Jehova Rinchhanin Nung Rawh!

1. Engvângin nge thlamuanna kan mamawh ṭheuh?

KAN vai hian thlamuanna kan mamawh ṭheuh va. Kan nun chu lungkhamna te, lunghnualna te, leh lungngaihnatein a khat mai thei a. Natna te, kum upatna avâng te, leh kan hmangaih tak tuemaw boralna avângtein hrehawm kan tuar thei a ni. Kan zînga ṭhenkhat chuan ṭha lo taka mi dangte cheibâwl an hlawh a. Chu bâkah, kan chhehvêla mite chu an nunrâwng tawlh tawlh a ni. Ni e, he “hun khirh takte” hian “ni hnuhnûngahte” kan nung tih leh khawvêl thar kan hnaih lehzual tih a finfiah a. (2 Timothea 3:1) Chu bâkah, Jehova thutiamte thlen famkim hun tûr chu rei tak kan lo nghâk tawhin, harsatna kan hmachhawn zual deuh deuh pawh a ni thei. A nih leh, khawi aṭangin nge thlamuanna kan hmuh theih?

2, 3. (a) Habakuka chanchin eng nge kan hriat? (b) Engvângin nge Habakuka lehkhabu hi kan bih chian ang?

² Chu zawhna chhânna hmu tûrin Habakuka lehkhabu i lo bih chiang ang u. Bible-ah chuan Habakuka nun kawng chanchin tam tak târ lan ni lo mah se, a lehkhabu ziah hian min tichak tak zet a ni. Habakuka tih hming chu “Duat Taka Pawm” tih awmzia a ni thei a. Chu chuan Jehova’n amah betute chu duat taka pawmin, a thlamuan tih a kâwk a ni. A nih loh leh, Jehova betute chuan nghet taka amah an vawn dân pawh a kâwk thei bawk. Habakuka chuan Pathian hnênah zawhna ṭhenkhat a zâwt a. Jehova chuan Habakuka nêna an inbiakna chu kan hlâwkpui dâwn tih a hriat avângin ziak tûrin thlarauvin a thâwk khum a ni.—Habakuka 2:2.

³ Zâwlnei lunghnual tak leh Jehova inbiakna chu Bible-a târ lan Habakuka chanchin zawng zawng chu a ni a. Mahse, a lehkhabu hi Pathian lehkha Thu-a ‘chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tura ziah,’ zînga tel a ni. (Rom 15:4) Engtin nge Habakuka bu hian min ṭanpui ṭheuh theih? Chu chuan Jehova rinchhan tih awmzia hre tûrin min ṭanpui thei a ni. Habakuka hrilh lâwkna hian buaina leh fiahna engpawh tâwk mah ila, rilru thlamuanna kan nei thei tih min rinnghehtîr a ni.

JEHOVA HNENAH ṬAWNGṬAI RAWH

4. Engvângin nge Habakuka chu a lunghnual?

⁴ Habakuka 1:2, 3 chhiar rawh. Habakuka chu hun harsa tak kârah a nung a. A chhehvêla mite chu sual tak leh nunrâwng tak an nih avângin, chu chuan a tilungngai hle a. A hawina lam apiangah, Israel mite chu râwng tak leh dik lo takin an incheibâwl tawn tih a hmu a. Habakuka chuan: ‘He suahsualna hi engtik hunah nge a tâwp ang? Engvângin nge Jehova’n hma la lova, tûn thlenga a la awm ni?’ tiin a ngaihtuah a. Ṭanpuitu nei lo niin a inngai a ni. Chuvângin, Jehova hnênah hma la tûrin a ngên a. Habakuka chuan Jehova’n A mite a ngaihsak tawh lo emaw, hma a la tawh dâwn lo emaw niin a ngai ṭan thei a ni. Chutiang chuan i ngai ve tawh ṭhîn em?

