Mi Siam Ṭha Thei Hmangaihna Chu Lantîr Zêl Rawh

1. A zirtîrte nêna zân hnuhnûng ber an hman ṭumah Isua’n eng thu pawimawh tak nge a sawi?

ZIRTIRTE nêna zân hnuhnûng ber an hman ṭumah, Isua chuan hmangaihna chungchâng vawi 30 lai a sawi a. A zirtîrte chu an ‘inhmangaih tawn,’ tûr a ni tih a hrilh a ni. (Johana 15:12, 17) Hmangaihna an lantîr chu Krista hnungzuitu dik tak an ni tih mite hriat khawpin a lang fiah tûr a ni. (Johana 13:34, 35) Isua sawi hmangaihna chu rilrua veina mai a ni lova, thiltithei tak leh mahni hmasial lo mizia a ni. Isua chuan: “Mihringin a ṭhian aia a nun a paih aliama hmangaihna nasa zâwk tuman an nei lo. Thu ka pêk apiang che u in tih chuan ka ṭhiante in ni ang,” tiin a sawi.—Johana 15:13, 14.

2. (a) Tûn laia Pathian chhiahhlawhte chu eng anga hriat hlawh nge an nih? (b) He thuziakah hian eng zawhnate nge kan chhân ang?

² Tûn laia, Jehova chhiahhlawhte chuan mahni hmasial lo hmangaihna dik tak leh inpumkhatna nghet tak an neih avângin mite hriat an hlawh a. (1 Johana 3:10, 11) Kan hnam te, ṭawng te, ṭobul te, leh seilennate chu eng pawh ni se, a pawimawh lo. Khawvêl puma Jehova chhiahhlawhte chu an inhmangaih tawn tak zet a ni. Tûn laiah engvângin nge hmangaihna chu a pawimawh êm êm? Engtin nge Jehova leh Isua’n hmangaihnaa min siam ṭhat? Mi dangte thlamuan leh tichak tûrin engtin nge hmangaihna kan lantîr ang?—1 Korinth 8:1.

TUN LAIAH HMANGAIHNA A PAWIMAWH CHHAN

3. Engtin nge he “hun khirh tak” hian mite chu a nghawng?

³ ‘Hun khirh taka’ kan nun avângin nun chu ‘thawhrimna leh lungngaihnain’ a khat a. (2 Timothea 3:1-5; Sâm 90:10) Mi tam tak chu hrehawm an tawrh nasat êm avângin an beidawng hle a. Kum tin hian mi 800,000 aia tamte chuan mahni an intihlum a, chu chu second 40-ah mi pakhat zêl thi ang a ni. Lungchhiahthlâk takin, kan unau ṭhenkhatte pawh chutiang rilru an neih avângin an intihlum a ni.

4. Bible-a tute’n nge thih lo duh tawh ṭhîn?

⁴ Bible hun laia Pathian chhiahhlawh rinawm ṭhenkhat chuan an buainate avânga an rilru a hrehawm êm avângin thih duh châng an nei a. Entîr nân, Joba chuan chutiang rilru natna a neih avângin: “Ka ning hluah hluah, ka nung rei lo vang,” tiin a sawi a ni. (Joba 7:16; 14:13) Jona pawh a lunghnual êm avângin: “Chuvâng chuan, aw LALPA, tûnah ka nunna hi mi lâksak tûrin ka ngên a che; keia tân hian dam aiin thih a ṭha zâwk si a,” tiin a sawi. (Jona 4:3) Zâwlnei Elija pawhin beisei bo nia a inngaih avângin: “A tâwk ta e, aw LALPA, tûnah hian ka nunna hi la mai teh,” tiin a sawi a ni. (1 Lalte 19:4) Jehova chuan chûng chhiahhlawh rinawmte chu a hmangaihin, nung tûrin a duh a. Chutiang rilru an neih avângin a dem lo. Chu aiin, rinawm taka a rawng an bâwl theih nân nun zawm zêl duhna nei leh tûrin a ṭanpui a ni.

