I Chhia Leh Ṭha Hriatna Chu Kaihruaitu Rin Tlâk A Ni Em?
“Thinlung thianghlim leh chhia leh ṭha hriatna thiang . . . aṭanga lo chhuak hmangaihna neih theih nân chu chu ti ka ni.”—1 TIMOTHEA 1:5.
1, 2. Tuin nge chhia leh ṭha hriatna min pe a, chu chu kan neih avângin engvânga lâwm tûr nge kan nih?
PATHIAN JEHOVA chuan mihringte chu zalên taka duh thlan theihna neiin a siam a. Duh thlanna dik siam tûra min ṭanpui tûrin, kaihruaitu min pe a ni. Chu chu chhia leh ṭha hriatna tia koh a ni a, kan chhûngrila awm a dik leh dik lo hriatna a ni. Kan chhia leh ṭha hriatna dik taka hmanna chuan thil ṭha ti tûr leh thil ṭha lo pumpelh tûrin min ṭanpui thei. Kan chhia leh ṭha hriatna hi Pathian min hmangaihna leh hlawhtling tûra min duhzia târ lanna a ni.
2 Tûn laia Bible tehnate hre lo mi ṭhenkhatte pawhin thil ṭha an tiin, thil ṭha lo an hua a. (Rom 2:13-16 chhiar rawh.) Engvângin nge chutiang chu a nih? An chhia leh ṭha hriatna vâng a ni. Chu chuan mi tam takte chu thil ṭha lo tihna lakah a vênghim a. Tumah hian chhia leh ṭha hriatna nei lo ta se, khawvêl a chhiat dân tûr chu han mitthla teh! Tûn ai hian chanchin ṭha lo kan hre tam zâwk mai thei a ni. Jehova’n mihringte hnêna chhia leh ṭha hriatna a pêk avângin lâwm tûr kan va ni em!
3. Engtin nge kan chhia leh ṭha hriatna chuan kohhranah min ṭanpui theih?
3 Mi tam zâwkte chuan an chhia leh ṭha hriatna sawizawi an tum lo va. Mahse, chu chu kohhrana inpumkhatna awmtîrtu thiltithei tak a nih theih avângin, Jehova mite chuan an chhia leh ṭha hriatnain ṭha taka hna a thawh theih nân sawizawi an duh a ni. Chu chuan thil dik leh dik lo, leh thil ṭha leh ṭha lo chungchânga Bible tehnate min hriat chhuahtîr kan duh a ni. Mahse, kan chhia leh ṭha hriatna sawizawi a, hmang tûr chuan Bible chhiar mai aia tam kan tih a ngai a. Pathian tehnate ngaina a, kan tâna ṭha tûr a ni tih kan rin a ngai a ni. Paula chuan: “Thinlung thianghlim leh chhia leh ṭha hriatna thiang leh rinna dik tak aṭanga lo chhuak hmangaihna neih theih nân chu chu ti ka ni,” tiin a ziak a. (1 Timothea 1:5) Chhia leh ṭha hriatna kan sawizawi leh kan zui hian, Jehova kan hmangaihna leh kan rinna a ṭhang chho ang. Kan chhia leh ṭha hriatna kan hman dân chuan Jehova nêna kan inlaichînna a ngheh dân leh a duhzâwng tih kan duhzia a târ lang a. Kan chhia leh ṭha hriatna chuan kan nihna dik tak a târ lang bawk.
4. Engtin nge kan chhia leh ṭha hriatna chu kan sawizawi theih?
4 Mahse, engtin nge kan chhia leh ṭha hriatna chu kan sawizawi theih? Bible kan zir ziah a ngai a, kan thu chhiarte kan chhût ngun a, kan thil zirte nunpui tûrin Jehova hnênah ṭanpuina kan dîl a ngai a ni. Chu mi awmzia chu thil nih phung leh dânte hriat mai aia tam kan tih a ngai a. Bible kan zir hian kan thiltum chu Jehova hriat chian lehzual a ni. A nihna te, a duhzâwng leh duh loh zâwngte kan lo hre ta a. Pathian Jehova chanchin kan zir tam poh leh kan chhia leh ṭha hriatna chuan Pathianin thil dik leh dik lo a thlîr dân a hre nghâl thei ang. Kan chhia leh ṭha hriatna kan sawizawi ṭhat poh leh Jehova angin thil kan ngaihtuah thei lehzual sauh dâwn a ni.
