“Pathian Kaihhruaina” Rinchhan Zawm Zêl Rawh

1. Jehova’n eng mamawh bulpui neiin nge min siam? (Matthaia 5:3)

JEHOVA’N mihringte chu mamawh bulpuite neiin min siam a. Entîr nân, kan nun zawm zêl theih nân, ei leh in te, thawmhnaw te leh, chênna tûr hmunte kan mamawh a. Chûngte zînga pakhat chauh pawh rei lote chhûng tlachhama kan awm a nih chuan, nun chu a harsa hle thei a ni. Dik tak chuan, Jehova’n chûng tisa lam mamawhte neia min siam mai bâkah, thlarau lam mamawhna nei pawhin min siam a. (Matthaia 5:3 chhiar rawh.) Chuvângin, hlimna dik tak neih kan duh chuan, chûng kan mamawhte chu kan hriat a, kan phuhrûk zawm zêl a ngai a ni.

2. ‘Pathian kaihhruaina mamawh nia inhria,’ tih awmzia hrilhfiah nân eng entîrna nge i hman ang?

² ‘Pathian kaihhruaina mamawh nia inhria,’ tih awmzia chu eng nge ni? A tîra thuziaka he ṭawngkam hian thlarau lama kutdawh tih awmzia a nei a. Chu ṭawngkam chuan kutdawh mi rethei tak min mitthlatîr a. Thawmhnaw bâl leh ṭet hnuang haa kawng sîra mi pakhat ṭhu chu han mitthla teh. Ei tûr a tlâkchham avângin a chau hle a; a lan dân avânga mite en hran a hlawh bâkah, chhûn ni sa hnuaiah ṭhuin, zân boruak vawt tak a tuar bawk a ni. Chu kutdawh chuan a dinhmun ti hmasâwn tûrin ṭanpuina a mamawh tih a hre chiang hle. Chutiang bawkin, thlarau lam mamawhna nei tih inhria—thlarau lama kutdawh—chuan a dinhmun ti hmasâwn tûrin ṭanpuina a mamawh dâwn a. Chuvângin, ani chuan Jehova’n amah hmangaihtute tâna hnianghnâr taka a buatsaih thlarau lam ruahmannate chu hlâwkpui a duh tak zet a ni.

3. He thuziakah hian eng nge kan sawiho vang?

³ He thuziakah hian, Isua hnêna ṭanpuina dîltu Phoiniki hmeichhe pakhat hnên aṭanga kan zir theihte chu kan sawiho hmasa ang a. A chanchin chuan thlarau lam mamawhna nei nia inhriate neih ngai mize pathum a târ lang ang a. A hnuah, Pathian kaihhruaina an mamawh tih inhria mi pathum—tirhkoh Petera, Paula leh, Lal Davida te—entawn tûr siam chu kan ngaihtuahho dâwn a ni.

INNGAIHTLAWMNA, BEIH FAN FANNA LEH, RINNA KAWNGA ENTAWN TUR

4. Phoiniki hmeichhia chuan Isua hnên aṭangin eng nge a mamawh?

⁴ Ṭum khat chu, Phoiniki hmeichhe pakhat chuan Isua a va pan a. A fanu chu “ramhuaiin a man a, nasa takin a ti buai a ni.” (Mt. 15:21-28) Chu hmeichhia chuan ṭhingṭhi meuhvin Isua hnênah ṭanpuina a dîl a. Chutianga Isua a va pan chuan, mize chhinchhiah tlâk takte a lantîr a ni. Chûng zînga ṭhenkhat chu i lo ngaihtuahho vang u.