5. Engvângin nge kan unaute chuan kan hmangaihna an mamawh tak zet?

⁵ Tûn laiah, kan unau tam takte chuan dinhmun khirh tak tak an hmachhawn avângin kan hmangaihna an mamawh a. Ṭhenkhat chuan nuih sawhna leh tihduhdahna an tâwk a ni. A dangte chuan an hnathawhnaah tharum thawha beihnate leh sawisêlnate chu chhel taka an tawrh a ngai a. A nih loh leh, dârkâr rei tak leh hna khirh takte an thawh avângin an chau ngawih ngawih thei a. A dang lehte chuan chhûngkaw buaina khirh takte an nei a ni. Ṭhenkhat dang lehte chuan Jehova be lotu nupui pasal nei an nih avângin sawichhiat an hlawh reng bawk. Chûng thilte leh buaina dangte avângin mi tam tak chuan tuar thei tawh lo niin an inngai a, mahni inhlutna an hloh ṭan thei a ni. Anni chu tu nge ṭanpui thei ang?

JEHOVA HMANGAIHNAIN MIN TICHAK

6. Engtin nge Jehova hmangaihnain a chhiahhlawhte chu a tihchak?

⁶ Jehova chuan a chhiahhlawhte chu tûnah leh chatuanin a hmangaih ang tih a tiam a. Israel mite hnênah: “Ka ngaiha hlu tak in niha, mi zahawm tak in nih bawka, ka hmangaih bawk che u,” tih leh “Hlau suh u, in hnênah ka awm si a,” tih thu a hrilh laia an awm dân chu han mitthla teh. (Isaia 43:4, 5) Jehova tân mi tin hi kan hlu ṭheuh tih kan hria a.a (Footnote en rawh.) Bible chuan: “Chhandamtu tûr mi chak tak chu: Lâwmin i chungah a hlim ang a,” tiin min tiam a ni.—Zephania 3:16, 17.

7. Engtin nge Jehova hmangaihna chu nausên enkawltu nu hmangaihna nên a inan? (A thupui chunga milem en rawh.)

⁷ Jehova’n a mite chu buaina eng ang pawh nei mah se, a tichakin a thlamuan ang tih a tiam a. Ani chuan: “Chu chu in hnê ang; a hmathlâk ang che u a, a mal chungah chuan a ṭumtîr ang che u. Mi, a nuin a thlamuan angin ka thlamuan ang che u,” tia a sawi khân a lang a ni. (Isaia 66:12, 13) Nautê chuan a nuin a pawma, a lawm hian him nia a inngaih dân tûr chu han ngaihtuah teh! Jehova chuan a hmangaih tak zet chein, him nia inngai tûrin a duh che a ni. Jehova tân i hlu tak zet a ni tih chu ringhlel ngai suh.—Jeremia 31:3.

8, 9. Engtin nge Isua hmangaihna chuan min tihchak theih?

⁸ Jehova’n min hmangaih a ni tih kan hriat theihna chhan dang leh chu: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tihah hian kan hre thei a ni. (Johana 3:16) Isua inthawina chuan ani pawhin min hmangaih tih a târ lang a, chu hmangaihna chuan min tichak a ni. Bible chuan “hrehawmnain emaw, lungngaihnain emaw” “Krista Isuaa awm Pathian hmangaihna ata chu mi ṭhen thei lovang,” tiin a sawi.—Rom 8:35, 38, 39.

⁹ Taksa leh rilru lama mi tichau thei, a nih loh leh Jehova rawngbâwlnaa kan hlimna la bo thei buaina kan neih châng a awm a. Mahse, Krista min hmangaihzia hriatna chuan tuar chhuak thei tûrin chakna min pe a ni. (2 Korinth 5:14, 15 chhiar rawh.) Isua hmangaihna chuan nun zawm zêl duhna leh Jehova rawngbâwl zawm zêl duhna min neihtîr a. Chu chuan leilung chhiatna te, tihduhdahna te, lunghnualna te, leh lungkhamnate tuar chung pawha beidawng lo tûrin min ṭanpui thei a ni.

KAN UNAUTE’N KAN HMANGAIHNA AN MAMAWH

10, 11. Kan unau lunghnualte tichak tûrin tute’n nge mawhphurhna nei? Hrilhfiah rawh.