5. Habakuka lehkhabu aṭangin eng nge kan zir theih? (A thupui chunga milem en rawh.)

⁵ Habakuka’n Jehova leh a thutiamte a rinchhan tawh loh avânga chûng zawhnate zâwt a ni ang em? Ni lo ve! Habakuka chuan a rinhlelhna leh a buainaa ṭanpui tûrin a ngên a, chu chuan tlâwm mai lovin, Amah a la rinchhan tlat tih a târ lang a ni. Habakuka chu a lungngaiin a rilru a buai hle ngei ang. Jehova’n tûn thlenga hma a lâk loh chhan leh hrehawm tam tak tawrh a phal chhan chu a hre thiam lo a ni. Jehova’n Habakuka chu a lungkhamnate ziak tûra thlarauva a thâwk khumna aṭang hian zir tûr pawimawh tak kan nei a. Jehova hnênah kan lungkhamnate leh rinhlelhnate thlen chu kan hlau tûr a ni lo. Dik tak chuan, ani chuan a hnêna ṭawngṭai tûr leh kan rilru awm dânte hrilh tûrin hmangaihna nei takin min sâwm a. (Sâm 50:15; 62:8) Thufingte 3:5-na chuan: “I thinlung zawng zawngin LALPA ring la, nangma hriatnaah innghat suh,” tiin kan vaiin min fuih a. Habakuka chuan he thu hi a nunpui a ni.

6. Engvângin nge ṭawngṭai chu a pawimawh êm êm?

⁶ Habakuka chuan a Ṭhian leh a Pa Jehova chu a rinchhan tlat a, amah hnaih tûrin hma a la a. Ani chuan a dinhmun chungchângah a lungkhamin, mahnia chinfel mai a tum lo. Chu aiin, a rilru awm dân leh lungkhamnate chu ṭawngṭaiin a thlen zâwk a ni. Hei hi kan tân entawn tûr ṭha tak a ni a. Ṭawngṭaina ngaithlatu Jehova chuan a hnêna ṭawngṭai a, kan lungkhamnate hrilhin amah kan rinchhanzia lantîr tûrin min sâwm a ni. (Sâm 65:2) Chutianga kan tih chuan, Jehova’n kan ṭawngṭainate a chhân dân kan hmu ang. A thlamuanna leh kaihhruainate kan dawn chuan duat taka min pawm niin kan inhria ang. (Sâm 73:23, 24) Eng ang fiahna pawh tâwk mah ila, kan dinhmun a thlîr dân hre thiam tûrin min ṭanpui ang. Jehova hnêna ṭawngṭai chu amah kan rinchhanzia lantîr theih dân kawng ṭha ber zînga pakhat a ni.

JEHOVA THU NGAITHLA RAWH

7. Habakuka’n a lungkhamnate a hrilh khân, Jehova’n engtin nge a chhân lêt?

⁷ Habakuka 1:5-7 chhiar rawh. Habakuka’n Jehova hnêna a lungkhamnate a hrilh hnu chuan, Jehova chhan lêt dân tûr chu a ngaihtuah mai thei a. Hmangaihna nei tak Pa angin, Jehova chuan Habakuka rilru awm dân chu a hre thiam a ni. Hrehawm a tawrh avângin ṭanpuina a dîl tih pawh a hria a. Chuvângin, Jehova chuan Habakuka chu hau lovin, rinawm lo Juda mite chunga nakin lawka a tih tûr chu a hrilh a ni. Dik tak chuan, Jehova’n chûng mite hremna chu a lo thleng thuai ang tia a hrilh hmasak ber chu Habakuka hi a ni thei.

