I Hmangaihna Chuan Eng Chen Nge A Huap?
“Nangmah i inhmangaih angin i vêngte pawh i hmangaih tûr a ni.”—MATTHAIA 22:39.
1. Jehova kan hmangaih chuan, engvângin nge vêngte pawh kan hmangaih ang?
THUPEK ropui ber chu eng nge ni tia zawh a nih khân, Isua chuan: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,” tiin a chhâng a. Tin, thupêk ropui ber nêna inang, thupêk a pahnihna chu heti hian a la chhuak a: “Nangmah i inhmangaih angin i vêngte pawh i hmangaih tûr a ni,” tiin. (Matthaia 22:37, 39) A ni, vêngte hmangaihna chu Kristian te chhinchhiahna a ni. Dik takin, Jehova kan hmangaih chuan kan vêngte pawh kan hmangaih tûr a ni. Engvângin nge? Pathian kan hmangaihna chu a Thu zâwmin kan lantîr a, a Thu chuan vêngte hmangaih tûra min tih avângin. Chuvângin, kan unaute kan hmangaih loh chuan, Pathian kan hmangaihna chu a tak tak a ni thei lo.—Rom 13:8; 1 Johana 2:5; 4:20, 21.
2. Eng ang hmangaihna nge kan vêngte lakah kan neih ang?
2 Isua’n vêngte hmangaih tûr thu a sawi khân, anni nêna inṭhianṭhatna mai a sawi a ni lo. Tin, chhûngkuaa awm inhmangaihna ang emaw, mipa leh hmeichhe inkâra awm inhmangaihna ang emaw chu a sawi lo bawk. Jehova’n a chhiahhlawh inpumpêkte a hmangaihna leh anni’n amah an hmangaihna ang a sawi zâwk a ni. (Johana 17:26; 1 Johana 4:11, 19) Juda lehkhaziaktute zînga pakhat—Isua’n fing takin a chhâng nia a hriata—chuan Pathian chu “thinlung zawng zawnga, hriatna zawng zawnga, chakna zawng zawnga hmangaih” tûr a ni tiin Isua chu a thlâwp a. (Marka 12:28-34) A sawi dik ngei mai. Kristianin a neih Pathian hmangaihna leh vêngte hmangaihnaah chuan thinlunga veina leh rilru ngaihtuahna a tel a ni. Chu chu thinlungin a vei a, rilru-in a kaihruai a ni.
3. (a) “Dân hretu” chu a vêngte a thlîr dân tizau tûrin engtin nge a zirtîr? (b) Isua tehkhin thu chu tûn laia Kristiante tân eng anga hman nge ni?
3 Luka lo ziak ang chuan, Isua’n kan vêngte hmangaih tûr a tih khân, “dân hretu tu emaw” chuan: “Ka vêngte chu tunge ni?” tiin a zâwt a. Isua’n thawnthu tâwi hmangin a chhâng a ni. Pa pakhat chu vuak hrep a ni a, a thil neihte rawksak leh thi lek leka kalsan a ni. Tin, puithiam pakhat leh Levia mi pakhatin an kalpêl a, tuman an ngaihsak lo va. Tichuan, Samari mi a lo kal a, hliam tuara chu a hmuh chuan zahngai takin a ṭanpui a ni. Chûng mi pathumte zîngah tu ber nge hliam tuarpa tân ṭhenawm ṭha ni ta? Chhân kher a ngai lo vang. (Luka 10:25-37) Isua’n Samari mi chu puithiam leh Levia mi aiin ṭhenawm ṭha zâwk an ni thei tih a sawi chuan dân hretu chuan mak a ti hle ngei ang. Isua chuan a huap zau zâwka a vêngte hmangaih thei tûrin chu pa chu a ṭanpui tih a chiang hle a ni. Kristiante pawhin chutiang hmangaihna chu an nei a. An hmangaihna dawngtute zînga tel zawng zawng han ngaihtuah teh.