¹⁰ Jehova chuan a hmangaihnaa min tichak tûrin kohhran chu a hmang a. Unaute kan hmangaih hian Jehova kan hmangaih tihna a ni. Kan unaute chu an hluin, Jehova’n a hmangaih tih kan hriat avângin anmahni ṭanpui tûrin kan tih theih apiang kan ti a ni. (1 Johana 4:19-21) Tirhkoh Paula chuan: “Infuih tawnin, intisâwt tawn ṭheuh rawh u, in tih rêng ṭhin ang hian,” tiin a ziak a. (1 Thessalonika 5:11) Hei hi kohhran upate chauh tih tûr a ni lo. Mi tin hian kan unaute thlamuanin, Jehova leh Isua kan entawn thei a ni.—Rom 15:1, 2 chhiar rawh.

¹¹ Lungngaihna leh lungkhamna avânga hrehawm tuar kohhrana unau ṭhenkhatte chuan mi thiamte ṭanpuina leh damdawi lama inenkawl an mamawh mai thei a. (Luka 5:31) Kohhran upate leh kohhrana mi dangte chuan zirtîrna dawng dâktawr an ni lo chung pawhin an ṭanpuina leh an thlamuanna chu a pawimawh hle tih an hria a ni. Kohhrana mi zawng zawng chu ‘rilru tête chu fuih a, chak lote chu ṭanpui a, mi zawng zawng lakah dawhthei takin’ an awm thei a ni. (1 Thessalonika 5:14) Kan unaute rilru awm dân chu hriat kan tum ang a. An chungah kan dawhtheiin, an lunghnual hunah anmahni thlamuan thei tûr zâwngin thu kan sawi ang. Mi dangte chu tihchak i tum em? Nasa lehzuala mite thlamuan a, fuih tûrin eng nge i tih theih?

12. Kohhran hmangaihna avânga tihchaka awm tuemaw thiltawn chu sawi rawh.

¹² Europe rama unaunu chuan: “Mahni intihhlum duh châng ka nei a; mahse, ṭanpuina ṭha tak ka dawng a ni. Ka lawina kohhran chuan ka nun a chhanhim a. Unaute chuan min fuihin, min hmangaih reng ṭhîn a. Lunghnualna ka neih chu unau tlêmtê chauhvin hre mah se, kohhran chuan min ṭanpui a inpeih reng a ni. Nupa tuak khat chu thlarau lama ka nu leh pa ang an ni a. Min ngaihsak tak zetin, nî lêngin min awmpui ṭhîn,” tiin a sawi. Ni e, mi tin hian chutiang anga tam chuan kan inṭanpui thei lo ngei mai. Mahse, kan unaute chu a tam thei ang bera ṭanpui kan duh a ni.b (Footnote en rawh.)

HMANGAIHNAA MI DANGTE SIAM ṬHAT DAN

13. Mi dangte thlamuan tûrin eng nge kan tih ngai?

¹³ Ṭha taka ngaithlatu ni rawh. (Jakoba 1:19) Lainatna thinglung nêna mite thusawi kan ngaihthlâk hian hmangaihna kan lantîr a ni. An rilru awm dân hre thiam tûra ṭanpui theitu zawhnate zâwt ang che. I ngaihsak tak zetzia chu i hmêl awm dân aṭang pawhin an hre thei ang. Thu an sawi laiin pawt chat lo la, dawhthei takin ngaihthlâksak ang che. Ṭha taka i ngaihthlâk chuan i hre chiang lehzual ang a, chu chuan nangmah rinchhan tûrin a ṭanpui thei ang. Tichuan, amah ṭanpui tuma i thusawite chu a tân ngaihthlâk a awlsam lehzual ang. Mite kan ngaihsak tak zet chuan anmahni kan thlamuan thei ang.

14. Engvângin nge sawisêl hmang kan nih loh vang?

¹⁴ Sawisêl suh. Mi lunghnual chuan kan sawisêl nia a hriat chuan a lunghnual lehzual ang. Chu chuan, kan tân ṭanpui a tiharsa ang. “Khandaih chhun anga na taka mi chhun thu sawi an awm a, mi fing lei erawh chu damna a ni.” (Thufingte 12:18) Kan thusawia mi lunghnualte tih nat chu tum ngai lo mah ila, ngaihtuah lo va thu kan sawi chuan an rilru natna kan tizual thei a ni. Kan unau tichak tûr chuan a dinhmun hriatthiam kan tum tak zet tih a hre chiang tûr a ni.—Matthaia 7:12.

