Inneihna—A Inṭanna leh A Tum
“LALPA Pathian chuan, ‘Mihring amah chauhva awm hi a ṭha lo ve: amah ṭanpuitu tûr a kawppui âwm mi ka siamsak teh ang,’ a ti a.”—GENESIS 2:18.
1, 2. (a) Engtin nge inneihna chu a inṭan? (b) Mipa leh hmeichhe hmasa berte chuan inneihna chungchângah eng nge an hriat theih? (A thupui chunga milem en rawh.)
NUPUI pasal neih hi thil pângngai tak a ni a. Mahse, engtin nge inneihna chu a inṭan a, a tum chu eng nge ni? Chu mi hriatna chuan inneihna leh a malsâwmnate chungchânga thlîr dân dik nei tûrin min ṭanpui ang. Pathianin mihring hmasa ber Adama chu a siam a, ran zawng zawngte hming a vuahtîr a ni. Ani chuan ramsa zawng zawngte’n kawppui an nei ṭheuh tih a hmu a, “nimahsela Adama tân chuan ṭanpuitu tûr a kawppui âwm mi a awm lo va.” Chuvângin, Pathianin Adama chu tui taka muthilhtîrin, a nâkruh pakhat a la a, hmeichhiaah a siam ta a. Chu hmeichhia chu Adama hnênah a hruai a, tichuan, a nupui a lo ni ta a ni. (Genesis 2:20-24 chhiar rawh.) Kan hmuh angin, inneihna chu Jehova thilthlâwnpêk a ni.
2 Kum tam tak a liam hnu chuan, Eden huana Jehova thusawi: “Mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,” tih chu Isua’n a sawi nawn a. (Matthaia 19:4, 5) Pathianin hmeichhe hmasa ber siam nâna Adama nâkruh pakhat a lâk chhuah avângin, nupate chuan an inzawm tlat tih an hre tûr a ni. Jehova chuan nupate chu an inṭhen emaw, vawikhata kawppui pakhat aia tam an neih emaw chu a duh ngai lo.
INNEIHNA HI JEHOVA THILTUM ZINGA MI A NI
3. Inneihnain a tum pawimawh tak chu eng nge ni?
3 Adama chu a hnua Evi tia a koh tâk a nupui nên chuan an hlim hle a. Ani chu amah tifamkimtu leh ṭanpuitu a ni. Adama leh Evi chu nupa niin an hlim dûn ngei ang. (Genesis 2:18) Inneihnain a tum pawimawh tak chu leilung luah khah hi a ni a. (Genesis 1:28) Fate chuan an nu leh pate chu an hmangaih a; mahse, a hnuah nupui pasal nei a, mahnia chhûngkua din tûrin an kalsan ang. Mihringte chuan leilung luah khatin, khawvêl pum pui hi paradis-ah an chantîr dâwn a ni.
4. Inneihna hmasa berah eng thil nge thleng?
4 Adama leh Evi’n Jehova thu an âwih loh khân, inneihna hmasa ber chu a chhe ta a. Diabol-Setana “rûlpui tar” chuan Evi chu bumin, “a chhia leh a ṭha hriatna thing” rah a ei chuan hriatna engemaw bîk tak a nei ang tih a hrilh a ni. Thei rah a ei chuan a chhia leh a ṭha chungchângah thutâwp a siam thei ang a ti bawk. Evi chuan a pasal hrilh hmasa lova thei rah ei tûra thu tlûkna a siam khân, chhûngkaw lû Adama chungah zahna a lantîr lo va. Chu bâkah, Adama chuan a nupui pêk thei rah a ei khân, Pathian thu a âwih lohna a lantîr a ni.—Thu Puan 12:9; Genesis 2:9, 16, 17; 3:1-6.
