Ṭhalaite U, Thlarau Lam Thiltumte Chu In Ngaihtuah Tlat Em?

1-3. (a) Ṭhalai zawng zawngte chu eng dinhmunah nge an awm a, chu chu eng nên nge kan tehkhin theih? (A thupui chunga milem en rawh.) (b) Chûng dinhmuna awm Kristian ṭhalaite chu engin nge ṭanpui ang?

THIL pawimawh tak ti tûrin khawpui hla taka kal tûrah han inchan teh. I kal tumna hmun thleng tûr chuan, bus i chuan a ngai a. Bus chawlhna hmun i thlen chuan mite tam vâng leh bus a tam êm avângin i buai deuh va. Mahse, thil lâwmawm tak chu, i kal duhna hmun leh i chuanna tûr bus i hre chiang hi a ni. Chuvângin, hmun danga hruai thleng theitu tûr che bus dang a engamah i chuang hauh lo vang.

² Nun hi khual zin kawng ang a ni a, nangni ṭhalaite chu bus chawlhna hmuna mite ang chu in ni. A châng chuan, nunah duh thlan tûr tam tak a awm avângin thlan bîk tûr pawh i hre lo thei a. I kal duhna tûr hmun i hriat chian chuan, duh thlanna dik siam a awlsam ngei ang. Khawi kawng nge i zawh dâwn?

³ He thuziak hian chu zawhna chu a chhâng ang a, Jehova tilâwm tûr zâwnga i nun hmang tûrin a fuih ang che. Chu mi awmzia chu zirna te, hna te, chhûngkaw din ang chi nuna i thu tlûkna siam zawng zawngah Jehova kaihhruaina i zâwm tihna a ni. Chu bâkah, Jehova hnaih lehzualtîrtu thlarau lam thiltumte hlen tûrin hma i la tihna pawh a ni bawk. Jehova rawngbâwlna chu i ngaihtuah tlat chuan mal a sâwm chein, hlawhtling tûrin a ṭanpui ang che tih i chiang thei a ni.—Thufingte 16:3 chhiar rawh.

ENGVANGIN NGE THLARAU LAM THILTUMTE I INSIAM?

4. He thuziakah hian eng nge kan enho vang?

⁴ Thlarau lam thiltumte insiam chu a ṭha a. Engvângin nge? A chhan pathum kan enho vang. Pakhatna leh pahnihna chuan thlarau lam thiltumte hlennain Jehova nên inṭhian ṭha lehzual tûrin a ṭanpui ang che. Pathumna chuan i vânglaia chûng thiltumte i insiam a ṭhat chhan a târ lang ang.

5. Thlarau lam thiltumte kan insiam a pawimawh chhan ber chu eng nge ni?

⁵ Thlarau lam thiltumte insiam a pawimawh chhan ber chu Jehova hmangaihna leh kan tâna thil min tihsakte avânga kan lâwmzia lantîr kan duh vâng a ni a. Fakna Hla phuahtu pakhat chuan: “LALPA hnêna lâwm thu sawi leh . . . LALPA, nang chuan i hnathawhin mi tilâwm si a: I kut thiltihte avângin hlimin ka zai ang,” tiin a sawi a. (Sâm 92:1, 4) Jehova’n a pêk zawng zawng che: i nunna, i rinna, Bible, kohhran, leh Paradis-a chatuanna nun beiseina te chu han ngaihtuah teh. Thlarau lam thiltumte i insiam hian, chûng thil zawng zawngte avânga Jehova chunga i lâwmzia i lantîr a, chu chuan amah a hnaihtîr che a ni.

6. (a) Thlarau lam thiltumte chuan Jehova nêna in inlaichînna chu engtin nge a nghawng? (b) I naupan laia i insiam theih thiltum ṭhenkhatte chu eng nge ni?

