“Pathian Hlim” Rawngbâwltute Chu An Hlim

1. Engvângin nge Jehova Thuhretute chu mi hlim thei tak an nih? (A thupui chunga milem en rawh.)

JEHOVA THUHRETUTE chu mi hlim thei tak an ni a. Inkhâwmah te, inkhâwmpuiah te, leh intihhlimna ang chi inhmuhkhâwmnaahte an tîtî hovin, an nui zaho ṭhîn a. Engvângin nge an hlim êm êm? A bul berah chuan “Pathian hlim” Jehova an hriat vâng a ni. A rawngbâwl a, amah entawn chu an tum tlat a. (1 Timothea 1:11; Sâm 16:11) Jehova chu hlimna hnâr a nih avângin kan hlim a duh a, hlimna tûr chhan tam tak min pe a ni.—Deuteronomy 12:7; Thuhriltu 3:12, 13.

2, 3. (a) Hlim tih awmzia chu eng nge ni? (b) Engvângin nge hlimna neih chu a harsat mai theih?

² I chungchâng eng nge ni ve? I hlim em? Hlim tih chu nuam taka awm, nuna lungawina neih, a nih loh leh lâwm taka awm a ni a. Bible-in Jehova malsâwmna dawngtute chuan hlimna dik tak an nei thei tih a sawi. A nih leh, tûn lai khawvêlah engvângin nge hlimna neih chu a harsat?

³ Kan hmangaih tuemaw boralna, a nih loh leh kohhran aṭanga hnawhchhuahna, nupa inṭhenna, leh hna channa ang chi dinhmun lungchhiatthlâk takte kan tawh hunah hlimna neih chu a harsa thei a ni. Inhnialna avânga ina remna a awm loh hunah te, Jehova rawng kan bâwl avânga kan hnathawhpuite leh school kalpuite’n min nuihsawh hunah te, tihduhdah leh lung ina tantîr kan nih hunahte hlimna neih chu a harsa thei bawk. A nih loh leh, kan hrisêlnain chhiat lam a pan a, natna benvawn kan nei chho va, rilru beidawnna kan neih vâng pawh a ni thei bawk. Mahse, mite thlamuantu leh hlimna thlentu, “hlim tak leh Thuneitu tak chauh,” Rorêltu Isua Krista chu hre reng ang che. (1 Timothea 6:15 New World Translation; Matthaia 11:28-30) Tlâng Chunga Thusawiah, Isua chuan Setana khawvêla kan awm avânga buaina tam tak kan nei chung pawhin, hlimna min neihtîr thei mize ṭhenkhat a sawi a ni.

JEHOVA TEL LO CHUAN KAN HLIM THEI LO

4, 5. Hlim tûr leh hlim reng tûrin eng nge kan tih theih?

⁴ Isua sawi hmasak ber chu a pawimawh bîk hle a. “Mahni thlarau lam mamawh hriate chu an hlim e, vân ram an ta a ni si a.” (Matthaia 5:3 NW) Kan thlarau lam mamawh kan hriat chuan, Pathian hriatna kan neih a ngai tih leh a ṭanpuina leh kaihhruaina kan mamawh tih kan hria ang. Engtin nge chu chu kan lantîr ang? Bible zir a, Pathian thu zâwm a, nuna amah biakna kan dah pawimawh berna hmangin. Chutianga tihna chuan hlim tûrin min ṭanpui ang a. Pathian thutiamte a lo thleng thuai dâwn tih kan rinna a tinghet zual sauh ang. Chu bâkah, Bible-a kan hmuh “beiseina lâwmawm” chuan min tichak ang.—Tita 2:12-13.

⁵ Kan nunah engpawh thleng se, hlim kan duh chuan, Jehova nêna kan inṭhianna kan tihngheh reng a ngai a. Tirhkoh Paula chuan: “Lalpaah chuan lâwm fo rawh u: ka ti leh pek ṭhîn ang, lâwm rawh u,” tiin a ziak a ni. (Philippi 4:4) Jehova ṭhian ni tûr chuan Pathian finna kan neih a ngai a. Pathian Thu chuan: “Finna hmu chhuaktu chu a nihlawh a, hriatthiamna hmu chhuaktu pawh. A vuan apiangte tân nunna thing a ni a, a kawl reng apiangte chu an hamṭha e,” tiin a sawi a ni.—Thufingte 3:13, 18.

