Engvângin Nge Jehova Thuhretute Lalpa Zanriah Hman Dân Chu Kohhran Dangte Hman Dân Nên A Inan Loh?

“Lalpa zanriah,” Zanriah Hnuhnung tih leh Isua thih Hriatrengna tia hriat bawk hman dân chungchângah Bible sawi dân chu zawm kan tum tlat a. (1 Korinth 11:20) Chumi nêna inkalh takin, hemi chungchanga kohhran tam takte thurin leh an hman dân chu Bible nên a inmil lo a ni.

A tum

Lalpa Zanriahin a tum ber chu Isua hriatrengna leh kan tâna a nun a pêk avânga kan lâwmzia lantîr a ni a. (Matthaia 20:28; 1 Korinth 11:24) Hei hi sacrament a ni lo va, sakhuate tih ṭhin lâwmthu sawina emaw, sual ngaihdamna emaw târ lanna an neih ṭhin ang mai pawh a ni hek lo.a Bible chuan kan sual chu sakhaw thiltih pakhat vâng ni lovin, Isua rinna vâng chauhva ngaihdam theih a ni tih a zirtîr a ni.—Rom 3:25; 1 Johana 2:1, 2.

Engtianga zinga hman tûr nge ni?

Isua’n a zirtîrte chu Lalpa Zanriah hmang tûrin thu a pe a; mahse, eng anga zinga hman tûr nge tih erawh a sawi fak lo. (Luka 22:19) Mi ṭhenkhat chuan thla tin hman tûrah an ngai a, mi dangte chuan kâr tin, nî tin, ni khatah vawi tam tak, a nih loh leh a zing thei ang bera hman tûrah an ngai thung.b Mahse, kan ngaihtuah ngai thil ṭhenkhat a awm.

Isua’n Lalpa Zanriah chu Judate Kalhlên Kût nîah a hmanpui a, chumi nî tlai lamah a thi a ni. (Matthaia 26:1, 2) Hei hi thil thleng palh a ni lo. Bible-in Isua inthawina chu Kalhlên Kût berâmno nên a tehkhin a. (1 Korinth 5:7, 8) Chu Kalhlên Kût chu kum tin vawi khat hman ṭhin a ni. (Exodus 12:1-6; Leviticus 23:5) Chutiang bawkin, Isua thih Hriatrengna pawh Kristian hmasate’nc kum tin vawi khat an hmang ṭhîn a, Jehova Thuhretute pawhin Bible ṭanchhan chu tih dân chu an zui a ni.

A hun leh a nî

Isua’n Hriatrengna a hmanpui dân chuan a zin zâwng chauh ni lovin, a hun leh a nî hre tûrin min ṭanpui a. Ani chuan Bible calendar-a C.E. 33 Nisan 14 ni tlâk hnuah, a hman dân tûr a hmêlhriattîr a. (Matthaia 26:18-20, 26) Chuvângin, Kristian hmasate hman ṭhin dân zuiin kum tin hemi nîah hian Hriatrengna chu kan hmang zawm zêl a ni.d

C.E. 33 kuma Nisan 14 chu Zirtâwpnî a ni a, chumi cham chu kum tin ni hrang hrangah a tla thei a ni. Kum tin Nisan 14 chu engtik nîah nge a tlâk tih hriat nân, tûn laia Juda calendar hmang lovin, Isua hun laia chhût chhuah dân chu kan hmang a ni.e

Chhang leh uain

Isua’n he kût thar hman nân hian Kalhlên kûtnaa an hman bâng chhang dawidim telh loh leh uain sen chu a hmang a. (Matthaia 26:26-28) Chu tih dân chu zuiin, chhang, dawidim leh thil dang engmah pawlh loh leh, uain sen a tihthlumna leh bâwlhlo dang engmah pawlh loh kan hmang a ni.

Pâwl ṭhenkhat chuan chhang dawidim telh an hmang a; mahse, Bible-ah dawidim chu sual leh thil ṭha lo entîrna atâna hman a ni ṭhîn. (Luka 12:1; 1 Korinth 5:6-8; Galatia 5:7-9) Chuvângin, dawidim leh thil dang pawlh loh chhang chauhvin, Krista sual nei lo taksa chu inhmeh takin a entîr thei. (1 Petera 2:22) Bible zirtîrna nêna inmil lo tih dân dang leh chu uain atâna dawidim telh grêp tui hman hi a ni a. Kohhran ṭhenkhatin Bible-in a khap loh, zu in an khap avângin chutiang chuan an ti a ni.—1 Timothea 5:23.