⁶ Thlarau lam thiltumte kan insiam chhan pahnihna chu, chûng thiltumte hlen i tum chuan Jehova tân hna ṭha i thawk a, chu chuan amah a hnaih lehzualtîr ang che. Tirhkoh Paula chuan: ‘In hnathawh leh a hming chunga hmangaihna in lantîr chu theihnghilh tûrin Pathian chu mi fel lo a ni si lo va,’ tiin min tiam a. (Hebrai 6:10) Thiltumte insiam tûrin naupang lutuk tih a awm lo. Entîr nân, Christine-i chuan kum 10 mi a nihin Thuhretu rinawmte nun kawng chanchin chhiar ziah a tum a. Kum 12 mi Toby-a chuan baptisma a chan hmain Bible chhiar chhuah chu thiltumah a nei a ni. Maxim-a chu kum 11 mi niin leh a nau Noemi chu kum 10 mi niin baptisma an chang a. An pahnihin Bethel-a rawngbâwl chu thiltumah an nei a ni. Chu an thiltum chu ngaihtuah reng thei tûrin an in bangah Bethel-a rawngbâwl tûra dîlna form chu an târ a. Nang eng nge i nih ve? I insiam theih thiltum ṭhenkhat chu ngaihtuahin, chu chu hlen tûrin hma i la ṭan thei ang em?—Philippi 1:10, 11 chhiar rawh.

7, 8. (a) Engtin nge thiltumte insiamna chuan thu tlûkna siam a tih awlsam? (b) Engvângin nge tleirâwl pakhat chuan university kal loh chu a thlan?

⁷ Naupang laia thiltumte insiam a ṭhat chhan pathumna chu eng nge ni? Naupang i nih angin, thu tlûkna siam tûr tam tak i nei a. Zirna te, i hna thawh tûr te, leh thil dang tam takte chu thu tlûkna siam a, i thlan a ngai a ni. Chûng i thu thlûkna siamte chu i zin kawnga kawngpui pali intawh khâwmna hmun ang a ni. Chutiang bawkin, i kalna tûr hmun i hriat chuan i zawh tûr kawng chu thlan a awlsam ang. I nunah pawh chutiang chiah chu a ni. I thiltumte i hriat chian chuan thu tlûkna fing siam a awlsam lehzual ang. Thufingte 21:5 [C.L. Re-edited ] chuan: “Mi taima thiltum chu a hlawhtling ṭhîn,” tiin a sawi. Thiltum ṭhate i insiam hma poh leh i hlawhtling hma lehzual ang. Hei hi Damaris-i’n tleirâwl nia thu tlûkna pawimawh tak a siam a ngaih laia a thiltawn chu a ni.

⁸ Damaris-i’n high school chu mark ṭha taka a pass avângin sênso ngai lovin university-ah dân lam zir zawm theihna a nei a. Mahse, bank-a hnathawh a thlang zâwk a ni. Engvângin nge? A naupan têt aṭangin pioneer thawh tumna a neih vâng a ni. Ani chuan: “Chutah chuan hunbi neiin ka thawk a. University aṭangin dân lam zir chhuak ta i la, sum tam tak ka hmu thei ngei ang; mahse, hunbi neia thawh tûr hna hmuh a harsa mai thei a ni,” tiin a sawi. Damaris-i chuan kum 20 chhûng pioneer a thawk tawh a. Tleirâwl a nih lai aṭang khân thiltum dik tak insiamin, thu tlûkna dik tak siam niin a inhria em? Aw, hria e. University zir chhuak se la chuan, hun bikima hna a thawh a ngai ang a, chutiang ang hna thawk mêk ukil tam tak chu hunbi neia a thawhna bank-ah a hmu ṭhîn a ni. An zînga tam tak chu an hnaah an hlim lo hle tih a sawi a. Damaris-i chu kum tam tak chhûng pioneer a thawhna chuan hlimna nasa tak a pêk bâkah, anmahni anga hlimna nei lova awm lo tûrin a ṭanpui a ni.