5. He thuziakah hian eng nge kan sawiho ang?
5 Mahse, heti hian kan inzâwt thei ang: Thu tlûkna kan siam a ngaih hunah ṭha taka sawizawi chhia leh ṭha hriatna chuan engtin nge min ṭanpui theih? Kristian unaute chhia leh ṭha hriatna chu engtin nge kan zahsak theih? Kan chhia leh ṭha hriatna chuan engtin nge thil ṭha ti tûra min chêttîr theih? Ṭha taka sawizawi chhia leh ṭha hriatna kan mamawhna kawng thum: (1) damdawia inenkawlna, (2) intihhlimna, leh (3) kan thu hrilh rawngbâwlnate chu i lo ngaihtuah ang u.
A AWM TAWK HRE RAWH
6. Damdawia inenkawlna chungchângah eng thu tlûknate nge kan siam ang?
6 Min tina thei thilte pumpelh a, ei leh in lama a âwm tâwk hre tûrin Bible chuan min hrilh a. (Thufingte 23:20; 2 Korinth 7:1) Bible fuihnate kan zawmna chuan, kan hrisêlna chu a vênghim dâwn a ni. Mahse, kan nain kan la tar reng tho va. Eng thu tlûknate nge kan siam ngai mai thei? Ram ṭhenkhatah chuan, mi nâwlpuite pawm theih leh duh thlan tûr inenkawlnate a awm a. Branch office-te chuan unaute hnên aṭangin inenkawlna awm theite chungchânga zawhna chu lehkhathawnin an dawng ṭhîn a. “Jehova mite’n chutiang inenkawlna chu an dawng thei ang em?” tiin mi tam takin an zâwt a ni.
7. Engtin nge thisen chungchângah thu tlûkna kan siam theih?
7 Kristian tuemawin damdawia inenkawlna chungchânga thu tlûkna siamsak tûra a zâwt a nih pawhin branch office, a nih loh leh tualchhûng kohhrana upate chuan thuneihna an nei lo. (Galatia 6:5) Mahse, upate chuan Kristian tuemaw chu thu tlûkna fing siam tûrin Bible thute an kawhhmuh thei a. Entîr nân, Pathian chuan thisen laka inthiar fihlim tûrin thu min pe a. (Tirhkohte 15:29) Chu thupêk chuan damdawi lama inenkawlnaah Kristianin thisen emaw, thisen pêng bulpui pali zînga a engemaw ber pawh chu a dawng thei lo tih hre thiam tûrin a ṭanpui a ni. He thu hian, Kristianin thisen aṭanga ṭhen hran a them tê tak tê, thisen pêng bulpui pali zînga a them tê zâwkte a dawn leh dawn loh tûr chungchânga thu tlûkna a siam hunah pawh a nghawng thei hial a ni.a (Footnote en rawh.) Bible thurâwn dang engin nge damdawia inenkawlna chungchânga thu tlûkna fing siam tûra min ṭanpui thei?
8. Engtin nge Philippi 4:5 chuan damdawia inenkawlna chungchângah min ṭanpui?
8 “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tiin Thufingte 14:15 chuan a sawi a. Tûn laiah hian, natna ṭhenkhat chu enkawl dam theih a la ni lo va. Damdawia inenkawlna, natna tidam thei anga sawi, a hlawhtlinna erawh hmuh tûr awm si lo lakah chuan kan fîmkhur a ngai a ni. Paula chuan: “In dawhtheihzia [a nih loh leh, a âwm tâwk in hriatzia] mi zawng zawng hriat ni rawh se,” tiin a ziak a. (Philippi 4:5) A âwm tâwk hriatna chuan hrisêlna chungchâng chauh ngaihtuah lo va, Jehova biakna lam ngaihtuah zâwk tûrin min ṭanpui ang. Damdawi lama inenkawlna chu kan nuna thil pawimawh ber a nih chuan a lutuka mahni inngaihtuah mi kan lo ni thei a ni. (Philippi 2:4) He khawvêlah hian hrisêlna ṭha famkim kan nei thei lo tih kan hria a. Chuvângin, Jehova rawngbâwl chu i nunah dah pawimawh ber ang che.—Philippi 1:10, 11 chhiar rawh.
9. Engtin nge Rom 14:13, 19 chuan inenkawlna chungchânga kan thu tlûkna siam chu a nghawng, engtin nge kan inpumkhatna chu a tihderthâwn theih?
