Tuin Nge Leilung Hi Chhanhim Ang?

Mi tam tak chuan he leilung leh a chhûnga chêng nunna neite chunga mihringte thlen chhiatna chu an ngaihven hle a. Mi thiam ṭhenkhat chuan, mihringte thiltih hian khawvêla nunna neite chungah chhiatna nasa tak a thlen a, nungcha ṭhenkhat phei chu mang mai thei dinhmun hlauhawmah a dah tih an sawi.

Mihringte hian leilung hi chên theih loh khawpin an tichhia ang em? A nih loh leh, leilung tichhe si lova kan chên theih hun a thleng thei ngai ang em?

Mihringte hmalâkna hi a hlawhtling ang em?

Mi thiam tam tak chuan, mihringte’n leilung hi an vênhim theih an rin bâkah, a tichhe lo zâwnga kan nun theih an ring a. Zir chîk mi ṭhenkhat chuan, hmun hrang hrangah a ruala inthlâkthlengna lian tak kan siam chauhvin, mihringte hmalâkna hi a hlawhtlin theih tûr thu an sawi. Chutianga inthlâkthlengnaah chuan hêngte hi a tel a ni:

• Khawmual te, ramngaw te, dûm hmun te, leh tuifinriatte ṭha taka enkawl.

• Lo neih dân leh chakna thahrui lâk dân tharte hman.

• Mite’n thlai ei tam a, lui lam sa pawh tiamin kan mamawh tâwk chauh sa kan ei nân leh chaw paih ral a tlêm zâwk theih nâna ei in siam leh thawn chhuahna lama inthlâk danglamna siam.

• Nun ṭha leh nuam neih chu khawvêl lam thil neih belh zêlnaah a innghat lo tih pawm.

Engtin nge i ngaih? Tûn hmaa la thleng ngai lo sawrkâr te, sumdâwng mi te, leh mi mal tinte thawkho tûra beisei chu thil inâwm niin i hria em? Nge ni a, mi ṭhenkhat chu duhâm tak, mahni hmasial tak, leh a sawhkhâwk tûr ngaihtuah lova thil tih chîngte an nih avângin, chutianga thawhhona chu a thlen theih i ring lo zâwk?—2 Timothea 3:1-5.

Beiseina kan neih theih chhan

Bible chuan kan chênna leilung hi tihchhiat a nih loh tûr thu min tiam a. Leilung chhanhim tûra mihringte hmalâkna a hlawhtlin loh chhan chiang taka a hrilhfiah bâkah, thlâk danglam ngai dik tak chu a târ lang a ni. Inthlâk danglamna a thlen dân tûr chu a târ lang bawk.

Mihringte hmalâknain leilung a chhanhim theih loh chhan. Pathian Jehovaa chuan leilung hi siamin, a enkawl tûrin mihringte hnênah mawhphurhna a pe a. (Genesis 1:28; 2:15) An Siamtu kaihhruaina an zawn a, a thupêkte an zawm chauhvin an mawhphurhna chu an hlen thei ang. (Thufingte 20:24) Mahse, Jehova hnâwlin mahnia ro inrêl an thlang ta zâwk a. (Thuhriltu 7:29) Mihringte hian mahni theihna mai chuan leilung hi an enkawl thei lo va, theih tâwp an chhuah chungpawhin hlawhtlinna tak tak an nei thei lo.—Thufingte 21:30; Jeremia 10:23.

Siam ngei tûr inthlâk danglamna. Pathianin mihringte leilung tihchhiatna hi a titâwp ang. (Thu Puan 11:18) Leilung tichhetu sawrkârte leh pâwlte chu a awm a phal tawh lo vang a, thil dangin a thlâkthleng ang. (Thu Puan 21:1) Chumi avâng chuan: “Ngai teh, thil engkim ka siam thar e,” tiin a sawi a ni.—Thu Puan 21:5.

Chu inthlâk danglamna lo thlen dân tûr. Jehova chuan mihring sawrkârte chu a vân lam sawrkâr, Pathian Ram hmangin a thlâk ang a. Isua Krista kaihhruai chu sawrkâr chuan khawvêl pumah ro a rêl ang.—Daniela 2:44; Matthaia 6:10.

Pathian Ram chuan mihringte chu Pathian tehna felte mila nun dân a zirtîr ang a. Mihringte’n an Siamtu hria a, a kaihhruainate an zawm hunah chauh leilung hi tichhe lovin an enkawl thei ang. (Isaia 11:9) Bible chuan Pathian sawrkârin a khua leh tuite chu duhthusâm nun pe a, leilung tichhe lo zâwnga nung tûra a ṭanpui tûr thu a sawi a ni. Hêngte hi a ti ang:

• Mi zawng zawng hnêna ei tûr hnianghnâr tak pêk.—Sâm 72:16.

• Leilung hausakna pêk leh.—Isaia 35:1, 2, 6, 7.

• Mihringte leh ramsate inngeih taka chêntîr.—Isaia 11:6-8; Hosea 2:18.

• Leilung leh a chhûng boruak chhe zêl tûr vênhim.—Marka 4:37-41.

Pathian Ramin chûng inthlâk danglamnate chu a rawn thlentîr vat ang tih i beisei thei a ni. Hriat belh nân, “Eng Tikah Nge Pathian Ramin Leiah Ro A Rêl Ang?” tih thuziak chu chhiar ang che.