Bible chhiar i han tum a; mahse, a chunga mite anga ngaih dân i neih avângin chhiar leh lovin i awm em? Mi tam tak tân chuan, Bible chhiar hi huphurhawm tak niin a lang. Mahse, Bible chuan nun hlimawm leh lungawithlâk tak nei tûrin a ṭanpui thei che tih hre ta la, engtin nge ni ang? Ngaihvenawm taka chhiar dân a awm tih hre leh ta la, engtin nge ni ang? Bible-in a pêk theih che chu i en chhin duh ang em?

Bible an chhiar ṭan avânga malsâwmna hmutute thusawi tlêm azâwng hi han ngaihtuah lawk teh.

Kum 20 vêla upa Ezekiel-a’n: “Tûn hma chuan, thlen tumna hmun nei lêm lova motor khalh kualtu ang ka ni. Mahse, Bible chhiarna chuan nun awmze nei tak min pe a. Bible-ah hian nî tîna ka hman theih thurâwn ṭangkai tak takte a awm a ni,” tiin a sawi.

Kum 20 vêl tho Frieda-i chuan: “Thil ti thawt thawt mi ka ni a. Mahse, Bible ka chhiarna aṭangin, inthunun ka zir a. Chu chuan mite nên tlâng nêl taka awm tûrin min ṭanpui a, tûnah phei chuan ṭhian tam tak ka nei tawh a ni,” tiin a sawi.

Kum 50 vêla upa Eunice-i chuan Bible chungchângah, “Mi ṭha zâwk ni tûr leh ka nungchang ṭha lote thlâk tûrin min ṭanpui a ni,” tiin a sawi.

Hêng chhiartute leh mi maktaduai tam takte hian, Bible chhiarnain nun hlim awm tak a pe thei che tih an hmu chhuak a ni. (Isaia 48:17, 18) Bible chhiarna chuan thil dang tam tam bâkah, (1) thu tlûkna ṭha siam tûrin, (2) ṭhian ṭha siam tûrin, (3) manganna hmachhawn tûrin leh, (4) a pawimawh ber, Pathian chungchâng thutak zir tûrtein a ṭanpui thei che a ni. Bible-a thurâwnte chu Pathian hnên aṭanga lo kal a ni a, chûng thurâwnte i zawm chuan i kal sual ngai lo vang. Pathian chuan thurâwn ṭha lo a pe ngai si lo va.

Thil pawimawh tak chu Bible chhiar ṭanna hi a ni. Chhiar ṭan tûr leh chhiar nuam ti tûrin engin nge ṭanpui thei che?

Bible chhiar nuam ti tûr leh hlâwkpui tak zet tûr chuan engin nge ṭanpui ang che? Mi tam takin an hlâwkpui rawtna pangate chu lo chhinchhiah ang che.

Hmun fianrial insiam rawh. Hmun reh tak zawng la. Rilru lût taka i chhiar theih nân nangmah tibuai thei thilte chu ti tlêm rawh. Eng ṭha leh thlifîm chuan i Bible chhiar hlâwkpui tak zet tûrin a ṭanpui thei che a ni.

Rilru put hmang dik nei rawh. Bible hi kan Pa vâna mi min pêk a nih avângin, hmangaihna nei nu leh pa hnên aṭanga inzir duhna nei naupang rilru put hmang ang i neih chuan, i chhiar chu i hlâwkpui ngei ang. Bible chungchângah ngaih dân dik lo i nei emaw, ngaih dân i lo nei sa emaw a nih chuan, Pathianin a zirtîr theih nân che chûngte chu paih bo rawh.—Sâm 25:4.

I chhiar hmain ṭawngṭai rawh. Bible-ah Pathian ngaihtuahnate a chuan avângin hre thiam tûra A ṭanpuina kan mamawh hi a mak lo ve. Pathian chuan ‘a dîltute chu thlarau thianghlim pêk’ a tiam a. (Luka 11:13) Thlarau thinghlim chuan Pathian ngaihtuah dânte hre thiam tûrin a ṭanpui thei che a ni. Chu bâkah, a hun takah “Pathian thu ril pawh,” hre thiam tûrin a ṭanpui ang che.—1 Korinth 2:10.