6. Hlim reng tûr chuan eng thil dang nge kan tih ang?

⁶ Hlim reng tûr chuan Bible aṭanga kan thu zirte kan nunpui zawm zêl chu a pawimawh hle a. Isua’n chu mi a pawimawh dân chu heti hian a sawi a ni: “Chûng thil chu in hriat chuan ti ula in eng a thâwl ang,” tiin. (Johana 13:17; Jakoba 1:25 chhiar rawh.) Kan thlarau lam mamawh phuhru a, hlimna neih reng chu thil pawimawh tak a ni. A nih leh, kan hlimna labo thei thil tam tak a awm chung pawhin, engtin nge kan hlim theih? Tlâng Chunga Isua Thusawi dang i lo en leh ang u.

HLIMNA MIN NEIHTIR THEI MIZIATE

7. Engtin nge mi lungngaite chu an hlim theih?

⁷ “Lungngaite chu an eng a thâwl e; thlamuanin an la awm dâwn si a.” (Matthaia 5:4) ‘Lungngaia awmte chu engtin nge an hlim theih?’ tiin kan ngaihtuah mai thei. Isua chuan lungngai zawng zawng chungchâng a sawina a ni lo. ‘Hun khirh tak’ he “ni hnuhnûngahte” hian mi suaksualte chuan buaina nasa tak an tawh avângin an lungngai a. (2 Timothea 3:1) Anni chuan Jehova ni lova, mahni tân chauh an ngaihtuah avângin, amah nêna inṭhian ṭhatna an nei lova, an hlim thei lo. Isua chuan mahni thlarau lam mamawh hriate chungchâng a sawi a ni. Mi tam tak lungngaih chhan chu Pathian an hnâwl vâng emaw, Pathian duh zâwnga an nun loh vâng emaw a ni a. Sual fa an ni tih leh he khawvêlah thil râpthlâk tak takte a thleng tih an hriat avâng pawhin an lungngai a ni. Jehova chuan chûng mi lungngaite chu a hre reng a, a Thu hmangin a thlamuan a, nun hlimawm tak a pe a ni.—Ezekiela 5:11; 9:4 chhiar rawh.

8. Mi thuhnuairawlh nihna chuan engtin nge hlim tûra a ṭanpui theih che?

⁸ “Thuhnuairawlhte chu an eng a thâwl e, lei hi an la rochung dawn si a.” (Matthaia 5:5) Engtin nge mi thuhnuairawlh chu a hlim theih? Mi tam tak chu an chaltlaiin, an râwng hle a, chûng mizia chuan buaina nasa tak a thlentîr thei a ni. Mahse, thutak an zir chuan, an inthlâk danglam a, ‘mihring tharin’ an inthuam a ni. Tûnah chuan, “lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te,” an lantîr a ni. (Kolossa 3:9-12) Chuvângin, remna an nei a, mi dangte nêna inlaichînna ṭha neiin, an hlim bawk. Chu bâkah, Pathian Thu chuan “lei hi an la rochung dâwn,” tih a tiam a ni.—Sâm 37:8-10, 29.

9. (a) Isua’n mi thuhnuairawlhte’n “lei hi an la rochung dâwn si a” tia a sawi khân eng a sawina nge? (b) Engvângin nge “felnaa rilṭâma tuihâlte chu” an hlim theih?

⁹ Isua chuan mi thuhnuairawlhte’n “lei hi an la rochung dâwn” tia a sawi hian eng a sawi duhna nge? Hriak thihte chuan lal leh puithiamte nia lei chunga ro an rêl hunah lei hi an rochun ang. (Thu Puan 20:6) Vân beiseina nei lo mi maktaduai tam takte chuan leiah chatuana nungin, lei hi an rochun tawh ang. Anni chu an ṭha famkim ang a, remna chenin, an hlim ang. Isua’n: “Felnaa rilṭâma tuihâlte chu an eng a thâwl e,” tia a sawite pawh, chûng mite tho chu an ni. (Matthaia 5:6) Jehova’n suahsualna zawng zawng a tihborâl hunah felna an ngainatna chu phuhhrûksak an ni ang. (2 Petera 3:13) Khawvêl tharah chuan, mi felte chu an hlim ang a, mi suaksualte thiltih ṭha lo avângin an lungngai leh tawh ngai lo vang.—Sâm 37:17.

10. Khawngaihna tih awmzia chu eng nge ni?

¹⁰ “Mi khawngaih thei takte chu an eng a thâwl e, khawngaih an la hlawh dâwn si a.” (Matthaia 5:7) Mi khawngaih thei tak ni tûr chuan mi ngainat awm tak, ngilnei tak, leh hrehawm tuarte khawngaihna tih awmze nei lainatna nei tak kan nih a ngai a. Mahse, khawngaihnaah chuan rilru veina mai aia tam a tel a ni. Bible chuan mi khawngaihnaah chuan mi dangte ṭanpui tûra thiltihna a tel tih min zirtîr a ni.