Entîrnate chu taksa leh thisen tak tak a ni lo

Hriatrengnaa hman chhang dawidim telh loh leh uain sente chu Krista taksa leh thisen entîrna a ni a. Mi thenkhatte ngaih dân angin chûng thilte chu mak tak maiin a taksa leh a thisen tak takah a chang lo. Chumi kan hriat thiam theih nân Bible ṭanchhan hrilhfiahna hi lo ngaihtuah ta ila.

• Isua’n a zirtîrte chu a thisen tak tak in tûra thu a pe a nih chuan, thisen hman chungchânga Pathian dân bawhchhe tûrin a hrilh tihna a ni ang. (Genesis 9:4; Tirhkohte 15:28, 29) Mahse, hei hi thil theih a ni lo, Isua’n thisen thianghlimna chungchânga Pathian dân bawhchhe tûrin mi dangte a zirtîr ngai dâwn si lo va.—Johana 8:28, 29.

• Tirhkohte’n Isua thisen in tak tak ta se, a inthawina chu la thleng tûr anga târ langin, a thisen chu “chhuak tûr” angin a sawi lo vang.—Matthaia 26:28.

• Isua inthawina chu “chatuan atân vawi khat chauh” hlan a ni. (Hebrai 9:25, 26, New World Translation) Mahse, Lalpa Zanriah neih chhûnga chhang leh uainte chu a taksa leh thisenah a chang tak tak a nih chuan a eiintute chuan inthawina chu an hlân nawn leh tihna a ni ang.

• Isua chuan: “Mi hlan nân” ti lovin, “mi hriat reng nân hei hi ti ṭhîn rawh u,” tiin a sawi.—1 Korinth 11:24.

Chhang leh uain chu Isua taksa leh thisen tak takah a chang nia ringtute chuan an thurin chu Bible châng ṭhenkhata ṭawngkam an ṭanchhan a. Entîr nân, Bible lehlin tam takah, Isua’n uain chungchâng a sawina chu: “Hei hi ka thisen,” tiin a inziak a. (Matthaia 26:28) Mahse, Isua thusawite chu: “Hei hi ka thisen entîrna,” “Hei hi ka thisen aiawh” a nih loh leh “Hei hi ka thisen ang,” tia lehlin theih a ni bawk.f A tih fo ṭhin angin Isua chuan entîrnei ṭawngkam hmangin a sawi a ni.—Matthaia 13:34, 35.

Tute’n nge eia in?

Jehova Thuhretute’n Lalpa Zanriah an hman hian mi tlêm tê chauhvin chhang leh uain chu an eiin an in a. Engvângin nge?

Isua thisen chhuak chuan “thuthlung thar” siamin, Pathian Jehova leh hmânlai Israelte inkâra thuthlung chu a thlâk a. (Hebrai 8:10-13) Chu thuthlung thara telte chuan Hriatrengna entîrnate chu an eiin an in a ni. Chutah chuan Kristian zawng zawngte ni lovin, Pathianin kawng danglam bîk taka a “kohvate” chauh an tel. (Hebrai 9:15; Luka 22:20) Chûng mite chuan Krista rualin vânah ro an rêl ang. Bible-in chu chanvo hlu tak chu mi 1,44,000-te chauhvin an dawng ang tih a sawi bawk.—Luka 22:28-30; Thu Puan 5:9, 10; 14:1, 3.

Krista rorêlpui tûra koh “pawl tlêmte” ang lo takin, keini a tam zâwkte chu leia chatuana nun beiseina nei “mipui tam tak” zîngah kan tel a. (Luka 12:32; Thu Puan 7:9, 10) Keini lei lam beiseina neite hian Hriatrengna entîrnate chu eiin in lo mah ila, kan tâna Isua inthawina avânga kan lâwmzia lantîr nân kan hmang a ni.—1 Johana 2:2.