Ineihna hlawhtling tûr chuan nupate chuan Jehova thu an âwih a, an thiltihah mawhphurhna an lâk a ngai
5. Adama leh Evi’n Jehova an chhân lêtna aṭangin eng nge kan zir theih?
5 Jehova’n zawhna a zawh khân, Adama chuan a nupui a mawhpuh a. Ani chuan: “Mi awmpui tûra i hmeichhe mi pêk ngei khân thing rah chu mi pe a, ka ei ta a ni,” tiin a sawi a ni. Chutiang bawkin Evi chuan, rûlin a bum vânga ei niin a insawi a. (Genesis 3:12, 13) Adama leh Evi chuan thuâwih lohnaah chhuanlam ho tak an siam a, an helna avangin Jehova’n ro a rêl a ni. An thiltih chu kan tân vaukhânna a va ni tak êm! Inneihna hlawhtling tûr chuan nupate’n Jehova thu an âwih a ngai a, an thiltihah mawhphurhna an la tûr a ni.
6. Engtin nge Genesis 3:15 thu chu i hrilhfiah ang?
6 Eden huanah Setana’n chutianga thil a ti chung pawhin, Jehova chuan mihringte’n nakin hun beiseina an nei tih a tichiang a. Chu beiseina chu Bible hrilh lâwkna hmasa berah hmuh a ni. (Genesis 3:15 chhiar rawh.) Chu hrilh lâwkna chuan Setana chu ‘hmeichhe thlahin’ a tiboral ang tih a târ lang a. Thlarau thilsiam fel tam takte chuan Pathian nên inlaichînna hnai tak neiin vânah rawng an bâwl a. Anni chu Pathian Jehova nupui ang an ni. Pathian chuan chûng thlarau thilsiamho zînga pakhat chu Diabola “tithitling” tûrin a tîr ang. Chu thlah chuan nupa hmasa berte hloh tâk chu, thuâwih mihringte hnênah a pe leh ang a. Thuâwih mihringte chuan Jehova thiltum angin leiah chatuana nun theihna hun remchâng an nei ang.—Johana 3:16.
7. (a) Adama leh Evi helna aṭangin inneihnaah eng thil nge thleng? (b) Bible chuan nupate chu engti tûrin nge a beisei?
7 Adama leh Evi helna chuan an inneihna, leh a hnua innei zawng zawngte chungah nghawng ṭha lo tak a thlen a. Entîr nân, Evi leh a thlah hmeichhia zawng zawngte chuan nau hrinnaah na nasa tak an tuar ngei ang. Hmeichhiate chuan an pasalte lamah duhna nasa tak an nei ang a, pasalte chuan an nupuite chungah thu an nei ang, chu chu tûn laia kan hmuh angin, dik lo taka hman châng pawh an nei a ni. (Genesis 3:16) Jehova chuan pasalte chu hmangaihna nei tak chhûngkaw lû ni tûr leh nupuite chu an pasalte hnêna intulût tûrin a beisei a. (Ephesi 5:33) Kristian nupate chu an thawh dun hian, harsatna tam tak an chingfel thei a ni.
ADAMA AṬANGA TUILET HUN THLENGA INNEIHNA
8. Adama aṭanga Tuilêt hun thlenga inneihna chanchin chu eng nge ni?
8 Adama leh Evi chuan an thih hmain fanu leh fapate an nei a. (Genesis 5:4) A hnuah, an fapa upa ber Kaina chuan a unaunu chu nupuiah a nei a ni. Kaina thlah Lameka chu Bible-a nupui pahnih nei nia târ lan hmasak ber a ni a. (Genesis 4:17, 19) Adama aṭanga Nova hun thlengin, mi tlêmtê chauhvin Jehova an bia a. Chûng zînga mi rinawm ṭhenkhat chu Abela, Enoka, Nova leh a chhûngte an ni. Nova hun lai chuan, “Pathian fapate chuan mihring fanute chu hmêl ṭha takin an hmu a; tichuan an duhzâwng apiangte chu nupuiahte an lo nei ta ṭhîn,” tiin Bible chuan a sawi. Mahse, chu chu thil pângngai a ni lo, chûng vântirhkohte leh hmeichhiate chuan Nephilim tia koh Milianho tharum thawh chîng fapate an hring a. Chu mi hun chhûng chuan, ‘leia mihring sualzia chu nasa tak’ a ni a, “an rilru suangtuahzia rêng rêng chu sual hlîr a ni.”—Genesis 6:1-5.
