“Chûng Thil Chu In Hriat Chuan Ti Ula In Eng A Thâwl Ang”

1. Khawvêl mite lantîr mahni hmasialna rilru put hmang chuan engtin nge kan inngaihtlâwmna a nghawng theih?

ENGVANGIN nge Pathian Thu aṭanga kan thil zirte nunpui chu a harsat? Thil dik ti tûrin inngaihtlâwmna kan neih a ngaih vâng a ni. He “ni hnuhnûngahte,” hian kan chhehvêla mi tam tak chu “mahni inhmangaihtu te, tangka ngainatu te, intivei te, chapo te,” leh “insûm thei lo te,” an nih avângin inngaihtlâwm reng chu a harsa a. (2 Timothea 3:1-3) Pathian chhiahhlawhte kan nih angin, chûng miziate chu a ṭha lo tih kan hria a; mahse, chutiang mite chu an hlawhtlingin nun nuam tak an nei niin a lang. (Sâm 37:1; 73:3) ‘Mahni mamawh aia mi dangte mamawh dah pawimawh zâwk chu a ṭha tak tak ang em? Inngaihtlâwmna ka lantîr chuan mite’n min zah ang em?’ tiin i ngaihtuah mai thei. (Luka 9:48) Khawvêl mite lantîr mahni hmasialna rilru put hmang kan inthununtîr chuan kan unaute nêna kan inlaichînna a chhe thei a, mi dangte tân Kristian kan ni tih hriat a harsa thei ang. Mahse, inngaihtlâwmna chungchânga Pathian chhiahhlawhte entawn tûr siam chu kan zir a, kan entawn chuan kan hlâwkpui ngei ang.

2. Hmân laia Pathian chhiahhlawh rinawmte hnên aṭangin eng nge kan zir theih?

² Hmân laia Pathian chhiahhlawh rinawmte chu a ṭhian ni tûrin engin nge ṭanpui? Engtin nge Pathian an tihlâwm? Thil dik ti tûrin khawi aṭangin nge chakna an hmuh? Bible-a an entawn tûr siamte kan chhiar a, kan chhût ngun chuan kan rinna a chak lehzual ang.

KAN RINNA TICHAK RENGTU

3, 4. (a) Engtin nge Jehova’n min zirtîr? (b) Kan rinna chak reng tûrin engvângin nge hriatna aia tam kan mamawh?

³ Jehova chuan kan rinna tichak reng tûra kan mamawhte chu min pe a. Bible aṭangin thurâwn ṭhate leh zirtîrnate kan dawn bâkah, kan Kristian thu leh hla chhuahte, kan website-te, JW Broadcasting-te, inkhâwm te, leh inkhâwmpuite min buatsaihsak a ni. Mahse, Isua chuan hriatna mai aia tam kan mamawh tih min hrilh a. Ani chuan: “Mitîrtu duhzâwng tih leh, a hna thawh zawh tûr hi ka chaw a ni,” tiin a sawi.—Johana 4:34.

⁴ Pathian duh zâwng tih chu Isua tân chaw ang a ni a. Chaw ṭha kan ei chuan kan taksa tân hrisêlna a ni a. Chutiang bawkin, Pathian duh zâwng tihna chuan rilru hahdamna min neihtîrin, kan rinna a tichak ang. Entîr nân, thlawhhma rawngbâwlna inhmuhkhâwmnaah phûr lo takin i kal a; mahse, rawngbâwlna aṭanga i hawn chuan i hlimin, i harh sawt ngai em?

5. Mi fing nih chu engtin nge kan hlâwkpui?

⁵ Jehova’n ti tûra min phûtte kan tih chuan kan fing ang. (Sâm 107:43) Finna neite chuan thil ṭha tam tak an seng ṭhîn. “Thil i duhthusâm theih ang zawng zawng pawhin a hen lo. . . . A vuan apiangte tân nunna thing a ni a, a kawl reng apiangte chu an hamṭha e.” (Thufingte 3:13-18) Isua chuan: “Chûng thil chu in hriat chuan ti ula in eng a thâwl ang,” tiin a sawi. (Johana 13:17) Isua’n ti tûra a phûtte an tih chhûng chuan a zirtîrte chu an hlim ang. Anni chuan a zirtîrna leh a entawn tûr siam zui chu an nun kawng an nihtîr a ni.