Hriatthiam tumin chhiar rawh. Chhiar zawh tum ringawt suh. I chhiarte chu ngun takin ngaihtuah la. Heti hian inzâwt ang che: ‘He ka thu chhiarah hian eng miziate nge ka hmuh? Engtin nge kan nunpui theih ang?’ tiin.

Tum bîk neiin chhiar rawh. I Bible chhiarte hlâwkpui tûr chuan, i nun tihmasâwntu tûr thil eng emaw hmuh chhuah tum ang che. A hnuaia thiltumte hi i insiam thei a ni: ‘Pathian chanchin hriat belh ka duh.’ ‘Mi ṭha zâwk, pasal ṭha zâwk a nih loh leh nupui ṭha zâwk nih ka duh.’ Tichuan, chûng i thiltumte hlentîr theitu Bible-a thu engemaw ber chu chhiar ang che.a

Hêng rawtna pangate hian Bible chhiar ṭan tûrin a ṭanpui ang che. Mahse, engtin nge nuam ti taka i chhiar theih ang? A dawta thuziakah chuan rawtna ṭhenkhat i hmu ang.

Bible chhiar a ninawm nge, a phûrawm zâwk? I tân eng ang nge ni ve? I chhiar dânah a innghat thui hle ang. Nuam tak leh phûr taka i chhiar theih dân tûr i lo eng ang u.

Rin tlâk leh hriat thiam awl ṭawng lehlin thlang rawh. Hriat thiam har thu leh ṭawng un tak tak telna thute i chhiar chuan, chhiar nuam i ti lo ngei ang. Chuvângin, i thinlung khawih thei hriat thiam awl Bible chu zawng rawh. Mahse, fîmkhur tak leh dik taka lehlin Bible a ni tûr a ni.a

Tûn lai thiamna hmang rawh. Tûn laiah, Bible hi a bu mai ni lovin, digital-te pawhin a hmuh theih tawh a. Bible ṭhenkhat chu online-ah a chhiar theih a, computer, tablet leh cell phone-ahte pawh mahnia chhiar atân a download theih bawk. Version ṭhenkhatah chuan, Bible chângte chu Bible lehlin dangte nên khaikhin nghâl mai theih tûrin hmanraw ṭhenkhat a tel a ni. Chhiar aia ngaihthlâk i duh zâwk chuan, aw thunsa pawha neih theih a ni a. Mi tam tak chuan zin pah te, thawmhnaw sûkpah te, leh thil engemaw an thawhpahte pawhin ngaihthlâk an duh ṭhîn a ni. I tâna rem tûr a engemaw ber chu i tichhin ve dâwn lâwm ni?

Bible zirna hmanruate hmang rawh. Bible zirna hmanruate chuan i chhiarte hlâwkpui tûrin a ṭanpui thei che a. Chu hmanruaahte chuan Bible ram mâpte a awm a, Bible-a chuang hmunte chu khawiah nge a awm tih hre tûr leh mitthla thei tûrin a ṭanpui ang che. He magazine-a thuziakte, leh jw.org website-a kan thu leh hlate chuan Bible bu hrang hranga thute hre thiam tûrin a ṭanpui thei che a ni.

Tih dân chi hrang hrang hmang rawh. Bible bu pum chhiar chhuah i huphurh a nih chuan, engvângin nge i chhiar duh berna aṭanga i chhiar ṭan mai loh vang? Bible-a mi langsârte chungchâng hriat i duh chuan, i chhiar duh ber mi langsârte thu aṭangin i chhiar ṭan thei a ni. Tih theih dân tluangtlam tak chu he thuziaka “Bible-a Chuang Mite Chanchin Hriat Tum Rawh,” tih bâwmah hian a awm a. A nih loh leh, Bible thupui azirin emaw, thil theng azirin emaw i chhiar duh zâwk pawh a ni mai thei. Chûng tih dânte chu engvângin nge i hman chhin loh vang?