11. Samari mi ṭha tehkhin thu chuan eng nge min zirtîr?

¹¹ Luka 10:30-37 chhiar rawh. Samari mi ṭha chungchânga Isua tehkhin thu chuan khawngaihna tih awmzia chu mawi takin a târ lang a. Samari mi chuan hrehawm tuarpa chu a lainat a, a khawngaih êm avângin ṭanpui a duh a ni. Isua’n chu tehkhin thu a sawi hnuah: “Nang pawh chu ang bawk chuan va ti ve rawh,” a ti a. Chuvângin, heti hian kan inzâwt thei a ni: ‘Chutiang chuan ka ti ve em? Samari mi ṭha tih angin ka ti ve em? Mite’n hrehawm an tawrh hunah ṭanpui tûrin engemaw ka tihsak thei em? tiin. Entîr nân, kohhrana kum upa te, hmeithai te, leh Jehova rawngbâwl lo nu leh pa nei naupangte chu ka ṭanpui thei em? Anmahni thlamuan tûrin ‘rilru tête chu ka fuih’ thei ang em?—1 Thessalonika 5:14; Jakoba 1:27.

12. Khawngaihna kan lantîr hian engvângin nge kan hlim?

¹² Mi khawngaih thei tak kan nih hian engvângin nge kan hlim? Mi dangte kan khawngaih hian, thilte kan pe a, chutianga thilpêkna chuan hlimna min neihtîr tih Isua’n a sawi. A chhan dang leh chu Jehova kan tilawm tih kan hria hi a ni. (Tirhkohte 20:35; Hebrai 13:16 chhiar rawh.) Lal Davida’n khawngaihna lantîrtu chungchâng chu: “LALPAN ani chu humhimin a tinung ang a, leiah hian malsâwmin a awm ang,” tiin a sawi a. (Sâm 41:1, 2) Mi dang chunga khawngaihna leh lainatna kan lantîr chuan Jehova khawngaihna kan dawng ang a, chatuanin kan hlim thei ang.—Jakoba 2:13.

“THINLUNGA THIANGHLIMTE” AN HLIM CHHAN

13, 14. Engvângin nge ‘thinlunga thianghlim’ chu a pawimawh?

¹³ Isua chuan: “Thinlunga thianghlimte chu an eng a thâwl e; Pathian an la hmu dâwn si a,” tiin a sawi a. (Matthaia 5:8) Thinlung thianghlim nei tûr chuan, kan ngaihtuahnate leh châknate chu kan vawn thianghlim reng a ngai a ni. Kan biakna Jehova pawm tlâk a nih chu thil pawimawh tak a ni.—2 Korinth 4:2 chhiar rawh; 1 Timothea 1:5.

¹⁴ Thinlung thianghlim neitute chuan “An puan su faite chu an eng a thâwl e,” tia sawitu Jehova nên inlaichînna ṭha an nei thei a. (Thu Puan 22:14 C.L. Re-edited.) “An puan su faite” tih awmzia chu eng nge ni? Hriak thih Kristiante tân chuan, Jehova’n anni chu thianghlim nia a thlîr avângin vânah thih theih loh nun a pein, chatuanin hlimna an chen ang tihna a ni a. Leia nun beiseina nei mipui nasa tak tân chuan, Jehova’n anni chu mi felte nia a thlîr avângin a ṭhiante niin a pawm tihna a ni. Bible chuan “an puante Berâm No thisena suin an tivâr ta a,” tiin a sawi.—Thu Puan 7:9, 13, 14.

15, 16. Engtin nge thinlung thianghlimte chuan ‘Pathian an hmuh’ theih?

¹⁵ Jehova chuan: “Mi hmua nung reng thei tumah rêng rêng an awm si lo va,” tiin a sawi a. (Exodus 33:20) A nih leh, engtin nge thinlung thianghlimte chuan ‘Pathian an hmuh’ theih? “Hmu” tia lehlin Grik thu mal hian mitthla, hre thiam, leh hria tih awmzia a nei thei a. Chuvângin, ‘Pathian hmu’ tih awmzia chuan eng ang Pathian nge a nih tih hriatthiamna leh a miziate ngainatna a kâwk a ni. (Ephesi 1:18) Isua chuan Pathian miziate chu sawisêlbova a entawn avângin, “Tupawh mi hmu chu Pa hmu a ni,” tiin a sawi thei a ni.—Johana 14:7-9.