9 A âwm tâwk hria Kristian chuan a ṭha ber nia a hriat ang ti tûrin mite a tilui lo vang. Ram pakhata nupa tuak khat chuan mi dangte chu food supplement leh thil engemaw bîk tak ei tûrin an fuih a. Unau ṭhenkhat chu an hmin thei a, mi dang erawh chuan ei loh an thlang thung. Chu chuan rah ṭha a chhuah loh tâkah chuan unau tam tak chu an lung ni lo va. Nupate chuan chûng thilte chu an tân an thlang thei a. Mahse, damdawia inenkawlna avânga kohhran inpumkhatna tihderthâwn chu thiltihâwm a ni ang em? Hmân lai Rom khuaah khân, Kristian ṭhenkhat chu ei tûr leh ni serh chungchângah an ngaih dân a inang lo va. Paula’n anni chu eng thurâwn nge a pêk? “Mi pakhatin ni khat hi ni dang ai hian a ngaihlu bîk ṭhîn a ni, mi dangin nî zawng zawng hi inang ṭheuhvin a ngai ṭhîn a ni. Mi tin mahni rilruah inhre chiang rawh se,” tih hi. Mi dangte titlu lo tûrin i fîmkhur ang u.—Rom 14:5, 13, 15, 19, 20 chhiar rawh.
I ngaih dân pawm tûrin mi dangte tihluih i tum em? (Paragraph 9-na en rawh)
10. Engvângin nge mi dangte’n mi mal thila thu tlûkna an siam chu kan zahsak ang? (A thupui chunga milem en rawh.)
10 Kohhrana tuemawin mi mal thila thu tlûkna a siam chhan chu hriatthiam loh châng kan nei thei a. Chutiang a nih chuan eng nge kan tih ang? Kan sawisêl nghâl mai emaw, a rilru thlâk danglam tûrin kan nawr lui emaw tûr a ni lo. A chhia leh ṭha hriatna a sawizawi lehzual a ngai emaw, a la puitling lo emaw pawh a ni thei a. (1 Korinth 8:11, 12) Kan chhia leh ṭha hriatna ngei pawh kan sawizawi ṭha tâwk lo a ni thei bawk. Damdawi lama inenkawlna leh thil dangah pawh mahniin thu tlûkna kan siam ṭheuh a ngai a, a mawh kan phur tûr a ni.
INTIHHLIMNA NEI RAWH
11, 12. Engtin nge Bible chuan intihhlimna kan thlannaah min ṭanpui?
11 Pathian Jehova chuan intihhlimna nei a, hlâwkpui tûrin min siam a. Solomona chuan “nuih hun” leh “lâm hun” a awm tiin a ziak a ni. (Thuhriltu 3:4) Mahse, intihhlimna zawng zawng chu a ṭangkaiin, a hahdamthlâk vek kher lo. Chûng thil atâna hun hman tam lutuk pawh kan pumpelh a ngai bawk. Engtin nge kan chhia leh ṭha hriatna chuan Jehova pawm zâwng intihhlimna nei tûr leh ṭangkaipui tûra min ṭanpui theih?
12 Bible chuan “tisa thiltihte” lakah min vaukhân a. Chûng thiltihah chuan “inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te, chutiangte chu” a tel a. Paula chuan “chutiang thil tih hmangte chuan Pathian ram an chang lo vang,” tiin a ziak a ni. (Galatia 5:19-21) Chuvângin: ‘Ka chhia leh ṭha hriatna chuan nasa taka inelna, mahni hnam ṭanna, a nih loh leh tharum thawhna tel inkhelhnate pumpelh tûrin min ṭanpui em? Mipat hmeichhiatna lam hawi film ṭha lo te, nungchang bawlhhlawhna te, zu ruihna te, a nih loh leh thlarau zâwlna lam thilte en duhna ka neih hunah ka chhia leh ṭha hriatna chuan mi thunun em?’ tiin kan inzâwt thei a ni.
13. Engtin nge intihhlimna thlan chungchângah 1 Timothea 4:8 leh Thufingte 13:20-naa thurâwn chuan min ṭanpui theih?
13 Bible thu bulte chuan intihhlimna thlannaa kan chhia leh ṭha hriatna sawizawi tûrin min ṭanpui thei a. Entîr nân, Bible chuan “taksa insawizawina hi sâwt zawng a sâwt ve bawk,” tih a sawi a ni. (1 Timothea 4:8) Mi tam tak chuan insawizawi ziahnain min tiharhvângin, min tihrisêl tih an hria a. Mahse, a huhovin insawizawi duh ta ila engtin nge ni ang? Mi eng ang pawh insawizawipui ta ila, a pawina a awm ang em? Thufingte 13:20 chuan: “Mi fing pâwl la, i lo fing ang a, mi â pâwl erawh chu hrehawm tuar phahna a ni,” tiin min hrilh a ni. Intihhlimna kan thlan hunah Bible zirtîr kan chhia leh ṭha hriatna kan hman a pawimawh tih a chiang hle.