9. Engvângin nge kan ṭhalaite chu kan chhuan êm êm?

⁹ Khawvêl pumpuia kan ṭhalai sang tam takte chu an taimain, fak an phu hle a. Jehova nên an inṭhianna leh an thlarau lam thiltumte chu an nunah an dah pawimawh ber a ni. Chûng ṭhalaite chuan an nun chu hlim takin an hmang a, zirna te, hna te, leh chhûngkaw nunte pawh tiamin, thil engkimah Jehova kaihhruaina zawm an tum bawk a ni. Solomona chuan: “I thinlung zawng zawngin LALPA ring la, . . . I kawng zawng zawngah amah hre reng la, i kawngte chu a kawhhmuh zêl ang che,” tiin a sawi. (Thufingte 3:5, 6) Ṭhalaite u, Jehova’n a hmangaih hle che u a ni! A tân in hlu tak zet a, a vênghimin a kaihhruai ang che u a, mal a sâwm ang che u.

JEHOVA CHANCHIN MI DANGTE HRILH TURIN ṬHA TAKIN INBUATSAIH RAWH

10. (a) Engvângin nge thu hrilh rawngbâwlna chu kan tân thil pawimawh ber zînga pakhat a nih? (b) Engtin nge i rinna chungchâng chu ṭha lehzuala i hrilhfiah theih?

¹⁰ Jehova tihlâwm i tum tlat chuan mi dangte hnêna a chanchin sawi chu i duh ngei ang. Isua Krista chuan “chanchin ṭha hi . . . hrilh hmasak tûr a ni” tih a sawi a. (Marka 13:10) Chuvângin, thu hrilh hna hi a hmanhmawhthlâk hle a, kan tâna thil pawimawh berte zînga mi a ni tûr a ni. Tam lehzuala thu hrilh chu thiltumah i nei thei ang em? Pioneer i thawk thei ang em? A nih leh, thu hrilh chu nuam ti lutuk lo ta la, engtin nge ni ang? I rinna chungchâng chu engtin nge ṭha lehzuala i hrilhfiah theih? Thil pahnihin a ṭanpui ang che: Ṭha takin inbuatsaih la, Jehova chungchâng i hriatte chu mi dangte hnênah beidawng lovin hrilh rawh. Thu hrilh nuam i tih dân tûr chu mak i ti mai thei a ni.

11, 12. (a) Jehova chungchâng mi dangte hrilh tûrin engtin nge i inbuaisaih theih? (b) Engtin nge ṭhalai unaupa chuan school-ah Jehova chungchâng sawi theihna hun remchâng chu a hman?

¹¹ I school kalpuite’n an zawh mai theih, entîr nân, “Engvângin nge Pathian i rin? tih zawhnate chhâng tûrin i inbuaitsaih ṭan thei a. Chu zawhna chhâng tûra ṭanpuitu thuziakte chu kan website jw.org-ah a awm a ni. BIBLE TEACHINGS > TEENAGERS tih hnuaia i kal chuan “Engvângin Pathian Ka Rin?” tih thupui nei worksheet i hmu ang. Chhânna i inbuatsaih hunah he worksheet-a tih tûrte chu zui ang che. I hman theih Bible châng pathumte chu: Hebrai 3:4, Rom 1:20, leh Sâm 139:14 a ni. Zawhna dang tam takte chhâng tûra i inbuatsaih theih nân worksheet dangte pawh a awm a ni.—1 Petera 3:15 chhiar rawh.

¹² I school kalpuite chu jw.org-ah thil tam tak an en theih thu hrilh ang che. Chutiang chuan Luca-a chuan a ti a. A school kalpuite chuan sakhaw hrang hrang chungchâng an sawi ṭhîn a ni. Luca-a chuan an zirlai buah Jehova Thuhretute chungchâng dik lo takin a chuang tih a hria a. Luca-a chu a zâm deuh hlek a; mahse, zirtîrtu hnênah chûng thute a dik loh chhan a class te hrilhfiah a duh thu a hrilh a. A thurin hrilhfiah chu zirtîrtu chuan a remti a, a class pumpui chu kan website a hmuhtîr thei ta a ni. Zirtîrtu chuan class chu homework atân Hnehchhiah Hmang Chu Kuttum Tel Lovin Ngam Rawh tih video en tûrin a pe a. School-ah Jehova chungchâng a sawi theih avânga Luca-a lâwm dân tûr chu i mitthla thei em?