8. Engvângin nge Jehova chhânna chu Habakuka beisei ang a nih loh?

⁸ Jehova’n Habakuka hnênah hma la tûra a inpeih thu a hrilh a. Ani chuan nunrâwng tak leh suaksual tak Juda mite chu a hrem ang. Chu chu “in dam chhûng hian” a thleng ang tia sawiin, Jehova’n chu rorêlna chu Habakuka, a nih loh leh a chhehvêla Israel mite dam chhûng ngeiin a thleng dâwn tih a târ lang a ni. Jehova chhânna chu Habakuka beisei ang chiah a ni lo. Kaldai mite, a nih loh leh Babulon mite chu râwng tak an ni a. Anni chu Jehova tehnate hretu Israel mite aiin an nunrâwng zâwk a ni. A nih leh, engvângin nge Jehova’n a mite hrem nân nunrâwng tak milem be hnam chu a hman ang? Chu chuan Juda mite hrehawm tawrhna chu a belhchhah mai a ni ang.a (Footnote en rawh.) Habakuka ni ta la, engtin nge i ngaih ang?

9. Eng zawhna dangte nge Habakuka’n a zawh?

⁹ Habakuka 1:12-14, 17 chhiar rawh. Habakuka’n a chhehvêla mi suaksualte hrem nân Jehova’n Babulon mite a hmang dâwn tih hre mah se, a rilru a la buai reng a. Mahse, ani chu mi inngaitlâwm tak a ni a, Jehova rinchhan zawm zêl a tum a ni. Dik tak chuan, Jehova chu a “lungpui” a ni zawm zêl ang tih a sawi a. (Deuteronomy 32:4; Isaia 26:4) Habakuka chuan Pathian chu hmangaihna leh ngilneihna a ni tih a rin tlat avângin hêng zawhna ang chite hi a zâwt hreh lo a ni: Engvângin nge Jehova chuan Judate dinhmun chhe lehzual tûr leh a mite tihrehawm lehzual tûra thil thlen chu a phal ang? Engvângin nge hma a lâk nghâl mai loh? Engvângin nge Engkimtitheia chu a “ngawih renga,” hmun tina suahsualna awm chu a phal ni? Dik tak chuan, Jehova chu “Mi Thianghlim” a ni a, ‘thil sual hmu thei lo khawpin a mit a thianghlim,’ a ni.

10. Engvângin nge Habakuka anga awm châng kan neih mai theih?

¹⁰ Habakuka anga awm châng kan nei ngei ang. Jehova thu chu kan ngaithla a. Amah kan rinchhan a, a Thu kan chhiarin, kan zir a, chu chuan kan beiseina a tinghet a ni. A inawpna pâwlin min zirtîrte kan ngaihthlâk hian a thutiamte chungchâng kan hre bawk. Mahse, ‘Engtikah nge kan hrehawm tawrhna a tâwp ang?’ tiin kan la ngaihtuah mai thei. A hnua Habakuka thiltih aṭangin zir tûr kan nei a ni.

JEHOVA HMA LAK HUN TUR CHU NGHAK RAWH

11. Habakuka’n eng nge tih a tum tlat?

¹¹ Habakuka 2:1 chhiar rawh. Jehova nêna an inbiakna chuan Habakuka chu rilru thlamuanna a pe a. Chu chuan Jehova hma lâk hun tûr nghâk tlat tûrin a ṭanpui a ni. Habakuka chuan: ‘Buaina nî a lo thlen hunin ka nghîng lo vang,’ tia sawiin a tum ruhzia a târ lang fo va. (Habakuka 3:16) Pathian chhiahhlawh rinawm dangte pawhin Jehova hma lâk hun tûr chu dawhthei takin an nghâk a. An entawn tûr siam chuan chutiang chuan kan ti ve thei tih a târ lan avângin min tichak a ni.—Mika 7:7; Jakoba 5:7, 8.

