Mi A Thih Hian A Thlarau A Dam Zêl Em?

Bible chhânna

Bible-a “thlarau” tih thu mal hi Hebrai thu mal neʹphesh tih leh Grik thu mal psy·khe tih aṭanga lehlin a ni a. Hebrai thu mala a ngial a ngana a awmzia chu “nunna nei thaw,” tih a ni a, Grik thu mala a awmzia chu “thil nung”a tihna a ni. Chuvângin, thlarau tih chu taksa chhûnga awm thih hnua nung chhunzawm zêl thil engemaw ni lovin, nunna nei taksa pum sawina zâwk a ni. Bible-in mihring thlarau chu a taksa pum sawina a ni tih a târ lan dân lo ngaihtuah ta ila:

• Pathian Jehova’n mihring hmasa ber Adama a siam khân, Bible chuan “mihring chu thlarau nung a lo ni ta a,” tiin a sawi. (Genesis 2:7, King James Version) Adama taksaah thlarau dah luh a ni lo—ani chu mi nung a lo ni ta zâwk a ni.

• Bible chuan thlarau chu hnathawk thei, ei tûr mamawh, ei thei, dân zâwm thei, leh mitthi ruang khawih thei angin a sawi a. (Leviticus 5:2; 7:20; 23:30; Deuteronomy 12:20; Rom 13:1) Chûng thiltihahte chuan a taksa pum a tel a ni.

Thlarau chu thi thei lo a ni em?

Ni lo, thlarau chu a thi thei a ni. Bible châng tam takin thlarau chu thi thei angin a sawi a. Entîrna ṭhenkhat lo en ta ila:

• “Thil sual titu thlarau chu a thi ngei tûr a ni.”—Ezekiela 18:4, 20, King James Version.

• Hmânlai Israelte huna thil sual titu tâna hremna na ber chu “a thlarau tihboral a ni.” (Exodus 12:15, 19; Leviticus 7:20, 21, 27; 19:8, King James Version) Chumi chu “tihhlum . . . tûr a ni.”—Exodus 31:14, King James Version.

• Bible châng ṭhenkhatah chuan mi a thih hian a ruang sawi nân “thlarau thi” tih ṭawngkam a hmang a. (Leviticus 21:11; Numbers 6:6) Bible lehlin tam takin “mitthi ruang,” a nih loh leh “mitthi,” tiin chûng chângahte chuan hmang mah se, a tîra ziak Hebraiah chuan neʹphesh, a nih loh leh “thlarau,” tih thu mal a hmang a ni.

“Thlarau” tih chu “nunna” sawina a ni thei

Bible chuan “thlarau,” tih awmze dang atân “nunna” tih a hmang a. Entîr nân, Joba 33:22, Mizo Common Bible chuan Hebrai thu mal “thlarau” (neʹphesh) tih chu a tlukpui atân “nunna” tih a hmang a ni. Chutiang bawkin, Bible chuan mi pakhat thlarau, a nih loh leh a nunna chu hlauhthâwnawma awm thei leh chân theih angin a târ lang a ni.—Exodus 4:19; Rorêltute 9:17; Philippi 2:30.

“Thlarau” tih thu mal hmanna hian thlarau chu “kal chhuak,” a nih loh leh “chhuahsan” tia sawina Bible chângte hre thiam tûrin min ṭanpui a. (Genesis 35:18; King James Version) He entîrnei ṭawngkam hian mi chu a nunna a tâwp tih a târ lang a ni. Bible lehlin ṭhenkhatah chuan Genesis 35:18-a ṭawngkam hi “a thaw a tâwp ta a,” tiin an let a ni.—Good News Translation; New Jerusalem Bible.

Thlarau thi thei lo thurin lo chhuahna

Kristian kohhran hrang hranga thlarau thi thei lo thurin inzirtîrna hi Bible aṭang ni lovin, hmânlai Grik mi fingte zirtîrna aṭanga lo chhuak a ni a. Encyclopædia Britannica chuan: “Bible-in thlarau chungchâng a sawi hian chu chu thaw nên inkûngkaihna a neiin, thlarau khawih theih leh thlarau khawih theih loh tiin a thliar hrang lo. Taksa leh thlarau (body-soul) hian inan lohna nasa tak a nei tih Kristiante ngaih dân hi hmânlai Grik mite hnên aṭanga lo chhuak a ni,” tiin a sawi.

Pathianin a zirtîrnate chu thlarau thi thei lo ang chî mihring finna zirtîrna nêna chawhpawlh chu a pawmzam mai lo. Chutih a hnêkin, Bible chuan: “Fîmkhur rawh u, chutilo chuan tupawhin . . . mihring thu rochhiah leh . . . an thu fing leh bumna mai maiin râl lâkin an la dah ang che u,” tiin min vaukhân zâwk a ni.—Kolossa 2:8.