Pathian Ram Chu Tûnah Thlâwp Rawh!
I awmna hmunah thlipui na tak a tleh dâwn angah han mitthla teh. Sawrkâr chuan: “TLAN CHHUAK RAWH U! TUNAH INHUMHIMNA ZAWNG RAWH U!” tiin vaukhânna thu pawimawh tak a puang a. Eng nge ti ila finthlâk ang? Hmun him lama insawn chu a pawimawh ber ngei ang.
Chutiang bawkin, kan za hian Isua’n “hrehawm nasa tak” tia a sawi “thlipui” na tak tlehna tûr kawngah kan awm a. (Matthaia 24:21) Chu hrehawm nasa tak chu pumpelh theih a ni lo. Mahse, mahni invênhim nân thil engemaw kan ti thei a ni. Chu chu eng nge ni?
Tlâng Chunga a Thusawiah, Isua Krista chuan he kaihhruaina hi a pe a ni: “A [Pathian] ram leh a felna chu zawng hmasa zâwk rawh u,” tiin. (Matthaia 6:33) Chu chu engtin nge kan tih theih?
Pathian Ram chu zawng hmasa rawh. Pathian Ram chu thil dang zawng aiin kan ngai pawimawh zâwk tûr tihna a ni. (Matthaia 6:25, 32, 33) Engvângin nge chutianga kan tih a ngaih? Mihringte hian kan hmachhawn buainate an chinfel theih loh vâng a ni. Pathian Ram chauhvin chu thil harsa tak chu a chingfel thei a ni.
A felna chu zawng rawh. Theih tâwp chhuahin Pathian dân fel leh thu bulte mila nun kan tum tûr a ni. Engvângin nge? Thil dik leh dik lo chungchânga mahnia thu tlûkna kan insiam chuan sawhkhâwk ṭha lo tak a chhuah dâwn vâng a ni. (Thufingte 16:25) Kawng leh lamah chuan, Pathian tehnate mila kan nun chuan, Pathian kan tilâwm mai ni lovin, mahni ngei pawhin hlâwkna kan hmu ang.—Isaia 48:17, 18.
Pathian Ram leh a felna chu zawng hmasa rawh. Isua chuan mi ṭhenkhatin sum tam tak an nei a nih chuan an him ang tia ngaiin an rilru an kal pêntîr mai thei tih a vaukhân lâwk a. Mi dangte erawh chu an nî tin nuna buainate chinfel tuma an hun leh thate sêngin Pathian Ram zawn nâna hun pe thei lo khawpin an buai hle thei bawk.—Matthaia 6:19-21, 25-32.
Mahse, Isua chuan Pathian Ram zawngtute’n tûna an mamawhte chu an nei dâwn tih leh nakin huna malsâwmna tâwp nei lo pawh an hmu ang tih a tiam a ni.—Matthaia 6:33.
Kum zabi khatnaa Isua zirtîrte’n Pathian Ram leh a felna an zawng hmasa chung pawhin, an hun laiin natna leh hrehawmna zawng zawng tâwpna chu an hmu lo va. Mahse, humhimin an awm a ni. Engtin nge?
Anni chu Pathian tehna fel milin an nung a, chu chuan Pathian thusawi ngaihthahtute tawrh harsatnate lakah a vênghim a ni. Pathian Ram a lo thleng dâwn tih an rin tlatna chuan buaina khirh ber berte pawh hmachhawn tûrin a ṭanpui a. Chu bâkah, Pathianin chûng harsatnate hmachhawn thei tûrin ‘thiltihtheihna nasa tak’ a pe bawk.—2 Korinth 4:7-9.
PATHIAN RAM I ZAWNG HMASA ANG EM?
Kum zabi khatnaa Kristiante chuan Pathian Ram zawng hmasa tûra thupêk chu an zâwm a. Ram chanchin ṭha chu an hun laia hmun tinah an hril a ni. (Kolossa 1:23) Tûn laiah, chutianga ti an awm em?
Awm e! Jehova Thuhretute chuan Pathian Ramin he khawvêl suaksual tak a tihboral hma hian hun tlêm tê chauh a awm tawh tih an hria a. Chuvângin, Isua thusawi anga nun chu an tum tlat a ni, Isua chuan: “He Ram chanchin ṭha hi hnam zawng zawng hriattîrna tûrin khawvêl zawng zawngah hrilin a awm ang a; chumi zawhah chuan tâwpna chu a lo thleng ang,” tiin a sawi.—Matthaia 24:14.
Engtin nge ram chanchin ṭha chu i chhân lêt ang? Kum zabi khatnaa Makedonia ram Beroia khuaa mite chu entawn tûrin kan fuih che a ni. Tirhkoh Paula hnên aṭanga ram chanchin ṭha an hriat chuan, a thuchah ken chu “rilru lâwm takin” an pawm a. Chumi hnuah, an thu hriatte chu a dik leh dik loh hriat nân “Pathian Lehkhaah an zawng ṭhîn a,” tichuan, an thu hriatte chu an nunpui a ni.—Tirhkohte 17:11, 12.
Nang pawhin, chutiang chuan i ti ve thei. Pathian Ram leh a felna chu zawng hmasain, tûnah ngei pawh inhumhimna i hmu ang a, nakinah remna leh muanna tluantling i hmu bawk ang.