Chhûngkaw Zînga Hmangaihna
4. Kristianin khawi hmunah nge hmangaihna an lantîr ṭan?
4 Kristiante chuan an chhûngkaw zînga mite chu an hmangaih a—nupuite’n an pasalte an hmangaih a, pasalte’n an nupuite an hmangaih bawk a, nu leh pate chuan an fate an hmangaih bawk a ni. (Thuhriltu 9:9; Ephesi 5:33; Tita 2:3-5) Chhûngkaw zînga mite hmangaihna chu chhûngkaw tinah a awm ngei mai. Amaherawhchu, nupa inṭhenna chanchinte, kawppuite chunga kut inthlâkna chanchinte, leh naupang ngaihthah leh chhawr khawloh chanchinte chuan tûn laiah chhûngkua chu lungngaihnain a tlâkbuak a ni tih a târ lang a, chhûngkua khaikhâwm tûr chuan chhûngkaw inhmangaihna narân a tâwk lo tih a târ lang bawk a ni. (2 Timothea 3:1-3) An chhûngkaw nun tihlawhtling tak zet tûr chuan, Kristiante chuan Jehova leh Isua neih ang hmangaihna an neih a ngai a ni.—Ephesi 5:21-27.
5. An fate enkawlna kawngah nu leh pate chuan tu ṭanpuina nge an beisei a, chu chuan mi tam tak tân eng rah nge a chhuah?
5 Kristian nu leh pate chuan an fate chu Jehova kawltîr angah ngaiin, anmahni enkawlna kawngah pawh a ṭanpuina an beisei a ni. (Sâm 127:3-5; Thufingte 22:6) Heti hian Kristian hmangaihna an chhawmnung a, chu chuan naupangte tichhe thei tûr thil ṭha lote lak ata an fate vênghim tûrin a ṭanpui a ni. Chuvângin, Netherland rama nu pakhat tawn ang hlimna chu Kristian nu leh pa tam takte chuan an tawng a ni. Ni kuma Netherland rama baptisma chang mi 575-te zînga tel, a fapa baptisma chan lai a thlîr hnu chuan, chu nu chuan heti hian a ziak a ni: “Tûnah chiah chuan, kum 20 kalta chhûnga ka thawhrimna zawng zawng chu rulh a ni ta. Rilru natna te, thawhrimna te, leh lungngaihna te tiamin, hun leh tha ka khawhral zawng zawngte chu theihnghilh a ni ta,” tiin. A fapa-in ama duh thlanna ngeia Jehova rawngbâwl a tum avângin a hlim hle a ni. Ni kuma Netherland rama thuchhuahtu tam lai ber chuan 31,089 an awm a, an zîngah chuan an nu leh pate hnên aṭanga Jehova hmangaih dân zir tam tak an tel a ni.
6. Engtin nge Kristian hmangaihna chuan nupate inpumkhatna a tihngheh?
6 Paula chuan hmangaihna chu “phuar famkimna” tiin a ko va, chu chuan hun harsa tak kârah pawh nupate chu a inpumkhattîr thei a ni. (Kolossa 3:14, 18, 19; 1 Petera 3:1-7) Tahiti ram aṭanga kilometer 700 vêla hlaa awm, Rurutu thliarkâra pa pakhat chuan Jehova Thuhretute nêna Bible a zir ṭan chuan, a nupui chuan nasa takin a dodâl a. A tâwp a tâwpah chuan, a fate hruaiin Tahiti-a khawsa tûrin a chhuahsan a ni. Chutichung pawhin, pawisate thawn zat zatin leh amah leh a fate’n mamawh an neih leh neih loh phone hmangin a be ṭhîn a. Hetiang hian a Kristian mawhphurhna chu hlenchhuak tûrin theihtâwp a chhuah a ni. (1 Timothea 5:8) An chhûngkua inzawmkhâwm leh theih nân a ṭawngṭai fan fan a, a tâwpah chuan a nupui chu a lo kîr leh a. Tichuan, ‘hmangaihna te, dawhtheihna te, thuhnuairawlhna tein’ a cheibâwl a ni. (1 Timothea 6:11) Kum 1998-ah baptisma a chang a; a hnua a nupuiin Bible zir ve a duh tâkah chuan hlim namênin a hlim ta lo a ni. Chu a Bible zirna chu ni kuma Tahiti branch enkawlna hnuaia Bible zirna 1,351 neihte zîngah a tel ta a ni.
