Bible-in Nau Tihtlâk Chungchângah Eng Nge A Sawi?

Bible chhânna

Bible-in “nau tihtlâk’ tih thu mal hi hmang lo mah se, Bible châng tam takin nausên la piang lote pawh tiamin, Pathianin mihring nunna a thlîr dân a târ lang a ni.

Nunna hi Pathian thilpêk a ni a. (Genesis 9:6; Sâm 36:9) Pathian chuan nausên la piang lo nunna pawh tiamin nunna zawng zawng hi a ngaihlu hle. Chuvângin, miin tum rêng vânga nau la piang lo nunna a lâk hian tual that ang a ni.

Israelte hnêna Pathian Dân pêk chuan: “Mi lo insual ta sela, hmeichhe nau pai vaw palh ang sela, a nau pai chu lo tla sela, chhiatna dang erawh chu awm lo sela: chu hmeichhe pasal chuan a ngen zât chu chawitîr ngei tûr a ni; tichuan rorêltute ruat ang zât chu a pe tûr a ni. Amaherawhchu chhiatna dang lo awm sela chuan nun aia nun,” tiin a sawi a ni.—Exodus 21:22, 23.a

• Eng hunah nge mihring nunna a inṭan?

• Nau ti tla tawh tuemaw chu Pathianin a ngaidam ang em?

• Nu emaw, nausên emaw nunna dinhmun hlauhawma a awm avânga nau tihtlâk chu sual a ni em?

Eng hunah nge mihring nunna a inṭan?

Pathian chuan nau chu pai a nih ṭan tirh tê aṭangin mihring nunna angin a thlîr a. A Thu Bible-ah, Pathianin nau la piang lo chu mi pakhat angin a târ lang fo a ni. Nau la piang lo nunna leh piang tawhte nunna a thliar hrang lo a ni tih târ langtu entîrna ṭhenkhat lo ngaihtuah ta ila.

• Pathian thlarau thâwk khumin, Lal Davida chuan Pathian hnênah: “Ka rîruang la famkim lo chu i mitin a hmu a,” tiin a sawi a. (Sâm 139:16) Pathianin Davida chu a pian hma aṭangin mi pakhat angin a thlîr a ni.

• Chu bâkah, Jeremia chuan a pian hma aṭangin zâwlnei niin chanvo pawimawh tak a dawng dâwn tih Pathianin a hria a. Chuvângin, a hnênah: “Pum chhûnga ka siam hmâ chein ka hria che a, chhûl ata i chhuah hmâ pawhin ka serh hrang che a, hnamte hnêna zâwlneiah ka ruat tawh a che,” tiin a hrilh a ni.—Jeremia 1:5.

• Bible ziaktu doctor Luka chuan nau la piang lo leh nausên piang hlim sawi nân Grik thu mal inang a hmang a ni.—Luka 1:41; 2:12, 16.

Nau ti tla tawh tuemaw chu Pathianin a ngaidam ang em?

Nau ti tla tawhte chuan Pathian ngaihdamna an dawng thei a. Pathianin nunna a thlîr dân an pawm tawh a nih chuan, inthiam lohna an neih reng a ngai lo. “LALPA chu lainatnaa khat, mi khawngaih thei tak . . . a ni. . . . Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a.”b (Sâm 103:8-12) Jehova chuan nau ti tlatute pawh tiamin, an tûn hma sualte avânga tih tak zeta inchhîrte chu a ngaidam ang.—Sâm 86:5.

Nu emaw, nausên emaw nunna dinhmun hlauhawma a awm avânga nau tihtlâk chu sual a ni em?

Nau la piang lo nunna chungchânga Bible sawi dân ngaihtuahin mi chuan nu emaw, nausên emaw hrisêlna dinhmun hlauhawma a awm theih avâng maiin nau a ti tla lo vang.

Thil thleng zen zen lo, nau hrin laia nu nunna nge, nausên nunna chhan zâwk tûr tih ang chi rîkrum thilah duhthlanna siam ngai ta se, engtin nge ni ang? Chutiang dinhmunah chuan a tuartute’n tu nunna nge chhan tûr tihah mi mal thu tlûkna an siam a ngai ang.