Natna Benvawn Neite—Bible-in A Ṭanpui Thei Em?

Bible Chhânna

Thei e. Pathian chuan a chhiahhlawh dam lote chu a ngaihsak hle a. A chhiahhlawh rinawm chungchângah Bible chuan: “LALPAN a chauhna mut hmunah chuan a tichak ang,” tiin a sawi a ni. (Sâm 41:3) Natna benvawn nei i nih chuan a hnuaia kawng thumte hian hmachhawn tûrin a ṭanpui thei che:

1. Chhelna dîlin ṭawngṭai rawh. I lungkhamna tikiam a, tichak theitu che “Pathian thlamuanna, rilru rêng rênga hriat sên loh” i dawng thei.—Philippi 4:6, 7.

2. A êng zâwngin thlîr rawh. Bible chuan: “Thinlung hlim hi damdawi ṭha tak a ni a, thinlung lungchhia erawh chuan ruh a tiro ṭhîn,” tiin a sawi a. (Thufingte 17:22) Fiamthu hian lungngaihna a tihziaawm mai bâkah, hrisêlna a tihṭhat theih avângin fiamthu duh mi tak nih tum rawh.

3. Nakin hun beiseina nei rawh. Beiseina nghet tak chuan natna benvawn tuar chung pawhin hlimna nei tûrin a ṭanpui thei che a. (Rom 12:12) Bible chuan heti hian a sawi lâwk a ni, “Chumi khuaa awm chuan, ‘Ka dam lo ve,’ a ti lo vang,” tiin. (Isaia 33:24) Pathian chuan tûn lai science thiamna pawhin a tihdam theih loh natna benvawnte pawh a tidam ang. Entîr nân, Bible chuan tarte an vânglai nîa an kîr leha an hrisêl ṭhat leh tûr thu chu heti hian a sawi a ni: “A taksa hi tleirâwl thar leh sela, a vânglai chakna nîte chu lo kîr leh tawh se,” tiin.—Joba 33:25.

Chhinchhiah rawh: Jehova Thuhretute chuan an dam loh hunah Pathian ṭanpuina an pawm rualin, damdawi lama inenkawlna pawh an zawng bawk a ni. (Marka 2:17) Mahse, damdawi lama inenkawl dân tûr thlan bîk kan nei lo; hemi chungchângah hian mi tinin mahni tân thu tlûkna an siam tûr a ni.