Engvângin Nge Mihring Insuatna A Thlen? Engvângin Nge Pathianin A Tihtâwp Loh?
Hêng zawhna zâwttute hian nasa taka an tawrh avângin a chhânna mai ni lovin, thlamuanna pawh an zawng a ni. Mi dangte chuan Mihring Insuatna hi mihringte thil ṭha lo tih râpthlâk ber angin an thlîr a, Pathian rin an harsat phah hial a ni.
Pathian leh Mihring Insuatna chungchânga ngaih dân dik lo tlânglâwnte
Hriat sual: Pathianin Mihring Insuatna thlen a remtih chhan zawh chu thil sual a ni.
Thu dik: Rinna nasa tak neite pawhin Pathianin thil ṭha lo thlen rem a tih chhan an zâwt ṭhîn a. Entîr nân, zâwlnei Habakuka chuan Pathian hnênah: “Engati nge khawlohnate min entîra, thiltih dik lo takte hi i en reng? Inrawkna leh inpâwngnêknate ka hmaah an awm reng si a; inhauhna leh innghirnghonate a lo chhuak a ni,” tiin a zâwt a. (Habakuka 1:3) Pathian chuan Habakuka chu hau lovin, a zawhnate chu mi zawng zawng chhiar theih tûrin Bible-ah a chhinchhiah zâwk a ni.
Hriat sual: Pathianin mihringte hrehawm tawrhna a ngaihsak lo.
Thu dik: Pathian chuan suahsualna leh chumiin a thlen hrehawm tawrhna chu a hua a. (Thufingte 6:16-19) Nova hun lai khân, leiah tharum thawhna a nasat êm avângin Pathianin “rilru nat nân a hman phah” a ni. (Genesis 6:5, 6) Pathian chu Mihring Insuatna avângin a rilru a na hle ang tih a chiang a ni.—Malakia 3:6.
Hriat sual: Mihring Insuatna hi Pathianin Judate a hremna a ni.
Thu dik: Pathianin kum zabi khatnaah khân Jerusalem chu Rom mite tihchhiat a remti a. (Matthaia 23:37–24:2) Mahse, chumi hnu aṭang chuan Pathianin eng hnam mah duhsak bîk leh hrem bîk a nei tawh lo. Pathian mit hmuhah, “Juda leh Jentail mite chu engah mah an danglam chuang lo.”—Rom 10:12, Good News Translation.
Hriat sual: Hmangaihna nei leh engkimti thei Pathian a awm a nih chuan Mihring Insuatna a dang ngei ang.
Thu dik: Pathianin hrehawm tawrhna thlentîr ngai lo mah se, rei lote chhûng thlen rem tih châng erawh a nei.—Jakoba 1:13; 5:11.
Engvângin nge Pathianin Mihring Insuatna thlen a rem tih?
Pathianin Mihring Insuatna thlen a remtih chhan chu hun rei tak kaltaa chawh chhuah thubuai avânga mihringte hrehawm tawrhna awm a phal chhan nên a inang a. Bible chuan tûna kan khawvêl awptu hi Pathian ni lovin, Diabola a ni tih chiang takin a târ lang a. (Luka 4:1, 2, 6; Johana 12:31) Bible-a thu dik pahnih chuan Pathianin Mihring Insuatna awm a phal chhan a hrilhfiah thei a ni.
Pathianin mihringte chu zalên taka duh thlan theihna neiin a siam. Pathianin mihring hmasa ber Adama leh Evi hnênah an laka a beiseite a hrilh a; mahse, a thu âwih tûrin a nawr lui lo. Anni chuan a chhia leh a ṭha chungchângah mahnia thu tlûkna siam an thlang a, chu an thu tlûkna ṭha lo siam—mihring chanchin pumpuia mite thu tlûkna siam ang—chuan mihringte chungah sawhkhâwk râpthlâk tak a nei a ni. (Genesis 2:17; 3:6; Rom 5:12) Statement of Principles of Conservative Judaism lehkhabu chuan: “Khawvêla hrehawm tawrhna tam tak hi zalên taka duh thlan theihna kan neih hman sualna vânga lo awm a ni,” tiin a sawi a. Zalên taka kan duh thlan theihna chu min lâksak aiin, Pathianin mihringte chu mahnia ro inrêl tûrin hun a pe zâwk a ni.
Pathianin mihring insuatna avânga chhiatna zawng zawng chu a sût lêt theiin a sût lêt ang. Pathianin Mihring Insuatna tuartute pawh tiamin, thi tawh mi maktaduai tam takte chu kaihthawh a tiam a. Mihring Insuatnaa damkhaw chhuakte tihrehawmtu an hriatrengnaa châm thil hlauhawm takte chu a nuaibosak bawk ang. (Isaia 65:17; Tirhkohte 24:15) Pathianin mihringte a hmangaih avângin hêng thutiamte hi a hlawhtling ang tih kan ring thei a ni.—Johana 3:16.
Mihring Insuatna tuartute leh chumia damkhaw chhuakte chuan Pathianin thil ṭha lote a thlen rem a tih chhan leh a thiltumin chumi sawh khâwkte a sût lêt ang tih hriatna aṭangin rinna an vawng reng theiin, nun awmze nei tak an nei thei bawk.