7. German rama pa pakhat sawi dânin engin nge an inneihna chu tinghet lehzual?
7 German rama pa pakhat chuan a nupui chu Bible thutak ngaihven a khap tlat a; Jehova Thuhretute’n a nupui chu an bum duhah a ngai nghet tlat a ni. Nakinah chuan a nupui va tlawh hmasa bertu Thuhretu hnênah heti hian lehkha a thawn a ni: “Ka nupui chu Jehova Thuhretute i hmêlhriattîr avângin ka lâwm e. Atîr chuan, an chanchin ṭha lo tak tak ka dawn ṭhin avângin ka lungngai a. Mahse, tûnah chuan an inkhâwmnaa ka kal hian ka lo ngaihsualzia ka hre tawh a. Ka thu hriatte chu thutak a ni tih ka hria a, chu chuan kan inneihna chu a tinghet zual a ni,” tiin. German rama Jehova Thuhretute mi 162,932 leh Tahiti branch enkawlna hnuaia mi 1,773-te zîngah chuan Pathian hmangaihnaa inphuarkhâwm chhûngkaw tam tak an tel a ni.
Kan Kristian Unaute Hmangaihna
8, 9. (a) Kan unaute hmangaih tûrin tuin nge min zirtîr a, hmangaihna chuan eng ti tûrin nge min chêttîr? (b) Hmangaihnain inṭanpui tawn tûra unaute a ṭanpuizia entîrna han pe teh.
8 Paula chuan Thessalonika Kristiante hnênah chuan: “Inhmangaih tawn tûrin nangmahni ngei Pathian zirtîrin inawm si a,” a ti a. (1 Thessalonika 4:9) Ni e, ‘LALPA zirtîrte’ chu an inhmangaih tawn a ni. (Isaia 54:13) An hmangaihna chu thiltiha lantîr a ni, Paula’n: “Hmangaihnain rawng inbâwlsak tawh ṭheuh . . . rawh u,” a tih thu hmanga a târ lan ang khân. (Galatia 5:13; 1 Johana 3:18) Unau dam lote an kan hian, lungngaite an fuih hian, leh chak lote an ṭanpui hian chu chu an ti a ni. (1 Thessalonika 5:14) Kan Kristian inhmangaihna dik tak chuan thlarau lam paradis a ṭhanlentîr a ni.
9 Ecuador rama kohhran 544 awmte zînga pakhat Ancón Kohhranah chuan unaute chuan an inhmangaihna chu thiltihin an lantîr a. Sum leh pai lama harsatna chuan hnathawh tûr leh sum lâk luhna nei lovin a siam hlawm a. Chuvângin, thuchhuahtute chuan zan khuaa sangha man tûra chhuak, sangha mantute lo haw lama an ei tûr chaw lo zawrh an tum a ni. Naupangte thlengin an thawkho dial dial a. Sangha mantute lo haw hun, zîng lam dâr 4:00-a lo peih hman tûrin zân dâr 1:00-ah ei rawng an bâwl ṭan a. Sum an lâkluhte chu an mamawh dân azirin an insem zêl a ni. Chutiang inṭanpui tawnna chuan Kristian hmangaihna dik tak a tilang a ni.
10, 11. Mi mala kan hriat loh unaute kan hmangaihzia engtin nge kan lantîr theih?
10 Amaherawhchu, kan hmangaihna chuan mi mala kan hriat unaute mai a huap lo. Tirhkoh Petera chuan: “Unauhote chu hmangaih rawh u,” a ti a. (1 Petera 2:17) Pathian Jehova chibai kan bûkpuite an nih avângin, kan unau zawng zawngte chu kan hmangaih a ni. Mangan nî khuate hi kan hmangaihna lantîr theihna hun remchâng a ni hlauh thei a ni. Entîr nân, kum 2000 rawngbâwl kum chhûng chuan, Mozambique ramah tui nasa takin a lian a; tin, Angola ramah tual râl a awm reng a, mi tam takin an retheih phah a ni. Mozambique rama unau tam tak 31,725-te leh Angola rama unau 41,222-te chuan chûng harsatnate chu an tuar a. Chuvângin, an ram ṭhenawm South Africa ram chuan an uanute manganna chhâwkzângkhai nân mamawh châkkhai tam tak an thawn a ni. An thil “neih” an unau mamawhte tâna an pêk duhna chuan an hmangaihna a lantîr a ni.—2 Korinth 8:8, 13-15, 24.