14. Engtin nge chhûngkaw pakhatin Rom 14:2-4 chu an nunpui?
14 Christian-a leh Daniela-i chuan fanu tleirâwl pahnih an nei a. Christian-a chuan: “Chhûngkuaa Pathian Biakna neih zânah chuan intihhlimna chungchâng kan sawiho va. Intihhlimna ṭhenkhat chu pawm theih a nih laiin a dangte chu a ni lo tih kan pawm tlâng a. Tute nge ṭhian ṭha anga kan ngaih theih ang? Kan fanute zînga pakhat chuan school-a an chawlh lâwk chhûngin mawi lo anga a ngaih thilte Thuhretu ṭha lai ṭhenkhatin an tih thu a sawi a. Chutianga ti ve tûra nawr niin a inhre bawk a ni. Mi tinin chhia leh ṭha hriatna an nei a, chu chuan kan thiltih leh kan ṭhian thlannaah min kaihruai tûr a ni tih kan chhûtpui a ni,” tiin a sawi.—Rom 14:2-4 chhiar rawh.
15. Engtin nge Matthaia 6:33 chuan intihhlimna atâna ruahmanna kan siam hunah min ṭanpui theih?
15 Intihhlim nân hun eng zât nge i hman? I nunah inkhâwm te, rawngbâwl te, leh Bible zirte nge, intihhlimna i dah hmasa zâwk? I tân eng thil nge pawimawh ber? Isua chuan: “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia,” tiin a sawi. (Matthaia 6:33) I hun hman dân tûra thu tlûkna i siam hunah, i chhia leh ṭha hriatnain Isua thurâwn hi a hriat chhuahtîr che em?
Bible zirtîr i chhia leh ṭha hriatna chuan hlauhawm pumpelh tûrin a ṭanpui thei che (Paragraph 14-na en rawh)
THU HRIL TURA CHETTIRIN KAN AWM
16. Engtin nge kan chhia leh ṭha hriatna chuan thu hril tûra min fuih?
16 Ṭha taka sawizawi chhia leh ṭha hriatna chuan thil ṭha lo tihna lakah min vaukhân mai ni lovin, thil ṭha ti tûrin min chêttîr bawk a ni. Chûng thil ṭha zînga pakhat chu in tinah leh tawnchawpa kan hmuhte hnêna thu hril a ni. Chu thil chu Paula’n a ti a. Ani chuan: “Tih mâkmawh ka chungah a innghat a ni si a; chanchin ṭha hril suh ila, ka chung a pik dâwn si a,” tiin a ziak a ni. (1 Korinth 9:16) Paula kan entawn chuan, thil dik kan ti a ni tih hriain chhia leh ṭha hriatna thiang kan nei ang. Mi dangte hnêna chanchin ṭha kan hril hian, an chhia leh ṭha hriatna chu thil ṭha tih duhna nei tûrin kan chawhthawhsak tihna a ni a. Paula chuan: “Thutak hriattîrin Pathian mithmuhin mi tin chhia leh ṭha hriatna mit kan intluntîr zâwk ṭhîn a ni,” tiin a sawi a ni.—2 Korinth 4:2.
17. Engtin nge tleirâwl pakhat chuan Bible zirtîr chhia leh ṭha hriatna chu a zawm?
17 Jacqueline-i chu kum 16 a nih laiin school-ah biology a zir a. Mahse, zirlaite chuan chanchhâwnna thurin an zir a. “Class-a sawihonaah ka chhia leh ṭha hriatna chuan ṭum dang angin rilru takin min teltîr thei lo va. Chanchhâwnna thurin chu ka thlâwp thei lo a ni. Zirtîrtu hnênah chuan ka dinhmun chu ka hrilhfiah ta a. Ani chu rin loh ang takin a lo nêlawm hle a, thilsiam chungchâng class chhûnga sawi theihna hun min pe ta hial a ni,” tiin a sawi. Jacqueline-i chuan Bible zirtîr a chhia leh ṭha hriatna chu a inthununtîr avângin lungâwina a nei a ni. I chhia leh ṭha hriatna chuan thil dik ti tûrin a chêttîr che em?
18. Engvângin nge chhia leh ṭha hriatna ṭha leh rintlâk neih kan duh?
18 Kan tum ber chu Jehova thu bulte leh tehnate mila nun a ni a. Kan chhia leh ṭha hriatna chuan chutianga ti tûr chuan min ṭanpui thei a ni. Pathian Thu kan zir ziah a, kan chhût ngun a, kan thil zirte mila kan nun hian, kan chhia leh ṭha hriatna chu kan sawizawi a ni. Tichuan, he thilpêk ropui tak hi kan Kristian nuna kaihruaitu rintlâk tak a lo ni ang. (ws15-E 09/15)
a Vênnainsâng July 1, 2004, phêk 29-31-a “Chhiartute Zawhna” chu en rawh.