5. Phoiniki hmeichhia chuan eng miziate nge a lantîr a, Isua’n engtin nge a chhân lêt? (Milem en bawk rawh.)

⁵ Phoiniki hmeichhia chuan inngaihtlâwmna dik tak a lantîr a ni. Engvângin nge chutianga kan sawi theih? A chhan chu Isua’n Jentailte ina duat taka an vulh ṭhin uitê nêna a khaikhin khân a thinrim lo. Nang ni ta la, engtin nge i chhân lêt ang? Lungni lo leh a ṭanpuina dîl zawm duh lovin i beidawng mai ang em? Phoiniki hmeichhia chu chutiang chuan a awm lo. Ani chuan inngaihtlâwmna a lantîr mai ni lovin, ṭanpuina a dîl fan fan zâwk a. Chu chu ṭanpuina a dîl zawm zêl dânah a lang chiang hle. A nih leh, engin nge chutianga ti tûra chêttîr? Isua chunga a rinna a ni. Dik tak chuan, chu hmeichhe rinna chuan Isua rilru a khawih êm avângin, thil chhinchhiah tlâk tak tihsak tûrin a chêttîr a ni. Isua chuan “Israel hnam berâm bote tân chauhva tirh” a nih thu hrilh tawh mah se, chu Jentail hmeichhe fanu chhûnga awm ramhuai chu a hnawh chhuahsak a ni.

6. Engtin nge Phoiniki hmeichhia chu kan entawn theih?

⁶ Kan thlarau lam mamawh phuhru tûr chuan chûng miziate chu kan neih ve a ngai a. Inngaihtlâwmna leh rinna nghet tak kan lantîr a, kan beih fan fan a ngai a ni. Kan inngaihtlâwm chauhvin Pathian hnênah ṭanpuina kan dîl fan fan thei dâwn a. Isua Krista chunga rinna nghet tak kan neih a, a hnungzuitute kaihruai tûra a mi hmante pawh kan rin a ngai bawk. (Mt. 24:45-47) Jehova leh a Fapa chuan chûng mizia lantîrtute thlarau lam mamawh phuhhrûksak chu nuam an ti a. (Jakoba 1:5-7 nên khaikhin rawh.) Tûnah, Jehova’n thlarau lam chaw, thawmhnaw leh, bûk tê min buatsaihsak dân kawngte i lo bih chiang ang u. Tirhkoh Petera, Paula leh Lal Davida te entawn tûr siam zuiin, chûng kan mamawhte nei tûra kan tih ngaite pawh kan hmu ang.

PETERA ANGIN—THLARAU LAMAH INCHAWM RENG RAWH

7. Petera’n eng mawhphurhna nge a dawn a; mahse, eng nge a tih ngai bawk? Hrilhfiah rawh. (Hebrai 5:14–6:1)

⁷ Tirhkoh Petera chanchin hi han ngaihtuah teh. Ani chu Jehova’n a mite hnêna “chatuana nunna thlentu thute” hriattîr tûra a mi hman Isua chu Messia a ni tih pawmtu hmasa ber Judate zînga mi a ni a. (Joh. 6:66-68) Tho leh Isua chuan vâna a lâwn hmain, Petera hnênah “Ka berâm note enkawl rawh,” tia sawiin mawhphurhna a pe a. (Joh. 21:17) Petera chuan chu mawhphurhna chu rinawm taka hlenin, Bible bu zînga tel lehkha thawn pahnih ziak tûrin Jehova’n a hmang hial a ni. Mahse, Petera ngei pawh thlarau lama a inchâwm a ngai a. Entîr nân, tûn hmaa tirhkoh Paula ziah thlarauva thâwk khum lehkhate chu a zir a. Paula thuziak ṭhenkhat chu “hriatthiam a har,” tih a pawm a ni. (2 Pet. 3:15, 16) Chuti chuang chuan, Petera’n tirhkoh Paula ziah chûng ‘chaw rumte’ chu hre thiam a, zâwm thei tûrin Jehova’n a ṭanpui ang tih ring tlatin a zir fan fan a ni.—Hebrai 5:14–6:1 chhiar rawh.

