Tute Nge Vân Ram Kai Ang?

Bible chhânna

Pathianin Kristian rinawm an thih hnua vân nunna changa kaihthawh tûrte chu bithliah chin neiin a thlang a. (1 Petera 1:3, 4) Anni chuan thlan an nih hnuah an vân lam rochan an dawn ngei theih nân rinna leh nungchang lama Kristian tehna chu an vawn chhunzawm zêl a ngai a ni.—Ephesi 5:5; Philippi 3:12-14.

Vân rama kaite chuan eng nge an tih ang?

Anni chuan Isua bulah lal leh puithiam niin kum 1,000 chhûng rawng an bâwl ang. (Thu Puan 5:9, 10; 20:6) “Vân tharte,” a nih loh leh vân sawrkâr an din ang a, chu chuan “lei thar,” a nih loh leh lei lam pâwl chungah ro a rêl ang. Vân lam rorêltute chuan a tîra Pathian thiltum angin mihringte chu felna dinhmun ṭha nei leh tûrin an ṭanpui ang.—Isaia 65:17; 2 Petera 3:13.

Vân ram kai tûrin mi engzât nge kaihthawh ni dâwn?

Bible chuan mi 1,44,000 vân nunna changa kaihthawh an ni ang tih a târ lang a. (Thu Puan 7:4) Thu Puan 14:1-3-a chhinchhiah inlârnaah tirhkoh Johana’n, “Berâm No Zion Tlânga ding leh, . . . mi 1,44,000 a hnênah” a hmu a ni. He inlârnaa “Berâm No” hian tho leh Isua a entîr a. (Johana 1:29; 1 Petera 1:19) “Zion Tlâng” chuan chawimawi tawh Isua dinhmun leh vâna a rorêlpui mi 1,44,000 te a entîr thung.—Sâm 2:6; Hebrai 12:22.

Lalrama Krista rorêlpui tûr ‘kohva te, leh thlana te’ chu “pâwl tlêmte” tia koh an ni a. (Thu Puan 17:14; Luka 12:32) Hei hian Isua berâm zawng zawngte nêna khaikhin chuan tlêm tê an ni dâwn tih a târ lang.—Johana 10:16.

Vân ram kai tûrte chungchânga ngaih dân dik lote

Ngaih dân dik lo: Thu Puan-a târ lan 1,44,000 hi a ngial a ngana lâk tûr ni lovin, entîr nei a ni.

Thu dik: Thu Puan bu-ah hian entîrnei number chuang mah se, number ṭhenkhat chu a ngial a ngana hman a ni a. Entîr nân, “Berâm No tirhkoh sâwm leh pahnihte hming” a sawi a. (Thu Puan 21:14) Hetiang chiah hian 1,44,000 number hi a ngial a ngana lâk tûr a ni tia thutâwp kan siam theih chhan lo ngaihtuah ta ila.

Thu Puan 7:4 chuan “an chhinchhiah zât chu [a nih loh leh, vân nunna chang tûra nemngheh] . . . mi 1,44,000,” tiin a sawi a. He châng hnuai maiah hian, a pâwl pahnihna chu heti hian a sawi a ni: “mipui tam tak tuma chhiar sên loh,” tiin. Chûng “mipui tam tak” chuan Pathian hnên aṭangin chhandamna an dawng bawk. (Thu Puan 7:9, 10) Heta 1,44,000 hi entîr nei a nih a, a zât sawi theih loh pâwl a kâwk a nih chuan pâwl pahnihte inkâr danglam taka târ lanna hian awmzia a nei lo vang.a

Chu bâkah, mi 1,44,000 te chu “rah hmasa ber ni tûrin mihring zîng ata tlan an ni,” tia sawi a ni a. (Thu Puan 14:4) “Rah hmasa ber” tih ṭawngkam hian aiawh atâna thlan chhuah mi tlêm tê a kâwk a. Chu chuan leilunga khua leh tui chhiarsên lohte chunga Krista ruala vâna rorêltu tûrte chu inâwm takin a târ lang a ni.—Thu Puan 5:9, 10.