9. Nova hun laia mi suaksualte chungah Jehova’n eng nge a tih a, chu mi hun laia thilthlengte aṭangin eng nge kan zir theih?
9 Jehova chuan mi suaksual zawng zawngte tiboral tûrin leiah tuilêt nasa tak a thlentîr ang tih a sawi a. “Nova, felna thu hriltu” chuan, chûng mite chu Tuilêt tûr thu a hrilh a ni. (2 Petera 2:5) Mahse, nupui pasal inneihna pawh tiamin, nî tin nuna an buai êm avângin, Nova thu hrilh chu an ngaithla lo. Isua chuan kan hun hi Nova hun nên a khaikhin a. (Matthaia 24:37-39 chhiar rawh.) Tûn laiah, mi tam zâwk chuan kan thuchah ken, Pathian Ram chanchin ṭha chu an ngaithla lo va. Chu thuchah chu he khawvêl suaksual tihboral a nih hma hian kan hril a ni. Tuilêt hun lai aṭangin eng nge kan zir theih? Jehova nî a hnai tih theihnghilh khawpin nupui pasal neia, fate neih chu kan ngai pawimawh lutuk tûr a ni lo.
TUILET AṬANGA ISUA HUN LAI THLENGA INNEIHNA
10. (a) Hnam dân tam takah mipat hmeichhiatna chu eng anga hman nge a nih? (b) Abrahama leh Sari chuan an inneihnaah engtin nge entawn tûr ṭha an siam?
10 Nova leh a fapa pathumte chuan nupui pakhat ṭheuh an nei a. Mahse, Tuilêt hnu chuan mipa tam takin nupui pakhat aia tam an nei a ni. Hnam dân tam takah, nungchang bawlhhlawhna chu a hluar hle a, sakhaw chîn dânah pawh a tel hial a ni. Abrahama leh Sari chu Kanaan rama an pêm khân, inneihna zah lo nungchang bawlhhlawhte hual vêlin an awm a. Jehova chuan Sodom leh Gomorra khawpuia mite chu an nungchang bawlhhlawhna avângin a tiboral a ni. Abrahama chu chûng mite lakah chuan a danglam hle a. Ani chu chhûngkaw lû ṭha tak a ni a, Sari chuan nupui intulût tak niin entawn tûr ṭha a siam bawk. (1 Petera 3:3-6 chhiar rawh.) Abrahama chuan a fapa Isaaka chu Jehova betu ngei nupuiah a neihtîr a. Isaaka chuan a fapa Jakoba chungah pawh chutiang chiah chuan a ti ve a, Jakoba fapate chu Israel hnam 12 te thlahtu an ni.
11. Engtin nge Mosia Dân chuan Israel mite a vênhim?
11 A hnuah, Jehova chuan Israel hnam nên thuthlung, a nih loh leh intiamna a siam a. Mosia Dân a pe a, chu chuan Jehova an biaknaah nupate chu a vênghim a ni. Entîr nân, nupui pakhat aia tam neih pawh tiamin, inneihna chungchângah dânte a awm a, Israel mite chu Pathian dik be lote nupui pasala neih phal an ni lo. (Deuteronomy 7:3, 4 chhiar rawh.) Inneihnaa buaina khirh tak a lo chhuah chuan upate’n an ṭanpui ang. Rinawm lohna te, thîkthuchhiatna te, leh rinhlelhnate nei lo tûrin dân thupêkte pawh a awm bawk a. Inṭhen chu phal ni mah se, dân chu mahni kawppui ṭheuh vênhimna a ni. Entîr nân, mi chuan a nupui chu “thil mawi lo eng emaw” avângin a ṭhen thei a. (Deuteronomy 24:1) Bible chuan “thil mawi lo” a tih chu a hrilhfiah lo va; mahse, pasal chuan thil sual tê tham chu a nupui ṭhen nân chhuanlamah a siam thei lo a ni.—Leviticus 19:18.
I KAWPPUI LAKAH RINAWM TLAT RAWH
12, 13. (a) Engtin nge Malakia hun laia mipa ṭhenkhat chuan an nupuite an cheibâwl? (b) Tûn laiah, baptisma chang tawh mi pakhatin mi dang kawppui neihsak ta se, eng sawhkhâwk nge awm ang?
