Ṭawngṭai Dân—Lal Ṭawngṭaina Hi Ṭawngṭai Dân Ṭha Ber A Ni Em?

Bible Chhânna

Lal Ṭawngṭaina hian kan ṭawngṭai dân tûr leh eng chungchângah nge kan ṭawngṭai ang tihah kaihhruaina min pe a. Hei hi Isua’n: “Lalpa, ṭawngṭai dân . . . min zirtîr ve ta che,” tia a zirtîrte ngenna chhân let nâna a pêk a ni. (Luka 11:1) Mahse, Lal Ṭawngṭaina, a nih loh leh Lal Biakna hi Pathian pawm zâwng ṭawngṭaina awmchhun a ni lo.a Chu aiin, Isua’n Pathian pawm zâwnga ṭawngṭai theih dân entîrna angin a pe zâwk a ni.

He thuziakah hian hêngte hi a tel

• Lal Ṭawngṭainaah eng thute nge tel?

• Lal Ṭawngṭaina awmzia chu eng nge ni?

• Lal Ṭawngṭaina hi ṭawngṭai theih dân awmchhun a ni em?

• Engtin nge kan ṭawngṭai ang?

• Bible-a chuang ṭawngṭaina dangte

Lal Ṭawngṭainaah eng thute nge tel?

Matthaia 6:9-13-a chhinchhiah Lal Ṭawngṭaina hi Bible lehlin hrang hrangah a thute a inang lo va. Hei hi entîrna pahnih a ni.

New World Translation: “Kan Pa vâna mi, i hming tihthianghlim ni rawh se. I Lalram lo thleng rawh se. I duh zâwng vâna an tih angin, leia min ti rawh se. Vawiinah hian kan ei khawpin chaw min pe ang che; kan batte hi min ngaidam ang che, keini pawhin kan englo bâte kan ngaihdam tâk ang khân. Sual tûra thlêmnaah min hruai lût suh la, mi sual lakah chuan min chhandam zâwk ang che.”

Mizo King James Bible: “Kan Pa, vân ami, i hming zahawm rawh se. I lalram lo thleng rawh se. I duhzâwng vâna an tih angin leia miten ti rawh se. Vawiinah kan ni tin châw mi pê ang che. Kan leibâte kan ngaihdam angin, nang pawhin kan leibatte min ngaidam ang che. Sual tûra thlêmnaah min hruai lût suh ang che, misual lakah chuan min chhandam zâwk ang che.”b

Lal Ṭawngṭaina awmzia chu eng nge ni?

Isua zirtîrnate chu Bible bu pumpui nên a inmil avângin Bible-a thu dangte pawhin Lal Ṭawngṭaina awmzia hre thiam tûrin min ṭanpui ang tih kan beisei thei a ni.

“Kan Pa vâna mi”

Pathian chu “kan Pa” tia koh a inâwm hle a, a chhan chu min siamtu leh nunna min petu a nih vâng a ni.—Isaia 64:8.

“I hming tihthianghlim ni rawh se”

Pathian hming, Jehova chu chawimawi tûr leh thianghlim taka cheibâwl tûr a ni a. Mihringte’n a miziate an sawi a, a thiltumte an hriattîr hian Pathian hming tihthianghlimnaah an ṭanpui a ni.—Sâm 83:18; Isaia 6:3.

“I Ram lo thleng rawh se”

Pathian Ram chu vân sawrkâr a ni a, a Lal chu Isua a ni. Isua chuan he sawrkârin lei pumpui awp tûra dîl tûrin min zirtîr a ni.—Daniela 2:44; Thu Puan 11:15.

“I duh zâwng vâna an tih angin, leia min ti rawh se”

Vânah sual leh thihna a awm loh angin, lei atâna Pathian duh zâwng chu mihringte’n remna leh himna chêna chatuana an nun hi a ni.—Sâm 37:11, 29.

“Vawiinah hian kan ei khawpin chaw min pe ang che”

Isua hun laiin chaw, a nih loh leh chhang chu ei tûr pawimawh tak a ni a. Kan nun theih nâna kan mamawhte min pe tûrin min Siamtu kan rinchhan tih kan hre reng tûr a ni.—Tirhkohte 17:24, 25.

