawng dang leh chu Joba chungchâng hrilhna hmangin a ni a. A hmasain, chutiang zawhna awmze nei tak a zawh avângin ani chu i fak thei a. Chumi hnuah, hmân laia hrehawm tam tak tuartu Joba pawhin chutiang zawhna chu a nei vein a hrehawm tawrhna chu Pathian thlentîr niin a ngai hial tih i hrilh thei a ni. (Job. 7:17-21) I mi biak chuan a zawhna neih chu hmân lai aṭanga mite lo zawh ṭhin a ni tih a hriatna chuan a rilru a khawih ngei a rinawm. A dawtah, Joba hrehawm tawrhnate chu Pathian vâng ni lovin, Diabola vâng a ni tih fing thiam takin i hrilh thei a. Diabola chuan mihringte’n Pathian an biak chhan chu mahni hmasialna vâng a ni tih finfiah a duh vâng a ni a. Joba hrehawm tawrhna chu Pathian thlentîr ni lo mah se, chutianga awmtîr chu a phal a; chu chuan Pathianin mi rinawmte’n Setana dik lohna an finfiah thei tih a rinzia a târ lang a ni. A tâwpah, Pathianin Joba chu a rinawmna avângin mal a sâwm tih i hrilh thei bawk. Chuvângin, kan hrehawm tawrhnate chu Jehova thlentîr a ni lo tih hrilh fiahin mite chu kan thlamuan thei a ni.

16. Joba buin hrehawm tuar mêk mi pakhat a ṭanpui dân târ langtu thiltawn pakhat sawi rawh.

¹⁶ Joba bu-in Mario-a a ṭanpui dân hi han ngaihtuah teh. Kum 2021 khân, tûk khat chu unaunu pakhat chuan phone hmanga thu hrilhna a nei a. A call hmasak bernaah, Mario-a chu Bible châng pakhat chhiarsakin, Pathianin kan ṭawngṭainate min ngaihthlâksak mai ni lovin, hma lam hun beiseina pawh min pêk thu a hrilh a. A ngaih dân a han zawh chuan, Mario-a chuan mahni a intih hlum tûr thu lehkha a lo ziah mêk thu a hrilh a ni. Ani chuan, “Pathian chu ka ring a; mahse, min kalsan ta ni hian ka lo ngai a,” tiin a sawi. A call ṭum hnihnaah chuan Joba hrehawm tawrhna chungchângte an sawi dûn a. Mario-a chuan Joba bu chu chhiar chhuah vek a tum ta a ni. Tichuan, unaunu chuan Khawvêl Thar Lehlin Pathian Lehkha Thu a chhiar theih nân link pakhat a thawn a. A hnuah eng nge thleng? Mario-a chuan Bible zirna chu pawmin, a chunga ngaihsakna lantîrtu hmangaihna nei tak Pathian chungchâng chu zir belh a tum ta a ni.

17. Engvângin nge thlarauva thâwk khuma ziah a Thua Joba bu a telh avânga Jehova chunga i lâwm? (Joba 34:12)

¹⁷ Pathian Thu chuan hrehawm tuarte pawh tiamin, mite ṭanpui tûrin thiltihtheihna nasa tak a nei tih a chiang a. (Heb. 4:12) Jehova’n Joba chanchin chu thlarauva thâwk khuma ziah a Thua a telh avângin kan va lâwm tak êm! (Job. 19:23, 24) Joba bu chuan “Pathian chuan suaksual takin a ti lul lo vang,” tih min rinnghehtîr a ni. (Joba 34:12 chhiar rawh.) Chu bâkah, Pathianin hrehawm tawrhna awm a phal chhan leh chhel taka kan tawrh chhuah theih dân pawh min zirtîr a. Chu chuan hrehawm tuarte thlamuan tûrin min ṭanpui a ni. A dawta thuziakah, Joba buin thurâwn pêkna kawnga min ṭanpui theih dân kan sawiho vang.