12 Zâwlnei Malakia hun laiah chuan, Juda pasalte chuan an nupuite ṭhen nân chhuanlam chi hrang hrang an siam a. Annupuite aia naupang zâwk emaw, Jehova rawngbâwl lo hmeichhiate emaw an neih theih nân an nupuite chu an ṭhen a ni. Isua hun laiah pawh, Juda mipate chuan “eng vâng pawhin” an nupuite an la ṭhen reng a. (Matthaia 19:3) Pathian Jehova chuan, dân lo anga inṭhente chu a hua a ni.—Malakia 2:13-16 chhiar rawh.
13 Tûn laiah, Jehova mite zîngah inneihnaa rinawm loh chu pawm theih a ni lo va, chu chu thil thleng khât tak a ni. Mahse, baptisma chang tawh nupui pasal nei tuemaw chuan uirêin, mi dang a neih theih nân a kawppui chu ṭhen ta angah han ngaituah teh. Ani chu a inlam lêt loh chuan kohhran vawn thianghim nân hnawhchhuah a ni ang. (1 Korinth 5:11-13) Kohhrana rawn kîr leha pawm a nih leh theih nân ‘sim hming pu tlâka a rah’ a ngai a ni. (Luka 3:8; 2 Korinth 2:5-10) Kohhrana lâk luh leh a nih theih nân hun bi ruatsak a ni lo va. A inchhîr tak zet a, kohhrana pawm a nih leh theih nân kum khat emaw, chu aia tam emaw hun a hman a ngai mai thei a. Chuti chung pawhin, ani chu “Pathian rorêlna ṭhutphah hmaah” a la ding dâwn a ni.—Rom 14:10-12; November 15, 1979, Vênnainsâng (English) phêk 31-32-na en rawh.
KRISTIANTE ZINGA INNEIHNA
14. Dânin a tum ber chu eng nge ni?
14 Israel mite chu Mosia Dân hnuaiah kum 1,500 aia tam an awm a. Dân chuan Pathian mite chu kawng tam takin a ṭanpui a ni. Entîr nân, Dân chuan chhûngkaw harsatnate chingfel thei tûrin thu bulte a pe a, chu chuan anni chu Messia lamah a kaihhruai a ni. (Galatia 3:23, 24) Isua a thih khân, Dân chu tihtâwp a ni a, Pathianin ruahmanna thar a siam a ni. (Hebrai 8:6) Mahse, Mosia Dânin a phal thil ṭhenkhat chu Kristiante tân phal a ni tawh lo.
15. (a) Kristian kohhranah, inneihna atâna tehna chu eng nge ni? (b) Kristian chuan inṭhenna chungchâng a ngaihtuah hian engte nge a ngaihtuah tel ang?
15 Ṭum khat chu Pharisaite’n Isua hnênah inneih chungchâng an zâwt a. Inṭhen chu atîr aṭangin Pathian duhzâwng ni lo mah se, Israel mite chu Mosia Dân hnuaiah inṭhen A phalsak tih Isua chuan a sawi a ni. (Matthaia 19:6-8) Isua chhânna chuan inneih chungchânga atîra Pathian tehna chu tûn laia Kristiante tân tehna a ni tûr a ni tih a târ lang. (1 Timothea 3:2, 12) Nupate “tisa pum khat” an ni tih awmzia chu an chêng dûn reng tûr tihna a ni. Pathian an hmangaihna leh an inhmangaih tawnna chuan a tipum khat reng ang. Uirê vâng ni lova kawppui ṭhentute chuan nupui pasal dang an nei thei lo a ni. (Matthaia 19:9) Mi chuan nungchang bawlhhlawh a kawppui chu a inchhîr chuan a ngaidam thei a. Chutiang chu zâwlnei Hosea’n nungchang bawlhhlawh tak a nupui Gomeri a ngaihdam a, Jehova’n Israel inchhîrte a ngaihdam khân a thleng a ni. (Hosea 3:1-5) Chu bâkah, mi chuan a kawppuiin nungchang bawlhhlawhna a nei tih hre reng chunga mipat hmeichhiatna a hmanpui chuan a kawppui chu a ngaidam tihna a ni. Pathian mithmuhah chuan inṭhen a, nupui pasal dang an neih nachhan tûr a awm lo.