8. Engtin nge Petera chuan vântirhkoh hnên aṭanga kaihhruaina thar a dawn chu a chhân lêt?

⁸ Petera chuan kaihhruaina a dawnte chu thuawih taka a zawmna hmangin, Jehova a rinzia a lantîr a. Entîr nân, Joppa khawpuia a awm laiin, inlârnaah vântirhkoh pakhat chuan Petera chu Mosia Dânin thianghlim lova a ruat ransate chu talh a, ei tûrin a hrilh a. Juda mite tân chu kaihhruaina chu a mak hle ngei ang. A tîr chuan, Petera’n: “Ni lo ve, Lalpa, thil bawlhhlawh leh thianghlim lo rêng rêng ka ei ngai lo,” tiin a chhâng a. Mahse, vântirhkoh chuan: “Pathianin a tih thianghlim tawh chu bawlhhlawh ti suh,” tiin a hrilh a. (Tirh. 10:9-15) Tichuan, Petera’n a ngaihtuah dân chu thuawih takin a siam rem a ni. Chu chu engtin nge kan hriat theih? Inlârna a hmuh hnu lawkah, Jentail mi Kornelia mi tirh pathumte lo thlengin, Petera chu lo kala an pu hmaa thusawi tûrin an sâwm a. Dik tak chuan, Juda mite chuan Jentailte chu thianghlim lo anga an thlîr avângin, Petera chuan Jentailte ina luh chu a duh ngai lo a ni. (Tirh. 10:28, 29) Mahse, Petera chuan Jehova hnên aṭanga a dawn kaihhruaina thar chu a pawm nghâl a. (Thuf. 4:18) Tichuan, Kornelia leh a chhûngte hnênah thu hrilhin, anni chuan thutak chu an rawn pawm a; thlarau thianghlim dawngin, baptisma an chang ta a ni.—Tirh. 10:44-48.

9. Thlarau lam chaw rum ei châkna neih kan hlâwkpui dân kawng hnih chu eng nge ni?

⁹ Keini pawh Petera ang bawkin, Pathian Thua chuang hnu te tui, a nih loh leh thutak bulpuia kan inchâwm ziah a ngai a. Chu bâkah, thlarau lam chaw rum—hriatthiam harsa lehzual thutak—ei châkna kan neih a ngai bawk. Pathian Thu hre thiam lehzual tûr chuan hun kan pêk a, ṭan kan lâk a ngai ngei mai; mahse, chu chu a hlâwkthlâk hle. Engvângin nge? A lo berah kawng hnihin kan hlâwkpui a ni: Kawng khat chu, Pathian Jehova hmangaiha zah lehzual tûra min ṭanpuitu a miziate kan zir theih phah a. Pa hnihna, mi dangte chu kan Pa vâna mi ropui leh zahawm tak chungchâng hrilh tûra chêttîrin kan awm bawk. (Rom 11:33; Thup. 4:11) Petera entawn tûr siam chuan hei pawh hi min zirtîr a ni: Bible zirtîrna chungchânga hriatthiamna thar kan dawn hunah kan ngaihtuah dân leh thil tih dânte chu kan siamrem vat a ngai tih hi. Chutianga kan tih chauhvin, thlarau lamah kan inchâwm ṭha rengin, Jehova tân kan ṭangkai reng thei dâwn a ni.

PAULA ANGIN—THLARAU LAMAH INTHUAM TLAT RAWH

10. Thlarau lama inthuam ṭhatnaah chuan eng nge tel? (Kolossa 3:8-10)

¹⁰ Pathian ti lâwm tûr chuan Jehova min buatsaihsak thil dang pakhat kan hman ṭangkai ngai a la awm a; chu chu thlarau lam thawmhnaw a ni. Chu chu eng nge? Tirhkoh Paula chuan kan ‘mize hlui paih thla a,’ “mize thara” inthuam tûrin min hrilh a. (Kolossa 3:8-10 chhiar rawh.) Chutianga inthuam chu a awlsam reng lo. Amah Paula ngei hi han ngaihtuah teh. Kum naupang tê a nih aṭangin, Pathian lawm hlawh tumin, ṭhahnem a ngai hle a. (Gal. 1:14; Phil. 3:4, 5) Mahse, Pathian thiltum chungchânga hriatna dik a neih loh avângin, thlarau lam dinhmun rethei takah a awm a ni. Krista zirtîrnate a hre lo va, a chapo bawk a; chu chuan mize ṭha lo tak taka inthuam “mi tawrawt tak” a nihtîr a ni.—1 Tim. 1:13.