¹⁶ Chu bâkah, kan nuna Pathian min ṭanpui dânte kan hmuh hian ‘Pathian hmu’ kan ni a. (Joba 42:5) Thinlung thianghlim taka awm a, rinawm taka a rawngbâwltute hnêna Jehova thutiam ropui takte chu kan “hmu,” emaw, kan ngaihven tlat emaw thei bawk. Hriak thihte chuan an thawh leh hnua vâna an kal hunah Jehova chu a takin an hmu tawh ang.—1 Johana 3:2.

BUAINA NEI CHUNG PAWHIN KAN HLIM THEI

17. Engvângin nge remna siamtute chu an hlim?

¹⁷ Isua chuan: “Remna siamtute chu an eng a thâwl e,” tiin a sawi leh a. (Matthaia 5:9) Mi dangte nêna remna siam tûra hma latu kan nih hian, kan hlim thei a. Zirtîr Jakoba chuan: “Felna rah chu remna siamtute tân remnain tuh a ni,” tiin a ziak a. (Jakoba 3:18) Chuvângin, kohhranah leh chhûngkuaa tuemaw nên in inrem vak lo a nih chuan, remna siamtu ni tûrin Jehova hnênah dîl ang che. Tichuan, Jehova’n a thlarau thianghlim a pe che ang a, chu chuan Kristian mizia lantîr tûrin a ṭanpui chein, i hlim lehzual ang. Isua chuan remna siam a pawimawhzia heti hian a sawi a ni: “Chutichuan, maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thilpêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tiin.—Matthaia 5:23, 24.

18, 19. Engvângin nge Kristiante chu tihduhdah an ni chung pawha an hlim theih?

¹⁸ “Miin keimah avânga an hau che u a, an tihduhdah che u a, dâwta sual tinrênga an hêk hunah che u, in eng a la thâwl ang.” Isua sawi tum chu eng nge ni? “Lâwm ulangin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha,” tiin a sawi belh a. (Matthaia 5:11, 12) Tirhkohte chu vuak an nih a, thu hril tawh lo tûra tih an nih khân, “rorêltute zîng ata an kal chhuak a, . . . an lâwm hle a.” Ni e, vuak an nih avânga hlim an ni lo va. Isua hming avânga “mualpho tuar tlâka ruat an nih avângin” an hlim a ni.—Tirhkohte 5:41.

¹⁹ Tûn laia Jehova mite pawh Isua hming avânga tihduhdah an nih hian hlim takin an tuar a. (Jakoba 1:2-4 chhiar rawh.) Tirhkohte ang bawkin, keini pawh hrehawm tawrh vâng leh tihduhdah kan nih avânga hlim kan ni lo. Mahse, Jehova chunga kan rinawm tlat chuan, tuar chhuak thei tûrin kan mamawh huaisenna min pe ang. Henryk Dornik-a leh a unaupa thiltawn hi han ngaihtuah teh. Kum 1944, August thalah, concentration camp-a thawn an ni a. Anmahni tiduhdahtute chuan: “Anni hi thil ti tûra hmin theih an ni lo. Martar-a an thih ngamna chuan a tihlim a ni,” tiin an sawi. Henryk-a chuan: “Martar-a thih chu ka duh lo ngei mai; mahse, Jehova chunga ka rinawmna avânga huaisen tak leh zahawm taka hrehawm ka tawrhna chuan min tihlim a ni,” tiin a sawi. “Tih tak zeta ṭawngṭaina chuan Jehova min hnaihtîr lehzual a, ani chu ka tân Ṭanpuitu rinawm a ni,” tiin a sawi belh bawk.

20. Engvângin nge “Pathian hlim” rawng kan bâwl avânga kan hlim?

²⁰ “Pathian hlim,” Jehova lawm hlawh kan nih hian, tihduhdahna te, chhûngkua aṭanga dodâlna te, dam lohna te, leh kum upatnate kan tâwk chung pawhin kan hlim thei a ni. (1 Timothea 1:10-11) Pathian “dâwt sawi thei lova” chuan thil ṭha tam tak min tiam avângin kan hlim thei bawk. (Tita 1:1-2) Jehova’n a thutiamte a hlen hunah, tûna kan hmachhawn harsatnate chu kan theihnghilh tawh ang. Dik tak chuan, Paradis-a nun nawm dân tûr leh kan hlim dân tûr chu ngaihtuah phâk bâk a ni! Ni e, ‘remna chênin kan hmuingîl ang.’—Sâm 37:11.