Engvângin Nge Mite’n Remna An Siam Theih Loh?—Bible-in Eng Nge A Sawi?

Khawvêl hruaitute leh khawvêl pum huapa pâwl hrang hrangte chuan khawvêlah remna an thlen thei lo. Khawvêl Indopui II-na hnu lam hun dang zawng ai pawhin tûn laiah buaina a nasa lehzual a ni. Mi tlûklehdingâwn hnih vêl—khawvêla mi awm zât hmun lia ṭhena hmun khat—chu chûng buainate thlenna hmuna awmte an ni.

Engvângin nge mihringte hian remna an thlentîr theih loh? Bible-in eng nge a sawi?

Mihringin remna a thlentîr theih loh chhan pathum

1. 1. Mite chuan remna thlentîr tumna dâltu rilru put hmang an lantîr a. Bible chuan tûn kan hun chhûng hian mite chu “mi, mahni inhmangaihtu te, tangka ngainatu te, intivei te, chapo te, . . . thianghlim lo te, . . . huaikawmbâwl te, . . . insûm thei lo te, mi kawlhsen te, . . . thuhnudâwn lo te, inngaihlu te [an ni dâwn si,]” tih a sawi lâwk a ni.—2 Timothea 3:2-4.

2. 2. Mihring hian a mi malin emaw, a huhovin emaw pawh ni se, Siamtu Pathian Jehovaa ṭanpuina tel lovin, an buainate chu mahni chauhvin an chingfel thei lo. Bible chuan “tungchhova kal mihringah hian, a pheikhai hruai tûr a awm lo,” tih a sawi a ni.—Jeremia 10:23.

3. 3. Khawvêl hi rorêltu sual tak leh thiltithei tak, “khawvêl zawng zawng bumtu” Diabol Setana thununna hnuaiah a awm a. (Thu Puan 12:9) ‘Khawvêl pumhlûm hi [chu] mi sual thu thua a awm” chhûng chuan indonate leh buainate a awm reng ang.—1 Johana 5:19.

Tuin nge remna thlentîr thei ang?

Bible chuan remna chu mihringte thawhrimna aṭanga ni lovin, Pathian hnên aṭangin a lo awm ang tih min tiam a ni.

• “‘Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna [“remna,” NWT] ka ngaihtuah asin.’”—Jeremia 29:11.

Engtin nge Pathianin chu a thutiam chu a hlen ang? “Remna Pathian chuan . . . Setana chu a rawn rah perhtîr thuai ang che u.” (Rom 16:20) Pathianin Bible-a “Pathian Ram,” tia a sawi vân sawrkâr hmangin khawvêl pumah remna a rawn thlentîr ang. (Luka 4:43) Chu Rama Lalber Isua Krista rorêlna hnuaiah chuan mite chu inrem taka chênho dân zirtîr an ni ang.—Isaia 9:6, 7.

• Hriat belh nân, he thuziak “Pathian Ramin Eng Nge A Hlen Chhuah Ang?” tih hi chhiar ang che