Kan Leilung Awp Theitu Tûr Sawrkâr Nghet A Awm Em?—Bible-in Eng Nge A Sawi?

Khawvêl puma sawrkârte hi a buai nasa hle a. Ram nghet tak anga ngaih ramahte pawh ni se, sawrkârte chu hming chhiatna te, inthlanna te, politic lama inṭhen hranna te leh, tualchhûng buainate avângin a nghet hlei thei lo a ni.

Bible chuan sawrkâr nghet tak pakhat a awm tih a sawi a. Chu sawrkâr chungchâng chu i hre tawh pawh a ni thei. Chu chu Isua Krista’n Lal ṭawngṭainaa a târ lan kha a ni.

• “Nangni erawh chu hetiang hian in ṭawngṭai tûr a ni: “‘Kan Pa, vâna mi, i hming tihthianghlim ni rawh se. I Ram lo thleng rawh se. I duh zâwng vâna tih a nih angin, leiah pawh tih ni rawh se.’”—Matthaia 6:9, 10.

Bible-in chu Lalram chungchâng eng nge a sawi?

Lalram—sawrkâr nghet tak

Chu Lalram chuan vân aṭangin ro a rêl a ni.

• Isua’n chu sawrkâr chu “vân Ram” tiin a ko va. (Matthaia 4:17; 5:3, 10, 19, 20) Chumi avâng chuan: “Ka Lalram chu he khawvêla mi hi a ni lo,” tiin a sawi a ni.—Johana 18:36.

Chu Lalram chuan mihring sawrkârnate chu a thlâk ang.

• Bible chuan: “Vân Pathianin ram a rawn din ang a, . . . hêng [mihringte] ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi.—Daniela 2:44.

Lal Isua Krista rorêlna hnuaia awm chu Lalram chu tihchhiat a ni ngai lo vang.

• Bible chuan: “A rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang,” tiin a sawi.—Daniela 7:13, 14.

Chu Lalram chuan he leilungah remna leh muanna a rawn thlen ang.

• Bible chuan: “Mi tinte chu an grêp hrui hnuaiah leh an theipui kûng hnuaiah an ṭhu zâwk ang a, tu mân an tihlau lo vang,” tiin a sawi.—Mika 4:4.

Chu Lalram chungchâng zir belh rawh

Isua he leia a awm lai khân, “ram chanchin ṭha hrilin” a hun a hmang a. (Matthaia 9:35) Heti hian a sawi lâwk bawk a ni:

• “Tin, he Ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang a, chumi zawhah chuan tâwpna chu a lo thleng ang.”—Matthaia 24:14.

Tûn laiah, chu Lalram chanchin ṭha chu ram 240 chuangah hrilh mêk a ni a. Chu sawrkâr chungchâng leh a rorêlna i hlâwkpui theih dânte zir belh tûrin kan sâwm a che.

Khawngaihin, he video Pathian Ram Chu Eng Nge Ni? tih hi en ang che.