6. Engvângin nge kan thu zirte chu kan nunpui zawm zêl a ngaih?

⁶ Tûn laiah, keini pawh kan thil zirte kan nunpui zawm zêl a ngai a. Khâwl siam thiam chuan hmanrua te, bungrua te, leh hriatnate a nei a. Mahse, chûngte chu a hman chauhvin, khâwl siam thiam a ni ang. Thiltawn tam tak a nei pawh a ni thei; mahse, khâwl siam thiam ni reng tûr chuan a thil hriatte a hman zawm zêl a ngai a ni. Chutiang bawkin, thutak kan hriat tîrh chuan Bible aṭanga kan thu chhiarte kan nunpui avângin kan hlim hle a. Mahse, hlimna tluantling nei tûr chuan Jehova min zirtîrte chu nî tin kan nunpui zawm zêl tûr a ni.

7. Bible-a entîrnate aṭanga inzir tûr chuan eng nge kan tih ang?

⁷ He thuziakah hian inngaihtlâwmna lantîr a harsat mai theihna dinhmun ṭhenkhat kan sawiho vang. Tûn hmaa mi rinawmte an rinawm reng theih dân kan hria ang. Mahse, an chanchin chhiar mai aia tam kan tih a ngai a. Kan thu chhiarte chu ngaihtuah a, nunpui a ngai a ni.

MITE CHU ANG KHATIN THLIR RAWH

8, 9. Tirhkohte 14:8-15-a kan hmuh Paula inngaihtlâwmna aṭangin eng nge kan zir theih? (A thupui chunga milem en rawh.)

⁸ Pathian chuan mi zawng zawng “chhandama awmah leh thutak hriaah a duh a ni.” (1 Timothea 2:4) Thutak la hre lote chu engtin nge i thlîr? Tirhkoh Paula chuan Jehova chungchâng lo hre tawh Juda mite hnênah leh Pathian dik lo betute hnênah thu a hril a. Paula inngaihtlâwmna chu chûng mite hnêna thu a hrilhna hmanga fiah a ni. Engtin nge?

⁹ Paula chu missionary nia a zin chhuah hmasak ber ṭumin Lustra khuaah Barnaba nên an kal a. Chuta awm Lukaoni mite chuan Paula leh Barnaba chu mi chungnung bîk anga cheibâwlin, anni chu an pathian dik lote hming Jupita leh Merkuria tiin an ko va. Paula leh Barnaba chu an lâwm em? Chu chu an tlawh hnuhnûng ber khaw pahniha tihduhdahna an tawhna ata inthlâkthlengna duhawm tak niin an thlîr em? Chutianga ngaihsak an hlawh avângin mi tam lehzualin chanchin ṭha ngaihvenna an neih phah ang tih an ring em? Ring lo! Pawi an tih êm avângin: “Hêng thil hi engah nge in tih? Keini pawh in nungchang ang pu mihring kan nih hi,” tiin an au chhuak a ni.—Tirhkohte 14:8-15.

10. Engvângin nge Paula leh Barnaba chuan Lukaoni khuaa mite aia chungnung zâwka an inngaih loh?

¹⁰ Paula leh Barnaba’n mihring mai kan ni tia an sawi khân ṭha famkim lo an ni an tihna a ni. Pathian an biak dân chu Lukaoni khuaa mite biak dân nên a inang an tihna a ni lo. Anni chu Pathian tîrh missionary an ni a. (Tirhkohte 13:2) Thlarau thianghlima hriak thih an niin, beiseina ropui tak an nei a ni. Mahse, chu chu chungnung zâwk nia an inngaihna tûr chhan a ni lo. Chûng mite’n chanchin ṭha an pawm chuan vân beiseina an hmu ve thei tih an hria a ni.

11. Thu kan hrilh hunah engtin nge Paula anga kan inngaihtlâwm theih?

¹¹ Paula anga inngaihtlâwmna kan lantîr theih dân kawng khat chu hei hi a ni. Thu hrilh rawngbâwlna avâng leh Jehova ṭanpuinaa kan thil hlen chhuahte avângin mi pawimawh tak niin englai mahin kan inngai lo vang. Heti hian kan inzâwt thei a: ‘Ka rawngbâwlna biala mite chu engtin nge ka thlîr? Mi ṭhenkhat chungah inpâwng huatna rilru ka nei em?’ tiin. Khawvêl puma Jehova Thuhretute chuan chanchin ṭha ngaithla duhtute chu zawn hmuh an tum a. Ṭhenkhat chuan mite’n hnuaihnung zâwka an ngaih ṭawngte zirin, chûng hnam dânte chu hriat an tum a ni. Mahse, an thu hrilhnaa mite aia ṭha zâwk niin englai mahin an inngai lo. Chu aiin, mi a tam thei ang berin Lalram thuchah an pawm theih nân anni chu hriatthiam an tum zâwk a ni.