Bible hi lehkhabu pângngai mai a ni lo. Min Siamtu hnên aṭanga thurâwnte a chuang a. (2 Timothea 3:16) A thuchah chuan kan chungah nghawng ṭha tak a nei thei a ni. Dik takin, Bible chuan: “Pathian thu hi a nung a, thil a ti thei a,” tiin a sawi. (Hebrai 4:12) Kawng hnihin kan nun a tihmasâwn thei—kan nî tin nun atân kaihhruaina min pêk bâkah, Pathian leh a thiltumte hre tûrin min ṭanpui bawk a ni.—1 Timothea 4:8; Jakoba 4:8.

Tûna i nun a tihmasâwn. Bible chuan mi mal thilte ngei pawh a ṭanpui thei a. A hnuaia thute hian rawtna ṭha tak tak a pe a ni.

• Mi dangte nêna inlaichînna. —Ephesi 4:31, 32; 5:22, 25, 28, 33.

• Rilru leh taksa hrisêlna. —Sâm 37:8; Thufingte 17:22.

• Nungchang ṭhatna.—1 Korinth 6:9, 10.

• Sumdâwnna.—Thufingte 10:4; 28:19; Ephesi 4:28.a

Asia rama nupa tuak thar pakhat chuan Bible thurâwn hlutzia chu an hria a. Nupa tuak thar tam tak ang bawkin, mizia inthlâk danglam leh inbiak pawhna ṭha neih an harsat ve ve a ni. Mahse, Bible-a an thu chhiarte an nunpui ṭan chuan eng hlâwknate nge an seng? A pasal Vicent-a’n: “Bible-a ka thu chhiarte chuan kan nupa inkâra harsatnate chu ngilnei taka chingfel tûrin min ṭanpui a. Bible thute nunpuina chuan kan nupain nun hlimawm tak min pe a ni,” tiin a sawi. A nupui Annalou-i pawhin chu chu ṭâwmpuiin: “Bible-a entawn tûr ṭhate chuan mi ṭanpui a. Tûnah chuan, kan hlimin kan lungawi tak zet a, nunah thiltumte pawh kan nei hial tawh a ni,” tiin a sawi ve bawk.

Pathian i hre thei. An nupa chungchâng a sawi bâkah, Vicent-a chuan: “Bible ka chhiar hian, tûn hma zawng aiin Jehova ka hnaih lehzual niin ka hria,” a ti a. Vicent-a thil hmuh chhuah hian thil pawimawh tak a târ lang—Pathian hnaih tûrin Bible-in a ṭanpui thei che tih hi. Chutianga i tih ve chuan, Pathian thurâwn chu i hlâwkpui mai ni lovin, ani chu ṭhian angin i hre chiang dâwn a ni. Chu bâkah, chatuana i chen theih, “nunna tak tak” i neih hun tûr, nakin hun ṭha tak chungchâng kimchang takin a hrilh che tih i hria ang. (1 Timothea 6:19) Hei hi eng lehkhabu dang mahin a pêk theih loh thil a ni.

Bible chu i chhiar ṭan a, i chhiar zawm zêl a nih chuan, hêng hlâwknate hi i hmu ve ang—tûna i nun tih hmasâwnna leh Pathian hriatnate chu. Mahse, Bible i chhiar hian, zawhna tam tak i ngaihtuah chhuak ngei ang. Chutiang a nih chuan, kum 2,000 kalta a, Ethiopia mi tilrehpa entawn tûr ṭha chu hre reng ang che. Bible chungchângah zawh tûr tam tak a nei a. A thil chhiar a hriatthiam leh thiam loh zawh a nih khân: “Tuma mi hrilhfiah lovin engtin nge ka hriat theih ang?”b tiin a chhâng a. Tichuan, Isua zirtîr hmasa, Bible zirtîrtu ṭha Philipa hnên aṭangin ṭanpuina chu lâwm takin a pawm ta a ni. (Tirhkohte 8:30, 31, 34) Nang pawh chutiang rilru put hmang nei a, Bible hriat belh i duh chuan, www.pr2711.com, a nih loh leh he magazine-a târ lan address hnai berah lehkha thawn tûrin kan sâwm a che. I bul hnaia Jehova Thuhretute chu i be pawh thei a, a nih loh leh i awmna hmuna an Kingdom Hall chu i tlawh thei ang. Engvângin nge vawiin ni ngei a, Bible chhiarin nun ṭha zâwk nei tûra i inkaihhruaitîr loh vang?