12. Habakuka hnên aṭangin eng nge kan zir theih?

¹² Habakuka tum ruhna aṭangin eng nge kan zir theih? Pakhatna, eng harsatna pawh nei mah ila, Jehova hnênah bâng lovin kan ṭawngṭai tûr a ni. Pahnihna, Jehova’n a Thu leh a inawpna pâwl hmanga min hrilhte chu kan ngaihthlâk a ngai a. Pathumna, Jehova hma lâk hun tûr leh a hun taka kan hrehawmna min chhâwkzângkhaisak hun tûr chu dawhthei takin kan nghâk tûr a ni. Habakuka kan entawn chuan, rilru thlamuanna kan nei ang a, chhel takin kan tuar thei ang. Kan beiseina chuan dawhtheihna nei tûr leh eng buaina pawh hmachhawn mah ila, hlimna nei reng thei tûrin min ṭanpui ang. Kan Pa vâna mi chuan hma a la ang tih kan ring nghet tlat a ni.—Rom 12:12.

13. Engtin nge Jehova’n Habakuka chu a thlamuan?

¹³ Habakuka 2:3 chhiar rawh. Jehova hma lâk hun tûr Habakuka nghah tlatna chuan Jehova chu a tilâwm ang tih kan chiang thei a. Engkimtitheia chuan Habakuka hrehawm tawrh chu chiang taka a hriat avângin zâwlnei chu a thlamuan bâkah, tih tak zeta a zawhnate chu a chhâng ang tih ngilnei takin a tiam a ni. Hakakuka lungkhamna zawng zawng chu a reh thuai ang. Habakuka hnênah: “Dawhtheihna nei la, min rinchhan tlat ang che. Hun rei tak la duh angin lang mah se, i ṭawngṭaina chu kan chhâng ang,” tia hrilh ang a ni. Jehova chuan a thutiamte thlen famkimtîr hun tûr chu a ruat tawh tih Habakuka chu a hriatnawntîr a. Chuvângin, Habakuka chu nghâk fan fan tûrin a fuih a ni. A tâwpah chuan, zâwlnei chu a lunghnual tawh lo vang.

14. Fiahnate kan tawh hunah eng nge tih kan tum tlat ang?

¹⁴ Keini pawh Jehova hma lâk hun tûr chu kan nghah a ngai a. A thu min hrilhte ngun taka kan ngaihthlâk a ngai bawk. Tichuan, eng ang fiahna pawh tâwk mah ila, rinnghehna leh rilrua thlamuanna kan nei ang. Isua chuan Pathianin min hriattîr loh “a hun leh a nî” chu ngaihven lo tûrin min fuih a. (Tirhkohte 1:7) Jehova’n hma lâk hun tûr ṭha ber a hria tih kan ring tlat tûr a ni. Chuvângin, kan tlâwm tûr a ni lova, inngaitlâwm tak leh dawhthei takin, Pathianah rinna kan nghat tlat tûr a ni. Kan nghah laiin, kan hun neih chu fing takin kan hmang ang a, theih tâwp chhuahin Jehova rawng kan bâwl tûr a ni.—Marka 13:35-37; Galatia 6:9.

JEHOVA’N AMAH RINCHHANTUTE CHU NUNNA A PE

15, 16. (a) Habakuka lehkhabuah eng thutiamte nge kan hmuh? (b) Chûng thutiamte chuan eng nge min zirtîr?

¹⁵ Jehova chuan: “Mi fel erawh chu a rinnain a nung ang,” tih leh “LALPA ropuizia hriatnain lei hi a khat vek dâwn si a,” tiin a tiam a. (Habakuka 2:4, 14) Ni e, Jehova chuan dawhtheihna neite leh amah rinchhan tlattute chu chatuan nunna pêk a tiam a ni.

¹⁶ Habakuka 2:4-naa kan hmu thutiam chu a pawimawh êm avângin tirhkoh Paula’n a lehkha thawn ziahah vawi thum lai a la chhâwng a ni! (Rom 1:17; Galatia 3:11; Hebrai 10:38) Eng ang harsatna pawh tâwk mah ila, amah kan rin tlat chuan Jehova thutiam thlen famkimna chu kan hmu ang tih ka chiang thei a. Jehova chuan nakin hun atâna kan beiseina chu thlîr tlat tûrin min duh a ni.