11. Paula’n eng a chak lohna nge hneh tuma theih tâwp a chhuah? Hrilhfiah rawh.

¹¹ Kristian a nih hma chuan, Paula chu mi thin chhe tak a ni a. A thinrim êm avângin Isua zirtîrte chungah ‘vauna thu leh thah a tum thu a sawi,‘ tih Tirhkohte bu-ah târ lan a ni a. (Tirh. 9:1) Kristian a rawn nih hnu chuan, chu a mize hlui chu theih tâwpa hlihthlâk a tum tih a chiang hle. (Eph. 4:22, 31) Chuti chung chuan, Barnaba nêna an rilru an inhmuh loh khân, “nasa takin an inhnial a.” (Tirh. 15:37-39) Chutiang chuan, a mize hlui chu a rawn lang leh a; mahse, a beidawng mai lo. Jehova lawm hlawh a nih theih nân ‘a taksa a hnek’ chhunzawm zêl a; chumi awmzia chu a ṭhat famkim lohna chu a do zawm zêl tihna a ni.—1 Kor. 9:27.

12. Engin nge Paula chu a mize ṭha lote hlîp thei tûra ṭanpui?

¹² Paula chuan ama chakna a rinchhan loh avângin a mize ṭha lote chu hnehin mize tharin a inthuam thei a. (Phil. 4:13) Petera angin, ani pawhin “Pathian pêk chakna” a rinchhan a ni. (1 Pet. 4:11) Chuti chung chuan, hlawhchham nia inhriat chângte a la nei tho va. Mahse, a lunghnual hunah, Pathian Jehova’n a tâna a tihsak tawh thil ṭhate chu a ngaihtuah a, chu chuan mize thara inthuam chhunzawm zêl tûrin chakna a neihtîr a ni.—Rom 7:21-25.

13. Engtin nge Paula kan entawn theih?

¹³ Engtiang khawpa reiin Jehova rawng lo bâwl tawh pawh ni mah ila, kan mize hluite hlîp thla a, mize thar, Pathian buatsaih thlarau lam thawmhnaw inbel tûra theih tâwp kan chhuah zawm zêl a ngai tih pawmin Paula kan entawn thei a ni. Insûm thei lova kan lo thinrim emaw, tu emaw chungah ngilnei lo takin kan lo ṭawng emaw ang chi kan mize hlui a lo lang leh a nih pawhin, mi hlawhchham anga kan inthlîr a ngai lo. Chu aiin, kan ngaihtuah dân leh kan thil tih dânah inthlâk danglamna neih chhunzawm zêl kan tum zâwk tûr a ni. (Rom 12:1, 2; Eph. 4:24) Mahse, chutianga kan tih hunah, kan hriat reng ngai thil pawimawh tak pakhat a awm a, chu chu kan taksa nêna inmil tûra thawmhnaw kan fit ṭhat ang ni lovin, Pathian Jehova min buatsaihsak thlarau lam thawmhnaw milin kan insiamrem zâwk tûr a ni tih hi. Chutianga Pathian thil phûtte mila inthlâk danglamna siam chu thil inâwm tak a ni rêng a ni.

DAVIDA ANGIN—THLARAU LAM BUK TE-AH AWM RENG RAWH

14-15. Eng kawngin nge Jehova’n a mite tân thlarau lam bûk tê a buatsaihsak? (Sâm 27:5) (milem en bawk rawh.)

¹⁴ Hlimna dik tak nei tûr chuan, thlarau lam chaw ei a, thlarau lam thawmhnaw inbel mai aia tam kan tih a ngai a. Thlarau lam bûk têa kan awm tlat a ngai bawk a ni. Thlarau lam bûk tê chu eng nge ni a, chutah chuan engtin nge kan awm reng theih ang?