15. Mi dangte thlamuan nân eng hmanraw ṭangkai tak nge kan hman theih?

¹⁵ Mi dangte thlamuan nân Pathian Thu hmang rawh. (Rom 15:4, 5 chhiar rawh.) Bible chu “chhelna leh thlamuanna Pathian,” hnên aṭanga lo kal a nih avângin a thu-a thlamuanna tam tak kan hmu chu a mak lo. Watch Tower Publications Index leh Research Guide for Jehovah’s Witnesses te pawh kan nei bawk. Hêng hmanruaahte hian kan unaute thlamuan a, tichak tûra kan hman theih Bible chângte leh thu leh hla chhuahte kan hmu thei a ni.

16. Mi lunghnual tuemaw fuih thei tûrin eng miziain eng min ṭanpui ang?

¹⁶ Mi khawngaih thei tak leh ngilnei tak ni rawh. Jehova chu “khawngaihnate Pa leh thlamuanna zawng zawng Pathian,” a ni a, a chhiahhlawhte chungah “khawngaihna” a lantîr a ni. (2 Korinth 1:3-6 chhiar rawh; Luka 1:77; Rom 15:13) Paula chuan Jehova a entawn avângin he mi chungchângah entawn tûr ṭha a siam a. Ani chuan: “Nu, nau pawmin ama fate a duat angin in zîngah nunnêm takin kan awm zâwk kha. Chutiang bawkin kan duhzâwng tak in lo nih tâk avâng khân, kan duh ngawih ngawih che u a, Pathian chanchin ṭha chauh ni lovin, keimahni nun pawh pêk hial che u kan peih kha,” tiin a sawi. (1 Thessalonika 2:7, 8) Jehova anga khawngaihna kan lantîr chuan kan unaute’n ṭawngṭaia an dîl thlamuanna chu kan pe thei ang!

17. Unaute fuih tûrin eng thlîr dân inâwm tâwk tak nge kan neih ngai?

¹⁷ I unaute chu ṭha famkim tûrin beisei suh. A âwm tâwkin beisei rawh. I unaute chu ṭha famkim tûra i beisei a nih chuan i beidawng mai ang. (Thuhriltu 7:21, 22) Jehova chuan inâwm tâwk takin min beisei tih hre reng ang che. Chuvângin, kan indawh tawn a ngai a ni. (Ephesi 4:1-3, 32) Kan unaute chu thawk tam tâwk lo leh mi dangte nêna khaikhin nia inngaihtîr chu kan duh lo va. Chu aiin, kan fak ang a, an thil ṭha tihte chu kan sawi hmuh ang. Chu chuan Jehova rawng an bâwlnaah hlimna nei tûrin a ṭanpui thei a ni.—Galatia 6:4.

18. Engvângin nge mite chu hmangaihnaa siam ṭhat kan duh?

¹⁸ Jehova chhiahhlawh tinte chu amah leh Isua tân an hlu a. (Galatia 2:20) Kan unaute chu kan hmangaih tak zet avângin khawngaihna nei takin kan cheibâwl tûr a ni. Chuvângin, “inremna tûr leh intihsâwt tawnna tûr thilte chu i ûm ang u.” (Rom 14:19) Lunghnualna tûr chhan awm tawh lohna Lei Paradise chu kan va nghâkhlel tak êm! Natna leh indonate a awm tawh lo ang. Mite chu kan rochun sual avângin an thi tawh lo ang a, tihduhdahna te, chhûngkaw buaina te, lunghnualnate a awm tawh lo vang. Kum sângkhat tâwpah chuan mi zawng zawng chu an ṭha famkim tawh ang. Fiahna hnuhnûng bera rinawmte chu Jehova tân leia a fate ang an niin, “Pathian fate zalênna ropuiah chuan an lût dâwn si a.” (Rom 8:21) Chuvângin, kan za hian mi siam ṭha theitu hmangaihna chu lantîrin, Pathian khawvêl thar ropui taka dam khawchhuak tûrin inṭanpui tawn ang u.