16. Isua’n nupui pasal nei lote chungchâng eng nge a sawi?
16 Isua chuan Kristian dikte tân inṭhen theih nachhan awmchhun chu uirêna a ni tih a sawi a. Chu bâkah, nupui pasal nei lova awm “a pêkate” chungchâng a sawi bawk. “Tupawh a pawm thei apiangin pawm rawh se,” tiin a sawi. (Matthaia 19:10-12) Mi tam tak chuan tibuaitu awm lova Jehova rawngbâwl an duh avângin, nupui pasal nei lova awm zêl an thlang a, an thu tlûkna siamah an fakawm hle!
17. Kristian chu nupui pasal neih chungchânga thu tlûkna siam tûrin engin nge ṭanpui thei?
17 Mi chu nupui pasal neih chungchânga thu tlûkna siam tûrin engin nge ṭanpui thei? Ani chuan kawppui nei lova a awm theih dâwn leh dâwn loh chungchângah thu tlûkna a siam a ngai a. Tirhkoh Paula chuan nupui pasal nei lova awm chu a sawi mawi a. Mahse, ani chuan: “Inngaihnate a awm ṭhin avângin mipain nupui bîk nei ṭheuh sela, hmeichhia pawhin pasal bîk nei ṭheuh rawh se,” tiin a sawi bawk a ni. “Insûm theihna an neih loh erawh chuan innei rawh se; hur aiin inneih chu a ṭha zâwk si,” tiin a sawi belh a. Chuvângin, mi chuan tisa châkna nasa tak avânga nungchang bawlhhlawhna leh mahnia châkna hrîkthlâkna a pumpelh theih nân nupui pasal neih chu a thlang mai thei a. Mahse, nupui pasal nei tûrte chuan an puitlin tâwk leh tâwk loh an ngaihtuah a ngai a ni. Paula chuan: “Tupawhin a fanu nula thianghlim a lên reitîr kawngah tidik lova a inrin chuan, ani chu a vânglai a nih a, a ṭûl bawk si chuan, a tih duh chu ti rawh se; thil a tisual lo ve; neihtîr rawh se,” tiin a sawi a ni. (1 Korinth 7:2, 9, 36; 1 Timothea 4:1-3) Mi tam takin an tleirâwl lai huna an neih ṭhin angin, mi chu tisa châkna nasa tak a neih vâng maiin nupui pasal nei tûrin kan fuih tûr a ni lo. Chhûngkaw mawhphurhna la tûrin a puitling tâwk lo thei a ni.
18, 19. (a) Engtin nge Kristian inneihna chu ṭan a nih ang? (b) A dawta thuziakah eng nge kan sawiho vang?
18 Kristian inneihna chu an thinlung zawng zawnga Jehova hmangaihtu baptisma chang tawh mipa leh hmechhia inneihnaa ṭan a ni tûr a ni. Inhmangaih tawnin dam chhûnga awm dun an duh tûr a ni bawk. “Lalpaa awm mi” chauh nei tûra thupêk chu an zawm avângin, Jehova malsâwmna an dawng a. (1 Korinth 7:39) Bible thupêk an zawm zêl chuan an inneihna chu a hlawhtling ngei ang.
19 Tûnah hian, ‘ni hnuhnûngah’ kan awm a, mi tam tak chuan inneihna hlawhtling tûra mamawh miziate an nei lo a ni. (2 Timothea 3:1-5) A dawta thuziakah chuan Kristiante chu harsatnate’n hual vêl mah se, inneihna hlawhtling leh hlimawm nei tûra ṭanpui thei Bible thu bulte sawiho a ni ang a. Chu chuan chatuana nunna kawnga kal zawm zêl tûrin anni chu a ṭanpui bawk ang.—Matthaia 7:13, 14. (ws16.08-E)