Jehova Thuhretute’n Chhiat Tâwkte Hnênah Chhawmdâwlna An Pe Em?

Pe e, Jehova Thuhretute chuan chhiatna a thlen hian ṭanpuina an pe ṭhîn a. Galatia 6:10-a: “Mi zawng zawng chungah thil ṭha i ti ang u, rinna chhûngte zînga mi chungah i ti deuh ber ang u,” tih Bible kaihhruaina nêna inmilin Thuhretute leh Thuhretu ni lote hnênah chhawmdâwlna kan pe a ni. Chutiang huna chhiat tâwkte mamawh tak rilru lam leh thlarau lama ṭanpuina pêk pawh kan tum bawk.—2 Korinth 1:3, 4.

Inawpna pâwl

Chhiatna a thlen hnuah, chhiatna thlenna hmuna kohhran upate chuan an kohhrana mite him leh him loh hre tûr leh an mamawh ṭanpuina an pêk theih nân anni chu an be pawh ṭhîn a. Upate chuan an thu dawnte leh chhawmdâwlna an pêk tawhte chu tualchhûnga Jehova Thuhretute branch office-ah an hriattîr a ni.

Chhawmdâwlna chu chhiatna thlenna hmuna kohhrante pêk theih phâk bâk a nih chuan, Jehova Thuhretute Governing Body chuan an mamawhte pe tûrin ruahmanna a siam a. Hei hi ṭâm tlâk laia Kristian hmasate inngaihsak tawnna lantîr dân nên a inang a ni. (1 Korinth 16:1-4) Tualchhûng branch office chuan chhawmdâwlna ruahman tûr leh kaihruai tûrin Chhiat Tâwkte Chhawmdâwlna Ngaihtuahtu Pâwl, Disaster Relief Committees a din a. Hmun danga awm Thuhretute chuan an hun leh thil neihte pein tlâwmngaiin an ṭanpui a ni.—Thufingte 17:17.

Sum leh pai

Jehova Thuhretute branch office-tea thawn thawhlâwm tling khâwmte hman dân kawng khat chu chhiat tâwkte chhawmdâwl nân a ni a. (Tirhkohte 11:27-30; 2 Korinth 8:13-15) Chhiat tâwkte chhawmdâwlna hi hlawh nei lova tlâwmngaia inpete hmanga thawh a nih avângin thawhlâwmte chu thil danga pawt pêng lovin, chhawmdâwlna atân liau liau hman a ni a. Thawhlâwm zawng zawngte hi fîmkhur taka hman a ni.—2 Korinth 8:20.