11 Ram rethei zâwka unaute tâna Kingdom Hall leh Assembly Hall-te sak nâna thawhlâwm an thawhnaah hmangaihna hmuh theih a ni bawk. Entîrna pakhat chu Solomon Thliarkâra thil thleng hi a ni. Ram chhûng buaina nasa tak kârah pawh Solomon Thliarkâr ram chu thuchhuahtu zâ zêlah 6-in an pung a, an tam ber ṭum chuan 1,697 an ni. Assembly Hall sak an tum a ni. Chu thliarkâra awm tam takte chuan ram buaina avângin an ram tlânchhiatsan mah se, in sakna ṭanpui tûrin Australia aṭangin inpumpêka hnathawkho an lo kal a. A tâwpah chuan ram chu an chhuahsan ngai mah se, tualchhûng unaute chu a lungphûm siam dân an zirtîr hman a ni. Chuktuah mai theih tûra ruangâm siamsa hall chu Australia aṭanga thawn luh a ni a, in tam tak kalbosan a nih laia Pathian chibai bûkna tûr in ṭha tak sak zawhna chu, Jehova hming leh uanute inhmangaihna hriattîrtu ṭha tak a ni ngei ang.
Pathian Angin Khawvêl Kan Hmangaih
12. Kan rinna min ṭâwmpui lote chunga kan rilru put hmangah engtin nge Jehova kan entawn?
12 Kan hmangaihna chuan kan chhûngte leh kan unauhote chauh a huap em ni? “Pathian awm dân latute” kan nih chuan an ni chauh a huap tûr a ni lo. Isua chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” a ti a. (Ephesi 5:1; Johana 3:16) Pathian Jehova angin, mi tinte chungah—kan rinna min ṭâwmpui lote chungah pawh—hmangaihna kan lantîr a ni. (Luka 6:35, 36; Galatia 6:10) He mi avâng tak hian, Ram chanchin ṭha chu kan puang a, an tâna Pathian hmangaihna thiltih ropui tak chu kan hriattîr a ni. Chu chuan a ngaithlatute chu a chhandam thei a ni.—Marka 13:10; 1 Timothea 4:16.
13, 14. Harsa leh hrehawm tak kâra Thuhretu ni lote chunga hmangaihna lantîr unaute thiltawn ṭhenkhat chu eng nge ni?
13 Nepal rama special pioneer palite chanchin hi han ngaihtuah teh. Anni chu an ram chhimthlang lama khawpui pakhata rawngbâwl tûra dah an ni a, kum nga chhûng chu khawpui chhûng leh a bula thingtlâng khuaahte thu hrilin an hmangaihna chu an lantîr a ni. An rawngbâwlna bial tlawh chhuah nân, ni sa tak, 40 degree Celsius aia sâng hnuaiah dâr kâr tam tak chhûng thîrsakawra an kal a ngai a. An hmangaihna leh ‘thil ṭha an tih fan fanna’ chuan rah ṭha a chhuah a, thingtlâng khaw pakhatah book study group din a ni ta hial a ni. (Rom 2:7) Kum 2000 March thlaah chuan bial kantu vântlâng thusawi ngaithla tûrin mi 32 lai an lo kalkhâwm a ni. Nikuma thuchhuahtu tam lai ber khân Nepal ramah thuchhuahtu 430 an awm a, zâ zêla 9-in an pung tihna a ni. Chu rama unaute ṭhahnemngaihna leh hmangaihna chu Jehova’n mal a sâwm a ni tih a chiang hle.
14 Colombia rama rei lo tê chhûng special pioneer thawkte chu Wayuu Indian-ho laka thu hril tûrin an kal a. Chutianga an tih theih nân, ṭawng thar an zir a ngai a; mahse, ruahpui vânâwn hnuaiah pawh vântlâng thusawi ngaithla tûrin mi 27 an lo kal khâwm a. An hmangaihna chu malsâwm a ni tak zet a ni. He mite lantîr ang hmangaihna avânga ṭhahnemngaihna chuan Colombia ramah thuchhuahtu zâ zêlah 5-in a puntîr a, an tam lai ber ṭum chuan thuchhuahtu 107,613 an awm a ni. Denmark rama uanunu tar lam tawh chuan mi dangte hnêna chanchin ṭha hril chu a duh a; mahse, rualban lo a ni si. Lunghnual mai lovin, tuina nei mite chu lehkha thawn hmangin a kâwm a. Tûnah tak chuan mi 42 nên lehkha an inthawn mêk a, Bible zirpui mi 11 a nei a ni. Ani chu ni kuma Denmark rama thuchhuahtu tam lai bera thuchhuahtu awm zât 14,885 zîngah a tel a ni.