MITE CHU AN HMING LAMIN ṬAWNGṬAISAK RAWH

12. Engtin nge Epaphra chuan mi dangte a ngaihsak tak zet tih a lantîr?

¹² Inngaihtlâwmna kan lantîr theih dân kawng dang leh chu ‘rinna hlu tak kan chan ang chang ve,’ kan unaute tâna kan ṭawngṭaina hi a ni. (2 Petera 1:1) Chutiang chuan Epaphra’n a ti a. Bible chuan ani chu vawi thum chauh a târ lang a ni. Paula chuan Rom khuaa, ina khuahkhirha a awm lai khân, Kolossa khuaa Kristiante hnênah Epaphra chungchâng sawiin: “A ṭawngṭainaahte chuan nangmahni tân a bei fo ṭhîn a ni,” tiin a ziak a. (Kolossa 4:12) Epaphra chuan unaute chu a hre chiang hlein, a ngaihsak tak zet a. Paula’n ani chu “ka tânpuipa,” tia a koh avângin Epaphra pawhin mi mal harsatna a nei a ni. (Philemona 23) Chuti chung pawhin, mi dangte mamawh a ngaihsak rengin, ṭanpuinate a pe a. Ani chuan unaute tân a ṭawngṭaisak a, keini pawh an hming lamin an tân kan ṭawngṭaisak thei a ni. Chutiang ṭawngṭaina chuan nasa takin thil a ti thei a ni.—2 Korinth 1:11; Jakoba 5:16.

13. Engtin nge kan ṭawngṭai hunah Epaphra kan entawn theih?

¹³ A hming lama i ṭawngṭaisak theih tuemaw chu ngaihtuah rawh. Harsatna hmachhawn mêk kohhrana i ṭhiante leh i chhûngte chu i hre chhuak mai thei. Thu tlûkna siam harsa an ti emaw, thlêmna an tâwk emaw a ni thei a. Unaute tân pawh i ṭawngṭaisak thei a, chûng unaute hming chu jw.org-a “An Rinna Avânga Lung Ina Tâng Jehova Thuhretute” tih thuziakah i hmu thei a ni. (NEWSROOM > LEGAL DEVELOPMENTS tih hnuaiah lût rawh.) Thihnaa hmangaih tak chân te, tûn hnai maia leilung chhiatna leh indonaa dam khawchhuak te, leh sum lama harsatna neite tân pawh i ṭawngṭaisak thei bawk. Kan ṭawngṭaisak ngai unaute an va tam êm! An tâna kan ṭawngṭai hian mahni mamawh chauh ni lovin, mi dangte mamawh pawh kan ngaihsak tak zet tih kan lantîr tihna a ni a. (Philippi 2:4) Jehova’n chûng ṭawngṭainate chu a ngaithla tak zet a ni.

‘NGAIHTHLAK CHUH RAWH’

14. Engtin nge Jehova chu ngaithlatu ṭha ber a nih?

¹⁴ Inngaihtlâwmna kan lantîr theih dân kawng dang leh chu ṭha taka ngaihthlâk hi a ni. Jakoba 1:19 chuan “ngaihthlâk chuh” tûrin min hrilh a. Jehova chu ngaithlatu ṭha ber a ni. (Genesis 18:32; Josua 10:14) Entîr nân, Exodus 32:11-14-a kan hmuh inbiakna hi han ngaihtuah teh. (Chhiar rawh.) Jehova’n Mosia ngaih dân chu a hriat ngai lo mah se, a ngaihtuah dânte a sawitîr a. Tûn hmaa thil lo tisual ṭhîntu thusawi chu dawhthei taka ngaithlain, a thurâwn pêk chu i zui ang em? Jehova chuan rinnaa ṭawngṭai zawng zawngte chu dawhthei takin a ngaithla a ni.