“Kan batte hi min ngaidam ang che, keini pawhin kan englo bâte kan ngaihdam tâk ang khân”

Helai thu-ah hian “batte” tih thu mal hi sualte sawina thu mal dang a ni a. (Luka 11:4) Mi zawng zawng hi sual nei leh ngaihdam ngai vek an ni a. Chuvângin, Pathian ngaihdamna dawn kan duh chuan mi dangte chu kan chunga an thiltih sual ngaihdam kan inhuam tûr a ni.—Matthaia 6:14, 15.

“Sual tûra thlêmnaah min hruai lût suh la, mi sual lakah chuan min chhandam zâwk ang che”

Pathian Jehova chuan thil sual ti tûrin min thlêm ngai lo. (Jakoba 1:13) Mahse, “mi sual,” Diabol-Setana—“Thlêmtu” tia koh—chuan min thlêm ṭhîn a. (1 Johana 5:19; Matthaia 4:1-4) Chuvângin, a thuâwih lo tûra thlêma kan awm huna kan tlâwm lohna tûrin Jehova hnênah kan ngên a ni.

Lal Ṭawngṭaina hi ṭawngṭai theih dân awmchhun a ni em?

Lal Ṭawngṭaina hi entîrna atâna Isua pêk a ni a. A ngai ngaia chham nawn tûr a ni lo. Isua chuan Lal Ṭawngṭaina a zirtîr hma lawkin: “Tin, in ṭawngṭaiin, . . . sawi nawn mai mai suh u,” tiin a vaukhân a. (Matthaia 6:7) Dinhmun dangah entawn tûr ṭawngṭaina a pêk khân ṭawngkauchheh dang a hmang a ni.—Luka 11:2-4.

Ṭawngṭai dân kawng ṭha ber chu Pathian hnênah kan ngaihtuahna leh rilru vei zawngte tih tak zeta hrilh hi a ni.—Sâm 62:8.

Engtin nge kan ṭawngṭai ang?

Lal Ṭawngṭaina chuan Pathian ngaihthlâk zâwnga ṭawngṭai dân entawn tûr ṭha tak a pe a. Chu chu Bible châng dangte nêna a inrem dân hi chhinchhiah ang che.

• Pathian hnênah chauh ṭawngṭai rawh

  Bible châng: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se.”—Philippi 4:6.

  A awmzia: Kan ṭawngṭainate chu Pathian hnênah a ni tûr a ni—Isua, Mari, a nih loh leh mi thianghlimte hnênah ni lovin. Lal Ṭawngṭaina chu “Kan Pa” tia ṭan a ni a, chu chuan Pathian Jehova hnênah chauh kan ṭawngṭai tûr a ni tih min zirtîr a ni.

• Pathian duh zâwng nêna inmilin ṭawngṭai rawh

  Bible châng: “Eng pawh a duh zâwng anga kan dîl chuan anin min ngaihthlâksak ṭhin hi.”—1 Johana 5:14.

  A awmzia: Pathian duh zâwng nêna inmil eng pawh kan ṭawngṭainaah kan telh thei a. Isua chuan Lal Ṭawngṭainaah “i duh zawng . . . angin . . . ti rawh se,” tia sawiin Pathian duh zâwng a pawimawhzia min zirtîr a. Bible zirna hmangin lei leh mihringte tâna Pathian duh zâwng chu kan zir thei a ni.

• Mi mal lungkhamna chungchângah ṭawngṭai rawh

  Bible châng: “I rit phurh chu LALPA chungah nghat la, tichuan anin a tichak ang che.”—Sâm 55:22.

  A awmzia: Pathianin kan thil veite chu a ngaihsak a. Isua’n Lal Ṭawngṭainaah mi mal ngenna chi hrang hrang a telh ang khân, kan nî tin tisa lam mamawh atân te, thu tlûkna pawimawh tak siam huna kaihhruaina min pe tûr te, harsatna tawh huna min ṭanpui tûr te, leh kan sualte min ngaidam tûr tein kan ṭawngṭai thei a ni.c