I Hmêlmate Hmangaih Rawh
15, 16. (a) Kan hmangaihna chu engti fakauva huap zau tûrin nge Isua’n a tih? (b) Mawhphurhna nei unaute chuan Jehova Thuhretute dik lo taka puhtu chu hmangaih takin engtin nge an dâwr?
15 Dân hretu hnênah Samari mite pawh ṭhenawm anga ngaihtheih an nihzia Isua’n a hrilh a. Tlâng chunga a Thusawinaah Isua chuan a sawi thui deuh hlek a: “‘I vêngte hmangaih la, i hmêlma haw rawh,’ an tih in hre tawh. Kei erawh chuan ka hrilh a che u, In hmêlmate chu hmangaih ula, a tiduhdahtu che u chu ṭawngṭaisak rawh u, in Pa vâna mi fate in nih theih nân,” tiin. (Matthaia 5:43-45) Dodâl kan nih hunah pawh “ṭhatnain sual chu ngam zâwk” kan tum ṭhîn. (Rom 12:19-21) A theih phawt chuan mi dodâltu hnênah kan rochan hlu ber, thutak chu kan hrilh a ni.
16 Ukraine rama Kremenchuk Herald chanchinbu chuan Jehova Thuhretute chu sakhaw hlauhawm takah a puh a. Chu chu thil sual tak a ni, Europe khawmualah ṭhenkhat chuan Thuhretute rawngbâwlna khuahkhirh nân emaw, khap nân emaw Jehova Thuhretute chanchin chu khatianga an sawi ṭhin avângin. Chuvângin chu chanchinbu editor chu a thu chhuah siamṭhatna chhuah tûra va tlawh a ni a. Rem ti mah se, a chhuah rualin a chanchin chhuah hmasa zâwk chu thutak bulfûk nei a ni tih a ziak tel ṭalh tho va. Chuvângin mawhphurhna la unaute chuan chanchin kimchang zâwk nên an va tlawh leh a. A tâwpah chuan, editor chuan a thuziak hmasa ber kha a sual a ni tih a hre ta a. A inhnuhdawh thu a ziak ta a ni. He thil chingfel tûra tlang tak leh zahngai taka va dâwr chu hmangaihna thiltih a ni a, rah ṭha a chhuah a ni.
Engtin Nge Hmangaihna Kan Neih Theih Ang?
17. Inhmangaih tawn reng a harsa dâwn tih engin nge târ lang?
17 Naupang chu a pian tirh aṭangin a nu leh pate chuan an hmangaih nghâl a. Mahse, puitlingsate hmangaih taka dâwr chu a theih nghâl ṭhîn lo. Chuvâng a ni ngei ang, Bible-in inhmangaih tawn tûra min hrilh fo chhan chu. Chu chu neih tuma kan thawh a ngai a ni. (1 Petera 1:22; 4:8; 1 Johana 3:11) Isua’n “vawi sarih hmun sawmsarih thlengin” in inngaidam tûr a ni a tih khân, kan inhmangaihna chu fiah a ni dâwn tih a hriat vâng a ni. (Matthaia 18:21, 22) Paula pawhin ‘indawh tawn’ tûrin min fuih bawk. (Kolossa 3:12, 13) “Hmangaihna hi ûm zêl ula,” tia fuih kan ni pawh hi a mak lo ve! (1 Korinth 14:1) Engtin nge kan tih theih?
18. Mi dangte hmangaihna nei tûrin engin nge min ṭanpui ang?
18 A hmasa berah chuan, Pathian Jehova kan hmangaihna kan ngaihtuah reng thei a ni. Chu hmangaihna chu vêngte hmangaih tûra min chêttîrtu chak tak a ni. Engvângin nge? Chutianga kan tih hian, chu chuan kan Pa vâna mi mizia a tilang a, fakna leh chawimawina a thlen a ni. (Johana 15:8-10; Philippi 1:9-11) A pahnihnaah chuan, Jehova thlîr dâna thil thlîr kan tum thei a ni. Thil sual kan tih apiangin, Jehova laka sual ti kan ni a; mahse, ani chuan min ngaidam ṭhînin, min hmangaih reng a ni. (Sâm 86:5; 103:2, 3; 1 Johana 1:9; 4:18) Jehova thlîr dân kan neih chuan, mi dangte hmangaih kan duh ang a, kan thinurna tûr an tih hunah pawh kan ngaidam ang. (Matthaia 6:12) A pathumnaah chuan, mi dangin min cheibâwl dân tûra kan duh angin, mi dangte kan cheibâwl thei a ni. (Matthaia 7:12) Ṭha famkim lo kan nih avângin, ngaihdamna kan mamawh fo va. Entîr nân, mi dang rilru natna tûr kan sawi palh châng hian, mi tinin an thusawiah thil an tisual ṭhîn tih an hriat kan beisei a ni. (Jakoba 3:2) Mi dangin ṭha taka min cheibâwl kan duh chuan anni chu ṭha takin kan cheibâwl ve tûr a ni.