15. Mi dangte chawimawiin engtin nge Jehova kan entawn theih?

¹⁵ Heti hian inzâwt rawh: ‘Jehova chu Abrahama te, Rakili te, Mosia te, Josua te, Manoa te, Elija te, leh Hezekiate thusawi a ngaihthlâk anga mite thusawi ngaithla thei khawpa a inngaitlâwm a nih chuan chutiang chuan ka ti ve tûr a ni lawm ni? Unaute ngaih dân ngaihthlâksak a, a theih chuan an ngaih dân zuina hmangin anni chu ka chawimawi lehzual thei ang em? Kohhranah leh chhûngkuaah nasa lehzuala kan ngaihsak ngai tuemaw an awm em? Chu mi chungchângah eng nge ka tih theih?’ tiin.—Genesis 30:6; Rorêltute 13:9; 1 Lalte 17:22; 2 Chronicles 30:20.

“LALPA CHUAN KA HREHAWMZIA HI A RAWN HMU ANG”

16. Simeia’n dik lo taka a cheibâwl khân Lal Davida’n engtin nge a chhân lêt?

¹⁶ Inngaihtlâwmna chuan mi dangin dik lo taka min cheibâwl hunah insumtheihna lantîr tûrin min ṭanpui bawk. (Ephesi 4:2) Entawn tûr ṭha ber chu 2 Samuela 16:5-13-ah kan hmu a. (Chhiar rawh.) Lal Saula chhûngkhat Simeia’n Davida leh a chhiahhlawhte chu a diriam a. Davida’n chutianga ti lo tûrin Simeia chu a khap thei a; mahse, a diriamna chu dawhthei takin a tuar a. Engtin nge Davida’n chutiang insumtheihna chu a neih? Sâm number pathumna kan zirna aṭangin kan hmu thei a ni.

17. Engin nge Davida chu insumtheihna nei tûra ṭanpui a, engtin nge kan entawn theih?

¹⁷ Davida chuan Sâm number pathumna hi a fapa Absaloma’n thah a tum laia a ziah a ni a. Chûng hun lai chuan Simeia’n Davida chu ṭawngkamin bei mah se, rilru chiai lovin a awm thei a ni. Engtin nge chutianga a awm theih? Sâm number 3:4-ah Davida thute chu heti hian kan chhiar a ni: “Ka awin LALPA chu ka au va, a tlâng thianghlim aṭangin mi chhâng ṭhîn a,” tiin. Dik lo taka cheibâwl kan nih hunah Davida anga kan ṭawngṭai a ngai a ni. Tichuan, chhelna nei tûrin Jehova’n a thlarau thianghlim min pe ang. Tuemawin dik lo taka a cheibâwl che hunah insumtheihna lantîr lehzualin, i ngaidam thei ang em? I hrehawm tawrhte chu Jehova’n a hriain, a ṭanpui chein, mal a sâwm ang che tih i ring em?

“FINNA HI THUPUI BER A NI”

18. Engtin nge Jehova kaihhruaina zawm tlat chu kan hlâwkpui?

¹⁸ Dik nia kan hriatte kan tih hian kan fing ang a, Jehova’n mal min sâwm ang. Thufingte 4:7 chuan: “Finna hi thupui ber a ni,” tiin a sawi. Finna chu hriatnaa innghat ni mah se, hriatthiamna mai aia tam a tel a ni. Finnaah chuan kan thu tlûkna siamte pawh a tel bawk. Fangmîrte meuh pawhin thlasika chaw khâwlkhâwmin finna an neihzia an lantîr a. Thil tam tak hre lo mah se, nakin hun atân remhre takin an inbuatsaih lâwk a ni. (Thufingte 30:24, 25) “Pathian finna,” tia koh Krista chuan a Pa duh zâwng a ti reng a. (1 Korinth 1:24; Johana 8:29) Keini pawh dik nia kan hriatte kan tih a, inngaitlâwm taka kan awm a, finna kan lantîr chuan Pathianin lâwmman min pe ang. (Matthaia 7:21-23 chhiar rawh.) Chuvângin, kohhran chu mi zawng zawngin inngaitlâwm taka Jehova an biakna hmun nihtîr zêl ang che. Dik nia kan hriatte nunpui tûr chuan hun pêk a, dawhtheihna neih a ngai a. Mahse, chutianga tih chu inngaihtlâwmna lantîrna a ni a, chu chuan tûnah leh chatuanin hlimna min thlen ang.