13. Harsatnate kan hmachhawn hunah engvângin nge kan beidawn loh vang?

¹³ Harsatnate i hmachhawn hunah lunghnual mai lovin, i thiltumte hlen tûrin bei zêl rawh. (2 Timothea 4:2) Katharina-i’n chutiang chuan a ti a. Kum 17 mi a nihin, a hnathawhpui zawng zawngte hnêna thu hrilh chu thiltumah a nei a. An zînga pakhat chuan vawi tam tak a hnial a. Mahse, a thiltum chu a theihnghilh ngai lo a ni. A nungchang ṭha chuan a hnathawhpui dang Hans-a rilru chu a khawih hle a. Kan thu leh hla chhuahte a chhiar ṭan a, Bible a zir a, tichuan, baptisma a chang ta a ni. Chutih hun lai chuan, Katharina-i chu a insawn tawh avângin chu mi chungchâng chu a hre lo va. Kum 13 a liam hnuah a chhûngte nêna an va inkhâwmnaah vântlâng thusawitu chu Hans-a a lo ni reng mai chu mak a ti hle! A hnathawhpuite hnêna thu hril tûra thiltum a neih chu beidawng lova hleh a tum avângin a hlim hle a ni.

I THILTUMTE CHU THEIHNGHILH SUH

14, 15. (a) Mi dangte’n an tih anga ti ve tûra an nawr luih che chuan eng nge i tih ang? (b) Mi dangin an nawr luih che hunah chak taka awm tûrin eng nge i tih theih?

¹⁴ He thuziak hian Jehova tilâwm tûra i nun hmang tûr leh thlarau lam thiltumte insiam tûrin a fuih che a ni. Mahse, i rualpui ṭhalai tam takte chuan nuam taka hun hman mai chu an duh a. An thiltihnaa tel ve tûrin an sâwm che pawh a ni mai thei. Engtik nîah emaw chuan, i thiltumte chu i tân a pawimawh tih mi dangte i hriattîr a la ngai ngei ang. Mi dangte avângin chûng thiltumte chu theihnghilh suh. He thuziak tîr lama târ lan bus chawlhna hmuna awm ni ta la, bus-a chuangte’n hun hlimawm tak an neih vâng maiin bus engpawh i chuang ve mai ang em? I chuang hauh lo vang!

¹⁵ Chuvângin, mi dangin an tih ang ti ve tûra an nawr luih che hunah chak taka awm tûrin eng nge i tih theih? Mite nawr luihna do tiharsatu dinhmunte chu pumpelh rawh. (Thufingte 22:3) Thil sual tihnain sawhkhâwk ṭha lo tak a neihte chu ngaihtuah rawh. (Galatia 6:7) Thurâwn ṭha i mamawh tih inngaitlâwm takin pawm rawh. I nu leh pate leh kohhrana thiltawn ngah unaute’n an hrilh che hunah ngaithla ang che.—1 Petera 5:5, 6 chhiar rawh.

