Engvângin Nge Jehova Thuhretute’n Thisen Inthun An Pawm Loh?

Ngaih dân dik lo tlânglâwnte

Hriat sual: Jehova Thuhretute chuan doctor-te’n an ṭanpui theih an rin loh avângin damdawi lama inenkawlna an zawng lo.

Thu dik: Keimah ni leh kan chhûngte tân damdawi lama inenkawl dân ṭha ber kan zawng a. Hrisêlna lamah harsatna kan neih chuan damdawi lama thiamna nei leh thisen tel lova mi zai thei doctor-te kan pan ṭhîn a ni. Damdawi lama inenkawlnain hma a sâwn chho zêl chu kan lâwm hle a. A nihna takah chuan, Thuhretu dam lote ṭanpui nâna thisen tel lova inenkawlnate chu tûnah chuan mi dangte enkawl nân pawh an hmang tawh a. Ram tam takah chuan, dam lo tupawhin thisen inthun loh a thlang thei a, chutiang chuan thisen thun avânga hlauhawm awm thei natna inkaichhâwnna te, taksa râl do khâwl chak lohna te, leh thisen inmil lo thun palh ang chîte chu a pumpelh thei a ni.

Hriat sual: Jehova Thuhretute chuan mi chu rinnain a natna a tidam ang tih an ring.

Thu dik: Rinnaa tihdamna ang chî hi kan ti ve ngai lo.

Hriat sual: Thisen thun lova inenkawl hi sênso a tam hle.

Thu dik: Thisen thun lova damdawi lama inenkawlna hi a man a to lo.a

Hriat sual: Thisen thun an duh loh avângin naupangte pawh tiamin, kum tin Thuhretu tam tak an thi.

Thu dik: He thu hi finfiahna awm miah lo a ni a. Mi zai thiamte chuan lung zai te, ruh lam zai te, leh taksa pêng thlâk ang chî inzai khirh takte chu thisen thun lovin an ti fo va.b Naupangte pawh tiamin, dam lo thisen inthun duh lote chu a inthunte ang bawkin an dam ṭha leh a. A inthunte aiin an dam ṭha chak zâwk mah a ni.c Eng pawh ni se, dam lo chu thisen a inthun loh avângin a thi ngei dâwn tih emaw, thisen a inthun avângin a dam ngei dâwn tih emaw tumahin an sawi thei lo.

Engvângin nge Jehova Thuhretute’n thisen inthun an pawm loh?

Hei hi damdawi lam vâng ni lovin, sakhaw thurin vâng zâwk a ni a. Thuthlung Hlui leh Thuthlung Thar-te chuan thisen laka inthiar fihlîm tûrin chiang takin thu min pe a ni. (Genesis 9:4; Leviticus 17:10; Deuteronomy 12:23; Tirhkohte 15:28, 29) Chu bâkah, Pathianin thisen chu nunna aiawhtu angin a thlîr a. (Leviticus 17:14) Chuvângin, Pathian thu kan awih vâng chauh ni lovin, nunna Petu a nih anga amah kan zah avângin thisen inthun chu kan pumpelh a ni.

Thlîr dânte a inthlâk

Tûn hma chuan thisen inthun lova inenkawlna (thisen tel lo damdawi tia koh bawk) chu kal sualna emaw, mahni intihhlumna ang hial emawa thlîr a ni ṭhîn a; mahse, he thlîr dân hi tûn hnai kumahte khân a inthlâk tawh a ni. Entîr nân, kum 2004-a damdawi lam zirtîrna chanchin bua thuziak pakhat chuan “Jehova Thuhretu dam lote enkawlna atâna an chher chhuah thiamnate chu hun lo awm tûrahte chuan hman ber a la ni chho vang,” tiin a târ lang a.d Kum 2010-a tihchhuah Heart, Lung and Circulation tih chanchin bu-a thuziak chuan “‘thisen tel lova inzai hi’ Jehova Thuhretute tân chauh ni lovin, inzaina apiangah hman tûr a ni,” tiin a sawi ve bawk.

Khawvêl puma doctor a sâng têlte chuan thisen chhuak tlêm tûra inzai dân hmangin thisen thun lova inzaina khirh takte an kalpui mêk a. Thisen thun lova chutianga inenkawlnate chu ram retheiahte pawh an hmang mêk a, Jehova Thuhretu ni lo dam lo tam takte pawhin chutianga inenkawl chu an dîl a ni.