¹⁵ Lal Davida chuan Jehova buatsaih thlarau lam bûk tê chungchâng a sawi a. (Sâm 27:5 chhiar rawh.) Jehova chuan a mite chu an rinna ti chhe hlen theitu thil zawng zawng lakah a vênghim a ni. A nih leh, engtin nge Jehova’n a chhiahhlawhte chu dinhmun hlauhawm tak laka a vênhim? Anmahni beihna tûra hriam chher rêng rêng a sâwt lo vang tih a tiam a. (Sâm 34:7; Is. 54:17) Setana leh a ṭhuihhruaite chu chak hle mah se, kan chhiat hlenna thlen thei thil eng mah an ti thei lo vang. Kan nunna min lâksak a nih pawhin, Jehova’n min kai tho leh dâwn a ni. (1 Kor. 15:55-57; Thup. 21:3, 4) Chu bâkah, Jehova chuan a rawngbâwl tâwpsan tûr khawpa min siam theitu lungkhamnate lakah pawh min vênghim a. (Thuf. 12:25; Mt. 6:27-29) Hmangaihna nei tak kan Pa vâna mi chuan min ṭanpuitu tûr thlarau lam chhûngkua leh min vênghimtu tûr kohhran upate min pe bawk a. (Is. 32:1, 2) Kan inhmuh khâwm hian, Jehova vênhimna kan hlâwkpui theih dân kawng pawimawh takte chu hriat nawntîrin kan awm ṭhîn a ni.—Heb. 10:24, 25.

16. Eng kawngtein nge Jehova’n Davida a vênhim?

¹⁶ Davida’n Jehova thu a âwih khân, ani chu thil sual ti luitute chunga thleng ṭhîn chhiatna lakah a vênghim a. (Thufingte 5:1, 2 nên khaikhin rawh.) Chumi nêna inkalhin, Pathian tehnate a ngaihthah khân, Jehova’n a thil tih sawhkhâwkte lakah a vênghim lo thung. (2 Sam. 12:9, 10) A nih leh, a thil tih sual vâng ni hauh lova hrehawm a tawrh laite khân, vênhim a ni em? Davida’n a thinlung leihbuaa Jehova hnêna a ṭawngṭai khân, Jehova’n ani chu a hmangaih tak zetin, a ngaihsak ang tih hriat nawntîrin a lungkhamnate chu a tih kiamsak a ni.—Sâm 23:1-6.

17. Engtin nge Davida kan entawn theih?

¹⁷ Thu tlûkna kan siam hunah Jehova kaihhruainate zawngin Davida kan entawn thei a. Chu bâkah, Jehova’n min vênhim loh vâng ni lo va, thu tlûkna ṭha lo kan siam avâng zâwkin hrehawm tawrh chângte kan nei thei tih kan pawm tûr a ni. (Gal. 6:7, 8) Kan thil tih sual vâng ni lova harsatnate kan tâwk a nih chuan, kan thinlung leh rilru ngaihtuahnate min vênsak ang tih ring tlatin, Jehova hnênah thinlung leihbuain kan ṭawngṭai thei a ni.—Phil. 4:6, 7.

I THLARAU LAM MAMAWHTE CHU PHUHRU ZAWM ZEL RAWH

18. Eng harsatna nge kan hmachhawn a, kan thlarau lam mamawh chu engtin nge kan phuhhrûk zawm zêl theih? (Milem en bawk rawh.)

¹⁸ 2026 kum châng chuan: “Pathian kaihhruaina mamawh nia inhriate chu an hlim e,” tiin a sawi a. Isua sawi anga Jehova rinchhan chu tûn hma zawng aiin tûn hunah a pawimawh lehzual a ni. Engvângin nge? A chhan chu chutianga mamawh nia inhriatna nei lo, a nih loh leh chu mamawhna chu sakhaw dik lo leh mihring finna hmanga phuhhrûk tum, hlimna nei lo mite hual vêla kan awm vâng a ni. Chûng mite rilru put hmang inthununtîr chu kan duh ngai lo vang. A nih leh, eng nge kan tih ngai? Jehova buatsaih thlarau lam chawa kan inchâwm a, mize thara inthuam a, a buatsaih thlarau lam bûk têa vênhimna kan zawn chhunzawm zêl a ngai a ni.