16. Christoph-a thiltawn chuan inngaihtlâwm a pawimawhzia engtin nge a târ lan?

¹⁶ Christoph-a chu inngaihtlâwmnain thurâwn ṭha pawm tûrin a ṭanpui a. Baptisma a chan hnu rei vak lovah, taksa insawi zawina hmunah a kal ziah a. Chuta ṭhalai dangte chuan an infiamna club-a tel ve tûrin an sâwm a. Chu mi chungchâng chu kohhran upa a hrilh a, upa chuan inel duhna nasa tak ang chi dinhmun hlauhawm ṭhenkhatte ngaihthuah tûrin a hrilh a. Christoph-a chuan infiamna club-a tel tûrin thu tlûkna a siam ta tho a ni. Mahse, chu an infiamna chu tharumthawhna leh dinhmun hlauhawm tak a ni tih a hre ta thuai a. Upate hnênah a hrilh leh chuan Bible aṭangin thurâwn an pe a. Christoph-a chuan, “Jehova’n thurâwn ṭha petute chu min hmuhtîr a, A thu chu ka ngaithla a; mahse, hun engemaw chen chu a tlai deuh a ni,” tiin a sawi. Thurâwn ṭha pawm tûrin i inngaitlâwm tâwk em?

17, 18. (a) Jehova chuan tûn laia ṭhalaite chu engti tûrin nge a duh? (b) Duh thlanna i siamte avânga i puitlin hnua i inchhir loh nân eng nge i tih theih? Thiltawn pakhat sawi rawh.

¹⁷ Bible chuan: “Ṭhalaite u, in ṭhat lai chên ula, in la naupan viau lai hian hlim rawh u,” tiin a sawi a. (Thuhriltu 11:9) Jehova chuan in ṭhatlaia hlim tûrin a duh che u a ni. He thuziakah hian, i hlim theih dân kawng khat chu thlarau lam thiltumte ngaihtuah tlat leh i ruahmannaah leh i thu tlûkna siamah Jehova thurâwn pêkte zui hi a ni tih i hre tawh a. Chu chu i nuna i tih hma poh leh Jehova kaihhruaina te, vênhimna te, leh malsâwmnate chu i dawng hma lehzual ang. A Thu hmanga thurâwn ṭha a pêkte chu ngaihtuah la, he thurâwn: “I vânglai hian i siamtu hre reng rawh,” tih hi nunpui ang che.—Thuhriltu 12:1.

¹⁸ Naupangte chu an ṭhang lian chakin an puitling chak hle a. A tam zâwk chuan an naupan laia thiltum dik lo an insiam vâng emaw, thiltum engmah an insiam loh vâng emaw, a hnua inchhirna an nei leh ṭhîn chu lungchhiatthlâk tak a ni. Mahse, i thlarau lam thiltumte i ngaihtuah tlat chuan, i duh thlanna avângin i puitling hunah i hlim ngei ang. Mirjana-i chuan chutiang chuan a ngai a ni. Tleirâwl a nih laiin, infiamna lamah a thiam hle a. Thlasik Olympic Inkhelhnaa tel tûra sâwm hial a ni. Mahse, ani chuan hun bikima Jehova rawngbâwl a thlang zâwk a. Kum 30 a liam hnuah pawh, a pasal nên hun bikimin rawng an la bâwl reng a. Hmingthanna te, chawimawina te, thuneihna te, leh hausaknate duhtute chuan hlimna dik tak an nei ngai lo tih a sawi a. Pathian rawngbâwl tûr leh a chanchin mi dangte hre tûra ṭanpui hi thiltum azawnga ṭha ber a ni tih a sawi bawk.

19. Naupan laia thlarau lam thiltum i neihte ngaihtuah tlat chu engvângin nge a ṭhat?

¹⁹ Nangni ṭhalaite hian harsatnate hmachhawn chûng pawha Jehova rawngbâwlna in ngaihtuah tlat avângin fak inphu tak zet a ni. Thlarau lam thiltumte in insiam a, thu hrilh rawngbâwlna chu in nuna thil pawimawh berte zînga mi niin in thlir a. Chu bâkah, in thiltumte theihnghilh tûrin khawvêl inthununtîr chu in duh lo bawk. In thawhrimna chu a thlâwn lo tih in chiang thei a. Hmangaihtu leh ṭanpui duhtu unau tam tak in nei a ni. Chuvângin, “i hnate chu LALPA kawltîr rawh, tichuan i thil ruahmante chu tihnghehin a awm ang.”