Hremhmun A Awm Tak Tak Em? Bible Sawi Angin Hremhmun Hian Eng Nge A Kawh?
Bible chhânna
Sâp ṭawng Bible lehlin hmasa hrang hrang, hêng King James Version ang chîte hian châng ṭhenkhatah “hremhmun” tih ṭawngkam hi an hmang a. (Sâm 16:10; Tirhkohte 2:27a) He thuziaka i hmuh sakhaw zirtîrna ṭanchhana siam milemte hian mi tam takin hremhmun chu mi suaksualte kalna hmun chatuana meialh angin an ngai tih a târ lang a ni. Mahse, chu chu Bible zirtîrna a ni em?
He thuziakah hian hêngte hi a tel
Hremhmun chu chatuana innghaisakna hmun a ni em?
Ni lo. Bible lehlin hmasa ṭhenkhata “hremhmun” tia lehlin a tîra ziak thu malin a sawi tum tlângpui chu (Hebrai, “Seol”; Grik, “Hades”) “Thlân” a ni a, chu chu mitthite phûmna hmun a ni. Bible chuan “Thlâna” awmte chu an nung tawh lo tih a târ lang.
Mitthite chuan hriatna an nei lo va, na an hre thei tawh lo bawk. “Hremhmunah chuan thiltih tûr emaw, remruat tûr emaw, hriatna emaw, finna emaw a awm lo.” (Thuhriltu 9:10, Douay-Rheims Version) Hremhmun chu na tuar au thâwmin a khat lo va. Chu aiin, Bible chuan: “Mi suaksualte chu mualphovin awm sela, thlânah [hremhmunah, Douay-Rheims] ngawi rengin awm rawh se,” tiin a sawi zâwk a ni.—Sâm 31:17; King James Version (30:18, Douay-Rheims); Sâm 115:17.
Pathianin sual man chu hremhmun meidîla innghaisak ni lovin, thihna a ni tih a sawi. Pathianin mihring hmasa ber Adama hnênah Pathian dân bawhchhiat avânga hremna chu thihna a ni tih a hrilh a. (Genesis 2:17) Meidîla chatuana innghaisak chungchâng engmah a sawi lo. Adama’n thil sual a tih hnuah Pathianin a hremna chu: “Vaivut i ni a, vaivutah i kîr leh tûr a ni,” tiin a hrilh a ni. (Genesis 3:19) Ani chu a awm chhunzawm tawh lo vang. Adama chu hremhmun meidîlah kaltîr tak tak se chuan, chumi chungchâng chu Pathianin a sawi lang ngei ang. Ani chuan a dân zâwm lote hremna chu a thlâk lo va. Adama’n thil sual a tih hnu daihah Bible ziaktu pakhat chu: “Sual man chu thihna a ni,” tia ziak tûra thlarauva thâwk khum a ni. (Rom 6:23) ‘Tu pawh thi tawh chu sual laka a chhuah tawh’ avângin hremna dang pêk a ngai tawh lo.—Rom 6:7.
Chatuana innghaisakna ngaih dân chu Pathian huat zâwng tak a ni. (Jeremia 32:35) Chutiang ngaih dân chuan “Pathian chu hmangaihna a ni” tih zirtîrna a kalh a. (1 Johana 4:8) Pathian chuan chatuana hrem kan hlauh vâng ni lovin, hmangaihna avânga amah be tûrin min duh zâwk a ni.—Matthaia 22:36-38.
Hremhmunah mi ṭha an kal. “Hremhmun” tih ṭawngkam hmang Bible lehlinte chuan, Jakoba leh Joba te ang chî mi rinawmte’n hremhmuna kal an beisei tih a târ lang a. (Genesis 37:35; Joba 14:13) Isua Krista hial pawh a thiha a thawh leh hmain hremhmunah a awm tia sawi a ni. (Tirhkohte 2:31, 32, Mizo King James Bible) Chûng Bible lehlinte’n “hremhmun” tia an hman chu Thlân sawina mai a ni tih a chiang hle.b
Mi hausa leh Lazara chungchânga Isua tehkhin thu awmzia chu eng nge ni?
He tehkhin thu hi Isua sawi a ni a, chu chu Luka 16:19-31-ah chhinchhiah a ni. Tehkhin thu chu nungchang, a nih loh leh thlarau lama thutak târ langtu a ni a. Tehkhin thu-a mi hausa leh Lazara chu an awm tak tak lo. (Matthaia 13:34) He tehkhin thu chungchâng hriat belh nân, “Mi Hausa leh Lazara Chu Tute Nge Ni?” tih thuziak chu en rawh.
Hremhmun hian Pathian laka inmihranna a kâwk em?
Kâwk lo. Mitthite’n Pathian laka inmihrana inhriatna an nei thei tih thurin hi Bible nên a inkalh a, Bible chuan mitthite’n engmah an hre lo tiin chiang takin a zirtîr a ni.—Sâm 146:3, 4; Thuhriltu 9:5.
Hremhmun aṭanga chhuak an awm tawh em?
Awm tawh e. Bible chuan Thlâna (Bible ṭhenkhata “hremhmun” tia lehlin) kal tawh mi pakuate chanchin chipchiar takin a târ lang a, anni chu nunna nei leh tûra kaihthawh an ni.c Hremhmuna an awm laiin thilthlengte an hria a nih chuan, chumi chungchâng chu an tawnhriat aṭangin an sawi thei ngei ang. Mahse, chûng mi pakuate chuan hrehawm an tawrh thu emaw, thiltawn an neih thu emaw engmah an sawi lo chu a ngaihvenawm hle. Eng nge a chhan? Bible zirtîrna ang chiahin, anni chu tui taka “muhîl” ang maiin engmah hre lova an awm vâng a ni.—Johana 11:11-14; 1 Korinth 15:3-6.
a Tûn laia Sâp Ṭawng Bible lehlin thar berte chuan Tirhkohte 2:27-ah “hremhmun” tih ṭawngkam hi an hmang tawh lo va. Chu aiin, Bible ṭhenkhat chuan “thlân,” (New Century Version); “mitthi khua,” (New International Version); “mitthi” (The Passion Translation) tih ang chi ṭawngkam a hmang zâwk a ni. Lehlin dangte chuan Grik thu mal “Hades” tiin a lam rîk dân milin an dah thung.—Holman Christian Standard Bible, NET Bible, New American Standard Bible, English Standard Version.
b “A Tîra Ziak Bible Thute” tih bâwm en rawh.
c Lalte pakhatna 17:17-24; 2 Lalte 4:32-37; 13:20, 21; Matthaia 28:5, 6; Luka 7:11-17; 8:40-56; Johana 11:38-44; Tirhkohte 9:36-42; Tirhkohte 20:7-12 en rawh.