17. Jehova’n amah kan rinchhan chuan eng nge min tihsak a tiam?

¹⁷ Habakuka lehkhabuah hian ni hnuhnûnga awm, kan vai tâna zir tûr pawimawh tak a awm a. Jehova chuan amah rinchhan tlattu mi felte chu chatuan nunna a tiam a ni. Chuvângin, eng ang buainate leh lungkhamnate pawh nei mah ila, Pathian kan rinna chu i tinghet chhunzawm zêl ang u. Habakuka hnêna Jehova thusawi chuan min ṭanpuiin, min chhanhim ang tih min rinnghehtîr a ni. Amah rinchhan tlat tûr leh leia a Lalramin ro a rêl hun tûr a ruat tawh chu dawhthei taka nghâk tûrin min ngên a. Chutih hunah chuan, leilung chu hlim tak leh thlamuang taka Jehova chibai bûktutein a khat tawh ang.—Matthaia 5:5; Hebrai 10:36-39.

JEHOVA RINCHHANIN HLIM RAWH

18. Engtin nge Jehova thusawi chuan Habakuka chungah nghawng a neih?

¹⁸ Habakuka 3:16-19 chhiar rawh. Jehova thusawi chuan Habakuka chungah nasa takin nghawng a nei a. Ani chuan Jehova’n tun hmaa a mite tâna a tihsak thil mak tak takte chu a chhût ngun a ni. Tûnah chuan, Jehova a rinchhanna chu a nghet sauh va. Jehova’n hma a la thuai ang tih a hre chiang hle! Chu chuan hun engemaw chen hrehawm a la tuar dâwn tih hre mah se, thlamuanna a pe a. Habakuka’n rinhlelhna a nei tawh lo. Chu aiin, Jehova’n a chhanhim ang tih a ring tlat zâwk a ni. Dik tak chuan, châng 18-naa a thusawi hi rinna chungchânga Bible-a kan hmuh azawnga ṭawngkam khauh ber zînga pakhat a ni thei a. Bible lama mi thiam ṭhenkhat chuan, chu ṭawngkam chu: “Lapaah lâwmin ka lâm ang; Pathiana ka lâwm êm avângin ka vîr kual ang,” tihna niin an ring a ni. Kan tân zir tûr pawimawh tak a va ni êm! Jehova chuan nakin hun atân thutiam ṭha tak min pêk bâkah, chûng a thutiamte chu a thleng famkim thuai ang tih min rinnghehtîr a ni.

19. Habakuka angin, engtin nge Jehova thlamuanna kan hmuh theih?

¹⁹ Habakuka lehkhabu aṭanga zir tûr pawimawh tak kan neih chu Jehova rinchhan tlat hi a ni a. (Habakuka 2:4) Jehova rinchhan zawm zêl tûr chuan amah nêna kan inlaichînna kan tihngheh a ngai a ni. Chuvângin, kan tih tûrte chu hêngte hi a ni, (1) Kan lungngaihnate leh lungkhamnate chu ṭawngṭaiin a hnênah kan hrilh reng ang. (2) Jehova’n a Thu aṭanga min hrilhte chu ngun takin kan ngaithla ang a, a inawpna pâwl kal tlanga min pêk kaihhruainate chu kan zui ang. (3) Rinawm taka awmin, Jehova thutiamte thlen famkim hun tûr chu dawhthei takin kan nghâk ang. Chutiang chuan Habakuka’n a ti a ni. Jehova nêna an inbiak ṭan tirh chuan lunghnual hle mah se, a tâwpah, tihchaka awmin, a hlim hle! Habakuka kan entawn chuan, keini pawh vâna kan Pa Jehova’n duat taka min pawm avângin thlamuanna kan nei ang. He khawvêl suaksualah hian hei aia thlamuanna nasa zâwk hi a awm thei dâwn em ni?