19. Hmangaihna kan neih theih nân engtin nge thlarau thianghlim ṭanpuina kan zawn theih?
19 A palinaah chuan, thlarau thianghlim ṭanpuina kan zawng thei a ni, hmangaihna chu thlarau rahte zînga mi a ni si a. (Galatia 5:22, 23) Ṭhian inhmangaihna te, chhûngkua inhmangaihna te, leh mipa leh hmeichhe inkâra inhmangaihna te chu amahin a lo awm nghâl ṭhîn a. Mahse, phuar famkimna hmangaihna, Jehova neih ang hmangaihna nei tûr chuan, Jehova thlarauva ṭanpuina kan mamawh a ni. Thlarauva thâwk khum Bible chhiarin thlarau thianghlim ṭangpuina kan zawng thei a. Entîr nân, Krista nun kawng chanchin kan zir chuan, mite a dâwr dân kan hria ang a, amah entawn dân kan zir thei ang. (Johana 13:34, 35; 15:12) Chu bâkah, hmangaihna lantîr a harsatna dinhmunah Jehova thlarau thianghlim kan dîl thei a ni. (Luka 11:13) A tâwp berah chuan, Kristian kohhran kan bel tlatin hmangaihna kan ûm thei a ni. Hmangaihna nei unaute nêna awmhona chuan hmangaihna nei tûrin min ṭanpui a ni.—Thufingte 13:20.
20, 21. Kum 2000 rawngbâwl kum chhûng chuan, Jehova Thuhretute chuan hmangaihna lantîrna langsâr tak eng nge an siam?
20 Kum kalta khân, khawvêl pum puiah chanchin ṭha hriltu tam lai berin mi 6,035,564 an awm a. Jehova Thuhretute chuan chanchin ṭha hrilh theih tûr mi zawn chhuah nân dârkâr 1,171,270,425 an hmang a ni. A sûr a sa leh khaw vâwt hnuaia rawng an bâwl theih chhan chu hmangaihna vâng a ni. Hmangaihna avângin, school-a an ṭhiante, an hnathawhpuite leh, kawtthlêrah leh hmun dang dangah an hmêlhriat ngai lohte pawh an pan ṭhîn bawk. Thuhretute va tlawh mite zîngah a ṭhen chuan an lo ngaihsak lo va, a ṭhen chuan an lo dodâl a ni. Amaherawhchu, ṭhenkhat chuan tuina an lantîr a, chuvângin tlawhkîr 433,454,049 neih a ni a, Bible zirna 4,766,631 neih a ni.
21 Hêng zawng zawng hi Jehova Thuhretute’n an Pathian leh an vêngte an hmangaihzia tilangtu a va ni êm! Chu hmangaihna chu a dai ngai lo vang. Kum 2001 rawngbâwl kumah chuan mite hnêna thuhrilhna ropui zâwk a awm ang tih kan ring tlat a ni. Jehova malsâwmna chu ‘an tih apiang hmangaiha tih nihtîrtu’ a mi rinawm nghette leh ṭhahnemngaite hnênah awm reng rawh se.—1 Korinth 16:14. (w01 1/1)
I Hrilhfiah Thei Em?
• Kan vêngte kan hmangaih hian tu nge kan entawn?
• Kan hmangaihna chuan eng chen nge a huap dâwn?
• Kristian hmangaihna lantîr thiltawn ṭhenkhat chu eng nge ni?
• Kristian hmangaihna chu engtin nge kan neih theih ang?
[Phêk 15-naa milemte]
Kristian hmangaihna chuan chhûngkua a tipumkhat
[Phêk 17-naa milemte]
Hmangaihna chuan kan beiseina mi dangte hrilh tûrin min chêttîr