Jehova Thuhretute’n Anmahniin Bible Hran An Nei Em?

Jehova Thuhretute chuan Bible an zirnaah Bible lehlin hrang hrang an hmang ṭhîn a. Mahse, New World Translation of the Holy Scriptures hian Pathian hming a hman a, a dik leh a fiah avângin kan ngaihlu lehzual a ni.

• Pathian hming hmanna. Bible tichhuaktu ṭhenkhat chuan a phû angin a Ziaktu an chawimawi lo va. Entîr nân, Bible lehlin pakhat chuan a tihchhuahna kawnga ṭanpuitu mi 70 chuang laite hming a târ lang a ni. Mahse, chu Bible vêk chuan a Ziaktu Pathian Jehova hming a paih vek thung!

  Chumi nêna inkalh takin, New World Translation chuan a tîra a awmna hmunah Pathian hming a dah vek a, chutih rualin a tichhuaktute hming a târ lang ve lo.

• A dikna. Bible lehlin zawng zawngte hian a tîra Bible thuchah chu dik takin an letling vek lo va. Entîr nân, Bible lehlin pakhat chuan Matthaia 27:39, 40 chu heti hian a letling a ni: “Pathian Fapa i nih chuan kraws ata kha lo chhuk ta che,” tiin. Mahse, a tîra ziakah “thing ban” tih thu mal hmang mah se, ṭawng letlingtute chuan Isua chu Kraws-ah a thi anga an ngaih avângin “kraws” tih thu mal hi an hmang a ni thei. Chu chu Bible-in a pawm lo. New World Translation chuan: “Pathian Fapa i nih chuan thing ban ata kha lo chhuk ta che,” tiin dik takin a letling a ni.

• A fiahna. Ṭawng lehlin ṭha chu a dik mai bâkah, a fiahin hriatthiam a awl tûr a ni a. Entîrna pakhat lo ngaihtuah ta ila. Rom 12:11-ah Kristian tirhkoh Paula chuan, “thlarauva chhuan so” tih thu awmze nei ṭawngkam a hmang a. Tûn lai huna Sâpṭawng thu kalphungah hriatthiam a har hle a, New World Translation chuan he thu hi hriatthiam awlsam takin a sawi a ni. Chutah chuan Kristiante chu “thlarau kawngah chuan ṭhahnemngai,” tûrin a ti a ni.

Pathian hming a hmanna, a dikna, leh fiahna mai bâkah, New World Translation hian danglamna dang pawh a la nei a: Chu chu a thlâwna sem chhuah a ni hi a ni. Chuvâng chuan, mi maktaduai tam takin Bible leina tûr an nei lo chung pawhin, anmahni ṭawng ngeiin an chhiar theih phah a ni.